Los Hechos 7 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Attho Estebanpaꞌ serrpareꞌtatan amhchaꞌtarethneshaꞌ

¹ Allempoñapaꞌ añña korneshaꞌ ñeñth nanak amhchaꞌtarethpaꞌ aꞌphthoꞌtan Esteban, ateth och: —¿Poꞌñoxhaꞌt ateth?

² Estebanñapaꞌ ateth och: —Ñewa, masheñneshachaꞌ allowenes nomporneshachaꞌ oꞌch seꞌmhñoten, oꞌch notas ñeñth ateth phaꞌyeseꞌth awath yatañneshañ. Awathpaꞌ Yompor ñeñth nanak Paretspaꞌ orrtaneꞌth yatañ Abraham all anetso Mesopotamia. Allempopaꞌ ama xhenaꞌ Haráno allchaꞌ yexherra.

³ Allempo orrtana Abrahampaꞌ ateth och ñeñthchaꞌ ateth pha: “Theꞌpaꞌ oꞌch aweph arroth oꞌch pesaꞌnom añ peney, oꞌch pesaꞌnemh ñamha phamoꞌtseshaꞌ, oꞌch aweph allchaꞌ notaph.” Ateth och Yompor, atethxhoꞌ pha yatañ Abraham.

⁴ Allempoñapaꞌ aꞌypoꞌñaꞌnman all yexheꞌth all yexhanateꞌth ñamha caldeoꞌmarneshaꞌ attho xhap alloꞌtsen anets Harán all yexherra. Allempo oꞌ rroma pomporeñpaꞌ Yomporpaꞌ oꞌ alla anererr arrma Canaáno all yeyxhena ya theꞌ.

⁵ Tharraña allempo xhap arr awathpaꞌ Yomporpaꞌ ama apoeñaꞌ añ pats, amaꞌt koñeꞌtha. Tharraña Yomporpaꞌ awoꞌt och esempowañen oꞌch aph añ pats, eꞌñe ñokop, amaꞌt poechemerekop, ñamha poꞌmhrenñekop. Tharraña allempopaꞌ yatañ Abrahampaꞌ ama chemereꞌtenaꞌ.

⁶ Allempokma Yomporpaꞌ oꞌ eñotatan Abraham atthoch esempo poꞌmhreneñpaꞌ awanmoetchaꞌ arroth, xhapoetchaꞌ poꞌpoñ anetso Egipto all ama paꞌnyempañoyaye, allchaꞌ yexhaꞌwerret, allñapaꞌ moeroxhtatapanetchaꞌ alloꞌmarneshaꞌ acheñ. Ñamha añ eñotatan Abraham atthoch atarwasatarethtach eꞌñe attha poꞌmhreneñ, eꞌñe cuatrocientos char amoeroxhtatarethtet.

⁷ Tharraña Yomporpaꞌ oꞌ eñotatan Abraham ñamha poꞌpoñ. Awoꞌt och Yompor: “Tharraña napaꞌ netsaꞌtaterach ñeñthchaꞌ moeroxhtateꞌ pemhreneñ. Allempoñapaꞌ waxherretchaꞌ alla arr Canaáno allchaꞌ maꞌyocherrnet.”

⁸ Ñamha allempo Yomporpaꞌ awoꞌt otan Abraham poꞌpoñ ñeñthchaꞌ ateth yexhaꞌ judioneshaꞌ allempotheñ errponowañen, atthoch eñochet Yomporpaꞌ ama poeno poꞌñoñ. Añmapaꞌ ñeñth ateth otan Abraham: “Añ pokteꞌ oꞌch setsorre allowen asheñorrotholleshaꞌ.” Ñeñthoꞌmar allempo chemereꞌt Abrahampaꞌ poechemeretholl ñeñth soch Isaacpaꞌ awoꞌt tsorreñ. Poꞌpsokmatñopaꞌ oꞌ tsorre. Isaacñapaꞌ allempo oꞌ poꞌnpaꞌ oꞌ chemereꞌtana Jacob. Jacobñapaꞌ chemereꞌtana xharrasheña poechena epa ñeñthara yatañneshañ yepen ya ñeñthey israelenaꞌtarey.

