San Lucas 15 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Acheñ ñeñth ama ameꞌñetsopaꞌ arrpaꞌ all atmaꞌntatarethtet ateth ñerraꞌm carnero ñeñth chenkëtsa

¹ Shonteꞌ ñeñth cobrets kelle gobiernokop ñeñthara ñeñth atarr shekareꞌtyets ñamha shonteꞌ ochñatheneshaꞌ, ñetñapaꞌ waxhaꞌtet Jesúsesho oꞌch eꞌmhñoteññañetaꞌ ñeñth ateth serrpareꞌtatenan allowen acheñeneshaꞌ.

² Añña fariseoneshaꞌ ñamha ñeñth atarr etsotayenayeñ ñoñets ñeñth ateth anareth judioneshakop, ñetñapaꞌ amaꞌt mameshapaꞌ ama pokteyeꞌ enteñeto. Ñetñapaꞌ attha sasareꞌteñet Jesúspaꞌ ñeñthpaꞌ ateth otannaꞌtyenet: —Añ acheñer amaꞌt ñeñth atarr ochñatheneshaꞌpaꞌ esoꞌmartheꞌña eꞌñe kowen agapyenanet, ñamha alla rrallmeꞌchapreteñet.

³ Ñeñthoꞌmar Jesúspaꞌ alla tomaꞌntaterraneterr; ñeñthpaꞌ ateth oterraneterr:

⁴ —Sapaꞌ ñerraꞌm eseshas echeneꞌ shonteꞌ secarneror, xharroch xharraꞌ sechen tharraña ñerraꞌm pomokarrña machayotha saꞌchenkachpaꞌ amaꞌt ateth sepeno. Oꞌch sesaꞌnom allowen poꞌpotantañ ñeñth oꞌ noventa nuebhamha all amayo amaꞌt atarr aꞌyopaꞌ oꞌch awes eꞌnerrayaꞌ pomokarr ñeñth chenkëtsa. Allchaꞌ seꞌnameꞌtyeraꞌpaꞌ atthothach senter.

⁵ Allña senterpaꞌ oꞌch senatner, eꞌñech soksheñeshokmañen saner.

⁶ Oꞌchña sexhapater sepakllopaꞌ allñapaꞌ oꞌch sexhoreꞌtwer samoꞌtseshaꞌ oꞌch onaxhaꞌtet. Allñapaꞌ oꞌch sotwerr: “Theꞌpaꞌ oꞌch sokshapreterrna necarneror, theꞌpaꞌ oꞌ nenterrña ñeñth naꞌchenkaten.”

⁷ Ñeñthoꞌmarña theꞌpaꞌ notenes: Yamoꞌmteꞌ ñeñth poeꞌtañoꞌtsen atthekmach atarr nanak kosherrana amaꞌt poesheñarra acheñ ñeñth atarr ochñath ñerraꞌm esempoch oꞌch kothapeꞌcherret ello eꞌñe kowen ñokop. Elloch metanaꞌtwerran ñeñth attho koshenana poꞌpotantañ ñeñth shonteꞌ ñeñth eꞌñe pokteꞌ es phaꞌyenet ñokop amaꞌt ñetpaꞌ shontet ateth ñerraꞌm noventa nueve carnero ñamha ñetpaꞌ amaꞌt ama pallteneto oꞌch kothapeꞌcherret ello kowen.

Arrpaꞌ all atmaꞌntatarethtena poetallarr kelle ñeñth aꞌchenkaten pamoꞌmteꞌ

⁸ ‘Ñeñthara kothaphñats, theꞌpaꞌ ñatoꞌ atethchaꞌ netmaꞌntacha poꞌpoñoneth ateth ñerraꞌm poesheñarr koyaneshaꞌ ñerraꞌm echenan xharratlla poꞌkhllayor ñeñth atarr morrentena. Ñerraꞌm xho aꞌchenkach poetallarrpaꞌ amaꞌtchaꞌ aꞌllchatanoña poꞌlampareñ atthoch tarrapoꞌtenan paꞌpakëll allchaꞌ eꞌnameꞌtyerran poetallarr poꞌkhllayor. Atthothchaꞌña enter.

⁹ Oꞌchña enterpaꞌ allempoñapaꞌ oꞌch agotan pamoꞌtseshaꞌ eꞌñe pakmaneshocheꞌ, atethchaꞌ otanet: “Theꞌpaꞌ oꞌch sokshapreterrna ñeñth poetallarr nekhllayor ñeñth naꞌchenkat, theꞌpaꞌ oꞌ nenter.”

