San Mateo 14 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Allempo eꞌñe kowen es orrtatyes Jesús, Herodesñapaꞌ xha otapañ Juanañtheꞌ oꞌ tanterra ñeñth apatayeꞌth acheñ Yomporekop

¹ Allempoña amhchaꞌtareth Herodespaꞌ eꞌmareꞌtenan ateth phaꞌyena Jesús. Ñewa, Herodespaꞌ all amhchaꞌtarethtena anetso Galileo.

² Allempoñapaꞌ ateth otan ñeñth sherbeneꞌ: —Añepaꞌtkaꞌyeña Juanañ ñeñth apatayeꞌth acheñ Yomporekop; taꞌmkaꞌye xhatheꞌkaꞌye tanterraña rromoth. Ñeñthoꞌmartheꞌkaꞌyeña theꞌpaꞌ orrtaterranña partsoteñets.

³ Ñewa, allempopaꞌ awañmoꞌchakma rrematenanaꞌ Juanañ oꞌ wankachpaꞌ allña yottamphsach atthoch koshatan Herodías ñeñth paꞌmoꞌnasheñ Felipe poethapor.

⁴ Tharroꞌmar Juanañpaꞌ ña otayeꞌth Herodes: —Amakaꞌye pokteyaye oꞌch peyorampes pemoꞌnasheñ poethapor.

⁵ Amaꞌt atarr moeneñeñ oꞌch moetsatacheñ eꞌñe allempokma tharraña Herodespaꞌ mechaꞌtenan acheñeneshaꞌ ñeñthoꞌmarña ama eshkayeꞌ moetsatache. Tharroꞌmar acheñeneshaꞌpaꞌ eꞌñe kowen enteñet Juanañ ateth ñerraꞌmrratheꞌ ñeñth aꞌmhteneꞌ Yompor poꞌñoñ.

⁶ Allempoña koshameꞌtapreteñet Herodes allempo eñalletña allñapaꞌ oꞌ tanksosa Herodías poechoyor.

⁷ Herodesñapaꞌ ñeñtha atarr kowen ent. Ñeñthoꞌmarña och: —Na poꞌñoxhpaꞌ oꞌch nenaꞌ neñoñ eꞌñe Parets paꞌsoꞌchño, amaꞌt es penamoenpaꞌ napaꞌ napaphchaꞌ.

⁸ Pachorñapaꞌ allentha otareꞌch eꞌñe aꞌnawa: —Oꞌwa phochtheꞌ amhchaꞌtareth: “Añchaꞌ phapoen Juan poñ.” Allempoña shopsheshaꞌpaꞌ ateth otan Herodes: —Napaꞌ añ nemnen oꞌch pepechennanaꞌ Juan poñ ñeñth apatayeꞌth acheñeneshaꞌ, oꞌch penon platopaꞌ oꞌch phapwerren eꞌñe arrma.

⁹ Oꞌña enamwepaꞌ amhchaꞌtarethñapaꞌ xha lleka. Tharraña amaꞌt llekañpaꞌ oꞌ nowanña poꞌñoñ womenk eꞌñe Yompor paꞌsoꞌchño ñamha alloꞌtsaꞌyen ñeñth waꞌñen ñeñth eꞌmoeneꞌ ateth oten ñeñthoꞌmarña otanet: —Theꞌpaꞌ oꞌch saph Juan poñ.

¹⁰ Allempoñapaꞌ oꞌ moeñan paꞌcheñer oꞌch pecheñetaꞌ Juan all yottampeñet.

¹¹ Allempoña oꞌ wapaterrñañet poñ platopaꞌ apweret shopsheshaꞌ. Ñañapaꞌ anemh pachoresho oꞌch apoeñaꞌ.

¹² Allempoñapaꞌ awanma Juanañ poeyochreshaꞌ oꞌ aneret apechareth oꞌch pampoeretaꞌ. Oꞌña pampaꞌweretaꞌpaꞌ oꞌ awanerret oꞌch eꞌmareꞌtateñetaꞌ Jesús.