⁹ ‘Tharraña allempopaꞌ añña ñeñth yatañneshañ yepenpaꞌ oꞌ sopeꞌcheñet paꞌmoꞌnasheñ José. Ñeñthoꞌmarña oꞌ pomet paꞌmoꞌnasheñ. Ñeñthña agapoeꞌpaꞌ oꞌ anemh bhaxhayo all anets Egipto.

¹⁰ Tharraña Yompor ña aꞌnataya. Yomporpaꞌ oꞌ aꞌpoktatwoñ ora allowen attho moeroxhtacheteꞌth. Añña ñeñth amhchaꞌtarethtatseꞌth Egiptopaꞌ eꞌñe kowen entaneꞌth José. Añ ñeñth amhchaꞌtarethtatseꞌth Egipto ñeñthpaꞌ oteñet Faraón. Faraónpaꞌ eñotan José ñapaꞌ nanak es eñoten. Ñeñthoꞌmar amhchaꞌtareth Faraónpaꞌ oꞌ nan José ñeñthchaꞌ amhchaꞌtarethtapretaya all Egipto. Ñamha ora allpon ñeñth tarwasets Faraón paꞌpaklloꞌmarpaꞌ oꞌ nan José ñeñthchaꞌ yechenawet.

¹¹ ‘Allempoñapaꞌ orrta moexheñets. Ora allowen egiptoꞌmarneshaꞌ nanak cheporrareꞌtet. Ñamha ora allowen canaánoꞌmarneshaꞌpaꞌxhoꞌña nanak cheporrareꞌtet. Paꞌchporrñothetpaꞌ nanak moeroxhteteꞌth. Yatañneshañpaꞌ ama echeteꞌthe pokrramet amaꞌt koñeꞌtha.

¹² Allempoñapaꞌ yatañ Jacobpaꞌ oꞌ eꞌmareꞌtan orameñ rreñets Egipto. Ñeñthoꞌmarña moeñan poechemereshaꞌ ñeñthara yatañneshañ yepen ya. Ñetpaꞌ oꞌ awanmoet Egipto oꞌch rañthenetaꞌ rreñets.

¹³ Rañthaꞌwenetaꞌ rreñetspaꞌ oꞌ poerraxherret. Atomatpaꞌ oꞌ wañaperret pokrramhpaꞌ oꞌ alla awanerreterr Egipto. Allempoña xhaxherreterr Egipto paꞌmoꞌnasheñet Josépaꞌ ateth otanet ñapaꞌ ñaña paꞌmoꞌnasheñ penet. Allempoñapaꞌ oꞌ chemeꞌchet paꞌmoꞌnasheñ José. Paꞌmoꞌnasheññapaꞌ oꞌ anmanet amhchaꞌtarethesho atthoch chemeꞌtatanet.

¹⁴ Chemeꞌtatwanetpaꞌ allempoña Josépaꞌ oꞌ moeñerranet paꞌnyeto añekop atthoch eretaꞌ pompor Jacob ñamha allowen pamoꞌtseshaꞌ, ateth ot José: “Onetepaꞌ allowenet Egipto.” Ñeñthoꞌmarña allowen kanxhrroch xharraꞌ poechena amnarsheña pamoꞌtseshaꞌ ñetñapaꞌ awanmoet Egipto alloꞌtsen José.

¹⁵ Allempoñapaꞌ xhaxhaꞌtet Egipto. Oꞌ met allpon charpaꞌ oꞌ rroma yatañ Jacoboñ all Egipto. Meterrerr allpon charpaꞌ oꞌ kollaꞌwa ñamha poechemereshañ ñeñthara yatañneshañ yepen. Kollaꞌwetpaꞌ alla apamparethtet all Egipto.

