San Marcos 7 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Attho Jesúspaꞌ eñotatenanet ama añeyeꞌ yaꞌsosyatenaye Partsokop ñeñth yerraꞌyen yenamoth

¹ Allempoña allpaꞌ waxhaꞌtoña fariseoneshaꞌ epoet ñamha poesheñaꞌtets ñeñth waxhetsa Jerusaléñoth ñeñth atarr etsotayenayeñ ñoñets ñeñth ateth anareth judioneshakop.

² Ñetña allpaꞌ entosñañet Jesús poeyochreshaꞌ attha rraꞌyenet ama eꞌpotaꞌtyeneto pot Partsokop allempoch rrallmeꞌchet.

³ (Ñewa, allowen fariseoneshaꞌ amaꞌt ñamha allowen judioneshaꞌ ñetpaꞌ ateth yexhenet amach rrenetaꞌpaꞌ oꞌch eꞌpotaꞌtyeset Partsokop. Tharraña ñeñthpaꞌ paꞌtañneshaña yexhatnomawet.

⁴ Ñamha poꞌpoñ ellonethpaꞌ ateth yexhataneteꞌth paꞌtañneshañ ñerraꞌm esempo werret allothekma pomatsreꞌtyenet, amach rrenetaꞌpaꞌ xhoch ñanom aꞌkowentatenetañ Partsokop. Ñamha shonteꞌ poꞌpoñexhno ñeñth eꞌñe yexhatyesaneteꞌth paꞌtañneshañ. Amaꞌt ñeñth porreth phaꞌyenet ñamha poꞌpajoxhnetpaꞌ xhochña eꞌñe eꞌpameꞌtyeñetañ Partsokop, eꞌparroꞌtyenetañ amaꞌt ñamha paꞌsrerrogaxhno Partsokop. Amaꞌt ñamha all phanrameꞌtyenet eꞌñech eꞌpataꞌtweñetañ Partsokop.)

⁵ Añña fariseoneshaꞌ ñamha ñeñth atarr etsotayenayeñ ñoñets ñeñth ateth anareth judioneshakop ñetña allempo entosñañet Jesús poeyochreshaꞌ attha rraꞌyenet ama eꞌpotaꞌteneto Partsokop ñeñthoꞌmarña ñetpaꞌ ateth otoset Jesús: —Peyochreshaxhnoñapaꞌ esoꞌmareꞌtña ama eseshaꞌ yexhenayeña ñeñth ateth yexheꞌth yatañneshañ. Ñetpaꞌ attha rraꞌyenet ama eꞌpotaꞌteneto Partsokop allempo rrenet.

⁶ Jesúsñapaꞌ ateth otanet: —Sapaꞌ atarrwakaꞌye ommoñathneshastheꞌ tharroꞌmar atarr seshkareꞌten, amaña Yomporeyeꞌ sesherbeno. Isaíaspaꞌ eꞌñe kowen aꞌmhtaneꞌth Yompor poꞌñoñ, saña theꞌñapaꞌ eꞌñe ateth sepena ateth oteꞌth allempo ateth ot Yompor: Ñeñth acheñenesharpaꞌ eꞌñe poenamotha kowentatennanetañ; poeyoxhretoñapaꞌ ama xhenaneto ñeñth kowen nenten na.

⁷ Eꞌñe orrena maꞌyochennet, ñeñth ateth yexhatannenetpaꞌ ñeñthpaꞌ eꞌñe acheña nayeꞌth awath pokthaphña.

⁸ Jesúspaꞌ alla oterraneterr: —Sapaꞌ xhakaꞌye sekexhpoenña ñeñth ateth oteney Yompor ñeñthchaꞌ ateth yephaꞌyen kowen; sapaꞌ añakaꞌyeña atarr setsotayen ñeñth ateth yexhatyesnomoes saꞌtañneshañ; ñeñtha ateth sephaꞌyen orrothexhno eꞌpameꞌtyeseꞌ ñamha sepajoxhno. Ñamha poꞌpoñexhno paꞌnamen sephatseꞌtyeneñ ñeñth soten Partsokpañoꞌ.

⁹ Jesúspaꞌ alla oterraneterr: —Sapaꞌ añakaꞌye atarr señoten atthoch sewaporeꞌtoñ Yompor poꞌñoñ ñeñth ateth oteney ña ñeñthchaꞌ ateth yepha kowen; ñeñthoꞌmarña sapaꞌ eꞌñe aña setsotayen ñeñth yexhatyesnomoes satañneshañ.

¹⁰ Ñewa, Moiséspaꞌ atethkaꞌye oteꞌth: “Semorrenteñothpaꞌ semhchaꞌnaꞌchchaꞌ sompor ñamha sachor.” Elloña ñamha poꞌpoñonethpaꞌ ateth oteꞌth Moisés: “Ñerraꞌm eseshaꞌ sasareꞌteneꞌ pompor ñamha pachor ñeñthpaꞌ moetsetepaꞌ.”