Allempo Jesúspaꞌ rratenan shonteꞌ acheñeneshaꞌ; ñeñthña acheñeneshaꞌpaꞌ alloꞌtsen amnaroch mil

¹³ Jesúspaꞌ allempo eꞌmareꞌtan Juanañ, ñañapaꞌ awampes noñtho oꞌ saꞌnman acheñeneshaꞌ oꞌch awoꞌ all ama acheñempañoyaye. Acheñeneshaꞌñapaꞌ allempo eꞌmareꞌchet ñetñapaꞌ allentha awanmoet ñamet. Allowen anetsothpaꞌ eꞌñe awanmoet oꞌch enteretaꞌ Jesús. Ñetñapaꞌ alla oñmaxhaꞌtet patsoꞌmar.

¹⁴ Allempoña sewosa Jesús noñthothpaꞌ alla entwerraneterr oꞌ alla shontaꞌwerrerr acheñeneshaꞌ. Ñañapaꞌ atarr nanak moeraꞌwerraneterr. Allñapaꞌ oꞌ alla aꞌkrratyeswerraneterr patsnañether.

¹⁵ Attheñapaꞌ ellerren poeyochreshaꞌñapaꞌ oteñetaꞌ Jesús: —Theꞌpaꞌ arroꞌtseney all ama acheñempañoyaye ñamha oꞌkaꞌye ellerren. Theꞌpaꞌ oꞌch phoch acheñeneshaꞌ awanemyerretepaꞌ anetsoꞌmar allchaꞌ rañthaꞌyeswerret poerraret ñeñthchaꞌ rraꞌyeswerret.

¹⁶ Jesúsñapaꞌ otanet: —Amachkaꞌye awanmatsterreto. Sachkaꞌye apaꞌyesawet ñeñthchaꞌ rret.

¹⁷ Ñetñapaꞌ ateth ochet: —Ya arrpaꞌ amakaꞌye es yechenoña amaꞌt koñeꞌtha; yapaꞌ eꞌñekaꞌye amnara pan yechen ñamha epatholl kak.

¹⁸ Allempoña Jesúspaꞌ ateth otanet: —Sanmon arrma oꞌch sapoennaꞌ.

¹⁹ Allempoñapaꞌ otan acheñeneshaꞌ: —Theꞌpaꞌ oꞌch sanorrxhaꞌtyes eꞌñe all kowen emmoꞌratyen pasetmaꞌ. Allempoña agapan ñeñth amnar pan ñamha epatholl kak, oꞌ kowaꞌ enoneth, parasyosoꞌtamphsan pan allothñapaꞌ shotaꞌtan pan, apanatyesan poeyochreshaꞌ. Ñetñapaꞌ oꞌ epatyeset allowen acheñeneshaꞌ.

²⁰ Eꞌñe epaꞌwet, allempoña oꞌ rrallmeꞌchet allowenet eꞌñepaꞌtchaꞌ yetrraꞌtwawet. Eꞌñe yetwawetpaꞌ xha aꞌpchatyeset ñeñthñapaꞌ aꞌyapaxheret. Ñeñthña aꞌyapaxherretpaꞌ xhepaꞌtchaꞌ chorrats xharraꞌ poechena epa kañther eꞌñe thamoꞌyareꞌ.

²¹ Ñeñthña rrallmeꞌchatspaꞌ atarr shonteꞌ acheñeneshaꞌ; ñatoꞌ alloꞌtsentheꞌ amnaroch mil ñeñth eꞌñe yakmaneshocheꞌ. Ellonethpaꞌ alloꞌtsaꞌyen ñamha koyaneshaxhno ñamha cheshaneshaxhno.

Attho Jesúspaꞌ eꞌñe kowen chopeꞌchnen enoth oño

²² Allempoña Jesúspaꞌ otan poeyochreshaꞌ: —Theꞌpaꞌ oꞌch saꞌtaxhaꞌt noñtho oꞌch sota sanom oꞌch sephchaterra yoth. Napaꞌ oꞌch nesoꞌtnomh ora acheñeneshaꞌ.

