San Marcos 4 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

All tomaꞌntatanet Jesús ñeñth aꞌparreꞌteneꞌ poerets

¹ Jesúsñapaꞌ alla yexhaterranerr acheñeneshaꞌ eꞌñe alla saꞌpatophño. Allña emchorraꞌwererr shonteꞌ acheñeneshaꞌ. Ñeñthoꞌmarña Jesúspaꞌ aꞌtap noñthopaꞌ awampes mameꞌ allpononeth allñapaꞌ anorros noñtho eꞌñe all saꞌpo. Acheñeneshaꞌña allowenetpaꞌ eꞌñe saꞌpatophñoꞌtsaꞌyenet all mastho.

² Allñapaꞌ esokmañen serrpareꞌtatenan acheñeneshaꞌ paꞌnamen tomaꞌnteñtsoxhno. All yexhatyenanetpaꞌ ateth otanet:

³ —Seꞌmhñoton añ ñeñth ateth notenes: Ñeñthña aꞌparreneꞌ poerets ñañapaꞌ awoꞌ allchaꞌ aꞌparreꞌtyenanaꞌ poepoer.

⁴ All aꞌparreꞌtyeñ patantaꞌtetsñapaꞌ alla xhapyes thoñoꞌmar. Allñapaꞌ waxhaꞌtyesa oth eꞌñe añyallmeꞌchwenanaꞌ poerets.

⁵ Poꞌpoñexhnoñapaꞌ alla xhapyes mapoetroꞌmesoꞌmar all ama tama eñalle pats. Ama nanak oꞌponoꞌtseno patso ñeñthoꞌmarña mamethollapaꞌ chepareswañ.

⁶ Oꞌña enomeꞌtaꞌmoen atsrrethpaꞌ alla aꞌwyatwer. Ama erxhaꞌtenaꞌ ñeñthoꞌmarña alla weyaꞌwerra.

⁷ Poꞌpotantañña poeretspaꞌ alla xhapyes allchaꞌ chepares aj. Allpaꞌxhoꞌ mameshapaꞌ chepareswañpaꞌ ajñapaꞌ mameshapaꞌ ateshaꞌtwa alla kaꞌmatwerranña narmets alla aꞌkllatwer, ñeñthoꞌmarña ama ellomhreꞌto.

⁸ Poꞌpotantañexhno ñeñthñapaꞌ arr xhapyes all eꞌñe kowen patso. Ñeñthñapaꞌ eꞌñe kowen chepares. Allempoña ateshaꞌtwapaꞌ oꞌ ellomhreꞌtyes. Atarr atonapaꞌtets ellomhreꞌtyes —poechaꞌtetspaꞌ maꞌpoch xharraꞌ poeꞌllomer, poꞌpchañexhnoñapaꞌ pechapoch xharraꞌ poeꞌllomer, poꞌpchañexhnoñapaꞌ xharroch xharraꞌ poeꞌllomer.

⁹ Allempoña Jesúspaꞌ alla oterraneterr: —Ñeñthes poꞌñoxh neꞌmhñoteneꞌ, xhaponasepaꞌch seyoxhro ñeñth ateth netmaꞌntatensa añ ñoñets.

Ateth otanet Jesús ñeñthekop ateth tomaꞌntatyenanet

¹⁰ Allempoña patmoerra acheñpaꞌ oꞌ ñapthamha Jesús epoet ñamha poeyochreshaꞌ ñamha poesheñaꞌtets poꞌpotantañ ñeñth alloꞌtsaꞌyen, ñetñapaꞌ ateth ochet Jesús: —Taꞌm ¿estheꞌña petmaꞌntatenyaña ñorraꞌ?

¹¹ Jesúsñapaꞌ ateth oterraneterr: —Sa theꞌpaꞌ Yomporña semnateneꞌ atthoch señoterr ñeñth ama eñotpawoyaye amaꞌt awathotheñ ateth penaña Yompor poꞌkowenña attho ayochreshathtena ña. Tharraña poꞌpotantañexhno ñeñth attha es poexhaꞌyetsa, ñokpoetpaꞌ ama eñoteñeto ñeñth ateth atmaꞌntatareth ñoñets.

¹² Atthoña amaꞌt enteñetañ ñetñapaꞌ amach errothenoth es xhapaweto poeyoxhreto. Amaꞌt eꞌmoeñetañ amach xhenanetoña poeyoxhreto ñeñth ateth yexhateney Yompor poꞌkowenña. Atthoña amach kothapeꞌcherreto ello kowen Yomporekop atthoch ñach peretnerrawet poꞌchñaret.

