Los Hechos 9 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Allempo Saulopaꞌ kothapeꞌcherr ello kowen Yomporekop

¹ Allempoña Saulopaꞌ nanak eꞌmoñeꞌtenan ñeñth ameꞌñenaya Yepartseshar Jesús. Paꞌtsrreꞌmoeñothpaꞌ ateth ot: —Napaꞌ oꞌch naꞌkllatweñaꞌ ñeñth ameꞌñenaya Jesús. Ñeñthoꞌmarña oꞌ awoꞌ alloꞌtsen ñeñth nanak amhchaꞌtareth korneshaꞌ eꞌñe all Jerusaléño.

² Xhap alloꞌtsenpaꞌ oꞌ enamos orden atthoch aꞌkllatwan ñeñth ameꞌñetsa. Oꞌ enam orden ñeñthchaꞌ anom aꞌyo anetso Damasco allekma apxhenet judioneshaꞌ poꞌprawo. Oꞌch xhap allpaꞌ oꞌch aposan ñeñth amhchaꞌtarethtetsa poerawo. Atthoch apet all llesens atthoch rromanatan acheñ ñeñth kotheneꞌ Jesús pokthaphña. Amaꞌt koyaneshaxhno ñamha yakmaneshaxhno oꞌch rromanatanet oꞌch wankatanet oꞌch anmarethterret Jerusaléño. Ateth kothapeꞌchña Saulo.

³ Allempoña agapwan orden allempoñapaꞌ oꞌ awoꞌ. Oꞌ xhap allameꞌtets Damascopaꞌ machayotha ñeñth nanak poptetsa entothpaꞌ oꞌ xhoyoꞌtampes eꞌñe ñesho.

⁴ Oꞌ xhoyoꞌtampespaꞌ ñañapaꞌ alla rromopra patso. Xhap patsopaꞌ eꞌman ñoñets ñeñth ateth oten: —Esomareꞌt, Saule, pemoeroxhtatennanña ñeñth nameꞌñenaya.

⁵ Sauloñapaꞌ ateth ot: —¿Eseshapeꞌt, Ayochreshathe, eñets? Ñeñth eñetspaꞌ alla otererr: —Napaꞌ ñeñthen Jesúsen, ñeñthara ñeñthen pemoeroxhtaten. Añpaꞌ phañeña moeroxhtatetsa. Tharroꞌmar xha phottena ñerraꞌmrratheꞌ ashen ñeñth eꞌñe pathpareꞌteñoth ñañeñachña atserrphatetsa.

⁶ Sauloñapaꞌ poꞌyorñothpaꞌ xha paꞌshmoena allempoñapaꞌ ateth ot: —Partseshachaꞌ, theꞌpaꞌ ¿errothenaꞌt penmen ñeñthchaꞌ ateth nepena? Partseshaꞌña Jesúspaꞌ ateth otererr: —Theꞌñapaꞌ oꞌch petanta, aweph Damasco. Allchaꞌña otapet ñeñthchaꞌ ateth pepha.

⁷ Ñeñth parro epoet sen Saulo ñetñapaꞌ attha kowanrrortenet. Pokwanrrorteñothetpaꞌ ama erroth oteto. Ñetpaꞌxhoꞌña eꞌmoet ñeñth eꞌmorrtatsa tharraña ama es enteto.

⁸ Allempoña Saulopaꞌ oꞌ tanta. Tantapaꞌ oꞌch kowaꞌyespaꞌ ama ento. Ñeñthoꞌmarña attha echaꞌnmet potothpaꞌ oꞌ anmet Damasco.

⁹ Oꞌ xhap Damascopaꞌ maꞌpamoet Sauloñapaꞌ ama enteno, ñamha ama es rreno, ñamha ama es orreno, amaꞌt koñeꞌtha.

¹⁰ Damascoñapaꞌ alloꞌtsen poesheñarr ñeñth nanak ameꞌñenaya Yepartseshar Jesús. Ñañapaꞌ añ paꞌsoꞌcheñ Ananías. Añña Ananíaspaꞌ Yepartseshar Jesús orrtoña ateth ñerraꞌm poexhopoñoth oꞌ xhoreꞌchpaꞌ ateth och: —¡Ananías! Ananíasña anaphpaꞌ, ateth ot: —Napaꞌ, Nepartseshare, añen.

