Los Hechos 27 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Allempo anmet Pablo Romo

¹ Allempoña oꞌ aꞌpoktatwet oꞌch moeñet Pablo anetso Romo allara Italiapaꞌ oꞌ anmet alloꞌtsen capitán ñeñth paꞌsoꞌcheñ Julio, ñeñth poꞌcapitaner penet ñeñth emchorrenaya amhchaꞌtareth Augusto. Ñamha oꞌ anmet poꞌpoñexhno ñeñth ayottamphsarethexhno oꞌ apoeñetaꞌ Julio, allñapaꞌ ñach kowampesnomawet.

² Allempopaꞌ alloꞌtsen ñamha Aristarco ñeñth macedonioꞌmarneshaꞌ ñeñth wetsa Tesalónicoth. Ñeñthchaꞌ parro yokthaꞌnemh Pablo. Allempoñapaꞌ oꞌxhoꞌ yebeꞌthosxhaꞌt boto ñeñth wetsa anetsoth Adramitioth, ñeñthña botepaꞌ oꞌch etsotyesnoma allemeña sowaꞌpoetsoꞌmar ora Asioꞌmar. Allempoñapaꞌ oꞌxhoꞌ awamphsey boto.

³ Tsapathñapaꞌ arr yetsotosa all oteñet Sidóno. Allña capitán Juliopaꞌ morrentnomana Pablo ñeñthoꞌmar oꞌ moenach oꞌch emoꞌtnoman pamoꞌtseshaꞌ, ñeñth yexhaꞌyetsa all Sidóno, atthoch ñetpaꞌ oꞌch apapet Pablo ñeñth palltena.

⁴ Allempoña awamperryerrpaꞌ nanak yorrnotampesnoma. Mhorrpaꞌ ama moenatye oꞌch yemet atthoch oꞌch awey eꞌñe paxharr all oñenet, ñeñthoꞌmarña yepotesampeswanma koñeꞌth pats ñeñth paꞌsoꞌcheñ Chipre. Tharroꞌmar yepoteswanma atthoch ñeñth patspaꞌ oꞌch aꞌnpamphsey mhorr.

⁵ Allempoñapaꞌ arr yoñemwanom allameꞌtets Cilicioꞌmar, ñamha allameꞌtets Panfilioꞌmar. Allempoñapaꞌ yexhap ñamha Miro all yetsotosa, allara ñeñth paꞌnetser Licia.

⁶ Allña capitán Juliopaꞌ entosan poꞌpoñ bote ñeñth wetsa Alejandrioth ñeñthchaꞌ tatsa Italio. Ñaña allempopaꞌ otey awoꞌch yaꞌtaxhaꞌt all.

⁷ Allempoña oꞌ allponmat awamphsey eꞌñe akophapaꞌ eꞌñe yemoeroxhenñotha yemet ñamha Gnidoth. Allothpaꞌxhoꞌña ama moenaterryerro mhorr oꞌch awerryerr eꞌñe paxharr, ñeñthoꞌmarña yepotesampeswanerrerr koñeꞌth pats ñeñth paꞌsoꞌcheñ Creta atthoch ñeñth patspaꞌ oꞌch aꞌnpamphsey mhorr. Allñapaꞌ allponoꞌmar yoñom allekma etsotenet ñeñth paꞌsoꞌcheñ Salmón.

⁸ Yemoeroxhenñotha yemetwa ñamha alloth eꞌñe akopha. Attheñapaꞌ yexhap ñamha all oteñet Kowen Sowaꞌpoetso. Allothpaꞌ eꞌñe allameꞌttsa anetso Lasea.

⁹ Yemoeroxhtameꞌteñothpaꞌ oꞌ yaꞌllponmatnom ñeñthoꞌmar allempopaꞌ oꞌ xhen allempo nanak amhchaꞌnoxhtena oꞌch awamphsey saꞌpoꞌmar. Ñamha oꞌ met allempo anareth judioneshakop allempokma awantenet paꞌchporrña Yomporekop, ñeñthoꞌmarña yapaꞌ oꞌ yeñoch oꞌ xhen allempo nanak orrnotena saꞌpoꞌmar. Ñeñthoꞌmarña Pablopaꞌ oꞌ yerpatanet,

¹⁰ ateth otanet: —Masheñneshachaꞌ, napaꞌ nokthapeꞌchen arepoña es yewapoya thoño allempoch awamperryerr. Napaꞌ nokthapeꞌcheñ ñatoꞌ oꞌch yechenkatsreꞌtnoma, amaꞌt ñamha yebotepaꞌ xhach chenka; amaꞌt yapaꞌxhoꞌña arepoña xha yechenka.

¹¹ Tharraña capitánñapaꞌ oꞌ ameꞌñenana ateth otanet ñeñth manejaꞌneneꞌ bote ñamha ñeñth ateth otanet ñeñth pamoꞌmteꞌ pen bote. Ama ameꞌñyeto ateth otanet Pablo.

