San Marcos 6 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Allempo serrpareꞌtatan Jesús acheñeneshaꞌ all Nazareto

¹ Jesúsña awerrerr allothpaꞌ oꞌ alla xherrerr paꞌnyo all Nazareto. Poeyochreshaꞌñapaꞌ alla kothaꞌwanererr.

² Allñapaꞌ allempo xherr yeth allempokma amesenet, ñañapaꞌ arr yexhatwerraneterr judioneshaꞌ poꞌprawo. Shonteꞌ acheñeneshaꞌ ñeñth eꞌmhñotapoerreꞌ ateth serrpareꞌtatwerranet all, ñetñapaꞌ nanak kowanrrortapoeret, allempoñapaꞌ ateth otyeset ñokop: —Ñapaꞌ errawañakaꞌyeña eñotanña ora allowen ñeñth ateth phaꞌyena. Eseshaꞌwañakaꞌyeña eñotateneꞌña atthoth orrtatenan partsoteñets. Errothwakaꞌyeña wenaña ñeñth eñoteñtsor ñeñth orrtatyen ña.

³ Ñapaꞌ añakaꞌye ñeñth poꞌtarwas peneꞌ oꞌch thorrenana tsach atthoch es yexhkatyen paꞌnamen. Ñapaꞌ añakaꞌye María poechoyor. Paꞌmoꞌnasheñpaꞌxhoꞌña añakaꞌye Jacobo, José, Judas, ñamha Simón. Ñamha poꞌxhaneshaꞌpaꞌ eꞌñekaꞌye yechmeꞌtenanet, parroꞌmarneshayarramcheꞌ. Ñeñthoꞌmarña all eꞌñe ña paꞌnyopaꞌ ama eseshayeꞌ akwaꞌpenaye entenaye.

⁴ Allempoña Jesúspaꞌ ateth otanet: —Ñeñth aꞌmhteneꞌ Yompor poꞌñoñpaꞌ xhokmakaꞌye amhchaꞌnaꞌtpoꞌ entyeñña allowen acheñeneshaꞌ; arrña paꞌnyo alloꞌtsen eꞌñe ña pamoꞌtsnaꞌtarneshaꞌ ñeñth eꞌñe pamoꞌtsnaꞌtar penpaꞌ ñetñapaꞌ ama akwaꞌpenayeꞌ enteñeto. Amaꞌt ñamha ñeñth parro yexhenet paꞌpaklleto, ñetpaꞌxhoꞌña ama akwaꞌpenayeꞌ enteñeto.

⁵ Ama ameꞌñeñeto ñeñthoꞌmarña allpaꞌ ama atonocheyeꞌ orrtataneto poꞌpartsoña. Allpaꞌ aña orrtatyen atthoch aꞌphllaꞌyenan poesheñaꞌtets atsnañeth allpaꞌ atthokaꞌyeña aꞌkrratenanet.

⁶ Ñeñthoꞌmarña Jesús atarr kothapeꞌchateñ pamoꞌtseshaꞌ attho ñetpaꞌ ama akwaꞌpenayeꞌ enteñeto, ñapaꞌ xha moeneꞌ llekateñet. Allempoña Jesúspaꞌ alla chopeñeꞌchyerrerr yexhatyerrtserr allemeñ anetsoꞌmar.

Allempo Jesúspaꞌ llesensan poeyochreshaꞌ oꞌch awanemyeset allchaꞌ serrpareꞌtyenetaꞌ

⁷ Allempo xhapaꞌmoen allempo Jesús agotaꞌmoenan poeyochreshaꞌ xharrasheña ñeñth poechetsa epsheña. Eꞌñe apxhaꞌwet ñeshopaꞌ ñañapaꞌ apanet llesens atthoch kexhpatyeset oneñethexhno attho chorraꞌyenana acheñeneshaxhno. Atthoña llesensanet ñetpaꞌ oꞌch awanemyeset eꞌñe epsheñaꞌttsokmoet.