¹¹ Yepartsesharñapaꞌ alla otererr: —Oꞌch notaph atethchaꞌ pepha. Oꞌch aweph alloꞌtsen thoñ ñeñth nanak paxharr allchaꞌ pentos Judas paꞌpakëll. Pexhap all paꞌpakllopaꞌ oꞌch phaꞌphthoꞌtos erroꞌtsentheꞌña ñeñth Saulo ñeñth tarsoꞌmarneshaꞌ. Alla otererr Yepartseshar: —Oꞌch notaph ñamha, añ ñeñthara Saulo eꞌñe theꞌpaꞌ alloꞌtsen maꞌyochetsa.

¹² Napaꞌ oꞌ norrtatwoñ ñeñth oꞌ entwa neshoth. Oꞌ entwan ateth ñerraꞌmrratheꞌ acheñ añ paꞌsoꞌcheñ Ananías wapatsa. Oꞌ wapa ñeshopaꞌ oꞌ nosan pot ñesho oꞌch alla kowerr.

¹³ Ananíasñapaꞌ alla anapoererr: —Partseshachaꞌ, napaꞌ oꞌ neꞌmareꞌch ateth oꞌ pha añ ñeñthara Saulo. Shonteꞌ acheñ oꞌ eꞌmareꞌtatnet attho ñapaꞌ nanak moeroxhtatenan ñeñth phameꞌñenaya Jerusaléño.

¹⁴ Theꞌpaꞌ ñapaꞌ echenan orden oꞌch wankatyesey alloweney ñeñthey phameꞌñenaya, oꞌch anmatey cárcelo. Ñeñth paꞌmhchaꞌtaretherneshaꞌ pen allowen judioneshaꞌ poꞌkornanesharpaꞌ oꞌ apet Saulo añ orden.

¹⁵ Yepartsesharñapaꞌ alla otererr: —Tharraña amaꞌt ateth theꞌpaꞌ oꞌch aweph all, ñeñth ateth oꞌ notwaph. Theꞌpaꞌ oꞌ neneꞌ Saulo ñeñthchaꞌ naꞌpotheneꞌ neñoñ amhchaꞌtarethneshesho. Amaꞌt poꞌpoñexhno acheñeneshopaꞌ ñapaꞌ aꞌpothonchaꞌ neñoñ. Ñamha amaꞌt israelenaꞌtarneshopaꞌ oꞌch aꞌpothon neñoñ.

¹⁶ Ñamha oꞌch neñotach Saulo ñapaꞌ oꞌch moeroxhta nanak nokop, tharroꞌmar theꞌpaꞌ oꞌch ameꞌñaꞌna na. Añpaꞌ allowa ñeñth ateth serrpareꞌt Yepartseshar epoet Ananías.

¹⁷ Allempoñapaꞌ oꞌ awoꞌ Ananías oꞌch entenanaꞌ Saulo. Xhap allpaꞌ oꞌ beꞌthosos pokollo alloꞌtsen Saulo. Oꞌ ponmosyapaꞌ oꞌ nosan pot eꞌñe ñesho. Nowan pot eꞌñe ñeshopaꞌ otosan Saulo, ateth och: —Masheñe Saule, Yepartseshar Jesús ñeñthkaꞌye phorrtoya allempo phoñen thoño. Theꞌpaꞌ añ ñeñthara Yepartseshar Jesús oꞌ moeñan na oꞌch non atthoch alla pekwerr, ñamha atthoch chorrapha Parets Poekamkëñ.

¹⁸ Ñeñtha otwapaꞌ allorokma rrataꞌnom paꞌklloyoth ñeñth ateth ñerraꞌmrratheꞌ es paꞌtall, oꞌ alla kowerr eꞌñe kowen. Alla kowerr eꞌñe kowenpaꞌ allempoñapaꞌ apatarethta Yomporekop.

¹⁹ Oꞌ apatarethetwapaꞌ oꞌ rrallmeꞌcherr. Oꞌ alla xherr poꞌwamenk. Allempoñapaꞌ allponmaterrerr alla Damascopaꞌ oꞌ serrpareꞌt epoet ñeñth ameꞌñetsa.

Allempo Saulopaꞌ eꞌñe ñenmath serrpareꞌterr all Damasco

²⁰ Ñamha Saulopaꞌ xhokma sen judioneshaꞌ poꞌprawo allchaꞌ serrpareꞌtatenanet ateth pena Jesús. Otanet añ Jesúspaꞌ poꞌñoxh ñeñthpaꞌ ñeñthña Parets Poechemer.

