Los Hechos 28 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Allempo xhapoet koñeꞌth pats paꞌsoꞌcheñ Malta

¹ Allempoña oꞌ yekeshphaꞌwa alloweneypaꞌ allempoñapaꞌ otyet añ koñeꞌth patspaꞌ añoꞌ paꞌsoꞌcheñ Malta.

² Añña acheñeneshaꞌ ñeñth yexhetsa allpaꞌ nanak moerapyet ñeñthoꞌmarña aꞌthoronayet tsoꞌ allchaꞌ yeshotosa, tharroꞌmar allempopaꞌ xha watena oꞌ yesnatheꞌt. Tharraña eꞌñe kowen agapapoey allowen acheñeneshaꞌ.

³ Pabloñapaꞌ allentha tsellaꞌthpechospaꞌ oꞌ aꞌthamoꞌyeꞌ tso. Allempoñapaꞌ machayotha xhaꞌnom shecheph eꞌñe tsoth. Awoꞌt atserr eꞌman tsoꞌpaꞌ oꞌ xhaꞌnompaꞌ, xha axhan Pablo potothpaꞌ alla aꞌsopeꞌch.

⁴ Acheñeneshaꞌ ñeñth yexhetsa allpaꞌ eñchet Pablo xha aꞌsopeꞌcheñ shecheph potothpaꞌ ateth otannaꞌtyeset: —Añ acheñpaꞌ amtsañtheꞌkaꞌye ñeñthoꞌmar theꞌpaꞌ amaꞌt oꞌ keshphaꞌwa saꞌpothpaꞌ theꞌña Yomporpaꞌ oꞌch tsaꞌtacha.

⁵ Tharraña Pablopaꞌ paꞌshkeꞌcherra shechephñapaꞌ oꞌ shoraꞌnerr tso, amaña errotheyeꞌ pe amaꞌt mamesha.

⁶ Allempoña acheñeneshaꞌpaꞌ attha koweñet Pablo ñatoꞌ machayothach añekmoenta potpaꞌ oꞌch thakoꞌra rromoeꞌ. Allempoñapaꞌ oꞌ kowaꞌwet oꞌchet ama es atsoto, allempoñapaꞌ oꞌ kothapeꞌcherret poꞌpoñ, ateth otet: —Añpaꞌ poꞌñoxh Paretstheꞌ.

⁷ Ñeñthña aneꞌtañtetsa allpaꞌ añ paꞌsoꞌcheñ Publio. All yexhap yapaꞌ allothpaꞌ allameꞌttsa all yexhena Publio, allpaꞌ alloꞌtsen poꞌpatseñ. Ñapaꞌ oꞌ agapapoey eꞌñe kowen ñeñthoꞌmar allpaꞌ yemaꞌpamoetnom paꞌpakllo.

⁸ Eꞌñe allempopaꞌ añña Publio pomporpaꞌ xha atsnaꞌten, nanak woraten ñamha xha chemotseꞌten, ama achñeno. Allempoña Pablopaꞌ oꞌ awoꞌ oꞌch enteñaꞌ. Allempoña xhap Pablopaꞌ ñañapaꞌ maꞌyochamphsosya. Allempoña Pablopaꞌ oꞌ aꞌphllanaꞌchpaꞌ añña ñeñth atsnaꞌtetspaꞌ allentha korrena.

⁹ Allempoña eꞌmareꞌch allowen acheñeneshaꞌ ateth oꞌ phosa Pablopaꞌ wapyesa acheñeneshaꞌ ñeñth atsnaꞌtyets. Ñetpaꞌxhoꞌña eꞌñe aꞌkrratyeswanet Pablo.

¹⁰ Ñeñthoꞌmarña acheñeneshaꞌpaꞌ shonteꞌ regalaꞌyesyet paꞌnamen. Ñamha allempo awamperryerr botopaꞌ nonayet allpon ñeñth yepalltena.

¹¹ Allempoña oꞌ met maꞌpmha arrorrpaꞌ oꞌ alla awamperryerr poꞌpnañ boto. Ñeñthña botepaꞌ ñeñth koweneꞌ oꞌch metwen allempo orrnoteñtsopoten. Añ botepaꞌ ñeñth wapatsa awaña Alejandrioth. Ñamha añ botepaꞌ echenan poñeꞌmhagoth acheñmaꞌth ñeñth epoeshaꞌ ñeñth tomaꞌntatenet poꞌyosret; ñeñthpaꞌ añ paꞌsoꞌcheñ Cástor; poꞌpsheñeñpaꞌ añ paꞌsoꞌcheñ Pólux.

