San Lucas 12 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Attho Jesúspaꞌ yexhatan poeyochreshaꞌ amach eñotatstoñeto fariseoneshaꞌ pommoꞌcheña

¹ Shonteꞌ acheñeneshaꞌ ñeñth waxhenoya Jesús, shonteꞌ nanak patoner. Xha cheꞌmoechoset Jesúsesho attha athmatkaꞌtannaꞌtyesoset. Jesúsña ñanompaꞌ alla serrpareꞌtaterranerr poeyochreshaꞌ, ñeñthpaꞌ ateth otanet: —Eꞌñech señota ñatoꞌt semeñeꞌteñaꞌ fariseoneshaꞌ pokthaphña, tharraña ñeñth pokthaphña penet ñetpaꞌ ñeñthpaꞌ ommoꞌcheñtsa. Ñeñthpaꞌ mamethollapaꞌ oꞌch epaꞌwa errapharen eꞌñe ateth pena ñerraꞌmrratheꞌ chaseꞌ mamethollapaꞌ oꞌch eꞌñe es aꞌchasaꞌwa.

² Tharroꞌmar yapaꞌ yeñoteñ allowen ñeñth allo eꞌñe aꞌnawa shekareꞌtyenet theꞌ esempowañenñapaꞌ aꞌmethamphsarethterretchaꞌ. Amaꞌt allowen ñeñth eꞌñe aꞌnasotyenet theꞌpaꞌ esempowañenñapaꞌ eꞌñech eñotatarethetwerret.

³ Ñeñthoꞌmarña amaꞌt erraꞌtsena seserrparen eꞌñe aꞌnawa theꞌ esempopaꞌ señotatwerchaꞌ ora allowen acheñeneshaꞌ. Amaꞌt erraꞌtsena ñeñth ateth seserrpareꞌtyen theꞌ eꞌñe aꞌnawa oꞌpono pokollo, esempopaꞌ seserrpareꞌtatchaꞌ allchaꞌ eꞌñe kowen eꞌmwerres allowen acheñeneshaꞌ ateth ñerraꞌmrratheꞌ enoth seserrpareꞌten shelletoth.

Attho amach yemhchaꞌtatsto ñeñthchaꞌ moetseꞌ yechets, añchaꞌña yemhchaꞌnaꞌt Yompor

⁴ Theꞌpaꞌ oꞌch notas masheñneshachaꞌ, amach aña semhchaꞌtatsto ñeñthchaꞌ semtseꞌ. Tharroꞌmar añach moetsonaset sechets, sekamkëññapaꞌ amach errothenoth moetsonaseto.

⁵ Añchaꞌña semhchaꞌnaꞌt Yompor tharroꞌmar ñerraꞌm ña moenats eꞌñe ña poꞌwamenkothpaꞌ oꞌch aꞌchenkatonay yechets, yekamkëñpaꞌxhoꞌña oꞌch moeñonay koñcheñtso all parraren tsoꞌ. Eꞌñe poꞌñoxh notenes, Yomporchaꞌña semhchaꞌnaꞌten.

^6-7 Elloña theꞌpaꞌ napaꞌ oꞌch notas, xhokmach seyemcha Yompor, poꞌñoxh ñapaꞌ ñach sekwampeneꞌ. Amaꞌt othetholleshaꞌpaꞌxhoꞌña xhokma kowampeñ. Ñewa, amaꞌt yapaꞌ yeñoteñ othethollpaꞌ ama tama sherbeno. Amaꞌt yepomatset, amnar othetholleshaꞌpaꞌ ñeñthpaꞌ ama tsaꞌteyaye, eꞌñe eptallatholla centavo tsaꞌtena. Tharraña amaꞌt attheñ Yomporña amaꞌt pathrra othethollpaꞌ ama poeseñe. Ñeñthoꞌmarña notenes, amaꞌt mameshapaꞌ amach semhchaꞌtatsto, Yomporchaꞌña eꞌñe seyemta. Attho atarr morrentenana othetholleshaꞌ elloña sapaꞌ atarr nanak morrentensa. Ñewa, amaꞌt allpon sechetholleshaꞌ allpon soñoꞌtsen ñapaꞌ eꞌñe eñotennas.