²¹ Allowenet ñeñth eꞌmoeneꞌpaꞌ otyeset: —Taꞌ, errothenwañakaꞌyeña theꞌ ñeñth yakmar. Añmapaꞌ ñeñthkaꞌye moeroxhtatayeꞌth awaña ñeñth ameꞌñenaya Jesús all Jerusaléño. Ñeñthoꞌmarña theꞌpaꞌ wena arr, moeneñ oꞌch rromanatenanaꞌ ñeñth ameꞌñetsa oꞌch anmarethtet kornaneshesho ñeñth paꞌmhchaꞌtaretherneshaꞌ pen allowen judioneshaꞌ poꞌkornaneshar.

²² Saulopaꞌ alloꞌna sen womenk phaꞌnmoeꞌ poeyoxher atthoch serrpareꞌtan Yompor poꞌñoñ. Nanak serrpareꞌtatanet attho poꞌñoxh Jesúspaꞌ ñeñthara Cristotats. Amaꞌt judioneshaꞌ ñeñth yexhetsa Damascopaꞌ ama errotheno anapeto.

Allempo Saulopaꞌ aꞌyetater judioneshaꞌ

²³ Attheña oꞌ allponmatpaꞌ añña judioneshaꞌpaꞌ oꞌpachet oꞌch moetset.

²⁴ Saulopaꞌ eꞌmareꞌch oꞌ oꞌpachet, oꞌch kowet atthoch oꞌch moetset. Arr kowet allothekma beꞌthenet all akonxhaꞌtamphsareth ora anets. Ellapeneteꞌth kowameꞌtet ñamha arepeneteꞌth.

²⁵ Tharraña ñeñth poeyochreshaꞌ Saulopaꞌ oꞌ anmet tsapo alloꞌtsen pokoll eꞌñe all akonxhaꞌtamphsareth anets, allñapaꞌ eñall ventana alloth aꞌswatamperet atarret kañthroth.

Allempo Saulopaꞌ poerrerra alla Jerusaléño

²⁶ Allempoñapaꞌ awerr Jerusaléño. Xherr Jerusaléñopaꞌ atarr moeneñ oꞌch entenanaꞌ ñeñth ameꞌñetsa. Ñeñthña ameꞌñetsapaꞌ ama moeneto oꞌch entenanetaꞌ tharroꞌmar nanak mechaꞌteñet, otenapoetañ atthoꞌtheꞌ shekënanet oꞌ ameꞌña.

²⁷ Añña poesheñarr ñeñth paꞌsoꞌcheñ Bernabépaꞌ ñañapaꞌ oꞌ anemh alloꞌtsen Jesús poellsensarneshaꞌ, oꞌ otosanet: —Añ Saulopaꞌ oꞌ entan Yepartseshar Jesús allempo sen Damasconeth. Yepartsesharepaꞌt epoet serrpareꞌt. Ñañapaꞌ ama mechaꞌto ñeñthoꞌmar atarr serrpareꞌt Damasco ateth pena Jesús.

²⁸ Allempotheññapaꞌ eꞌñe pokteꞌ eñchet, allempoñapaꞌ oꞌ eꞌñe parrokmatwet. Ñapaꞌ ama mechaꞌteno amaꞌt mamesha. Atarr nanak serrpareꞌtan Jesús poꞌñoñ.

²⁹ Xhokmach serrpareꞌten epoet judioneshaꞌ ñeñth eꞌmoeneꞌ griegaxhpaꞌ tharraña amach pokteyeꞌ enteñeto. Allempoñapaꞌ oꞌpachet ñamha all oꞌch moetset.

³⁰ Allempoña ñeñth parro ameꞌñenetpaꞌ anmet Saulo poꞌpoñ anetso Cesareo. Allothpaꞌ oꞌ moeñet ñamha anetso Tarso.

Attho Pedropaꞌ orrtatan Yompor poꞌpartsoña all oteñet Lido

³¹ Attheñapaꞌ oꞌ moetsoñeñtwerra ñeñth amoeroxhtatañ. All Judeo ñamha Galileo ñamha Samariopaꞌ oꞌwañ amoeroxhtatarethtet ateth peteꞌth awaña. Allowen ñeñth ameꞌñetsa alloꞌna senet womenk phaꞌnmoet poeyoxhret. Attheñapaꞌ oꞌ shontaꞌnma ñeñth ameꞌñetsa. Pameꞌñeñothetpaꞌ alloꞌna senet mechaꞌnaꞌtnomoet Yompor. Ñamha alloꞌna Parets Poekamkëñpaꞌ nanak koshatenanet.