^8-9 Ñamha ateth otapanet: —Ñerraꞌm oꞌch sawanmapaꞌ amach es sanmatsto amaꞌt koñeꞌtha allchaꞌ sechopeñeꞌchyes —amaꞌt sebolsa, amaꞌt ñeñthchaꞌ serraꞌyesnom, amaꞌt sekhllayora. Amaꞌt eꞌñe epma seshtampaꞌ amach sanmatsche. Añach sanem sekarr, senaꞌnomchaꞌ ñamha sesapat.

¹⁰ Alla oterraneterr: —Amaꞌt errach pokollro sexhap allach sommosa allponmat esempowach awerrserr poꞌpoñ anetso.

¹¹ Ñerraꞌm erra anetsro ñeñth alloꞌmarneshaꞌña ama kowenayeꞌ agapaseto ñerraꞌm amach moeneto oꞌch eꞌmhñotapasetpaꞌ oꞌch semhterrerr ñamha alloth. Ñerraꞌm allempo semhterrerr ñamha alloth, ñeñthña setkoꞌtsaꞌyen pañeꞌteꞌ patspaꞌ xhoch sepaꞌshetkaꞌtyesnomña setak. Atthochña alloꞌmarneshaꞌpaꞌ oꞌch señotatnomanet ñetpaꞌ amakaꞌye pokteyeꞌ entenanetoña Yompor. Poꞌñoxh oꞌch notas: Esempowañen allempoch akrarethetwerra allowen acheñeneshaꞌ, añña anetsoꞌmarneshaꞌ ñeñth ama sagapaye ñetñapaꞌ atarrchaꞌ aꞌkoñchatarethterret. Elloch metanaꞌtweret ñeñth attho aꞌkoñchatarethterra sodomoꞌmarneshaꞌ ñamha gomorroꞌmarneshaꞌ.

¹² Eꞌñe ñeñtha otarethetwetpaꞌ ñetñapaꞌ allentha awanmoet oꞌch chopeñeꞌchyeset errakmañen anetsoꞌmar. Allñapaꞌ serrpareꞌtyesnomoet ñeñth poktetsa allowenakop oꞌch kothapeꞌcherret ello kowen Yomporekop.

¹³ Ñamha all chopeñeꞌchyeset errakmañenpaꞌ ñetpaꞌ allña kexhpatyeset shonteꞌ oneñethexhno attho chorraꞌyenana acheñeneshaxhno. Ñamha shonteꞌ poꞌpotantañexhno acheñeneshaꞌ ñeñth atsnaꞌtyets all, ñetñapaꞌ aꞌyanaꞌtyesoset atsnañethexhno olivosoꞌyo eꞌñe aꞌkrratyesoset.

Allempo eꞌñe kowen es orrtatyes Jesús, Herodesñapaꞌ xha otapañ Juanañtheꞌ oꞌ tanterra ñeñth apatayeꞌth acheñ Yomporekop

¹⁴ Allempoña amhchaꞌtareth Herodes ñañapaꞌ ateth eꞌmareꞌtenan Jesús ñeñth ateth phaꞌyena, tharroꞌmar Jesús allowen acheñeneshaꞌpaꞌ eꞌñe eꞌmareꞌtweñet ñeñth ateth phaꞌyena. Ñañapaꞌ ateth ot: —Añepaꞌtkaꞌyeña Juanañ ñeñth apatayeꞌth acheñ Partsokop. Taꞌmkaꞌye xhatheꞌ tanterraña rromoth. Ñeñthoꞌmarepaꞌtkaꞌyeña theꞌpaꞌ orrtaterranña partsoteñets.

