San Lucas 19 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Attho Jesús epoet ñamha Zaqueo eñoranaꞌtannenet

¹ Allempoña Jesúspaꞌ xhap all anetso Jericó, all oñmos anetsoꞌmar.

² Allñapaꞌ alloꞌtsen poesheñarr yakma ñeñth sochetsa Zaqueo ñeñth paꞌmhchaꞌtarether peñ allowen ñeñth cobraꞌyeneꞌ acheñeneshaꞌ kelle gobiernokop. Ñañapaꞌ atarr ekhllayoreth.

³ Zaqueoñapaꞌ atarr moeneñ oꞌch entapan ñeñth otenet Jesús. Ñewa, ñapaꞌ amach errothenoth entapano Jesús tharroꞌmar shonteꞌ acheñ ñeñth emchorraꞌnenaya all oñen ñamha Zaqueopaꞌ allponmetholla.

⁴ Ñeñthoꞌmarña ñapaꞌ mata allenethchaꞌ oñem, aꞌtapos tsacho ñeñth paꞌsoꞌcheñ sicómoꞌrech allothchaꞌ entapan Jesús tharroꞌmar allchaꞌ oñem.

⁵ Allempoña xhap Jesús eꞌñe ñesho, kowostsa enonethpaꞌ alla entos, ñañapaꞌ ateth otos: —Zaqueo, peswerra thekma. Theꞌ napaꞌ eꞌñe poktennana oꞌch nexhap pepakllo.

⁶ Ñañapaꞌ allentha sowerra thekma eꞌñe poksheñeshaꞌ agapaph.

⁷ Allempoña acheñeneshaꞌ ateth eñchet, ñetñapaꞌ amaꞌt mameshapaꞌ ama pokteyeꞌ es entaye. Ñetpaꞌ ateth otannaꞌtyeset: —Esoꞌmarchaꞌkaꞌyeña beꞌthososña Jesús allchaꞌ mos añ acheñer paꞌpakllo ñeñth atarr nanak ochñath.

⁸ Zaqueoñapaꞌ allentha thomwerrpaꞌ ateth otapan Partseshaꞌ: —Theꞌpaꞌ oꞌch peꞌmhñotosen, Ayochreshathe. Ñeñth ora allpon nechyen, theꞌñapaꞌ oꞌch napaꞌyer poeshmet wokchañneshaxhno. Poꞌñoxh allempo es neprratampesyeseꞌth poesheñaꞌtetspaꞌ theꞌñapaꞌ paꞌtatsocheꞌtatschaꞌ napoerranet.

⁹ Jesúsñapaꞌ ateth otos: —Theꞌñapaꞌ oꞌ xhapanet allowenakop ñeñth yexhetsa añ pokollro alloch aꞌkeshphatarethterret. Amaꞌt ñapaꞌxhoꞌña Abrahamkaꞌye poꞌmhreneñ.

¹⁰ Na Ñeñthen Acheñetosets ñeñthoꞌmarña nowapa añe patsro oꞌch neꞌnyesos acheñeneshaꞌ ñeñth chenkëtsa ñeñthchaꞌña naꞌkeshphatyesos.

Arrpaꞌ all atmaꞌntatarethtena xharrasheña ñeñth aparethtatsa kelle eꞌñe allponeshapaꞌttsokma

¹¹ Acheñeneshaꞌ oꞌ eꞌmhñotenet shonteꞌ ñeñth ateth serrpareꞌtatanet Jesús ñeñth ateth pena Yompor poꞌkowenña, ñamha Jesúspaꞌ oꞌ xhapmoch Jerusaléño. Ñeñthoꞌmarña ñetñapaꞌ xha otenapoetañ allempokmach etsota allempopaꞌ ñach amhchaꞌtarethtatsa Yomporeshoth arr patsro. Ñeñthoꞌmarña elloña ñapaꞌ tomaꞌntatanet poꞌpoñ.

¹² Ñeñthpaꞌ ateth otanet: —Eñall poesheñarr acheñ ñeñth eꞌñe kowen amhchaꞌnaꞌtpoꞌ entyen allowen acheñeneshaꞌ amaꞌt eꞌñe pamoꞌtseshowen. Ñeñthña acheñerpaꞌ arr sechena bhaxhayo poꞌpoñ anetso allothchaꞌ apet llesens atthoch esempoch werrapaꞌ oꞌch amhchaꞌtarethetwerra all paꞌnyo.