¹¹ Tharraña sañapaꞌ ateth sotyen ñerraꞌm eseshaꞌ ateth oteneꞌ pompor ñamha pachor: “Ñeñth nechen oꞌch napapeñpaꞌ tharraña amach napape theꞌpaꞌ oꞌch neneꞌ Yomporekop ñeñth otenet Corbán”,

¹² ñeñthña acheñerpaꞌ sañapaꞌ atethchaꞌ soteñ: “Phokoppaꞌ ama pallteno oꞌch es phaph phamoꞌmteꞌ.” Atthoña sapaꞌ ama semnateñe ñeñth acheñer eꞌñe ña poemorrenteñothpaꞌ oꞌch es apoenan pompor ñamha pachor.

¹³ Atthokaꞌyeña sewaporeꞌteññañña Yompor poꞌñoñ allochñapaꞌ eꞌñech aña setsoten ñeñth eꞌñe sa seyxheña. Amaꞌt ellonethpaꞌxhoꞌña shonteꞌ poꞌpoñexhno ñeñth ateth sephatseꞌtyena paꞌnamenaꞌttsokma.

¹⁴ Allempoña Jesúspaꞌ xhoreꞌtan acheñeneshaꞌ ñeñth shontetsa, ñetñapaꞌ ateth otanet: —Sañapaꞌ poꞌñoxh allowenes eꞌñepaꞌchña kowen seꞌmhñoten allochñapaꞌ atthoch eꞌñe kowen xhaponasa seyoxhro.

¹⁵ Ama añeyeꞌ yaꞌsosyatenaye Partsokop ñeñth yerraꞌyen. Añkaꞌyeña yaꞌsosyateneꞌ eꞌñe ya yokthapeꞌchatseꞌteñoth ñeñthpaꞌ yeyoxhrothkaꞌye wena.

¹⁶ Ñeñthes poꞌñoxh neꞌmhñoteneꞌ xhaponasepaꞌch seyoxhro ñeñth ateth netmaꞌntatensa añ ñoñets.

¹⁷ Allempoña Jesúspaꞌ saꞌnerran acheñeneshaꞌpaꞌ ñañapaꞌ beꞌthoswerrerr pokollo allña poeyochreshaꞌpaꞌ ateth otoset: —¿Esoꞌtña petmaꞌntatyeneyña ñorraꞌ?

¹⁸ Jesúsñapaꞌ ateth otanet: —Sapaꞌxhoꞌña eꞌñeꞌtña atthekmas samha, ama es sexhenoyo seyoxhro. Sapaꞌ amaꞌt señotenoña ñeñth yerraꞌyen yenamoth ñeñthpaꞌ amatheꞌ errothenoth aꞌsosyatyeña Partsokop.

¹⁹ Tharroꞌmar ñeñth yerraꞌyenpaꞌ amakaꞌye yeyoxhroyeꞌ xheno, yathakaꞌye xhen. Ñeñthpaꞌ xhokmachkaꞌye yener aꞌyo. Ñewa, ñeñthpaꞌ ateth eñotateney Jesús allowen rreñtsoxhnopaꞌ eꞌñekaꞌye kowenakma eꞌñe arrapawokma.

²⁰ Jesúsñapaꞌ alla oterraneterr: —Añña ñeñth xhaꞌnets yenamoth ñeñth attho yeñosatseꞌtyen ñeñthpaꞌ eꞌñe yeyoxhroth wena ñeñthña xhokma yaꞌsosyateneꞌña Partsokop.

²¹ Eꞌñe yeyoxhroth wena kothaphñats ñeñth amaꞌt mameshapaꞌ ama kowenayaye, ñeñthpaꞌ añ: chetapretannaꞌteñets thaporets, kañoreshaꞌteñets, moetsannaꞌteñets,

²² etatsreꞌtyeñets, yeꞌchapretannaꞌteñets, atsrreꞌmoeñets, shekareꞌtannaꞌteñets, ottatseꞌteñets, moparrñats, sasareꞌteñets, ommoꞌcheñets, otatseꞌteñets.

²³ Ñeñth allowen sosyaꞌtsañexhno ñeñthpaꞌ yeyoxhrothkaꞌyeña wena, ñeñthkaꞌyeña yaꞌsosyateneꞌña Partsokop.