¹⁵ Poꞌpotantaññapaꞌ ateth otyenet: —Añepaꞌtkaꞌyeña Elías ñeñth aꞌmhtayeꞌth Yompor poꞌñoñ awath. Poꞌpotantaññapaꞌ ñetpaꞌxhoꞌña ateth otyenet: —Añepaꞌtkaꞌyeña ñeñth aꞌmhteneꞌ Yompor poꞌñoñ, eꞌñekaꞌye ateth ñerraꞌm ñeñth aꞌmhtayeꞌth Yompor poꞌñoñ awath.

¹⁶ Herodesña allempo eꞌmareꞌch ñañapaꞌ ateth ot: —Añepaꞌtkaꞌyeña Juanañ ñeñth nepechat awañmoꞌcha, xhepaꞌtrramcheꞌ tanterraña rromoth.

¹⁷ Ñewa, allempo Herodespaꞌ awañmoꞌchakma rromatenanaꞌ Juanañ oꞌ wankachpaꞌ allña yottamphsach atthoch koshatan Herodías ñeñth paꞌmoꞌnasheñ Felipe poethapor. Tharroꞌmar allempo Herodespaꞌ oꞌkaꞌye poerraterran paꞌmoꞌnasheñ poethapor.

¹⁸ Juanañpaꞌ ñakaꞌye otayeꞌth Herodes: —Amakaꞌye pokteyaye oꞌch peyorampes pemoꞌnasheñ poethapor.

¹⁹ Ñeñthoꞌmarña allempo Herodíaspaꞌ atarr eꞌmoñeꞌtaneꞌth Juan, atarr moeneñeꞌth oꞌch moetsatacheñ tharraña ama erroth pe.

²⁰ Tharroꞌmar Herodespaꞌ mechaꞌnaꞌtaneꞌth Juan, eñocheꞌth ñapaꞌ eꞌñe pokteꞌ es phaꞌyeseꞌth. Eñocheꞌth ñapaꞌ añekpaꞌna atarr thorrena Partsokop. Ñeñthoꞌmareꞌnaña eꞌñe kowen kowamphsacheꞌth allochñapaꞌ amach moetseto. Allempo eꞌmhñotenan Juan attho serrpareꞌteꞌth atarr kowen enteñeñ, tharraña ama eꞌñeyeꞌ eñotenanoña ñeñth ateth kothapeꞌchateñ Juan eꞌñe kowen.

²¹ Attheñapaꞌ xhapaꞌmoen pamtharr allempoch Herodías eñoteñ atthothchaꞌ moetsaterran Juan. Ñeñthpaꞌ tharrempo ateth pha allempo xhapaꞌmoen Herodes poeꞌñalletño ñeñth poerrollar pen Herodías. Allempoña Herodespaꞌ waꞌñatyesan acheñeneshaꞌ ñeñthchaꞌ rrallmeꞌchapretenayaꞌ. Añ waꞌñatyes ñeñth amhchaꞌtarethexhno ñamha ñeñth solltar poꞌkaphtanreneshaꞌ ñamha ñeñth atarr ekhllayoretheneshaꞌ ñeñth galileoꞌmarneshaꞌ.

²² Allempo rrallmeꞌchetpaꞌ allña beꞌthososña ñamha shopsheshaꞌ ñeñth Herodías poechoyor. Ñañapaꞌ allña tanksareꞌtosa. Herodesñapaꞌ ñeñtha atarr kowen ent amaꞌt ñamha ñeñth awaꞌñarethexhno. Ñeñthoꞌmarña amhchaꞌtareth Herodespaꞌ ateth otan shopsheshaꞌ: —Amaꞌt erraꞌtsena penamoenenpaꞌ napaꞌ napaphchaꞌ.

²³ Elloñapaꞌ eꞌñe Yompor paꞌsoꞌchño nan poꞌñoñ, allempoñapaꞌ alla otererr: —Poꞌñoxhkaꞌye napaꞌ amaꞌt es penamoen napaꞌ napaphchaꞌ amaꞌt poeshmet nepatseñ all naꞌmhchaꞌtarethtena.