¹² Ñamha all Sowaꞌpoetso Kowenpaꞌ, ama tama kowenayaye oꞌch allaya allempo xhen orrnoteñtsopo. Ñamha allowenetpaꞌ oꞌ eꞌñe pokteꞌ entwet oꞌch awamperryerr alloth. Arroꞌchña yexhap sowaꞌpoetso all oteñet Fenice, tharraña allara anetso Creta. Oꞌ sechet Sowaꞌpoetso Feniceo tharroꞌmar allpaꞌ ama tama orrnoteno. Allñapaꞌ allach yaꞌposa tharrempowa oꞌch metwen orrnoteñtsopo.

Allempo womenkëshatampesnomoet saꞌpoꞌmar

¹³ Allempoñapaꞌ oꞌ wapa mhorr poꞌpshemhtañoth, tharraña ñeñthpaꞌ mamesha mhorraren. Allempoñapaꞌ otyeset: —Theꞌpaꞌ pokteꞌ oꞌch awerryerr. Allempoñapaꞌ oꞌxhoꞌ cheterret ñeñth rremoeneꞌ botepaꞌ oꞌxhoꞌ awamperryerr. Allothñapaꞌ eꞌñe tophñaꞌsoꞌmara yoñmampes allara anetso Creta.

¹⁴ Tharraña eꞌñe oꞌchtapaꞌ awepaꞌtchaꞌ wapa ñamha mhorr onnathoth allentheꞌtsen anets Creta. Allempoñapaꞌ oꞌxhoꞌ yorrnotampesnoma nanak womenk.

¹⁵ Botepaꞌ ama eshkayeꞌ to alleneth anmampenyet allempoña ama erroth yepepaꞌ oꞌ anmamphsey orrno aꞌyeneth.

¹⁶ Orrnoñapaꞌ oꞌ xhapatey poꞌpshemhtañoth alloꞌtsen koñeꞌth rroxhpeꞌchañ añ paꞌsoꞌcheñ Clauda. Oꞌ xhapatey allothemhtaꞌn ama tama weno mhorr. Allña eꞌñe yemoeroxhenñotha yechant noñth ñeñth chetaꞌnen atarr bote. Allothpaꞌ yeshaꞌch atarr boto.

¹⁷ Allempoña oꞌ yeshaꞌtwa noñthpaꞌ ñetñapaꞌ wankatseꞌtet atarr bote atthoch amach tareꞌche orrno. Ñamha ñetpaꞌ añ mechaꞌtet ñatoꞌ botepaꞌ oꞌch xhap moelleꞌsatho alloꞌtsen moeñ ñeñth ama echarroyaye ñeñth otenet Sirte. Ñeñthoꞌmarña oꞌ poeywet enoth shetamoets ñeñth chopeꞌchateneꞌ bote atthoch botepaꞌ amach erreneth to.

¹⁸ Allempoñapaꞌ awepaꞌtchaꞌ yorrnotampes nanak womenk. Tsapathñapaꞌ chetanatet cargapaꞌ saprrochet saꞌpo.

¹⁹ Pomaꞌpamtañoñapaꞌ oꞌ saprrotet ñamha ñeñth allpon echyen bote.

²⁰ Allempopaꞌ allponmat ama orrterro atsneꞌ amaꞌt ñamha rantoxhno, amaꞌt mamesha. Nanak yorrnotamphsa. Attheñapaꞌ yot: —Theꞌpaꞌ amach errotheno yekeshperro.

²¹ Ñamha allponmat ama es yerro. Allempoña Pablopaꞌ thompaꞌ ot: —Ñerraꞌm amach masheñneshachaꞌ sathpaꞌnoñe ateth notaseñ, amach yonñe Cretoth, theꞌpaꞌ amatheꞌ es yeyoreꞌtenayñe ñamha allempopaꞌ amatheꞌ yechenkatsreꞌtañe.

²² Tharraña theꞌpaꞌ oꞌch notas, amach sellkatsto tharroꞌmar yapaꞌ yekeshphach alloweney. Añachña chenkatsreꞌtatsa bote.

²³ Napaꞌ neñoteñ tharroꞌmar tsapopaꞌ orrtona mellañotheñ ñeñth wetsa Yomporeshoth ñeñthara Yompor ñeñth poechemer nepeneꞌ, ñamha ñeñthara ñokop nethorrena.

²⁴ Ñeñth norrtoyapaꞌ ateth oten: “Amach Pablo pellkatsto tharroꞌmar pexhapchaꞌ alloꞌtsen amhchaꞌtareth all Romo. Eꞌñe phothpaꞌ Yomporpaꞌ oꞌch aꞌnatana allowen ñeñth epaph sechopeꞌchampen boto.”

²⁵ Ñeñthoꞌmarña notenes amach sellkatsto. Tharroꞌmar napaꞌ neyemteña Yompor, ñerraꞌm errothen otenpaꞌ atethchaꞌ pha.