¹² Allempopaꞌ arr yetsotnoma all oteñet Siracusa. Allñapaꞌ alla yemaꞌpamoetnom.

¹³ Allothpaꞌ allampañoꞌmara yokthatophñeꞌch pats, attheñapaꞌ yexhap all oteñet Regio. Allpaꞌxhoꞌ all yetsotnoma. Tsapathñapaꞌ oꞌ mhorrarenerr mameshaꞌtets. Mhorrpaꞌ arroth wena yechaꞌñemhtaꞌnoth. Allempoñapaꞌ oꞌxhoꞌ alla awampenyerr. Allothñapaꞌ eꞌñe poepomtañokma yexhap all oteñet Puteoli. Allpaꞌ all yetsotosa.

¹⁴ Allñapaꞌ yentos ñeñth ameꞌñetsa. Ñetpaꞌ aꞌpatapyet all yexhenet, ñeñthoꞌmarña yapaꞌ alla yekanxherrmatnom ñesheto. Atthothapaꞌ oꞌxhoꞌ yeyaꞌrrota ñamha Romo.

¹⁵ Añña ñeñth ameꞌñetsa all Romopaꞌ awoꞌt eꞌmareꞌtyet oꞌ yexhap allampañopaꞌ allenthaꞌt onaxhaꞌtet oꞌch poktapyet. Poesheñaꞌtetspaꞌ oꞌ xhapoet all oteñet Foro ñeñthara Apio. Poꞌpotantaññapaꞌ allaꞌt xhapyeset rrocho all oteñet Maꞌppawa Pokoll. Allñapaꞌ all poktaꞌyet. Allñapaꞌ all entosanet Pablopaꞌ nanak parasyosoꞌtan Yompor tharroꞌmar allempopaꞌ nanak koshatapet Pablo.

¹⁶ Allempoña oꞌ yexhap Romopaꞌ ateth otapet Pablo yexhosepaꞌtoꞌ elloneth, tharraña xhokma net solltar ñeñthchaꞌ kowamphseꞌ.

Allempo Pablopaꞌ serrpareꞌtatosanet allempo xhap anetso Romo

¹⁷ Pomaꞌpamtañoñapaꞌ añña ñeñth amhchaꞌtarethtetsa judioneshakop allpaꞌ Pabloñapaꞌ agotatanet allowenet. Allempoña oꞌ eꞌñe apxhaꞌwetpaꞌ Pabloñapaꞌ ateth otanet: —Masheñneshachaꞌ, amaꞌt napaꞌ ama erroth nepeñeña judioneshaꞌ ñamha ama xho newaporeꞌtateno ñeñth ateth yexheꞌth yatañneshañpaꞌ theꞌña judioneshaꞌpaꞌ oꞌ attha rromaꞌnet all Jerusaléño, oꞌ pomnet alloꞌtsen romanoneshaꞌ.

¹⁸ Ñetpaꞌ aꞌphthoꞌtareꞌtnet, tharraña amaña entoneto attho alloch moetsatnet, ñeñthoꞌmar ñetpaꞌ moeneñetañ oꞌch aꞌrroyerrnetañ.

¹⁹ Tharraña judioneshaꞌpaꞌ ama pokteyeꞌ eñcheto oꞌch aꞌrroyerrnet. Ñeñthoꞌmarña napaꞌ nesecha oꞌch entatennetaꞌ amhchaꞌtareth arr Romo. Tharraña napaꞌ ama xho notteñeꞌcheñe namoꞌtsnaꞌtar.

²⁰ Ñeñthoꞌmarña theꞌpaꞌ oꞌ nagotatwas allochñapaꞌ oꞌch neserrpareꞌtatwas ñeñth ateth pennet. Ñamha napaꞌ nameꞌñena attho ñerraꞌm yerromapaꞌ Yomporpaꞌ oꞌch tantaterrey esempowañen. Ñeñthoꞌmarña theꞌpaꞌ oꞌ sentwan napaꞌ ewankarethen, tharraña amaꞌt allowen judioneshaꞌpaꞌ atthekma ameꞌñenetañ.

²¹ Ñetñapaꞌ ateth ochet Pablo: —Tharraña yapaꞌ ama yagënaꞌ carta Judeoth ñeñth ateth otenet phokop. Ñamha ñeñth ameꞌñetsa amaꞌt wapyenet arrpaꞌ ama eseshaꞌ erroth otetso phokop ñeñth ama kowenayaye.