Attho poesheñarr koyaneshaꞌ ñeñth ama judioneshayaye ñapaꞌ atarr yemtapana Jesús

²⁴ Allempoñapaꞌ awerrerr Jesús allothpaꞌ alla xhap allampaño anets Tiro ñamha Sidón. Allempo xhap all pokollopaꞌ ñapaꞌ moeneñeñ eꞌñoꞌch aꞌnawa xhapañ. Tharraña ama errothenoth xhapo aꞌnawa,

²⁵ tharroꞌmar eꞌñe allempo xhap xha eꞌmareꞌteꞌ poesheñarr koyaneshaꞌ ñeñth achoyoreth. Poechoyorñapaꞌ penochor ñeñthñapaꞌ xha chorreña oneñeth. Ñeñthña koyaneshaꞌ wapapaꞌ rromosa Jesús paꞌrrphoth.

²⁶ Ñeñthña koyanesharpaꞌ ama judioneshayaye, ñapaꞌ poꞌpoñ acheñ ñeñth sirofenicioꞌmarneshaꞌ. All rromosa Jesús paꞌrrphothpaꞌ ateth otos: —Nepapare, pekexhpatatayeꞌchapon nechoyor oneñeth.

²⁷ Jesúsñapaꞌ ateth tomaꞌntatana acheñeneshaꞌ ñeñth ama judioneshayaye ñeñthoꞌmarña ateth och: —Ñanomchaꞌ ya yakñethar yaꞌyetaꞌ tharroꞌmar ama pokteyaye oꞌch yeprratampes yakñethar poerrar oꞌch yewaporeꞌtampes alloꞌtsen ochek oꞌch rreꞌ ñamha ochek.

²⁸ Koyaneshaꞌñapaꞌ ateth otererr: —Amaꞌt atteñ nepapareshachaꞌ tharraña amaꞌt ochekpaꞌxhoꞌña rraꞌyenan cheshaneshaꞌ poerrar ñeñth aꞌshoreꞌtatyenet poꞌmesaphnaxho.

²⁹ Allempoña Jesúspaꞌ ateth otererr: —Eꞌñe pokteꞌ ateth peꞌñorena; eꞌñepaꞌt phameꞌñenna. Ñeñthoꞌmar theꞌpaꞌ oꞌch awerreph eꞌñe peñmañeshaꞌ, theꞌña oneñethpaꞌ oꞌ kexhpaꞌnerrnaph pechoyor.

³⁰ Allempoña koyaneshaꞌpaꞌ awerr paꞌpakllo, oꞌ xherrpaꞌ alla entwerran poechoyor alla phanena eꞌñe kowen poꞌmayo, oneñethñapaꞌ oꞌ kexhpaꞌner.

Allempo Jesúspaꞌ aꞌkrraterran paket ñeñth opanatets

³¹ Allempo poerrerra alloth ñeñth allampañoth Tiroth, arr oñemwanom anetso Sidón alloth ñamha poꞌpoñ anetso Decapolisoꞌmar. Atthoña oꞌ alla awerr saꞌponeth all Galileyaso.

³² Oꞌ xherr allpaꞌ wapaterrñañeterr poesheñarr yakma ñeñthñapaꞌ paket ñamha ama eꞌñeyeꞌ kowenayeꞌ eñeno. Ñeñthña wapateꞌpaꞌ ateth otosan Jesús: —Añekopkaꞌ newapateñ oꞌch phaꞌphlleꞌ phototh atthoch korrerra.

³³ Jesúsñapaꞌ allentha anemh ñapoeth aꞌyeneth, allñapaꞌ eshoꞌtosan potaph paket poeto; ñamha oꞌ senmareꞌpaꞌ oꞌ alla aꞌphllerrñañer ñamha poeñeñ.

³⁴ Allempoña Jesús kowaꞌ enonethpaꞌ enara. Allempoñapaꞌ ateth ot eꞌñe ña poꞌñoño: —Efata —ñeñth yoten yeñoño: Potaꞌnerrepaꞌ pet allochñapaꞌ oꞌch peꞌmoerra eꞌñe kowen.

³⁵ Eꞌñe otweꞌpaꞌ xha potaꞌnerrets poetpaꞌ eꞌñe kowen eꞌmoerra. Amaꞌt ñeñth echarrtateneꞌ poeñeñpaꞌ oꞌ aꞌrroyer xha eñorerrtsa eꞌñe kowen.

³⁶ Jesúsñapaꞌ ateth otanet: —Theꞌpaꞌ amach eseshaꞌ sotaphsaꞌtatsto amaꞌt eꞌñe poesheñarra. Amaꞌt ateth otanetañ elloña ñetpaꞌ aꞌmethareꞌteñet.

³⁷ Allñapaꞌ atarr nanak kowanrrorteñet, ateth otyenet: —Jesúspaꞌ atarroꞌtrra kowenña ñeñth allowen ateth es phaꞌyen. Amaꞌt paketneshaꞌpaꞌ xhokma eꞌñe kowen eꞌmatwenanet. Amaꞌt ñamha opananeshaxhnopaꞌ xhokma eꞌñe kowen eñoratyenanet.