¹⁶ Ñewa, meterrerr allpon charpaꞌ oꞌ awanmarethterret poenpaꞌts anetso Sikmho allchaꞌ apamparethterret ello poenpaꞌts. All apamparethterretpaꞌ ñeñthpaꞌ ñeñthara pats ñeñth oꞌ rañthaꞌwa Abrahamañ awath. Añña patspaꞌ ñeñthoꞌ vendoñ Hamor poechemereshañ awath all Sikmho.

¹⁷ Alla oterraneterr Esteban, ateth ot: —Allponerrerr charpaꞌ xhapmoch allempo oꞌch etsota ateth Yomporpaꞌ otaneꞌth awath Abraham allempo womenk naneꞌth poꞌñoñ. Ñetpaꞌ allempo nanak mereteꞌth all Egipto.

¹⁸ Attheñapaꞌ oꞌ met shonteꞌ charpaꞌ oꞌ orrta poꞌpoñ amhchaꞌtareth Egipto ñeñth ama poentarano José, tharroꞌmar Josépaꞌ awathotheñ oꞌ rroma.

¹⁹ Añña amhchaꞌtarethpaꞌ nanak moeroxhtatyesonay yatañneshañ. Oꞌ nanet ñoñets atthoch pamoꞌmtayetpaꞌ oꞌch aꞌypoꞌñet poechemeretholl aꞌyo. Añekpoꞌch ateth peñet atthoch moetsatachet poechemeretholl. Allochñapaꞌ amach nanak mereto.

²⁰ Eꞌñe allempopaꞌ oꞌ eñalleta Moisés tharraña Yomporpaꞌ eꞌñe kowen entaneꞌth Moisés. Pamoꞌmteꞌpaꞌ eꞌñe aꞌnawa koweꞌ maꞌpmha arrorr all paꞌpakllo.

²¹ Allempoñapaꞌ oꞌ xhap allempo amach errotheno koweñeto paꞌpakllo aꞌnawa. Allempopaꞌ aꞌypoꞌñet aꞌyeneth. Añña amhchaꞌtareth Faraón poꞌseñpaꞌ awoꞌ wapa all neñet awoꞌ entos, nanak amoeroxhen eñch, allentha aner atthoch ñañrecha. Attheñapaꞌ oꞌ atarrtach paꞌpakllo ateth ñerraꞌm poechoyor eꞌñe ño.

²² Ñeñthoꞌmarña Moiséspaꞌ ayxhatarethta ora allpon ñeñth ateth eñotyeseꞌth egiptoꞌmarneshaꞌ. Nanak eñotañteꞌth ñerraꞌm allempo eñoseꞌth, nanak eñotañteꞌth ñerraꞌm allempo es phaꞌyeseꞌth.

²³ ‘Allempo xhap paꞌtatsoch xharraꞌ poꞌcharña Moiséspaꞌ nanak yerpaneꞌth pamoꞌtseshaꞌ ñeñthara israelenaꞌtarneshaꞌ. Atarr secheꞌth oꞌch abhchenanetaꞌ. Allempoña parrochpaꞌ oꞌ awoꞌ alloꞌtsaꞌyen pamoꞌtseshaꞌ.

²⁴ Oꞌña xhap allpaꞌ all entosan poesheñarr egiptoꞌmarneshaꞌ nanak koñchatenan poesheñarr israelenaꞌtar. Ñañapaꞌ oꞌ moñsosana pamoꞌts. Oꞌ xhote womenkpaꞌ xha rroma. Attho chemnatanaña pamoꞌts.

²⁵ Añña Moiséspaꞌ otapañ pamoꞌtseshaꞌpaꞌ eꞌñech kowen entapet. Otapañ oꞌtheꞌ eñochet Yompor moeñeꞌ atthoch aꞌkeshphatan pamoꞌtseshaꞌ. Tharraña ñetpaꞌ ama eseshayeꞌ pokteꞌ entaye.

