San Marcos 16 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Attho tanterra Jesús

¹ Oꞌña wañ yeth allempo amesenet, María Magdalena ñamha Salomé ñamha poꞌpsheñeñ María ñeñth Jacobo pachor, ñetñapaꞌ rañthaꞌyesnenet eñmosath ñeñthchaꞌ anmaꞌmoenet tsapath Jesús poepampro alloch aꞌyanaꞌteretaꞌ amaꞌt rromotha.

² Tsapath allempo mothtaꞌmoena yethñats temenk ñetñapaꞌ eꞌñe awathekma awanmaꞌmoenet Jesús poepampro. Oꞌ thaya wapaꞌmoena atsneꞌpaꞌ allempo awanmaꞌmoenet.

³ Ñetñapaꞌ otannaꞌtyesnomoet: —Taꞌ, eseshaꞌch aꞌrrotheꞌteꞌña mapoeꞌ añekmoen ñeñth allo yottampeñet atthoch yebeꞌthos all poepampro eshekchaꞌ yaꞌyanaꞌteraꞌ eñmosatho.

⁴ Ñetña xhapatseta all, kowostseta entoset mapoeꞌ oꞌ aꞌrrotheꞌtarethtena aꞌyeneth, amaꞌt ñeñth mapoeꞌpaꞌ añekmoen.

⁵ Ñetña allempo beꞌthososet poepampro allñapaꞌ all entoset poesheñarr wepoeshaꞌ all anen poꞌkowenroth. Paꞌshtamñapaꞌ atarr wallamaꞌth, xha thorats phanet poeyoxhret.

⁶ Ñeñthña mellañotheñerpaꞌ ateth otapanet: —Amach xha seyorenatsto. Napaꞌ neñotenes añkaꞌye semnen oꞌch sentaꞌmoeñ Jesús ñeñth otenet nazaretoꞌmarneshaꞌ ñeñth oꞌ korsoꞌtamperret. Tharraña ña theꞌ oꞌkaꞌye tanterra, ama arroꞌtsenaro. Sekweñaꞌkaꞌye all neretañ, amakaꞌye eñalle.

⁷ Allempoña mellañotheññapaꞌ alla oterraneterr: —Theꞌpaꞌ oꞌch awerres oꞌch sotwer Pedro ñamha poꞌpotantañ poeyochreshaꞌ, Jesús oten oꞌch ota oꞌch awerr Galileo. Xhoschaꞌña awanmatsa samha allochñapaꞌ allchaꞌ senter ñeñth ateth otaseꞌth awaña.

⁸ Allempoña koyaneshaxhno ateth otarethtet all Jesús poepampro, ñetña xhaꞌnmaxherretpaꞌ matenakma awanerret poꞌyorñothetpaꞌ xha yonshemaꞌtyesnerret. Pomhchañothet amaꞌt eꞌñe eseshapaꞌ ama errothenayeꞌ otenayeꞌ entnerreto.

Allempo tanterra Jesúspaꞌ añ ñanom orrterra María Magdalena

⁹ Ñewa, awathekma tanterra Jesús añe yethro allempo mothtaꞌmoenerr yethñats temenk. Allempo tanterrapaꞌ añ ñanom orrterra María Magdalena. Ñeñthña Maríapaꞌ kanxherrsheña oneñeth ñeñth chorrayeꞌth Jesúsñapaꞌ eꞌñe kexhpatamphsatwer.

¹⁰ Maríañapaꞌ allentha awoꞌ oꞌch otenanaꞌ ñeñth epoet yemteꞌth Jesús all poellkëñothet atarr yawanrrortenet.

¹¹ Ñetña allempo eꞌmareꞌchet oꞌ tanterra Jesús, Maríapaꞌ oꞌkaꞌye enter, ñetñapaꞌ arepaꞌtchaꞌ ameꞌñyeto.

Allempo Jesúspaꞌ orrterrana ñamha epsheña poeyochreshaꞌ

¹² Poꞌpocheño Jesúspaꞌ eꞌñe poꞌpoñoth orrterrana epsheña poeyochreshaꞌ allempo chopeñeꞌchnenet allampañoꞌmar.

¹³ Ñetñapaꞌ allentha poerrerret oꞌch otweret poꞌpotantañ, arepaꞌtchaꞌña ameꞌñarethtapoerreto ñeñth ateth enteret ñamet Jesús.

Attho Jesúspaꞌ otnerran poeyochreshaxhno ñetpaꞌ atethchaꞌ phaꞌyerret

¹⁴ Poꞌpocheño Jesúspaꞌ alla orrterranerr poeyochreshaꞌ xharrasheña ñeñth poechetsa patherr all rrallmeꞌchenet. Ñañapaꞌ ateth kothapeꞌchatwenanetpaꞌ ateth otwenanet: —Sapaꞌ esoꞌmareꞌtña ama sameꞌñeñoña poꞌpotantañ ñeñth soteneꞌ napaꞌ oꞌkaꞌye netanterra tharroꞌmar ñetpaꞌ xhokaꞌye enterrnet. Tharraña sapaꞌ amakaꞌye es sexhenoyo seyoxhro.

¹⁵ Allempoña Jesúspaꞌ ateth oterraneterr: —Theꞌpaꞌ oꞌch awyeses ora errapharen allowanen añ patser, seserrpareꞌtach allowen acheñeneshaꞌ añ kowen ñoñets alloch aꞌkeshphatarethterret.

¹⁶ Allowen amaꞌt erraꞌtsena ñeñthchaꞌ ameꞌñerraya añ kowen ñoñets ñamha ñeñth pameꞌñeñothetpaꞌ apatarethterretchaꞌ ñetñapaꞌ aꞌkeshphatarethterretchaꞌ. Tharraña ñeñthchaꞌ ama ameꞌñerrtso, ñetñapaꞌ amñarethterrach koñcheñtso.

¹⁷ Ñeñthchaꞌ nameꞌñerraya ñokpoetpaꞌ norrtaterranetchaꞌ nepartsoña. Eꞌñe na nesoꞌchñoch kexhpatyesetchaꞌ oneñethexhno, ñamha eñosyesetchaꞌ poꞌpoñeꞌttsokma ñoñtso.

¹⁸ Ñamha ñerraꞌm eꞌñe potothet chetetchaꞌ shecheph, tharraña amach erroth phaneto; ñamha amaꞌtchaꞌ añ orret ñeñth amtsañtetsa tharraña amach erroth phaneto. Ñamha ñerraꞌm esempoch aꞌphllaꞌyeñet atsnañeth, atsnañethñapaꞌ akrrerrocheꞌch.

Allempo aꞌterr Jesús poeꞌntaño

¹⁹ Oꞌña ateth otwanerranet Partseshaꞌ Jesúspaꞌ allentha aꞌtapater Pompor poeꞌntaño, allñapaꞌ anorrwen eꞌñe Pompor poꞌkowenroth, all partsotapretwera.

²⁰ Poeyochreshaꞌñapaꞌ awanomyeset, serrpareꞌtyesnomoet errapharen. Partseshaꞌ Jesúspaꞌ xhokma thorrapretenanet, orrtatenanet poꞌpartsoña atthoch acheñeneshaꞌ eꞌñech eñotenanet ñeñth ateth serrpareꞌtyenet, ñeñthpaꞌ eꞌñe poꞌñoxh Parets poꞌñoñ. Ñeñthpaꞌ atthetepaꞌch Nompore. Allowa.