San Mateo 16 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Attho fariseoneshaꞌ ñamha saduceoneshaꞌ enamoset Jesús gatapanetepaꞌtoꞌ poꞌpartsoña

¹ Fariseoneshaꞌ ñamha saduceoneshaꞌ ñetpaꞌ oꞌ awanmoet oꞌch enteñetaꞌ Jesús. Xhaxhaꞌtet Jesúsesho ñetña poeshkënothetpaꞌ ateth otyesoset: —Yapaꞌ añ yemnen oꞌch pegatapoey pepartsoña entoth allochñapaꞌ atthoch yeñotoseph poꞌñoxh phapaꞌ Parets Poechemereph. Ñetpaꞌ xha moeneñet oꞌch topatoset Jesús.

² Ñañapaꞌ aña yerpatapanet ñeñth ateth otyenet ñet paꞌnyeto: —Sapaꞌ ñerraꞌm esempo sentnen oꞌch tsatatetnena enet, sañapaꞌ xhokmach ateth sotyesneneꞌth: “Tsapathpaꞌ atarrchaꞌ char.”

³ Aromtañañapaꞌ ñerraꞌm esempo sentaꞌmoen enet xha tsatattaꞌmoena, sañapaꞌ xhokmach ateth sotyesaꞌmoeneꞌth: “Xhoch wataꞌmoena ñeñthoꞌmar oꞌ xha rrenarsaꞌmoen.” Sapaꞌ atarr señoteneñña ñeñth sentyen ento ñeñthña señotateneꞌ. Tharraña ñeñth ateth norrtatyennas nepartsoteña esoꞌmartheꞌña ñeñthñapaꞌ amaña eñotatensoña ñeñth ateth pennas Yompor theꞌ oꞌch orrtatonas poꞌkowenña. Ñeñthpaꞌ atthatheꞌ seshkën.

⁴ Acheñeneshaꞌ ñeñth korraꞌyetsa theꞌ ñetñapaꞌ ama kowenayeꞌ kothapeꞌchyeneto, ama añeyeꞌ kosheneto Yompor ñeñthoꞌmarña ñetpaꞌ eꞌñe orrena otennet awoꞌch norrtatanet nepartsoña. Tharraña amach es norrtataneto. Napaꞌ añach patherr neñotatanet ateth eñotataneꞌth Jonás awath nínivoꞌmarneshaꞌ. Jesúsñapaꞌ saꞌnerranetpaꞌ awerr.

Attho Jesús tomaꞌntaterraneterr ñeñth poꞌchaser pen fariseoneshaꞌ

⁵ Allempoña pechatrraꞌtet yomhtaꞌn oꞌ xhapoet all, poeyochreshaꞌñapaꞌ oꞌ yerpoerret ñetpaꞌ ama anmoeto pan ñeñthchaꞌ rroset all.

⁶ Jesúsñapaꞌ ateth otapanet: —Eꞌñech señota ñatoꞌt semeñeꞌteñaꞌña fariseoneshaꞌ amaꞌt ñamha saduceoneshaꞌ poꞌchaser allo tsetenet pan.

⁷ Ñetña kothapeꞌchyesetpaꞌ ateth otannaꞌtyeset: —Amakaꞌye yanmoña pan ñeñthoꞌmartheꞌkaꞌyeña oteney añoꞌch yemeñeꞌtatscheña fariseoneshaꞌ poꞌchaser.

⁸ Jesúsña allempo eñotanet ateth kothapeꞌchyenet ñañapaꞌ ateth oterraneterr: —Esoꞌmareꞌt sellkëñeshaꞌ sotannaꞌtyena añoꞌ eñalle ñeñthchaꞌ serraꞌ. Sapaꞌ amaꞌtña eꞌñeyeꞌ seyemtenno.

⁹ Themeꞌttsenaꞌtña ama es sexhenoyoña seyoxhro. Amaꞌtña seyerpoenoña allempo natontat amnar pan ñeñth nerratallmeꞌchpaꞌ alloꞌtsen amnaroch mil acheñeneshaꞌ. Amaꞌt seyerpoenoña ñamha ñeñth allpon chorrarerrets kañthro ñeñth sapxherr allempo.

¹⁰ Amaꞌt ñamha allempo natontaterrerr ñeñth kanxherr pan ñeñthña nerratallmeꞌcherrerrpaꞌ alloꞌtsen paꞌtatsoch mil acheñeneshaꞌ. Ñamha ñeñth allpon chorrarerrets kañthro ñeñth sapxherrerr allempo.

¹¹ Errothenothwañakaꞌyeña ama señotenoña ñeñth ateth notas ñorraꞌ atthoch ama semeñeꞌtatsche fariseoneshaꞌ amaꞌt ñamha saduceoneshaꞌ poꞌchaser ñeñthpaꞌ ama rreñtsoyeꞌ notenso.