Attho ama aꞌnasotpawo Jesucristo acheñeshoꞌmar

⁸ Elloña napaꞌ oꞌch noterrserr, allowen amaꞌt erraꞌtsenchaꞌ ñeñthchaꞌ ama naꞌnasotenaye acheñeneshesho, napaꞌxhoꞌña Ñeñthen Acheñetosetspaꞌ amach naꞌnasotwerraneto namha Nomporesho alloꞌtsaꞌyen epoet poꞌmhllañotheñnaneshar.

⁹ Tharraña ñerraꞌm eseshaꞌ naꞌnasotenaya na arr patsro acheñeneshesho, napaꞌxhoꞌña naꞌnasoterranetchaꞌ Nomporesho alloꞌtsaꞌyen epoet poꞌmhllañotheñnaneshar.

¹⁰ ‘Ñerraꞌm eseshaꞌ nesaseneꞌ na Ñeñthen Acheñetsosets ñeñthpaꞌ aphretnaꞌpoꞌ nenteñ. Tharraña ñerraꞌm eseshaꞌ añ achmhareꞌtenet Parets Poekamkëñ ñeñthñapaꞌ ama aphretnaꞌpawoyeꞌ nenteñe.

¹¹ Ñamha oꞌch noterrserr, ñerraꞌm esempoch anmaset judioneshaꞌ poꞌprawo allchaꞌ aꞌmethareꞌtamphsaset amhchaꞌtarethesho, sañapaꞌ amach xha sellkaꞌphsatsto, amach xha sotaphsaꞌtatsto: Errothwachkaꞌye notostheꞌ atthoch kowen nanapos, eswachkaꞌye nottheꞌ.

¹² Sapaꞌ añchaꞌña seꞌñoratoseꞌ Parets Poekamkëñ eꞌñe allempo aꞌphthoꞌtareꞌtenset all.

Ñeñth eꞌñe aña moenen oꞌch esokmañen echyes, ñeñthpaꞌ atarr yoroxhenoꞌtsen

¹³ All cheꞌmoechen shonteꞌ acheñeneshaꞌ Jesúsesho, poesheñarrñapaꞌ ateth otan Jesús: —Maestro, theꞌpaꞌ oꞌch photon nemoꞌnasheñ nepoꞌnar apoerrnepaꞌñakaꞌyeña namha ñeñth allpon oꞌpatatnomna nomporeñ.

¹⁴ Tharraña Jesúsñapaꞌ ateth och: —Masheñchaꞌ napaꞌ ama eseshayeꞌ nenaye ñeñthenchaꞌ aꞌpoktateneꞌ ñoñets atthoch soten oꞌch napaꞌyesas allpon oꞌpatatyenset.

¹⁵ Alla oterraneterr Jesús: —Eꞌñech señota sañeña, amaꞌt seyoxhrapaꞌ amach es seyeꞌchapretannaꞌtatsto amaꞌt eꞌñe koñeꞌtha tharroꞌmar attho yokrrena arr kowen añe patsropaꞌ ñeñthpaꞌ ama añekpayaye alloch esokmañen es yechyerr ñeñthchaꞌ atarr yokshaterreꞌ tsapathoneth.

¹⁶ Ñeñthpaꞌ ateth otanet tomaꞌnteñtso: —Eñall poesheñarr acheñ atarr nanak ekhllayoreth. Allña poꞌpatsñopaꞌ shonteꞌ nanak aton aꞌyexhkaten.

¹⁷ Ñeñthña ekhllayorethpaꞌ ateth kothapeꞌchen poeyoxhropaꞌ ateth oten: “Errothwachkaꞌye nephaꞌña, ñeñth atarr nanak aton nethotaten amakaꞌye eñalleña allchaꞌ eꞌñe naññoꞌtwe.”