³² Attheña Pedropaꞌ xhokmach taꞌyena emoꞌtyeseꞌ ñeñth ameꞌñetsa. Parrochpaꞌ oꞌ xhap alloꞌtsen ñeñth ameꞌñetsa all anetso paꞌsoꞌcheñ Lida.

³³ Allñapaꞌ entosan poesheñarr yakma añ paꞌsoꞌcheñ Eneas. Ñapaꞌ awathotheñ echarrtena alla phanena oꞌ posok char.

³⁴ Oꞌ entos Pedropaꞌ ateth otos: —Oꞌch, Eneaso, notaph, Jesucristopaꞌ oꞌch aꞌkrraterreph. Theꞌñapaꞌ oꞌch petanta oꞌch phaññoꞌten pemoeꞌ. Allorokma korrena, oꞌ tantena.

³⁵ Allowen ñeñth yexhetsa Lido ñamha Sarónopaꞌ allempoña eñchetpaꞌ xha poeswerret ñeñth awath pokthaphñet oꞌ ameꞌñerrñañet Yompor poꞌñoñ.

Allempo Pedropaꞌ tantaterran Tabita allempo rroma

³⁶ Eñall poesheñarr koyaneshaꞌ ñeñth ameꞌñetsa añ paꞌsoꞌcheñ Tabita, añ ñeñthara soꞌchñets Tabita ñeñth otenet griegaxho Dorcas. Ñapaꞌ arr yexhena anetso ñeñth paꞌsoꞌcheñ Jope eꞌñe alla allameꞌtets Lido. Ñañapaꞌ nanak amoeraña, xhokmach yenpoenan ñeñth wokchañetyets.

³⁷ Allempopaꞌ oꞌ atsnaꞌt. Atsnaꞌtpaꞌ attheñapaꞌ oꞌ rroma. Rromapaꞌ pamoꞌtseshaꞌñapaꞌ oꞌ apach ateth yexhenet ñet. Apatwetpaꞌ oꞌ phanet enoneth all tama aꞌyowen bhath.

³⁸ Allempoña ñeñth ameꞌñetsa allpaꞌ oꞌ eꞌmareꞌchet Pedro allameꞌttsoꞌtsena all anets Lido. Oꞌ eꞌmareꞌchetpaꞌ oꞌ moeñet epsheña yakma atthoch oteñetaꞌ onepaꞌ all allorokma. Allempoña xhapoet Pedreshopaꞌ

³⁹ Pedroñapaꞌ oꞌ kotherranet. Xhap allpaꞌ oꞌ anmet all cuarto eno alloꞌtsen arromñath. All thomxhen shonteꞌ rrethorrnaneshaꞌ ñeñth llekanrrortetsa. Allñapaꞌ all gatannaꞌtyenet ñeñth chorraꞌyenet ñeñth sepechyesanet awaña Tabitañ.

⁴⁰ Pedroñapaꞌ moeñwanet allowenet aꞌyeneth. Oꞌ moeñwanet aꞌyenethpaꞌ oꞌ konkorposa, oꞌ maꞌyocha. Maꞌyochwapaꞌ oꞌ poetallsa arromñatheshonethpaꞌ ateth och: —Oꞌch, Tabita, notaph, petanterra. Allempoñapaꞌ akwerrocheꞌ. Oꞌ enterran Pedropaꞌ xha anerrets.

⁴¹ Pedroñapaꞌ cheter potothpaꞌ echanter atthoch therr. Allempoñapaꞌ oꞌ xhoreꞌterran ñeñth ameꞌñetsa ñamha rrethorrnaneshaxhno. Oꞌ beꞌthosxhaꞌterretpaꞌ oꞌ gaterranet oꞌ tanterra ñeñth rromats.

⁴² Allowenet ñeñth yexhetsa all Jopopaꞌ oꞌ eꞌmareꞌchet ateth pena Pedro. Ñeñthoꞌmarña shonteꞌ acheñ oꞌ ameꞌñeret Yepartseshar Jesús.

⁴³ Pedroñapaꞌ alla aꞌpa atomat alla Jopo. Oꞌ aꞌpa all Simón paꞌpakllo. Ñeñth Simónpaꞌ añ poꞌtarwas pen oꞌch aꞌkowenetyesan paꞌrrom.