¹² Allempoña ñetpaꞌ oꞌ xhapanet poeyoxhreto, ateth otannaꞌtet: —Amoepaꞌtkaꞌye añeyeꞌ otenye pan poꞌchaser; añepaꞌtkaꞌyeña oteney amach yemeñeꞌtatsche fariseoneshaꞌ amaꞌt ñamha saduceoneshaꞌ pokthaphña ñeñth ateth yexhatannenet ñeñth ama kowenayaye, theꞌt mamesha epaꞌwa errakmañen eꞌñe ateth pena chaseꞌ mameshapaꞌ oꞌch aꞌchasaꞌwan ora all yeneñ.

Attho Pedropaꞌ otan Jesús, phapaꞌ phaña Yompor Poechemereph ñeñtheph Cristotosets

¹³ Allempoña xhap Jesús all Cesarea ñeñthara Filipo, allñapaꞌ otosan poeyochreshaꞌ: —¿Errothenaꞌt otyenenña allowen acheñeneshaꞌ, na Ñeñthen Acheñetosets eseshantheꞌ?

¹⁴ Ñetñapaꞌ ateth otyeset: —Patantarr acheñeneshaꞌpaꞌ atethkaꞌye otyenpet phapaꞌ Juanañphoꞌtheꞌ ñeñthephoꞌ apatañtatseꞌth Yomporekop. Poꞌpotantaññapaꞌ ateth otyenpet phapaꞌ Elíasophoꞌtheꞌ; poꞌpotantaññapaꞌ ateth otyenpet phapaꞌ Jeremíasophoꞌtheꞌ amapaꞌ añephoꞌtheꞌ poꞌpsheñeñ ñeñth aꞌmhtayeꞌth Yompor poꞌñoñ awath.

¹⁵ Allempoñapaꞌ alla aꞌphthoꞌterraneterr: —Sañapaꞌ ¿errothenaꞌtña sotenenña sa?

¹⁶ Simón Pedroñapaꞌ eñoratsapaꞌ ateth och: —Phapaꞌ ñeñthephkaꞌye atarr yekwen amaꞌt awathotheñ; ñeñthephkaꞌye Parets Poechemereph ñeñtheph Cristotosets. Ñeñthña Parets ama arromñatheshayaye.

¹⁷ Jesúsñapaꞌ ateth och: —Nanak kosheñtsoꞌtseneph, Simóna ñeñtheph Jonás poechemereph tharroꞌmar attho peñotenenpaꞌ ñeñthpaꞌ ama arromñatheshayeꞌ peñotatenaye; naña Nompor peñotateneꞌ ñeñth poeꞌntañoꞌtsen.

¹⁸ Napaꞌxhoꞌña theꞌpaꞌ oꞌch notaph phamha, phapaꞌ añchaꞌ nesocherreph Pedro. (Ñewa, añ soꞌchñets Pedropaꞌ añ tomaꞌntena ñeñth atarr es echarr ateth ñerraꞌm mapoeꞌ.) Ñamha pha eꞌñe peyemteñothen na, na poꞌñoxhpaꞌ naña Cristotosets, ñeñthpaꞌ allochkaꞌyeña norrtaterrña allowen ñeñthchaꞌ nameꞌñerraya ñeñthchaꞌ apxhaꞌyerrtsa eꞌñe na pameꞌñeñothet. Atarrchaꞌ womenk echarr nephaꞌyerranet allowenet ñeñthetchaꞌ apxhaꞌyerrtsa pameꞌñeñothetan na atthochña ñokpoetpaꞌ amach eñalle ñeñthchaꞌ waporeꞌterrawet, amaꞌt awatha. Amaꞌt rromoeñets poꞌwamenkpaꞌ amach errothenoth metanerranetoña ñet poꞌwamenk.

¹⁹ Ñamha na theꞌpaꞌ oꞌch napoerreph llesens atthoch phaꞌpotherrñañ Yompor poꞌkowenña ñeñth attho ayochreshathtena ña poeꞌntañoth; ñeñthpaꞌ añ tomaꞌntena ateth ñerraꞌmrratheꞌ llave alloch petoramper allowen ñeñth moeneneꞌ oꞌch poeyochreshaꞌ perranet. Ñamha ñerraꞌm erraꞌtsenchaꞌ eꞌñe pokteꞌ pent ñeñthchaꞌ penaꞌyes arr patsropaꞌ Yomporpaꞌxhoꞌña ñeñth entoꞌtsen eꞌñech atthekma pokteꞌ enterranet. Ñamha ñeñthchaꞌ ama pokteyeꞌ penteno ñeñthchaꞌ penaꞌyes arr patsro, Yomporpaꞌxhoꞌña ñeñth entoꞌtsen eꞌñech atthekma amach pokteyeꞌ enterraneto.