²³ Oꞌña soꞌtwanmanetpaꞌ ñañapaꞌ awoꞌ aspentho eꞌñe ñapoeth allña maꞌyochosa. Amaꞌt oꞌ tsapoenpaꞌ ñañapaꞌ alloꞌtsena ñapoeth.

²⁴ Noñthñapaꞌ ñeñtha rroxhasoꞌtsenara saꞌpo, emoꞌyareꞌñapaꞌ xha anmapeꞌchampenanet, aꞌpoerrameꞌtampenanet orrno.

²⁵ Attheña allempoña poetarenmochpaꞌ wenanet Jesús xha chopeꞌchnen enoth oño.

²⁶ All chopeꞌchnen allempoña entapoeñ poeyochreshaꞌ, ñetñapaꞌ xha thoratsetyeset poeyoxhret, ateth otannaꞌtyeset: —Choyesheꞌmatstheꞌkaꞌye waponaya. Poeyorñothetpaꞌ attha rrannartet.

²⁷ Jesúsñapaꞌ eñoranaꞌtwenanet, ateth otwenanet: —Xhoñakaꞌye sokshapoenna, nakaꞌye oꞌ nowapa, amach attha semhchaꞌtatstapno.

²⁸ Allempoña Pedropaꞌ eñoranaꞌcha ñeñthpaꞌ ateth och: —Ñerraꞌm poꞌñoxhtheꞌ pha Partseshachaꞌ, theꞌpaꞌ oꞌch photosen, aphonkaꞌye nesho, pechopeꞌchnom phamha enoth oño.

²⁹ Jesúsñapaꞌ allentha och: —Aphonkaꞌye. Ñañapaꞌ allentha sowa noñthothpaꞌ oꞌ chopeꞌchnom ñamha enoth oño oꞌch awoꞌ Jesúsesho.

³⁰ Chopeꞌchnomtsapaꞌ oꞌ kowaꞌnman womenkëshaꞌ ñeñth xha emoꞌyartatenan saꞌppaꞌ xha yoreꞌch. Xha yoreꞌchpaꞌ alla moeneꞌ eshaꞌta oño. Allñapaꞌ rranareꞌta ateth otan Jesús: —¡Phaꞌkeshphatosen Partseshachaꞌ!

³¹ Jesúsña thekma rremaphpaꞌ ateth och: —Phapaꞌ amaꞌt eꞌñeyeꞌ peyemtenno. Esoꞌmareꞌt xha peꞌcharrtatenña peyoxher.

³² Eꞌñe aꞌtaxhaꞌtatseta noñthopaꞌ womenkëshaꞌñapaꞌ xhepaꞌtchaꞌ moetsoñeñterrtsa.

³³ Ñeñthña noñthoꞌtsaꞌyenpaꞌ allenthepaꞌtchaꞌ konkorpanrrortanaꞌtapetpaꞌ ateth otyeset: —Poꞌñoxhepaꞌt phapaꞌ eꞌñe Parets Poechemereph.

Allempo Jesúspaꞌ aꞌkrratyesosan paꞌnamen atsnañethexhno all Genesareto

³⁴ Allempoña pechatamphsetpaꞌ arr etsotoset all oteñet Genesareto.

³⁵ Ñeñthña aneꞌtañneshaꞌ allpaꞌ oꞌ chemeꞌtapet Jesús. Attho chemeꞌtapetpaꞌ ñetñapaꞌ allentha moeñet acheñ, oꞌch eꞌmareꞌtatenanaꞌ acheñeneshaꞌ allampañoꞌmar. Allothñapaꞌ wapatyesoñet allowen atsnañethexhno.

³⁶ Ñeñthña atsnañethexhnopaꞌ oꞌ enamyesoset amaꞌt posoꞌmotha oꞌch aꞌphllaꞌyesosñañet paꞌshtam. Allpon ñeñth aꞌphllaꞌyesoseꞌ Jesús paꞌshtam allponxhoꞌ eꞌñe korraꞌyeswerrtsa.