²⁶ Tharroꞌmar tsapathñapaꞌ alla awenerr, allempopaꞌ oꞌ entwenanerr epsheña pamoꞌtseshaꞌ xhoꞌ orrotenet eꞌñe ñañeñeta. Ñañapaꞌ moeneñ oꞌch amoꞌtstaterranet, ateth otanet: “Eswañakaꞌ masheñneshachaꞌ sottenña arr. Añña pokteꞌ eꞌñech semoꞌnasheñ sephannena.”

²⁷ Ñeñth cheteneꞌ pamoꞌtspaꞌ oꞌ aꞌmchech Moiséspaꞌ ñañapaꞌ ateth ot: “Eseshaꞌwañakaꞌ peneneꞌña pha amhchaꞌtareth arr yokop. Eseshaꞌwañakaꞌ photeneꞌ oꞌch phaꞌtsrreꞌmoxhta arr.

²⁸ Ñatoꞌ añtheꞌ pemnen oꞌch pemtsan namha ateth pepeꞌ moetseꞌ egiptoꞌmarneshaꞌ ellerro.”

²⁹ Allempoña oꞌ eꞌman añ ñoñets Moisésñapaꞌ oꞌ yeta poemhchañoth. Oꞌ awoꞌ aꞌyo alloꞌtsen pats paꞌsoꞌcheñ Madián. Oꞌ yexhaꞌwerra allaphar. Allñapaꞌ all senaꞌtapaꞌ oꞌ chemereꞌt epsheña.

³⁰ Oꞌ alla oterraneterr Esteban, ateth ot: —Allempoñapaꞌ oꞌ meterrerr paꞌtatsoch xharraꞌ char. Parrochpaꞌ amarathoꞌtsen Moisés allameꞌtets aspentho Sinaíphno. Allñapaꞌ entosan tsachmatholl all ñotha worten. Eꞌñe wortoth tsoꞌpaꞌ alloth orrtoña Parets poꞌmhllañoteñer.

³¹ Ñeñth entos Moiséspaꞌ ateth ot: “¿Estheꞌ wortetsña tharro?” Eꞌñe xhapatsa allameꞌtets oꞌch enteñaꞌpaꞌ oꞌ eꞌman ñoñets. Partsepaꞌt eñets, ateth och:

³² “Napaꞌ ñeñthen Poꞌyomporer pen amaꞌt phatañneshañ ñeñthara Abraham ñamha Isaac ñamha Jacob.” Moiséspaꞌ xha yoren. Poemhchañothpaꞌ ama kowano worteꞌ.

³³ Yomporñapaꞌ ateth otererr: “Pemhchaꞌnaꞌteñothpaꞌ perrotheꞌt pesapat tharroꞌmar all phathenpaꞌ ñeñthpaꞌxhoꞌ nanak Parets tharroꞌmar alloꞌtsenen na.”

³⁴ Oꞌ alla oterrerr Yompor: “Napaꞌ nenteñ attho moeroxhtatennanet ñeñth nechemereshaꞌ nepen ñeñthara israelenaꞌtar. Napaꞌ neꞌmoenanet ateth yawanrrortenet. Ñeñthoꞌmarña theꞌpaꞌ oꞌ nowapa oꞌch naꞌkeshphatanet. Theꞌñapaꞌ oꞌch nemñaph pha Egipto.” Añpaꞌ ñeñtha ateth otan Yompor Moisés.

³⁵ ‘Añña Yompor poꞌmhllañotheñer ñeñth orrtetsa all worten tsachmopaꞌ ñeñthña eñotateꞌ Moisés ateth moenen Yompor. Ñeñthoꞌmar yeñoteñ Yomporpaꞌ awoꞌt llesensan Moisés oꞌ alla moeñer pamoꞌtseshesho ñeñthchaꞌ amhchaꞌtarethtatsa ñokpoet ñamha ñeñthchaꞌ aꞌkeshphatawet alloth amoeroxhtatarethteteꞌth. Añ ñeñthara Moisés ñeñth ama pokteyeꞌ ento awaña pamoꞌts ñeñth otet awaña: “Eseshaꞌwañakaꞌ peneneꞌ pha amhchaꞌtareth arr yokop. Eseshaꞌwañakaꞌ photeneꞌ oꞌch phaꞌtsrreꞌmoxhta arr.”