²⁰ Allempoñapaꞌ otan poeyochreshaꞌ: —Amach eseshaꞌ sotaphsaꞌtatsto amaꞌt poesheñarra napaꞌ na ñeñthen Cristotosets.

Attho Jesúspaꞌ eñotatan poeyochreshaꞌ ñapaꞌ amtsarethterrach

²¹ Jesúsña eꞌñe allempotheñpaꞌ mothetnomh eñotatyesnomoeꞌ poeyochreshaꞌ ñeñth ateth anareth ñokop, ñapaꞌ moeroxhtateretchaꞌ; oꞌch awoꞌ Jerusaléño allñapaꞌ allchaꞌ moeroxhtateret. Añchaꞌ errotwanen perreꞌ ñeñth pomporneshaꞌ pen allowen judioneshaꞌ ñamha ñeñth paꞌmhchaꞌtaretherneshaꞌ pen allowen poꞌkornaneshar ñamha ñeñth atarr etsotayenayeñ ñoñets ñeñth ateth anareth judioneshakop. Allñapaꞌ allchaꞌ moetsatateret tharraña poemaꞌpamtañoña Pomporpaꞌ oꞌch alla tantater.

²² Pedroñapaꞌ allentha anemh aꞌyenethpaꞌ allñapaꞌ ateth otos: —Arepaꞌchña Partseshachaꞌ attheyeꞌ perrpeto amaꞌt errponaña. Yomporepaꞌchña eꞌñe pekwampeneꞌ.

²³ Ñañapaꞌ poetallsa aꞌyeneth mameꞌpaꞌ ateth otan Pedro: —Orraph aꞌyo neshoth oneñethe, phapaꞌ eꞌñe orrena pepatareꞌtenen; phapaꞌ amakaꞌye Yomporeyeꞌ ateth phokthapeꞌchatenaye, ñeñthpaꞌ acheñarramcheꞌ pokthaphña.

²⁴ Allempoña Jesúspaꞌ ateth otan poeyochreshaꞌ: —Ñerraꞌm eseshaꞌ moeneneꞌ oꞌch kotherrnet na eꞌñe poꞌñoxh atthoch neyochreshaꞌ neperranet, añ poktetsa sewanmoetepaꞌña ñeñth ateth moenenet eꞌñe ñokpoeta. Atthochña ñetpaꞌ oꞌch eꞌñe tomaꞌnteret ñeñth chechneneꞌ poꞌkorsoch allchaꞌ moeroxhtet ñamet. Atthochña kotherrnet eꞌñe poꞌñoxh.

²⁵ Tharroꞌmar ñerraꞌm eseshaꞌ eꞌñe aña moenenet oꞌch korrena atomat atthoch eꞌñe koshenet arr patsro, ñetñapaꞌ xhach aꞌchenkatenet eꞌñe ñañeñeta. Tharraña ñerraꞌm eseshaꞌ eꞌñe pokteꞌ enteneꞌ oꞌch es sowanerret eꞌñe pokrreñowenet nokop, ñeñthña acheñerpaꞌ ñañapaꞌ korretsach poksheñeshokmañen eꞌñe thayotheñ errponañowen.

²⁶ Amaꞌt errponenapharen esokmañen es yeyoratseꞌtyes ora allpon ñeñth yentyen añe patsro, tharraña ñerraꞌm ñeñthach eꞌñe yaꞌchenkaterreꞌ yekamkëñowen, ñeñthñapaꞌ amaꞌt koñeꞌthapaꞌ amach es sherberrye. Tharroꞌmar ama eñalle poꞌpoñ ñeñth atarr sherbets, añña atarr nanak sherbets ñeñthchaꞌ aꞌkeshphaterreꞌ yekamkëñ. Tharroꞌmar yokoppaꞌ ama es eñalle ñeñthchaꞌ yepomoerr alloch alla yerañtherra yekamkëñ.

²⁷ Poꞌñoxh napaꞌ Ñeñthen Acheñetosets oꞌch nowerra epan ñamha nemhllañotheñnaneshar. Eꞌñech Nompor poꞌkowenñoth nowerra. Allempochña netsaꞌterranet eꞌñe poesheñaꞌttsokmoet errothentheꞌ phaꞌyeseteꞌth.

²⁸ Poꞌñoxhkaꞌ theꞌpaꞌ oꞌch notas, patantaꞌttsos ñeñthes arroꞌtsaꞌyenes amaꞌt ama serromwenaꞌpaꞌ oꞌ senterrñañ Yompor poꞌkowenña attho napaꞌ Ñeñthen Acheñetosetspaꞌ atarrchaꞌ naꞌyochreshathterra.