Arrpaꞌ all eñotatanet Jesús ñeñth tomaꞌntatenanet ñeñth aꞌparreꞌteneꞌ poerets

¹³ Jesúsñapaꞌ alla oterraneterr: —Sapaꞌ amaꞌt mameshapaꞌ areꞌt señotenoña ñeñth oꞌ netmaꞌntatwasa ñorraꞌ. Ñerraꞌm ama xhennaso seyoxhro ñeñth oꞌ netmaꞌntatwasa ñorraꞌpaꞌ errothenotwachñakaꞌyeña xhaponasaña seyoxhro allowen poꞌpoñexhno ñeñthchaꞌ netmaꞌntaterrserr tsapathoneth.

¹⁴ Allempoña Jesúspaꞌ eñotatanet ñeñth ateth oꞌ tomaꞌntatwanet ñoñets ñokpoet, ñeñthpaꞌ ateth otanet: —Ñeñth aꞌparreꞌtyeneꞌ poerets, ñeñthña poeretspaꞌ añkaꞌye notenes Yompor poꞌñoñ allempo serrpareꞌteñet.

¹⁵ Añ poerets ñeñth xhapyets thoñoꞌmar ñeñthpaꞌ añ notenes acheñeneshaꞌ ñeñth eꞌmhñotenayeñ Yompor poꞌñoñ. Allempo eꞌmhñotwetpaꞌ allorokmach wapa oneñeth oꞌch alla poerratamperranet Yompor poꞌñoñ amaꞌt allpon ñeñth eñotetañ poeyoxhreto.

^16-17 Ñamha ñeñth xhapyesets mapoetroꞌmesoꞌmar ñeñthpaꞌ añ notenes acheñeneshaꞌ ñerraꞌm esempo eꞌmhñoteññañet Yompor poꞌñoñ eꞌñech allorokma poksheñeshaꞌ agëññañetañ Yompor poꞌñoñ. Eꞌñech kowen ameꞌñeretañ tharraña ñeñthpaꞌ mamekpach ateth penet. Tharroꞌmar ñetpaꞌ eꞌñe ateth penet ñerraꞌmrratheꞌ narmets ñeñth chepoets mapyo amach eñalle poerexh. Tsapathonethña ñerraꞌm oꞌch wapanet topateñets ñeñthchaꞌ moeroxhtatawet tharroꞌmar ñetpaꞌ oꞌ ameꞌñeretañ Yompor poꞌñoñ, ñetñapaꞌ allorokmach alla kexhpoerrñañet Yompor poꞌñoñ.

¹⁸ Ñamha poꞌpoñexhno poerets ñeñth xhapyets ajmoꞌmar ñeñthpaꞌ añ netmaꞌntatena poꞌpotantañ acheñeneshaꞌ ñeñth eꞌmhñotenayeñ Yompor poꞌñoñ.

¹⁹ Amaꞌtchaꞌ xhapanetañ poeyoxhreto tharraña ñetpaꞌ alloꞌnach senet eꞌñech aña atarr kothapeꞌchenet ñeñth llekaꞌyenet arr patsro ñeñth eꞌñe ñokpoeta. Añach moenenet oꞌch esokmañen es echyenet tharraña ñeñthpaꞌ xhakaꞌye shekënanet. Atthach paꞌnamen yeꞌchatseꞌtyenet. Atthoña wenanet topateñets ñeñthoꞌmarña ñetpaꞌ amach errothenoth orrtatoñetoña ñeñth eꞌñe kowen enten Yompor. Ñetpaꞌ eꞌñe attheta ñerraꞌm narmets ñeñth xha kaꞌmateñ ajmaꞌ ñeñthoꞌmarña amach errothenoth meꞌteneto oꞌch ellomhreꞌtyeset.

²⁰ Ñamha añ poerets ñeñth xhapyesets eꞌñe kowen patso ñeñth eꞌñe kowen cheparsatspaꞌ ñeñthña tomaꞌntenaya poꞌpotantañ acheñeneshaꞌ ñeñth eꞌmhñoteneꞌ Yompor poꞌñoñ. Ñoñetsñapaꞌ eꞌñech kowen xhenanet poeyoxhreto. Ñetñapaꞌ ñeñthet poꞌñoxh orrtatenet ñeñth atarr sherbets Yomporekop. Atthoña ñetpaꞌ eꞌñe ateth penet ñerraꞌm narmets ñeñth atarr meꞌtets—patheꞌtets maꞌpoch xharraꞌ poeꞌllomer, poꞌpoñpaꞌ pechapoch xharraꞌ poeꞌllomer, poꞌpoñpaꞌ xharroch xharraꞌ poeꞌllomer.