³⁶ Añ ñeñthara Moisés ñeñth anerrawet Egiptoth. Ñeñthara Moiséspaꞌ orrtatanet ñeñth ama poentareto all Egipto. Ñamha saꞌpoth ñeñth Tsasasen all orrtatanet ñeñth ama poentareto, attho eñotatanet añmapaꞌ ñeñth ateth pena Parets. Ñamha all chopeñeꞌchen amarathoꞌmar paꞌtatsoch xharraꞌ char Moiséspaꞌ all orrtatyesanet ñeñth ama poentareto. Añpaꞌ ñeñth eñotatanet ateth penaña Parets.

³⁷ Añ ñeñthara Moisés awathpaꞌ oꞌ otan israelneshaꞌ ateth: “Yomporpaꞌ orrtaterrnaschaꞌ poesheñarr ñeñthchaꞌ aꞌmhterreꞌ Parets poꞌñoñ, ñeñthara ñeñth eꞌñe samoꞌts sepen eꞌñech atthekma orrtaterr eꞌñe ateth orrtatenen namha. Ñeñthchaꞌña xhokma seꞌmhñoterrña sa.”

³⁸ Amaꞌt allempo yatañneshañ chopeñeꞌcheteꞌth amarathareropaꞌ añña Moisés alloꞌtseneta parro amaꞌt allpaꞌ xhokmach apxheteꞌth Yomporekop. Ñapaꞌ alloꞌtsena aspentho Sinaíphno allempo orrtoña Yompor poꞌmhllañotheñer ñeñth eñoranaꞌtaya ñamha oꞌ yexhach ñoñets alloch eꞌñe yokrra Partsokop. Ñeñthña ñoñets allempo poerrerra Moisés aspenthothpaꞌ oꞌ yexhatwerran ñamha pamoꞌtseshaꞌ.

³⁹ ‘Tharraña amaꞌt ateth peꞌth Moiséspaꞌ yatañneshañpaꞌ ama moeneteꞌthe oꞌch ameꞌñyet Moisés. Ama eseshayeꞌ pokteyeꞌ entayeꞌthe. Eꞌñe poeyoxhretopaꞌ atarroꞌ moeneteꞌth oꞌch alla poerrerret Egipto.

⁴⁰ Amaꞌt allempo aspenthoꞌtsen Moiséspaꞌ yatañneshañpaꞌ ateth otoñet paꞌmoꞌnasheñ Aarón: “Theꞌpaꞌ oꞌch peyexhkatonay ñeñthchaꞌ yeyoser yeperr ñeñthchaꞌ yanerreꞌ alla Egipto. Añ Moisés ñeñth yanmoeꞌ Egiptothpaꞌ yapaꞌ ama yeñoteñe, taꞌ, ¿erratheꞌ oꞌ awoꞌ?”

⁴¹ Allempoñapaꞌ oꞌ yexhkatanet ñeñth ateth ñerraꞌmrratheꞌ añ ayexhkatareth oro. Oꞌ moetset carnero oꞌ neññañetaꞌ eꞌñe ñesho. Nanak kowen entet ñeñth yexhkatet eꞌñe pototh.

⁴² Allempoña Yomporpaꞌ oꞌ aꞌypoꞌñaꞌnmanet, oꞌ moenatanet atthoch moechatseꞌtet ñeñth yexhoyoꞌtampeneꞌ amaꞌt arrorr ñamha ranto. Oꞌ pet ateth kellkëꞌth ñeñth aꞌmhtayeꞌth Yompor poꞌñoñ awath. Añmapaꞌ ñeñth kellkëꞌth awath, ateth ñerraꞌm Yompor otets: Napaꞌ oꞌch notas israelenaꞌtarneshachaꞌ, amaꞌt oꞌ semtsa carnero, amapaꞌ wakësh, tharraña ama nokpayeꞌ semtso, ñeñthpaꞌ ama neshoyeꞌ sewapache. Amaꞌt ora añ paꞌtatsoch xharraꞌ char all sechopeñeꞌchen amaratharero ateth es sephaꞌyen.