¹³ Allempo ama senaꞌpaꞌ agotatnoman xharrasheña paꞌtarwasañer ñeñthchaꞌ apaꞌyesnom allponeshapaꞌtets kelle eꞌñe poesheñaꞌttsokmoet. Allempo apaꞌyesnomanetpaꞌ ateth otyesnomanet: “Añ kellepaꞌ oꞌch setarwasach nokop. Esempoch newerrapaꞌ allempochña eꞌñe neñotwerrnas eꞌñe poesheñaꞌttsos errpontheꞌ kelle seganaꞌyesa ñeñth nokop.”

¹⁴ Tharraña patantarr acheñeneshaꞌ ñeñth paꞌnyoꞌmarneshaꞌ, ñetñapaꞌ atarr eꞌmoñeꞌteñet. Ñeñthoꞌmar allempo ta ñeñth anetsro, ñetñapaꞌ moeñet allponsheña ñeñthchaꞌ eñososets all sen oꞌch oteñetaꞌ alloꞌmarneshaꞌ: “Yapaꞌ ama yemno oꞌch seneꞌ añ acheñer oꞌch amhchaꞌtarethta yokop.”

¹⁵ Tharraña amaꞌt ateth petañ ñokopñapaꞌ xhokmach apet llesens atthoch werra oꞌch amhchaꞌtarethetwerra all paꞌnyo pamoꞌtseshakop. Allempoña xherrpaꞌ agotatwerran paꞌtarwasañreneshaꞌ ñeñth apaꞌyesnom kelle awaña. Ñapaꞌ añekopña agotatyeswerranet oꞌch eñotwerranet errpontheꞌ kelle ganatyesñañet poꞌkhllayor eꞌñe poesheñaꞌttset.

¹⁶ Atthoña apxhaꞌwerranet ñeshopaꞌ ñeñth ñanom wapatsapaꞌ ateth otos: “Ayochreshathe, ñeñth allpon phapaꞌnmoen awaña kelle, nañapaꞌ ello neganaterrnaperr pekhllayor xharroch.”

¹⁷ Pamoꞌmteꞌñapaꞌ ateth otwer: “Eꞌñe pokteꞌ, phapaꞌ atarr kowen pesherbenen. Amaꞌt allponatholla napaꞌnmaph awaña, phañapaꞌ atarr kowen pesherbhaton. Ñeñthoꞌmarña theꞌpaꞌ oꞌch nenwerreph xharrakop anets allchaꞌ paꞌmhchaꞌtarethterra pha.”

¹⁸ Allempoñapaꞌ oꞌ wapa ñamha poꞌpsheñeñ paꞌtarwasañerpaꞌ ñapaꞌxhoꞌña ateth otos: “Ayochreshathe, na ñeñth allpon phapaꞌnmoen awaña kelle, nañapaꞌ ello neganaterrnaperr pekhllayor anmaroch.”

¹⁹ Pamoꞌmteꞌñapaꞌ ateth otwer: “Eꞌñe pokteꞌ, theꞌpaꞌ oꞌch nenwerreph phamha amnarekop anets allchaꞌ phaꞌmhchaꞌtarethterra phamha.”

²⁰ Allempoñapaꞌ wapa poꞌpsheñeñ paꞌtarwasañer, ñapaꞌxhoꞌña ateth otos: “Ayochreshathe, arrpaꞌ ñeñtha allponara ñeñth eꞌñe allpona phapaꞌnmoen awaña kelle. Napaꞌ alla naññoꞌtennaph eꞌñe kowen nepennaph pañello.

²¹ Napaꞌ xha nemhchaꞌteneph tharroꞌmar neñoteneph phapaꞌ amakaꞌye matsrreꞌmñape. Phapaꞌ xhokmakaꞌye peprratampesyen amaꞌt ñeñthpaꞌ ama phoyaye, ñamha xhokmakaꞌye pethotatyenña ñeñth ama phayeꞌ nareꞌtatyenaye.”

²² Pamoꞌmteꞌñapaꞌ ateth otwer: “Phaña poꞌñoxhpaꞌ amakaꞌye kowenayeꞌ pesherbenno amaꞌt eꞌñe mamesha. Eꞌñe ateth photenen napaꞌ atarroꞌ atsrreꞌmñathen theꞌñapaꞌ poꞌñoxh atethchaꞌkaꞌye natsrreꞌmoxhtanaꞌtwerrephchaꞌ. Ñerraꞌm poꞌñoxh peñotennoñ napaꞌ atarr atsrreꞌmñatheneñ, ñerraꞌm poꞌñoxh xhokma neprratampesyeneñ ñeñth ama noyaye, ñamha napaꞌ ñerraꞌm poꞌñoxh xhokma nethotatyeneñ ñeñth ama nayeꞌ nareꞌtatyenaye,

²³ ñerraꞌm poꞌñoxh ateth pentennoñpaꞌ, esoꞌmarwañakaꞌyeña ama bancoyeꞌ penennanoña nekhllayor allochñapaꞌ theꞌña oꞌ newerrapaꞌ nagapoerreñchaꞌ nekhllayor allo atontateñet.”