²² Yapaꞌ aña yeñoten poꞌñoxh xhokma eꞌmoñeꞌteñet errakmañen ñeñth kotheneꞌ Jesús pokthaphña. Ñeñthoꞌmarña yapaꞌxhoꞌña yemneñ theꞌpaꞌ oꞌch yeꞌmhñotaph yamha errothentheꞌ phokthapeꞌchen pha.

²³ Allempoñapaꞌ aꞌpoktachet allempoch waxhaꞌtet alloꞌtsen Pablo allempoꞌch serrpareꞌtatanet. Allempoña oꞌ xhap allempoch waxhaꞌtetpaꞌ allempopaꞌ shonteꞌ acheñ waxhaꞌtatsa Pablesho. Allempoña Pablopaꞌ eꞌñe ellapen serrpareꞌtatawet; aꞌpothanet ateth pena Yompor poꞌkowenña ñeñth attho ayochreshathtena ña. Ñamha lleyatyesanet Moisés poꞌñoñ all oten atethchaꞌ pha ñeñthchaꞌ Cristotats. Ñamha lleyatyesanet poꞌñoñ ñeñth aꞌmhtayeꞌth awath Yompor poꞌñoñ all oten ñamha atethchaꞌ pha ñeñthchaꞌ Cristotats. Ñapaꞌ nanak moeneñ oꞌch ameꞌñatanet attho Jesúspaꞌ poꞌñoxh ñeñth Cristotats.

²⁴ Eꞌñe allempopaꞌ ameꞌñaꞌyesyet poesheñaꞌtets, tharraña poꞌpotantañpaꞌ ama es ameꞌñatso.

²⁵ Attheñapaꞌ ñañeñeta achmhareꞌtannaꞌtyeset. Allempo awanerrmochetpaꞌ allempoña Pablopaꞌ otanet: —Eꞌñe poꞌñoxh ateth oteꞌth Isaías awath allempo Parets Poekamkëñothpaꞌ otan satañneshañ:

²⁶ Oꞌch soteñaꞌ judioneshaꞌ añ ñoñets: Amaꞌtchaꞌ xhokma eꞌmhñotenetpaꞌ amaꞌt awathapaꞌ amach xhapaneto poeyoxhreto. Ñamha amaꞌtchaꞌ xho es entwetpaꞌ amach xhapaneto poeyoxhreto.

²⁷ Allothpaꞌ oꞌch sotenanetaꞌ, theꞌpaꞌ poeyoxhretopaꞌ nanak echarrtenet atthoch amach es xhapaweto poeyoxhreto. Theꞌpaꞌ amach moeneto oꞌch es eꞌmhñotet thayeꞌtoꞌ xhapanet poeyoxhreto. Theꞌpaꞌ amach moeneto oꞌch es entet thayeꞌtoꞌ xhapanet poeyoxhreto. Atthetach amach es kothapeꞌcherreto nokop amaꞌt mamesha atthoch naꞌkeshphaterranet. Añpaꞌ allowa ateth oteꞌth Isaías ñeñth aꞌmhtayeꞌth Yompor poꞌñoñ awath.

²⁸ Allempopaꞌ alla oterraneterr Pablo: —Theꞌpaꞌ oꞌch neñotatas añ, thayotheñ Yompor poꞌñoñpaꞌ oꞌch yeserrpareꞌtach poꞌpoñ acheñ ñeñth ama judioneshayaye. Tharroꞌmar ñetpaꞌ ñerraꞌm eꞌmoñet Yompor poꞌñoñpaꞌ oꞌch ameꞌñet. Eꞌñe pameꞌñeñothetpaꞌ keshperretchaꞌ.

²⁹ Ñeñtha otwanet Pablopaꞌ añña judioneshaꞌpaꞌ eꞌñe pachmhareꞌtannaꞌteñothetpaꞌ oꞌ awanerret.

³⁰ Eꞌñe epa char all yexha Pablo Romo. Allpon palltaꞌyeseꞌthpaꞌ eꞌñe tsaꞌtwawyeꞌth. Ñamha eꞌñe kowen agapyesaneꞌth ñeñth wapyestseꞌth.

³¹ Ñamha eꞌñe kowen serrpareꞌtataneteꞌth ateth pena Yompor poꞌkowenña attho ayochreshathtena ña, ñamha yexhataneteꞌth ateth pena Yepartseshar Jesucristo. Tharroꞌmar allpaꞌ ama eseshaꞌ epatareꞌtayeꞌthe. Allowa.