¹⁸ Allempo ateth kothapeꞌchenpaꞌ alla oterrerr: “Theꞌpaꞌ oꞌkaꞌ neñoch atethchaꞌkaꞌye nepha. Oꞌchkaꞌye naꞌmaterrña pokollasheꞌm allekma naññoꞌteꞌth koñeꞌthaꞌtets theꞌñapaꞌ oꞌch alla nathomaterr atarrpoꞌ allchaꞌ eꞌñe naññoꞌtwa allowen ñeñth allpon nethotaten amaꞌt ñamha allowen ñeñth allpon paꞌnamen esokmañen nechyen.

¹⁹ Allempoñapaꞌ atethchaꞌ not neyoxhro: Napaꞌ ama es nepallteno amaꞌt eꞌñe mamesha. Ñeñth allpon shonteꞌ oꞌ naññoꞌtwapaꞌ atarrchaꞌ atomat char amach es nepallterreꞌthe. Theꞌpaꞌ oꞌch names eꞌñe poktakma. Nellapeneꞌthchaꞌ rrats, nellapeneꞌthchaꞌ orrareꞌtats; ñeñthchaꞌña eꞌñe nokshateneꞌña na.”

²⁰ Tharraña ñeñth acheñerpaꞌ Yomporpaꞌ ateth och: “Phapaꞌ atarr otatsñatheph, ama es peñoteno amaꞌt mamesha. Theꞌpaꞌ añe tsaprokmach oꞌch perromoen. Ñeñthña shonteꞌ oꞌ phaññoꞌtwapaꞌ theꞌñapaꞌ eseshaꞌwachñakaꞌye oꞌpaterraya.”

²¹ Ñeñthoꞌmar yeñoteñ, ñeñth aññoꞌteneꞌ shonteꞌ esokmañen ñeñth eꞌñe ñokpa, ñeñthña acheñer atethpaꞌ ama echenanoña ñeñth sherbets Yomporekop.

Attho Yomporpaꞌ ñach eꞌñe kowen kowampeneꞌ ñeñth poechemereshaꞌ pen

²² Allempoña Jesúspaꞌ alla oterranerr poeyochreshaꞌ: —Ñeñthoꞌmarña theꞌpaꞌ oꞌch noterrserr, amach aña sellkatsto ñeñth attho yeyxhena arr patsro. Amaꞌt seyoxhra amach sotatsto, eswachkaꞌye yerrerrerrtheꞌ tsapathoneth. Ñamha amach aña sellkatsto ñeñth eꞌñe sechtsokpa, amach sotatsto, eswachkaꞌye yechorratheꞌ.

²³ Tharroꞌmar Yomporpaꞌ ña yapoeneꞌ yoꞌrrerrña allo yokrrena ñeñthña atarr nanak sherbets. Ñeñthoꞌmarña yeñoteñ ña yapoeneꞌ ñamha yerrar, ñeñthña ñokoppaꞌ ama esoyeꞌ enteñe. Ñamha ña yexhkateneꞌ yechets ñeñth atarr sherbets. Ñeñthoꞌmarña yeñoteñ ña yapoeneꞌ ñamha amaꞌt ñeñth yechorraꞌyena, ñeñthña ñokop ama esoyeꞌ enteñe.

²⁴ Sententheꞌ attho korrena paꞌnamen othneshaxhno. Ñetpaꞌ ama xhoyeꞌ nareꞌtatseꞌteneto ñamha ama xhoyeꞌ apxhaꞌyeneto poerrar ñeñthchaꞌ rraꞌyenet. Ñetpaꞌ ama es echenaye allchaꞌ es aññoꞌtyenet. Amaꞌt attho korrenetpaꞌ Yomporña eꞌñe yexhkatyeswanet ñeñthchaꞌ poerrar phaꞌyenet. Elloña sa Yomporpaꞌ atarr morrentensa sa; ello semhtaneñ ñeñth attho atarr morrentenana othneshaxhno.