Arrpaꞌ all tomaꞌntatanet lampareñ attho xhoyoꞌtampeney

²¹ Jesúsñapaꞌ alla tomaꞌntaterraneterr, ñeñthpaꞌ ateth oterraneterr: —Ñerraꞌm esempo yaꞌllchaten lampareñ, ñeñthpaꞌ ama añekpayeꞌ yewapateñe oꞌch alla yeꞌrramamphsos koymho. Ñamha ama añekpayeꞌ yaꞌwortatenoña lampareñ oꞌch yeneꞌ oꞌponoth yemayephnaxho. Añekopña yaꞌwortatenña lampareñ oꞌch yeneꞌ enoneth atthoch xhoyoꞌtampeswan allowen ñeñth alloꞌtsaꞌyen.

²² Tharroꞌmar allowen paꞌnamen ñeñth ama eñotpawoyaye amaꞌt awathotheñ, theꞌñapaꞌ oꞌch eꞌñe orrtatarethterra atthochña oꞌch eꞌñe eñotatarethetwerret eꞌñe poktakma.

²³ Ñeñthes poꞌñoxh neꞌmhñoteneꞌ xhaponasepaꞌch seyoxhro ñeñth ateth netmaꞌntatensa añ ñoñets.

²⁴ Jesúspaꞌ alla oterraneterr: —Sapaꞌ señotenatheꞌ eꞌñetheꞌ poꞌñoxh kowen seꞌmhñoteññañ Yompor poꞌñoñ ñatoꞌpaꞌ amatheꞌ. Tharroꞌmar ñerraꞌm erroth sephoñ poꞌpsheñeñ ñeñth ama kowenayaye Yomporñapaꞌ atthekmach perres samha. Ñamha ñerraꞌm eꞌñe kowen sepenanet, Yomporñapaꞌ eꞌñech kowen perres samha amaꞌt elloneth oꞌch apoerres ñeñth eꞌñe kowen.

²⁵ Tharroꞌmar eseshaꞌtheꞌ xhena poeyoxhro amaꞌt eꞌñe allpona Yompor poꞌñoñ, elloña Yomporpaꞌ alloꞌnach eñotatnenanet nanak shonteꞌ. Tharraña eseshaꞌña ñerraꞌm ama xhenaneto poeyoxhreto tharroꞌmar ñetpaꞌ ama poꞌñoxhayeꞌ agëññañeto Yompor poꞌñoñ, amaꞌt allpon eñotyenetañ poeyoxhro ñeñthñapaꞌ xhach poerratamperranet Yompor.

All tomaꞌntatanet poerets ñeñth eꞌñe kowen chepyets

²⁶ Jesúspaꞌ alla tomaꞌntaterraneterr, ñeñthpaꞌ ateth oterraneterr: —Yompor poꞌkowenña ñeñth attho ayochreshathtena ña, ñeñthpaꞌ ateth pena ñerraꞌmrratheꞌ poesheñarr acheñ ñeñth nareꞌteneꞌ poepoer. Oꞌchña nareꞌtwepaꞌ oꞌch awerr paꞌpakllo.

²⁷ Allach allponmaterraꞌ oꞌch tsapoenpaꞌ allach moeneꞌth, yethoñapaꞌ xhokmach tantaꞌmoeneꞌth, poepoerñapaꞌ attheñapaꞌ oꞌch chepwa oꞌch ateshaꞌta. Pamoꞌmteꞌñapaꞌ amach eꞌñeyeꞌ eñoteñe errothenoththeꞌña chepyen.

²⁸ Ñewa, yeñoteñ patspaꞌ ñeñthkaꞌye aꞌchpateneꞌ yepoer eꞌñe ñotha. Xhoch ñanom xhoꞌpeꞌchyes allempoñapaꞌ oꞌch atarrchet xhoch potsets atthoch ellomhreꞌtyes, atthothachxhoꞌ eꞌñe poꞌnwen.

²⁹ Eꞌñe errteꞌ poꞌnetspaꞌ eꞌñech allorokma moeñan ñeñthchaꞌ tsorrenayaꞌ. Oꞌkaꞌ xhen allempoch apxhenetña ñeñth narmetser.