²⁴ Allempoña shopsheshaꞌpaꞌ xhaꞌnerr awerr pachoresho, ateth otosan pachor: —Taꞌm ¿eschaꞌ nenamhña amhchaꞌtareth? Pachorñapaꞌ ateth och: —Añchaꞌ penamh Juan poñ ñeñth apatayeꞌth awaña acheñ.

²⁵ Allempoña shopsheshaꞌpaꞌ materra alla amhchaꞌtareth Herodesesho ateth otwerran amhchaꞌtareth: —Napaꞌ añ nemnen oꞌch pepechennanaꞌ Juan poñ ñeñth apatayeꞌth acheñeneshaꞌ oꞌch penon platopaꞌ oꞌch phapwerren eꞌñe arrma.

²⁶ Allempo enamwe shopsheshaꞌ Juan poñpaꞌ amhchaꞌtarethñapaꞌ xha lleka. Tharraña amaꞌt llekañpaꞌ oꞌ nowanña poꞌñoñ womenk eꞌñe Yompor paꞌsoꞌchño ñamha alloꞌtsaꞌyen ñeñth waꞌñen ñeñth eꞌmoeneꞌ ateth oten ñeñthoꞌmarña xhokmach aꞌpoktatan poꞌñoñ ateth otwan ñorraꞌ shopsheshaꞌ.

²⁷ Allempoñapaꞌ allentha otan poꞌsolltarer: —Theꞌpaꞌ oꞌch pepecheññañaꞌ Juan poñ all neyottamphsateñ; poññapaꞌ pewapater arrma.

²⁸ Solltarñapaꞌ allentha awoꞌ pechenanaꞌ Juan poñ, oꞌ wapater plato, apwerran shopsheshaꞌ. Shopsheshaꞌñapaꞌ apoenanaꞌ ñamha pachor.

²⁹ Allempoña Juan poeyochreshaꞌpaꞌ oꞌ eꞌmareꞌchet oꞌ pecheret paꞌyochreshatheret Juanañ, allempoña ñet awanmoet all pecheret Juanañ allempoña ñetpaꞌ eretaꞌ apechareth oꞌch pampoeñetaꞌ.

Allempo Jesúspaꞌ rratenan shonteꞌ acheñeneshaꞌ; ñeñthña acheñeneshaꞌpaꞌ alloꞌtsen amnaroch mil

³⁰ Atthothañapaꞌ oꞌ xhaxherr ñeñth llesensen Jesús. Ñetñapaꞌ serrpareꞌtatweret Jesús allowen ñeñth ateth phaꞌyeset. Serrpareꞌtatweret ñamha ateth yexhatyeset acheñeneshaꞌ Yompor poꞌñoñ.

³¹ Jesúsñapaꞌ ateth oterranerr poeyochreshaꞌ: —Theꞌpaꞌ oꞌch awey eꞌñe yapthocheꞌ all ama acheñempañoyaye; sapaꞌ allchaꞌña sameswerr allponmat. Ñeñth allempopaꞌ ateth otan Jesús poeyochreshaꞌ tharroꞌmar allempo shonteꞌ acheñeneshaꞌ ñeñth waxhaꞌtyetsa ñamha ñeñth xhokma awanemyetsa ñeñthoꞌmar amaꞌt mameshapaꞌ ama eshkayeꞌ rreneto.

³² Allempoñapaꞌ eꞌñe ñapthochayet awanmamphset noñtho, oꞌch awanmoet all ama acheñempañoyaye all otenanet Jesús.

³³ Allempoña shonteꞌ acheñeneshaꞌpaꞌ alla enterraneterr all oñmampenet. Allempoña achmeꞌtarethtapoetpaꞌ acheñeneshaꞌñapaꞌ oꞌ alla matrraꞌterrerr allowen ñeñthe anetsoth. Ñetñapaꞌ patsoꞌmara oñmaxhaꞌtet ñanmakmoeta xhaxhaꞌtet all sechena Jesús poeyochreshowen.