²⁴ Allempoña pamoꞌmteꞌpaꞌ ateth otan ñeñth thomxhaꞌtyets all: “Theꞌpaꞌ oꞌch seprratampeswer kelle, oꞌch sapoer ñeñth ganateneꞌ xharroch nekhllayor.”

²⁵ Ñetñapaꞌ ateth ochet: “Ayochreshathe, ñapaꞌ echenankaꞌyeña shonteꞌ kelle ñeñth ganena xharroch.”

²⁶ Pamoꞌmteꞌñapaꞌ ateth oterraneterr: “Tharraña amaꞌt attheñpaꞌ theꞌpaꞌ oꞌch notas, ñeñth es echets shonteꞌ eꞌñe poesherbhateñothet pamoꞌmteꞌ ñetña ellonethpaꞌ oꞌch alla aparethterret poꞌpoñ aton. Tharraña ñeñth ama es echetsopaꞌ amaꞌt allponatholla ñeñth echyenetañ aprratamphsarethterretchaꞌ.

²⁷ Ñamha theꞌpaꞌ añña ñeñth neꞌmoñeꞌteneꞌ ñeñth ama moenenaye oꞌch naꞌmhchaꞌtarethta ñokpoet, theꞌña sapaꞌ oꞌch sewapatanet atthoch semtsanatosanet eꞌñe arr nesho.”

Allempo xhap Jesús Jerusaléño

²⁸ Allempoñapaꞌ awerrerr Jesús Jerusaléñoneth.

²⁹ Xhapmochet aspentho ñeñth paꞌsoꞌcheñ Olivopen alloꞌtsen anets ñeñth Betfagé ñamha Betania. Oꞌ xhapmochet all Jesúsñapaꞌ

³⁰ ateth otosan epsheña poeyochreshaꞌ: —Sapaꞌ oꞌch sota oꞌch sexhap aꞌyentheyeꞌ eꞌñe allara anetso. Oꞌch sexhap allpaꞌ allchaꞌ sentos ashen rreꞌptor all wankëñet; ñeñthpaꞌ amaꞌt poesheñarra acheñ ama monteñaꞌ. Ñeñthña ashenpaꞌ oꞌch sepyamphsospaꞌ oꞌch sanerrnan arr.

³¹ Ñerraꞌm eseshaꞌch sotapoeꞌ: “¿Esoꞌmareꞌt sepyampeñña ashen?” sañapaꞌ atethchaꞌ sotosanet: “Yepartsesharkaꞌye moeneneꞌña añ ashen.”

³² Allempoña ñeñth moeñapaꞌ ñetñapaꞌ awanmoet all anetso. Allñapaꞌ atethxhoꞌ entoset eꞌñe ateth otanet Jesús, alloꞌtsenkaꞌye ashen rreꞌptor all wankëñet.

³³ Allempo poeyamphsosetpaꞌ pamoꞌmteꞌñapaꞌ ateth otapanet: —¿Esoꞌmareꞌtchaꞌña sepyamphsosnayña yashanor?

³⁴ Ñetñapaꞌ ateth otosñañetña ashen pamoꞌmteꞌ: —Yepartsesharkaꞌye moeneneꞌña añ ashen.

³⁵ Allempoñapaꞌ anerretña ashen Jesúsesho. Nowerret paꞌshtam ashnacheꞌñopaꞌ montatweret Jesús.

³⁶ Allempo montaꞌnma Jesús alleneth sen, acheñeneshaꞌñapaꞌ thothmaꞌtyesoñet paꞌshtam thoño allchaꞌ oñem.

³⁷ Attheñapaꞌ oꞌ xhapmochet Jerusaléño. Allempo aꞌnososet Olivophnoth shonteꞌ acheñeneshaꞌ ñeñth ameꞌñenaya Jesúspaꞌ ñetñapaꞌ allotheñ eꞌñe koshaꞌrrtoset. Eꞌñe poksheñeshaꞌ awanenet, panoꞌtatseꞌteñeshaꞌ ayeꞌchoxhtatneññañet Yompor, tharroꞌmar atarr kowen entnenet attho Jesúspaꞌ atarr orrtatenanet Pompor poꞌpartsoña.

³⁸ Ñetñapaꞌ ateth otyesnenet: —¡Ayeꞌchoxhtaterrapoꞌch Amhchaꞌtareth Jesús ñeñth llesensen Yompor! ¡Kosherretepaꞌch amaꞌt ñeñth poeꞌntañoꞌtsen! ¡Ayeꞌchoxhtaterrapoꞌch ñamha Yompor Parets ñeñth poeꞌntañoꞌtsen!