Attho Jesúspaꞌ tomaꞌntaterranet ateth pena poeꞌllomer ñeñth otenet mostazllomh

³⁰ Jesúsña ellonethpaꞌ ateth oterraneterr: —Añ Yompor poꞌkowenña ñeñth attho ayochreshathtena ña— ñanompaꞌ eꞌñech poesheñaꞌttsa ameꞌñaꞌyestsa, allempotheññapaꞌ alloꞌnach sen atonetnomtsa ñeñthchaꞌ ameꞌñerrtsa, atthochña eꞌñe epaꞌwerra errakmañen Yompor poꞌkowenña. Ñeñthña theꞌpaꞌ oꞌch netmaꞌntatasa ñeñth ateth pena ña.

³¹ Ñeñthpaꞌ ateth pena ñerraꞌmrratheꞌ añ poeꞌllomer ñeñth atarr añetholleshallmerr ñeñth otenet mostazllomh. Ñeñthña poeꞌllomhrethollpaꞌ oꞌch nareꞌchet patso. Ñewa, eꞌñe yeñoteñ mostazllomh ñeñthpaꞌ atarrkaꞌye nanak añetholleshallmerr.

³² Tharraña ñerraꞌm oꞌch nareꞌchetpaꞌ allempoña choppaꞌ alloꞌnach sen rrorranmats kowen, atarrchetnomoets, elloch metanaꞌtwan poꞌpchañ narmetsoxhno. Poetakreꞌnach ateshatakrerrtatsa. Allñapaꞌ oꞌch waxhaꞌtoña othexhno oꞌch rremaꞌrrartosa poetakroꞌmar poꞌmañthero.

Jesúspaꞌ ora allpon ñeñth ateth yexhatyenan acheñeneshaꞌ ñeñthpaꞌ attho paꞌnamen es tomaꞌntatyenanet

³³ Shonteꞌ poꞌpoñexhno ñeñth alla tomaꞌntaterraneterr attho serrpareꞌtatenanet Yompor poꞌñoñ. Atthoña eꞌñe allpona serrpareꞌtatanet ñeñthñapaꞌ eꞌñe kowen eñotatanet poeyoxhreto.

³⁴ Ama serrpareꞌtatenaneto attha, añña xhokma serrpareꞌtatenanet tomaꞌnteñtso. Ellonethpaꞌ xhokma eꞌñe eñotoxhen serrpareꞌtatenan poeyochreshaꞌ.

Allempo aꞌmchecherran Jesús womenkëshaꞌ ñamha saꞌp ñeñth emoꞌyarertetsa

³⁵ Ñeñthe yethrokma eꞌñe ellerroneth Jesúsñapaꞌ otan poeyochreshaꞌ: —Theꞌpaꞌ oꞌch awamphsey yomhtaꞌn.

³⁶ Poeyochreshaꞌna sowanmet acheñeneshaꞌ. Ñeñthara noñtho alloꞌtsen Jesúspaꞌ alloña anmampeñet Jesús oꞌch awamphset yomhtaꞌn. Allñapaꞌ kothaꞌwanmanet poꞌpnañexhno noñthexhno.

³⁷ Allempo awamphset allñapaꞌ machayothepaꞌtchaꞌ womenkëshatampesnomoet. Emoꞌyareꞌña xha eshaꞌtena noñtho attheña oññapaꞌ chorramoch noñtho.

³⁸ Jesúsñapaꞌ alla moen poepopato alla ñotena. Poeyochreshaꞌña opoeretpaꞌ ateth ochet: —¡Maestro, amawakaꞌye pellkënyotheꞌ oꞌrramcheꞌ yokllaꞌwamocha!

³⁹ Jesúsña tanterrapaꞌ eꞌñe poꞌñoñotha aꞌmtsoññetwerran womenkëshaꞌ. Ñamha poꞌñoñotha aꞌmtsoñeñterran saꞌp ñeñth emoꞌyartetsa, ñeñthpaꞌ ateth ot: —¡Moechecherrepaꞌ, moetsoñeñterrepaꞌ! Eꞌñe otweꞌpaꞌ xha moechecherrtsaña womenkëshaꞌ. Atthoña ñetpaꞌ oꞌ alla moechethtamperret eꞌñe kowen.

⁴⁰ Allempoña Jesúspaꞌ ateth otanet: —Sapaꞌ esoꞌmareꞌtña xha atarr seyoren. Esoꞌmareꞌtña ama eꞌñeyeꞌ seyemtenno.

⁴¹ Ñetñapaꞌ xha atarr nanak yorenet, ateth otannaꞌtyeset: —Taꞌmkaꞌye añ acheñerpaꞌ esonaꞌtartheꞌkaꞌye. Atarrepaꞌt es aꞌmchechaten, amaꞌt poꞌñoñothapaꞌ aꞌmchechaterran womenkëshaꞌ amaꞌt ñamha emoꞌyareꞌ oñ.