³⁴ Allempoña sewosa Jesús allpaꞌ alla entwerraneterr oꞌ alla shontaꞌwerrerr acheñeneshaꞌ. Atarr nanak moeraꞌwerraneterr Jesús, tharroꞌmar ñetpaꞌ eꞌñe ateth entwerraneterr ñerraꞌmrratheꞌ carnero ñeñth ama akwamphsaretheyaye. Allempoña Jesúspaꞌ alla yexhatwerraneterr paꞌnamen esokmañen ñeñth Yompor poꞌkowenña.

³⁵ Attheñapaꞌ ellerren poeyochreshaꞌñapaꞌ oteñetaꞌ Jesús: —Theꞌpaꞌ arroꞌtseney all ama acheñempañoyaye ñamha oꞌkaꞌye ellerren.

³⁶ Theꞌpaꞌ oꞌch phoch acheñeneshaꞌ awanemyerretepaꞌ anetsoꞌmar allchaꞌ rañthaꞌyeswerret poerraret ñeñthchaꞌ rraꞌyeswerret tharroꞌmar arrpaꞌ ama es eñalle.

³⁷ Tharraña Jesúsñapaꞌ otan poeyochreshaꞌ: —Sachkaꞌye apaꞌyesawet ñeñthchaꞌ rret. Ñetñapaꞌ ateth ochet: —¿Añeꞌt pemnen oꞌch awey oꞌch yepomoenaꞌ shonteꞌ kelle ñeñth doscientos denario alloch yerañthenaꞌ pan ñeñthchaꞌ yerratwerranet allowenet?

³⁸ Jesúsñapaꞌ ateth oterraneterr: —Ñewa, sekwaꞌ pan, ¿errpontheꞌ sechen? Ñetña kowet panpaꞌ ateth otereterr: —Eꞌñekaꞌye amnara pan eñall ñamha epatholl kak.

³⁹ Allempoña Jesúspaꞌ ateth otan acheñeneshaꞌ: —Theꞌpaꞌ oꞌch sanorrxhaꞌtyes eꞌñe sopaꞌttsokma eꞌñe all kowen emmoꞌratyen pasetmaꞌ.

⁴⁰ Ñetñapaꞌ atethxhoꞌ pet. Anorrxhaꞌtyeset eꞌñe ñopaꞌttsokmoet—xharrasheñaꞌttsokma xharrapaꞌtets ñamha amnarsheñaꞌttsokma xharrapaꞌtets ñeñth anorrxhaꞌtyesets.

⁴¹ Allempoña Jesúspaꞌ agapan ñeñth amnar pan ñamha epatholl kak, kowaꞌ enoneth parasyosoꞌtamphsan pan. Allempoñapaꞌ shotaꞌtan panpaꞌ apanatyesan poeyochreshaꞌ, ñetñapaꞌ epatyeset allowen acheñeneshaꞌ ñeñth anorrxhaꞌtyets all, eꞌñe epaꞌwet. Ñamha shetseꞌtan kak atthoch epatyesanet allowenet.

⁴² Allempoñapaꞌ oꞌ rrallmeꞌchet allowenet eꞌñepaꞌtchaꞌ yetrraꞌtwawet.

⁴³ Eꞌñe yetwawetpaꞌ elloña xha aꞌpchatyeset kak ñamha pan ñeñth ashotaꞌtyesareth. Ñeñthña aꞌyapaxherretpaꞌ xhepaꞌtchaꞌ chorrerrets xharraꞌ poechena epa kañther.

⁴⁴ Ñeñthña rrallmeꞌchats atarr shonteꞌ acheñeneshaꞌ alloꞌtsen amnaroch mil ñeñth eꞌñe yakmaneshocheꞌ.