⁴³ Añ seyomporer sepen poꞌpoñ, ñeñth ayexhkatareth ñeñth soten alloꞌ yexhena seyoser ñeñth sesochen Molok. Amapaꞌ ateth ñerraꞌm ayexhkatareth rantomaꞌth ñeñth soten añmapaꞌ seyosroꞌ ñeñth sesochen ñamha Refán. Shonteꞌ ayexhkatarethexhno ñeñth sekonkorpanaꞌtena. Ñeñthoꞌmarña theꞌpaꞌ oꞌch nemñas nanak allaphar, all Babilonio. Añpaꞌ allowa ñeñth ateth kellkëꞌth awath ñeñth aꞌmhtayeꞌth Yompor poꞌñoñ.

⁴⁴ Oꞌ alla oterraneterr Esteban, ateth ot: —Awath yatañneshañpaꞌ allempo chopeñeꞌcheteꞌth amarathareropaꞌ anmoeteꞌth pokoll shetamtsopoꞌ allekma apxheteꞌth Yomporekop. Oꞌponopaꞌ all neteꞌth mapoettall alloꞌ akellkareth ñoñets ñeñth poktetsa Yomporekop. Añ pokoll shetamtsopoꞌ Moiséspaꞌ ña yexhkatayeꞌth eꞌñe ateth ocheꞌth Yompor poꞌmhllañotheñer eꞌñe ateth gacheꞌth Yompor.

⁴⁵ Allempo rromanom Moisés poechopeꞌchpayopaꞌ oꞌ naꞌnmet Josué ñeñthchaꞌ anmoeꞌ yatañneshañ. Apaꞌnmet ñamha shetamtsopoꞌ ñeñthñapaꞌ xhapachet alloꞌtsenoꞌ pats ñeñth otaneteꞌth Yompor awathotheñ oꞌch apanet. Poꞌpoñ acheñeneshaꞌ ñeñth yexhetsa allpaꞌ Yomporpaꞌ oꞌ moeñoꞌtwerranet atthoch yatañneshañpaꞌ oꞌch yexhaꞌwerret all. Allempopaꞌ oꞌ xhapatet all shetamtsopoꞌ allekma apxhenet Yomporekop. Shetamtsopawopaꞌ allekma apxheteꞌth tharrempowa allempo orrta David.

⁴⁶ Allempo orrta Davidpaꞌ ñapaꞌ eꞌñe kowen enteñ Yompor. Ñañapaꞌ oꞌ enaman Yompor pokteꞌtheꞌ enteñ oꞌch yexhkatoñ paꞌpakëll ñeñth eꞌñe kowen echarr. Moeneñ oꞌch yexhkatan Yompor paꞌpakëll, ñeñthara Poꞌyomporer peꞌth ñamha paꞌtañ Jacoboñ.

⁴⁷ Tharraña amaꞌt moeneñeñ ñapaꞌ Yomporpaꞌ ama moeno. Añña moenatoñ poechemer Salomón, ñach thomateꞌ paꞌpakëll.

⁴⁸ Tharraña Ñeñth nanak Paretspaꞌ ama yexheno pokollo ñeñth yeyexhkaten ya, arromñathey. Amaꞌt ateth oteꞌth ñeñth aꞌmhtayeꞌth Yompor poꞌñoñ, ateth ñerraꞌm Yompor eñets, ateth oten:

⁴⁹ Napaꞌ nanak Partson. Napaꞌ nenten enet ateth ñerraꞌm nekonañ, patsñapaꞌ nenteñ ateth ñerraꞌm allchaꞌ nenen netak. Errothenowachñakaꞌ seyexhkatonña pokoll allchaꞌ neyxha. Ama nepallteno allchaꞌ neyxha, ateth oten Yompor.