²⁵ Ñamha amach sellkatsto atthoch amach serromo, tharroꞌmar amaꞌt sellkënañ atthoch atarr atomat sokrra arr patsro tharraña amaꞌt eꞌñe poesheñarrothesapaꞌ amatheꞌ errothenoth soꞌchtatoña sokrreña amaꞌt eꞌñe pamtharra.

²⁶ Ñewa, attho amaꞌt eꞌñe sellkëñotha sa ama erroth es sepeno, ñeñthepñapaꞌ amach paꞌnamena es sellkaꞌyesatsto tharroꞌmar ñeñthpaꞌ eꞌñech orrena es sellkaꞌyena.

²⁷ ‘Ñamha sententheꞌ ateth yexhkëna rorexhno. Ñetpaꞌ ama xhoyeꞌ tarwasaꞌyeneto amaꞌt mamesha, ama xhoyeꞌ taneneto ñeñth chorraꞌyenet attho eꞌñe kowen orretyenet. Tharraña napaꞌ oꞌch notas, amaꞌt amhchaꞌtareth Salomón attho eꞌñe aꞌkowentateꞌth awath, amaꞌt ñapaꞌ ama chorraneꞌtheña ñeñth atarr kowen ñeñth ateth atarr kowentena ror.

²⁸ Ñeñth ror poeꞌchorpaꞌ ñeñthara taꞌteꞌ ñeñth chepyets allemeñ ñeñth sentyen theꞌ tharraña ñeñthpaꞌ mamekpa. Amaꞌt kowen chepyeneñ theꞌpaꞌ tsapathonethñapaꞌ oꞌch ethomamperetpaꞌ eꞌñech kollaꞌwerra oꞌwañchaꞌ kowenta. Ñewa, Yompor attho kowentatyenan amaꞌt ñeñth eꞌñe mamekpa, elloña sapaꞌ atarr chorratyensañ samha; sañapaꞌ esoꞌmartheꞌña amaña eꞌñeyeꞌ seyemteño.

²⁹ Amach eꞌñe pathrra seꞌneno ñeñth attho serren ñamha ñeñth attho es sorryen. Amach ñeñthaña eꞌñe patherr sellkaꞌyesatsto.

³⁰ Tharroꞌmar allowen acheñeneshaꞌ arr patsro ñeñth ama ameꞌñaꞌyetso, ñetpaꞌ ñeñthaña eꞌñe patherr eꞌnenet. Ñewa, Somporña ñeñth poeꞌntañoꞌtsen ñapaꞌ eꞌñe entwenes ñeñth allpon paꞌnamen sepalltaꞌyena arr patsro.

³¹ Sapaꞌ añchaꞌña eꞌñe ñanom semaꞌyoxhrena Yomporekop atthoch atarr ayochreshathterra ña allochñapaꞌ ñachña sapaꞌyeneꞌ ñeñth allpon sepalltaꞌyena samha.

Attho ñeñthchaꞌ seshonterr ñeñth atarr sherbets arrchaꞌkaꞌye seshonteñ all Yompor poeꞌntaño

³² ‘Amach neyochreneshaxhnochaꞌ es sellkatsto amaꞌt ama atarr shonteyayso, Yomporña atarr kowen sekwampeneꞌ ateth ñerraꞌmrratheꞌ eꞌñe poꞌcarneror penes. Eꞌñe poksheñeshothpaꞌ apaschaꞌ atthoch eꞌñe kowen sokshapreterrñaña poꞌkowenña atthoch atarr ayochreshathterra.

³³ Theꞌpaꞌ oꞌch sepomyen ñeñth allpon sechyen allochñapaꞌ oꞌch sapaꞌyes ñamha ñeñth atarr es palltaꞌyetsa. Ñerraꞌm ateth sepena alloꞌnach atarr aton seshontaꞌnen ñeñth eꞌñe poꞌñoxh atarr sherbets Yomporekop. Ñeñthpaꞌ ama attheyaye ñerraꞌmrratheꞌ ñeñth sekhllayepoꞌrer sepen arr patsro, ñeñthpaꞌ atarr amhllashaꞌtña. Tharraña ñeñth seshontaꞌnen ñeñth atarr sherbets ñeñth ama awañaño, ñeñthpaꞌ arr seshonteñ Yompor poeꞌntaño. Allña amaꞌt eñethapaꞌ amach xheno oꞌch etatsreꞌtas ñamha amaꞌt pomphapaꞌ amach eñalle ñeñthchaꞌ rrerreꞌ ñeñth seshonten all.