¹⁰ Theꞌpaꞌ oꞌch noterrserr, elloña atarrchaꞌ nanak koshateret Yompor poꞌmhllañotheñreneshowen ñerraꞌm esempo amaꞌt poesheñarra acheñ ñeñth atarr ochñathpaꞌ oꞌch kothapeꞌcherret ello eꞌñe kowen Yomporekop.

Arrpaꞌ all atmaꞌntatarethtena poesheñarr yakma poechemer ñeñth atarr ottatsñath

¹¹ Elloña Jesúspaꞌ alla tomaꞌntaterraneterr, ñeñthpaꞌ ateth oterraneterr: —Eñall poesheñarr acheñ echenan epsheña poechemer.

¹² Ñeñthña poechoyomer penpaꞌ ateth otan pompor: “Apachaꞌ ñeñth ora allpon pechen theꞌ napaꞌ nemneñ oꞌch phapoen eꞌñe thayekma ñeñth allpon phoꞌpatatenna.” Allempoña pompor ora ñeñth allpon echyenpaꞌ oꞌ apaꞌyesan epsheñoꞌmar poechemereshaꞌ ñeñth allpon oꞌpatatyenanet eꞌñe poesheñaꞌttset.

¹³ Eꞌñe allponmatatsa ñeñthña poechoyomer penpaꞌ oꞌ eꞌñe pomwawanman ora allowen ñeñth allpon aph pompor allo agapan shonteꞌ kelle atthoch ta bhaxhayo poꞌpoñ anetso. Allempoña xhap bhaxhayopaꞌ allñapaꞌ sosyaꞌtsañexhna ateth phaꞌyesos. Atthoña amaꞌt shonteꞌ poꞌkhllayor ñeñth anem oꞌ eꞌñe aꞌgastaꞌwawe eꞌñe pottatseꞌteñoth.

¹⁴ Oꞌ eꞌñe aꞌgastaꞌwan ora poꞌkhllayorpaꞌ allempoña allpaꞌ oꞌ orrta moexheñets all ñeñthe anetsro. Ñañapaꞌ oꞌwañ errayeꞌ entan poerrar ñeñthchaꞌ rren.

¹⁵ Allempoña ñapaꞌ oꞌ awoꞌ alloꞌtsen aneꞌtañ all eꞌnyenan tarwas. Aneꞌtaññapaꞌ aña aph poꞌtarwas oꞌch awyesos aꞌyeneth allchaꞌ kowampesyesoñ poꞌchañchor.

¹⁶ Ña paꞌchporrñothpaꞌ atarr moeneñ oꞌch rrapretosan chañcho poerrar atthoch yetosa. Amaꞌt chañchopaꞌ paꞌtalleꞌtsa poerrar pen ñapaꞌxhoꞌña ñeñthaña atarr moenen oꞌch rros tharraña amaꞌt chañcho ama eseshayeꞌ apoenaye poerrar ñeñthchaꞌ rraꞌ.

¹⁷ Attheñapaꞌ machayotha xhapoña poeyoxhro, ateth ot: “Apa paꞌtarwasañer amaꞌt shontetpaꞌ echyenet poerrar, ello poechareꞌtyena. Naña arrpaꞌ oꞌ nerromoerrmoch nachporrñoth.

¹⁸ Theꞌpaꞌ oꞌch awerren apoesho; theꞌ napaꞌ atethchaꞌ notwer: Apachaꞌ, napaꞌ oꞌ nephowa ñeñth ama kowenayaye Yomporekop amaꞌt ñamha phokop.

¹⁹ Napaꞌ ama kowenayayno atthoch pechemer pephapoerren. Theꞌ napaꞌ aña poktetsa nokop phapaꞌ phaꞌtarwasañrach pephapoerren.”

²⁰ Oꞌña ateth kothapeꞌchwa ello eꞌñe kowen Yomporekoppaꞌ allempoñapaꞌ awen pomporesho. ‘Amaꞌt atarr ellapharmeñ allempo entapoeñ pompor eꞌñe poemoereñoth mata poktapoeñpaꞌ aꞌxhonoꞌtapoeñ, tsoꞌtstsapaꞌtapoeñ. Ñeñthpaꞌ ateth womhchaꞌtapoenan poechemer attho eꞌñe kowen agapapoeñ.