⁵⁰ Napaꞌ newamenkoth neyexhkatwa ora allowen ñeñth sentyen. Añpaꞌ allowa ateth ot Yompor.

⁵¹ Alla oterraneterr Esteban: —Sapaꞌ nanak seꞌcharrtena, seyoxhropaꞌ ama sokthapeꞌcheno ateth ñerraꞌm Yomporenaꞌtares. Ama semno oꞌch seꞌmhñotoñ Yompor poꞌñoñ. Xhokma sathpareꞌteññañ Parets Poekamkëñ. Ateth peꞌth satañneshañ awath theꞌpaꞌ atethxhoꞌ sepena samha.

⁵² Amaꞌt allowen ñeñth aꞌmhtayeꞌth Yompor poꞌñoñ awath satañneshaññapaꞌ xha moeroxhtatyesaneteꞌth. Amaꞌt awath allempo ama orrtenaꞌ Jesúspaꞌ ñeñth aꞌpothayeꞌth attho esempowañen oꞌch wapa Cristo ñeñth eꞌñe pokteꞌ es pets, ñeñthpaꞌxhoꞌña satañneshañpaꞌ xha moetse. Theꞌpaꞌxhoꞌña añ Cristo ñeñth eꞌñe pokteꞌ es petspaꞌ awoꞌ sepomh samha atthoch semtsach.

⁵³ Alla oterraneterr Esteban: —Amaꞌt Parets poꞌmhllañotheñer ñeñth señotateꞌ ñeñth poktetsa Yomporekop sañapaꞌ sathpareꞌtoñ Yompor poꞌñoñ. Añmapaꞌ allowa ñeñth ateth serrpareꞌtatanet Esteban.

Allempo moetset Esteban

⁵⁴ Allempoña ñeñtha eꞌmwet ateth ot Estebanpaꞌ nanak atsrreꞌmatanet. Paꞌtsrreꞌmoeñothetpaꞌ xha rrasoꞌtyeset paꞌs.

⁵⁵ Allempo Estebanpaꞌ eꞌñe chorreña Parets Poekamkëñ. Ñañapaꞌ oꞌ kowaꞌ enoneth, allñapaꞌ all entan Yompor poꞌkowenña. Entan Jesús eꞌñe poꞌpartsoteñoth all then Pompor poꞌkowenroth.

⁵⁶ Allempoñapaꞌ oterrerr Esteban: —Napaꞌ oꞌ nent enet atorareth. Oꞌ nent ñamha alloꞌtsen Ñeñth Acheñetosets, poꞌpartsoteñothpaꞌ all then Parets poꞌkowenroth.

⁵⁷ Acheñeneshaꞌña paꞌtsrreꞌmoeñothetpaꞌ rranareꞌtet. Poerranareꞌteñothetpaꞌ mopaketaꞌtyeset, oꞌ matrraꞌtet ñesho atthoch oꞌch rromoet.

⁵⁸ Oꞌ rromoetpaꞌ oꞌ anmet aꞌyeneth all ama eñalle pokoll allchaꞌ rrolleꞌchet. Ñeñthchaꞌ rrolleꞌteꞌpaꞌ oꞌ rrotrraꞌtyeset paꞌshtam, oꞌ naꞌyeset eꞌñe alloꞌtsen poesheñarr yakma ñeñth wepoeshameñ ñeñth paꞌsoꞌcheñ Saulo.

⁵⁹ Allempoñapaꞌ rrolleꞌchet. Rrolleꞌchetpaꞌ Estebanñapaꞌ oꞌ maꞌyochapaꞌ, ateth ot: —Nepartseshare Jesúso, phagaponchaꞌ nekamkëñ.

⁶⁰ Allempoñapaꞌ konkorpa. Konkorpapaꞌ eñora womenk, ateth ot: —Amach Nepartseshare petsaꞌtatatstaneto. Allempoñapaꞌ ñeñtha otwapaꞌ oꞌ moechecha, oꞌ rroma.