³⁹ Fariseoneshaꞌña poesheñaꞌtets ñeñth alloꞌtsaꞌyen ñeñth ama ameꞌñenaye Jesús, ñetñapaꞌ ateth otapet Jesús: —Maestro, pecheꞌptareꞌtayeꞌchyesnomhñakaꞌyeña peyochreshaxhno atthoch amach alloꞌna attha axhotatsetnenpeto.

⁴⁰ Tharraña Jesúsñapaꞌ ateth otosanet: —Napaꞌ oꞌch notas, amaꞌtchaꞌ ateth notatstanetañpaꞌ moemaꞌrrtetañchaꞌ, mapyexhnoñapaꞌ poerranareꞌteñothetpaꞌ naxhotenayach.

⁴¹ Allempo oꞌ eꞌñe xhapmochet attho entosan anets Jerusaléñ, Jesúsñapaꞌ atarr yaꞌnaꞌtosan jerusaléñoꞌmarneshaꞌ.

⁴² Allpaꞌ ateth eñorosa ñokpoet: —Atarr nemneñeñ amaꞌt eꞌñe thayekma poꞌñoxh sapaꞌxhoꞌña oꞌtheꞌ señotereñ errothenchaꞌ seperra atthoch Yomporpaꞌ oꞌch aꞌkeshphaterrsoñ eꞌñech soksheñeshaꞌ sokrrerrañ. Tharraña saña themeꞌttsen ñeñthñapaꞌ amaꞌt mameshapaꞌ ama xhennaso seyoxhro.

⁴³ Tharroꞌmar napaꞌ oꞌch notas, poꞌñoxh oꞌch xhap allempoch ñeñth seꞌmoñeꞌteneꞌpaꞌ konxhaꞌtamperrnasetchaꞌ saꞌnetser atthoch eꞌñe rroxhtamperrset allemhatheñ sathephothpaꞌ waxhaꞌtonasetchaꞌ, atthoch amach erreneth seyeterro amaꞌt eꞌñe poesheñarrothesa.

⁴⁴ Aꞌmataꞌtwerrnasetchaꞌ ora allowen saꞌnetser atthoch sepaklleꞌnachña eꞌñe saꞌtpetseꞌtwerreꞌ allowenes amaꞌt sakñetharetholleshowen. Allo sorraten sepakëll amaꞌt pathrra mapoeꞌpaꞌ amach aꞌpoerro, tharroꞌmar sapaꞌ ama semno oꞌch sagërrñañ Yompor poemoereña allempo moeneñeñ oꞌch yenpoerrsoñ samha.

Attho Jesúspaꞌ aꞌkowentatosan Parets paꞌpakëll

⁴⁵ Allempo xhap Jerusaléño Jesúsñapaꞌ awos Parets paꞌpakllo. Beꞌthosospaꞌ allothñapaꞌ xhaꞌnmaxhaꞌtatwosan ñeñth pomatsreꞌtyetsa all.

⁴⁶ Allñapaꞌ ateth otosan ñeñth pomatsreꞌtyetsa: —Yompor poꞌñoñ ñeñth ateth anwareth awathotheñ, allñapaꞌ ateth oten Yompor: “Añ ñeñth nepakëll nepenpaꞌ añekpakaꞌyeña sherben allekmach maꞌyochennet”; tharraña sañapaꞌ ateth sepeññañña Yompor paꞌpakëll ateth ñerraꞌmrratheꞌ eñeth ñeñth eꞌpotyetsa mapoetponoꞌmar.

⁴⁷ Patheꞌtets yeth Jesúspaꞌ xhokmach seneꞌth Parets paꞌpakllo all yexhatenaneteꞌth Yompor poꞌñoñ. Añña ñeñth paꞌmhchaꞌtaretherneshaꞌ pen allowen judioneshaꞌ poꞌkornaneshar ñamha añ ñeñth atarr etsotayenayeñ ñoñets ñeñth ateth anareth ñamha poꞌpotantañ ñeñth amhchaꞌtarethetyetsa all anetso, ñetñapaꞌ Jesúsa atarr oꞌpatyenet atthoch moetsatachet.

⁴⁸ Tharraña ñetpaꞌ ama erroth peto tharroꞌmar allowen acheñeneshaꞌpaꞌ atarr yemteññañet Jesús attho atarr kowen serrpareꞌtatenanet Yompor poꞌñoñ. Ñetpaꞌ ñeñthña atarr kowen entyenet.