²¹ Poechemerñapaꞌ ateth otweñ: “Apachaꞌ, napaꞌ oꞌ nephowa ñeñth ama kowenayaye Yomporekop amaꞌt ñamha phokop. Na theꞌpaꞌ ama kowenayayno atthoch pechemer pephapoerren.”

²² Tharraña pomporñapaꞌ eꞌñe allorokma otan poeñañreshaxhno: “Oꞌch senaꞌ eꞌñe thayekma shetamoets ñeñth atarr kowen koxhneshaꞌ, oꞌch sechorratapoennana nechemer. Oꞌch senatapoeñ ñamha anillo potapho, oꞌch senatapoeñ ñamha sapatets paꞌtko.

²³ Oꞌch sennanaꞌ ñamha newaksher ñeñth atarr neꞌsoyaꞌtaten oꞌch semtse oꞌch yerrallmeꞌch oꞌch yokshameꞌtamphsapoeña.

²⁴ Tharroꞌmar añ nechemer amaꞌt oꞌ rromwañ, theꞌñapaꞌ oꞌ alla tanterra. Amaꞌt oꞌ chenkaꞌwañpaꞌ theꞌñapaꞌ oꞌ alla nenter.” Allempoñapaꞌ atarr nanak koshameꞌtamphsapoeñet.

²⁵ ‘Ñewa, poꞌpsheñeñ poechemer ñeñth popoꞌnar ñañapaꞌ paꞌmroꞌtsen allempo xhen poechoyomer. Allempoña err paꞌmroth eꞌñe yaꞌrroterrtsa pokollopaꞌ oꞌ eꞌmwerran koshamhñats all rekërkënet ñamha asheꞌrarañ.

²⁶ Allempoñapaꞌ xhoreꞌtwerran cheshachorpaꞌ aꞌphthoꞌtwer: “¿Esoꞌmareꞌtña koshameꞌtenet? ¿Esoꞌtña atarr koshameꞌtampenet?”

²⁷ Cheshachorñapaꞌ ateth otapoer: “Oꞌ wena pemoꞌnasheñ, phomporpaꞌ oꞌ moetsatan becer ñeñth seꞌsoyaꞌtaten tharroꞌmar atarr koshapoenana poechemer. Ama xhoyeꞌ rromoeno, eꞌñe womech agapapoeñ.”

²⁸ Ñañapaꞌ ñeñtha atarr atsrreꞌmatwerreꞌ ama moeno oꞌch beꞌthoswerr all oꞌ xhen paꞌmoꞌnasheñ. Attheñapaꞌ xhaꞌnom pomporpaꞌ allach otereꞌth: “Pebeꞌthoswerr.” Ñañapaꞌ ama moeno oꞌch beꞌthoswerr.

²⁹ Ñañapaꞌ ateth otwerran pompor: “Napaꞌ peñotenen oꞌ shonteꞌ char eꞌñe kowen nameꞌñenpha; napaꞌ amaꞌt parrochapaꞌ ama esempo nathpareꞌtenpe. Tharraña amaꞌt ateth nepenpeñpaꞌ nañapaꞌ amaꞌt esempapaꞌ ama phapoennoña amaꞌt pathrra cabra atthoch nokshameꞌta namha epan ñeñth parro neyemoetyena na.

³⁰ Theꞌña oꞌ wena ñeñth pechemermaꞌth pepen amaꞌt ora oꞌ aꞌgastaꞌwonaph pekhllayor eꞌñe poekañoreshaꞌteñoth, theꞌña phapaꞌ oꞌ pemtsatapoeñ becer ñeñth yeꞌsoyaꞌtaten.”

³¹ Pomporñapaꞌ ateth otererr: “Poꞌñoxh, nechemerchaꞌ, phapaꞌ xhokma arroꞌtseney parro. Amawakaꞌye, nechemerchaꞌ, peñoteñetheꞌ ñeñth allpon nechenpaꞌ eꞌñerramcheꞌ phokma.

³² Ñeñthoꞌmarña theꞌpaꞌ añ poktetsa oꞌch yokshameꞌtamphsapoeña pemoꞌnasheñ, oꞌch atarr nanak yokshena tharroꞌmar amaꞌt oꞌ rromwañ theꞌñapaꞌ oꞌ alla tanterra; amaꞌt oꞌ chenkaꞌwañ theꞌñapaꞌ oꞌ alla yenter.”