Allempo Jesúspaꞌ eꞌñe kowen chopeꞌchnen enoth oño

⁴⁵ Allempoña Jesúspaꞌ otan poeyochreshaꞌ: —Theꞌpaꞌ oꞌch saꞌtaxhaꞌt noñtho oꞌch sota sanom oꞌch sephchaterra yoth oꞌch sexherr anetso ñeñth paꞌsoꞌcheñ Betsaida. Allempoña Jesúspaꞌ oꞌ soꞌtnoman acheñeneshaꞌ.

⁴⁶ Soꞌtwanmanetpaꞌ ñañapaꞌ awoꞌ aspentho, allchaꞌ maꞌyochosa.

⁴⁷ Attheñapaꞌ oꞌ tsapoen, ñapaꞌ alloꞌtsenara eꞌñe ñapoeth aspentho. Noñthpaꞌxhoꞌña ñeñtha rroxhasoꞌtsenara saꞌpo.

⁴⁸ Allothña entenan poeyochreshaꞌ ñeñth noñthoꞌtsaꞌyen. Ñetñapaꞌ eꞌñe poꞌmoeroxhenñotheta echotnenet oñ tharroꞌmar orrnoñapaꞌ xha aꞌpoerrameꞌtampenanet. Attheña allempoña poetarenmochpaꞌ wenanet Jesús xha chopeꞌchnen enoth oño. Awoꞌch metanenanetañ,

⁴⁹ allempoña poeyochreshaꞌpaꞌ entapoeñet xha chopeꞌchnen enoth oño. Ñetñapaꞌ xha otenapoetañ choyesheꞌmatstheꞌ wapanet. Xha rrannartet poemhchañoth.

⁵⁰ Allowenetpaꞌ eꞌñe entwapet nanak yoreꞌtosanet. Jesúsñapaꞌ eñoranaꞌtwenanet, ateth otwenanet: —Xhoñakaꞌye sokshapoenna, nakaꞌye oꞌ nowapa, amach attha semhchaꞌtatstapno.

⁵¹ Allempoña Jesúspaꞌ aꞌtapos noñtho alloꞌtsaꞌyen poeyochreshaꞌ. Womenkëshaꞌñapaꞌ xhepaꞌtchaꞌ moetsoñeñterrtsa. Ñetñapaꞌ xha atarr kowanrrortapoeñet.

⁵² Ama xhenaneto poeyoxhreto amaꞌt attho Jesúspaꞌ atontatan pan, amakaꞌye es xhenaweto poeyoxhreto.

Allempo Jesúspaꞌ aꞌkrratyesosan paꞌnamen atsnañethexhno all Genesareto

⁵³ Allempoña pechatamphsetpaꞌ arr etsotoset all oteñet Genesareto.

⁵⁴ Allempo sowaxhaꞌtoset noñthoth, añña acheñeneshaꞌ ñeñth alloꞌtsaꞌyen, ñetñapaꞌ chemeꞌtapet Jesúspaꞌ

⁵⁵ allentha matrraꞌtyeset ora errakmañen all yexhaꞌyena acheñeneshaꞌ. Atthothkaꞌyeña wapatampesyesoñetña atsnañethexhno allemhatheñ. Amaꞌt erra eꞌmareꞌteñet oꞌ xhap all, allchaꞌxhoꞌ anmoñetña patsnañether poecheknapeꞌna.

⁵⁶ Amaꞌt erra xhapyen all shontena acheñeneshaꞌ ñamha ñerraꞌm arr xhen all ama tama eñalle acheñ, amaꞌt allekma oñen acheñeneshaꞌ ñetñapaꞌ allchaꞌxhoꞌ naꞌyenetaꞌ patsnañetheret allchaꞌ enamapet amaꞌt posoꞌmotha oꞌch aꞌphllapoñet paꞌshtam. Allpon ñeñth aꞌphllaꞌyesapoeꞌ Jesús paꞌshtampaꞌ allponxhoꞌ eꞌñe korraꞌyeswerrtsa.