³⁴ Tharroꞌmar ñerraꞌm all poeꞌntaño seshontaꞌnen ñeñth atarr kowen senten, yeñoteñ eꞌñe ñeñtha patherr senen seyoxhro ñeñthña atarr sherbets Yomporekop. Tharraña arr patsro ñerraꞌm aña seshontaꞌnen ñeñth atarr semorrentena, yeñoteñ eꞌñe ñeñtha patherr senen seyoxhro ñeñthñapaꞌ ama es sherbenoña Yomporekop.

Attho xhokmach yeñoseꞌrteña Yepartseshar Cristo esempoch werra

^35-36 Theꞌpa oꞌch notas poꞌpoñ: Xhokmoepaꞌch señosereꞌtna esempowañenpaꞌ oꞌch alla nowerra. Ñatoꞌ oꞌch netmaꞌntatasa ateth ñerraꞌmrratheꞌ poesheñarr yakma ñeñth atarr ayochreshath. Ñapaꞌ awoꞌ allchaꞌ rrallmeꞌchapretenanaꞌ pakma ñeñth senaꞌtetsa. Poeyochreshaꞌñapaꞌ alla kowet paꞌpakllo esempoch werra. Allempoña ñetpaꞌ aꞌwortatyeset poꞌlampareñ allochñapaꞌ atthoch ñerraꞌm esempoch werra ñeñth pamoꞌmteꞌ penet ñerraꞌm oꞌch xhoreꞌtwenanetpaꞌ ñetñapaꞌ allorokmach toramphsapoeñet atthoch sherbhapoeñet.

³⁷ Atarr kosheñtsoꞌtsaꞌyen poeyochreshaꞌ ñerraꞌm esempoch werret pamoꞌmteꞌ allñapaꞌ entwenanet xho atarr eñoseꞌrteñet. Poꞌñoxhpaꞌ napaꞌ oꞌch notas, ñachkaꞌyeña sherbhaꞌweneꞌña ñeñth poeyochreshaꞌ pen ña. Oꞌch chanaꞌwena ñamhapaꞌ oꞌch anorrxhaꞌtatwenanet allchaꞌ rrallmeꞌchatwenanet.

³⁸ Ñeñthpaꞌ atethchaꞌ perranet amaꞌt rroxh tsapopaꞌ oꞌch wenanet amapaꞌ oꞌch poetarenmochpaꞌ oꞌch wenanet. Ñeñthoꞌmarña notenes, ñerraꞌm alla entwenanet xho atarr eñoseꞌrteñet, ñeñthña atarr eñoseꞌretyenayapaꞌ atarrchaꞌ kosheñtsoꞌtsaꞌyenet.

³⁹ Eꞌñech machayotha nowerra ateth pena eñeth allempo attha es sepxhaꞌyena machayothach waponasa oꞌch yoratsreꞌtensaꞌ. Tharraña sa ñeñthes apakllathes ñerraꞌm señoteñeñ eꞌñech esempo waponasa eñeth amach xha semanrraꞌteno atthoch amach semnacheña oꞌch toramphsas sepakllo oꞌch beꞌthosamphsasa oꞌch yorwennasaꞌ ñeñth allpon semorrentyena.

⁴⁰ Ñeñthoꞌmar notenes, sapaꞌxhoꞌña xhokmoepaꞌchña señoseꞌrtenna tharroꞌmar ñerraꞌm allempo attha es sepxhaꞌyenapaꞌ allempochña nowerra na Ñeñthen Acheñetosets.

Atethchaꞌ apharethterra atarwasañ ñeñth eꞌñe kowen etsoteneꞌ ateth yecheña pamoꞌmteꞌ ñamha atethchaꞌ apharethterra poꞌpoñ atarwasañ ñeñth ama etsotaye ñeñth ateth yecheña pamoꞌmteꞌ

⁴¹ Allempoña Pedropaꞌ ateth aꞌphthoꞌch: —Partseshachaꞌ ñeñth ateth petmaꞌntatena theꞌ ñeñthpaꞌ ¿eseshakpaꞌtña, ñatoꞌ yokpatheꞌ ñeñthey peyochreshay pepeney amapaꞌ ñatoꞌ allowenakpaꞌnatheꞌ?

⁴² Partseshaꞌñapaꞌ alla tomaꞌntaterraneterr poꞌpoñoneth, ateth oterraneterr: —Allowenespaꞌ atethchaꞌ sepha eꞌñe kowen ateth ñerraꞌmrratheꞌ poesheñarr yakma ñeñth yechena ñeñth pamoꞌmteꞌ pen all paꞌpakllo. Ñeñthchaꞌ poꞌtarwas peneꞌ xhokmach apaꞌyesan allowen poꞌpotantañ pamoꞌmteꞌ paꞌtarwasañer poerraret allpon ñeñth poktetsa poesheñaꞌttsokop. Ñapaꞌ atthekmach pena xhokmach apoenanet ñerraꞌm esempoch xherrerr allempo ateth anareth ñokop oꞌch alla apaꞌyerraneterr poꞌpocheño. Ñapaꞌ xhokmach ateth pena amach kaxhpoere tharroꞌmar ñapaꞌ eñoteñ atthoch eꞌñe koshatenan pamoꞌmteꞌ.

⁴³ Ñeñthña atarwasañpaꞌ atarrchaꞌ koshatweñ pamoꞌmteꞌ; ñerraꞌm esempoch werrapaꞌ alla entwenan paꞌtarwasañer ama xho kaxhpoenano ñeñth poꞌtarwas apaꞌnemh awañmoꞌchotheñ.

⁴⁴ Poꞌñoxh oꞌch notas, atarrchaꞌ koshatweñ. Añchaꞌ koshaterreꞌ oꞌch nower pamoꞌmteꞌ amhchaꞌtareth ñeñthchaꞌ kowamphsapreteꞌ ñeñth allpon echyen pamoꞌmteꞌ.

⁴⁵ Tharraña ñeñth atarwasañer allempo ama werraꞌ pamoꞌmteꞌ ñerraꞌm ñapaꞌ attha oten poeyoxhro, namoꞌmteꞌpaꞌ amach awen werro, allempoña ñapaꞌ xhach ashtapechyenan atarwasañexhno ñeñthchaꞌ rratañ amaꞌt ñamha koyaneshowen. Ñañapaꞌ atthach allemeñ rrapretyen ñamha atthach orrareꞌtapretyen allchaꞌ atarr posaꞌtareꞌtyen.

⁴⁶ Ñeñthña atarwasañer ñerraꞌm ñapaꞌ atthach ottatseꞌtyena amach es poexhaꞌyeno amach eñoteñe ñeñthe yetharoch werra pamoꞌmteꞌ amaꞌt erroꞌtsenchaꞌ yethro wena. Machayothachña werra pamoꞌmteꞌpaꞌ atarrchaꞌ koñchatwer, allach moeñwer all ñeñth oꞌpatenaya allowen ñeñth ama es otapotetso amaꞌt mamesha.

⁴⁷ ‘Elloña napaꞌ oꞌch notas, amaꞌt erraꞌtsena atarwasañer ñerraꞌm eñotenan ñeñth ateth moenen pamoꞌmteꞌ tharraña ñerraꞌm ama kowen ameꞌñenano pamoꞌmteꞌ ñerraꞌm ama eꞌñe kowenayeꞌ es phaꞌyeno atthoch eꞌñe kowen agërran pamoꞌmteꞌ esempoch werra, amaꞌt erraꞌtsena atarwasañerpaꞌ ñeñth ateth petsapaꞌ atarrchaꞌ ashtarethterret.

⁴⁸ Tharraña erraꞌtsenchaꞌ atarwasañer ñeñth ama eñotano ñeñth ateth moenen pamoꞌmteꞌ amaꞌt ñetpaꞌxhoꞌña aña ateth phaꞌyenet ñeñth ama kowenayaye amaꞌt eꞌñe pokteñ atthekmach ashtarethterretañ ñamet, tharraña ñetpaꞌ mameshaꞌttsach ashtapecharethetyerret tharroꞌmar ñetpaꞌ ama eñoteneto ñeñth ateth moenen pamoꞌmteꞌ. Alloweney erraꞌtsenothey ñeñthey atarr aparethey atthoch atarr yeñoterrñañ ñeñth atarr sherbets Yomporekop, ñeñtheychaꞌña atarrchaꞌ koweney Yompor oꞌch eꞌñe yesherbhatwoñ shonteꞌ allowen ñeñth atarr eñotateney. Ñamha alloweney erraꞌtsenothey ñeñthey atarr yemtenya Yompor elloña allempopaꞌ atarrchaꞌ koweney oꞌch alloꞌna eꞌñe kowen yesherbhaꞌneñ.

Attho Jesúspaꞌ orrtatosan eꞌñe ñoꞌmar elloptannaꞌteñets

⁴⁹ ‘Theꞌpaꞌ oꞌch neñotaterrserr poꞌpoñ. Napaꞌ attho nowena arr patsro oꞌch norrtatos elloptannaꞌteñets ñeñth atarr womenk ateth ñerraꞌm tsoꞌ atarr atserrtetsa. Pokteꞌ nenteñ oꞌch orrtet eꞌñe thayekma.

⁵⁰ Ñamha nokoppaꞌ eꞌñe ateth anareth naꞌmoeroxhtatarethterrach eꞌñe atarr womenk ateth ñerraꞌmrratheꞌ xho chorratennet ñeñthchaꞌ atarr nemoeroxhtaterreꞌ. Ñeñthoꞌmar napaꞌ ñeñthña atarr nellkateneꞌ theꞌ attha atarr naꞌwanteñ esempoch eꞌñech etsotwerra.

⁵¹ Sapaꞌ xhatheꞌ sotenapañ añekoptheꞌ nowapa oꞌch eꞌñe kowen namoꞌtstannaꞌtatera acheñeneshaꞌ arr patsro. Ñeñthpaꞌ ama attheyaye. Añekpaꞌnaña nowapa allochñapaꞌ eꞌñe noꞌmarpaꞌ acheñeneshaꞌñapaꞌ oꞌch attha elloptannaꞌtyeset.

⁵² Ñewa, ñeñth noten theꞌ eꞌñe thayotheñ ñatoꞌ all yexhena amnarsheña poepawarro pokollopaꞌ ñatoꞌ ñetpaꞌ oꞌch ellopaꞌtetstatet pokthaphña. Ñatoꞌ alloꞌtsen maꞌpsheña ñeñthchaꞌ nameꞌñerraya, ñatoꞌ epsheñañapaꞌ amach moeno oꞌch ameꞌñerrnet. Amapaꞌ ñatoꞌ epsheñach alloꞌtsen ñeñthchaꞌ nameꞌñerraya, maꞌpsheñañapaꞌ amach moeno oꞌch ameꞌñerrnet.

⁵³ Ñatoꞌ eꞌñe noꞌmarpaꞌ oꞌch ellopaꞌtetstatenet pokthaphña. Ñatoꞌ pompor oꞌch epatareꞌtenan poechemer, amapaꞌ ñatoꞌ poechemerñapaꞌ oꞌch epatareꞌtenan ñamha pompor, ñamha ñatoꞌ pachorpaꞌ oꞌch epatareꞌtenan poechoyor amapaꞌ poechoyor oꞌch epatareꞌtenan pachor, ñamha ñatoꞌ paꞌsoꞌmoe oꞌch epatareꞌtenan paꞌthoꞌñen amapaꞌ ñatoꞌ paꞌthoꞌñenñapaꞌ oꞌch epatareꞌtenan paꞌsoꞌmoe.

Attho Jesúspaꞌ orrtatosan ñeñthchaꞌ eñotatawet oꞌ xhapanet Yompor poꞌkowenña

⁵⁴ Allempoña Jesúspaꞌ ateth yerpatana acheñeneshaꞌ ñeñth ateth otyenet ñet paꞌnyeto: —Sapaꞌ ñerraꞌm esempo senten arr chorren os all emoena atsneꞌ, sañapaꞌ xhokmach ateth sotyen: “Theꞌpaꞌ xhach watena.” Atethchaꞌxhoꞌ pha, oꞌchxhoꞌ watena.

⁵⁵ Ñamha ñerraꞌm esempo senten wena mhorr topothoth, ñeñthpaꞌxhoꞌña atethchaꞌ sotyen: “Theꞌpaꞌ oꞌ charenmoch.” Atethchaꞌxhoꞌ pha, oꞌchxhoꞌ woraterr womenk.

⁵⁶ Sapaꞌ atarr señoteneñña ñeñth sentyen ento ñeñthña señotateneꞌ; amaꞌt ñamha ñeñth ateth sentyen ñamha arr patsro ñeñthpaꞌ eꞌñe señotweñeñ. Tharraña ñeñth ateth norrtatyennas nepartsoteña, esoꞌmartheꞌña ñeñthñapaꞌ amaña eñotatensoña ñeñth ateth pennas Yompor theꞌ oꞌch orrtatonas poꞌkowenña. Ñeñthpaꞌ atthatheꞌ seshkëñ.

Attho eñotatanet xhoyach amoꞌtsterraya eꞌñe mamekma ñeñth yeꞌmoñeꞌteneꞌ

⁵⁷ ‘Elloña eꞌñe sotha señotepaꞌchña ñeñth pokteꞌ enten Yompor sokop ñeñthchaꞌ ateth sephannena.

⁵⁸ Ñatoꞌ oꞌch netmaꞌntatasa ateth ñerraꞌmrratheꞌ eseshaꞌ setmanteneꞌ ñeñthchaꞌ sanmoeꞌ amhchaꞌtarethesho allchaꞌ saꞌpoktaterr señoñ. Añ poktetsa allempo ama sexhenaꞌ amhchaꞌtarethesho oꞌch phoch ñeñth petmanteneꞌ: “Oꞌch yaꞌpoktaterr yeñoñ eꞌñe kowen thayekma thayepaꞌtña ama yexhenaꞌ amhchaꞌtarethesho.” Tharroꞌmar ñeñth petmanteneꞌ ñerraꞌm oꞌch xhapataph amhchaꞌtarethesho, amhchaꞌtarethñapaꞌ xhatheꞌ pomaph policeyaneshesho, ñetñapaꞌ xhatheꞌ abeꞌthapet cárcelo allchaꞌ moeroxhtaterrpet.

⁵⁹ Oꞌch notas, ñerraꞌm xhoch yottamphsasetpaꞌ allasach oꞌpono, allothñapaꞌ amach awen xhaꞌnmaterrseto. Esempowañenchaꞌ xhoch sexhaꞌnmaterret ñerraꞌm allempoch eꞌñe setsaꞌtwerra ora allowen ñeñth allpon kelle moenenet. Amaꞌt eꞌñe eptalla centavothollña ñerraꞌm ama setsaꞌtweñaꞌ amachkaꞌye xhaꞌnmaterrseto alloth. Ñeñthoꞌmarña notenes oꞌch eꞌñe kowen samoꞌtstera ñeñth seꞌmoñeꞌteneꞌ thayepaꞌtñapaꞌ ama xhennasaꞌ ñeñth atarr yoroxhen senten sokop.