²⁶ Tharraña amaꞌt atethpaꞌ xhokmach yepotamphsa allempo oꞌch yexhapmoch patso. Añpaꞌ allowa ateth otanet Pablo.

²⁷ Allempoña oꞌ met xharramat poechena paꞌtatsmat, attha yetampena saꞌpo ñeñth otenet Adria. Allempopaꞌxhoꞌña yorrnotampesnoma. Allempo xhap rroxh tsapopaꞌ añña ñeñth tarwasets botopaꞌ ateth otet: —Ñatoꞌ oꞌ yexhapmoch alloꞌtsen pats.

²⁸ Allempoñapaꞌ oꞌ topasoꞌtet saꞌp. Allempoñapaꞌ awoꞌt eñochet alloꞌtsen maꞌpoch xharraꞌ poechena pechap metro. Allempoñapaꞌ oꞌxhoꞌ awerryerr allpononethpaꞌ allpaꞌxhoꞌña oꞌxhoꞌ topasoꞌtwereterr. Allñapaꞌ otet alloꞌtsen epoch xharraꞌ poechena kanxherr metro. Allempoñapaꞌ añ mechaꞌtet thayeꞌtoꞌ yetoꞌmamphsa mapyo.

²⁹ Allempoñapaꞌ oꞌxhoꞌ aꞌshoreꞌtet poekëꞌnareꞌtoth paꞌtatsmhaga ñeñthchaꞌ rremoeꞌ bote. Allempoña aꞌshoreꞌtwetpaꞌ oꞌ kowet atoꞌt poetarenaꞌ.

³⁰ Añña ñeñth tarwasets botopaꞌ aꞌswaterret eꞌñe aꞌnawa noñth tharroꞌmar ñetpaꞌ añ moenenet oꞌch kaxhpaꞌnmoet alla bote. Amaꞌt awepaꞌt aꞌswaterret noñthpaꞌ ñetpaꞌ xha ottenet ñerraꞌmrratheꞌ poꞌpoñ aꞌshoreꞌtenet ñeñthchaꞌ rromoeꞌ bote poñeꞌmhagoth.

³¹ Allempoña Pablopaꞌ eñotanet ateth kothapeꞌchen ñeñth tarwasets botopaꞌ ateth otan capitán ñamha poꞌpoñexhno solltarneshaꞌ ateth otanet: —Ñerraꞌm ama alla aꞌpoeto botopaꞌ sapaꞌ amatheꞌ errothenoth sekeshperro amaꞌt poesheñarrothesa.

³² Allempoña solltarneshaꞌpaꞌ oꞌ tsorramphset noñth poxhar atthoch awoꞌ aꞌyeneth.

³³ Eꞌñe poetareswanetsapaꞌ añña Pablopaꞌ ateth otanet allowenet: —Theꞌpa oꞌch serraꞌmoen tharroꞌmar oꞌ xharramat poechena paꞌtatsmat semaꞌyoxhreñoth poꞌpoñpaꞌ ama semoeno, ama es serreno.

³⁴ Ñeñthoꞌmarña oꞌ notaꞌmoenes serraꞌmoen atthoch xherr sewamenk, tharroꞌmar amach eseshas chenkatso, amaꞌt poesheñarrothesa.

³⁵ Ñeñtha otwanet oꞌ chetan panpaꞌ oꞌ maꞌyocha eꞌñe alla all shontena acheñeneshaꞌ. Allothpaꞌ shotan panpaꞌ oꞌ rreꞌ.

³⁶ Allempoñapaꞌ oꞌ yeꞌchatanetpaꞌ oꞌ rret ñamet.

³⁷ Ñeñthey botoꞌtseney alloweneypaꞌ alloꞌtsen doscientos setenta seis acheñeneshaꞌ.

³⁸ Allempoña ochaꞌwanet poerrarpaꞌ alla saprroteneterr trigopoꞌr oño atthoch oꞌwañchaꞌ tama eñerrta bote.

Allempo taramphsanet saꞌp poꞌbote

³⁹ Allempoña eꞌñe poetareswenpaꞌ oꞌ entet pats, tharraña ama poentareto ñeñth pats, tharraña allempo oꞌ entet ñamha aꞌyowen moeyapoꞌs allñapaꞌ aꞌyowen ñamha poemeꞌtar. Allempoñapaꞌ kothapeꞌchetpaꞌ otet: —Ñatoꞌ yexhapchaꞌ all allochñapaꞌ allchaꞌ yetsotosa kowen.

⁴⁰ Allothñapaꞌ tsorroꞌtet ñamha ñeñth rromoeneꞌ botepaꞌ oꞌ aꞌypoꞌñaꞌnmet alla saꞌpo. Allempoñapaꞌ oꞌ poeyamperet allo wankët awaña bote poepopaph. Allempoñapaꞌ echantet ñamha poñeꞌmhagoth shetamoets atthoch mhorrpaꞌ oꞌch matatan bote. Allempoñapaꞌ oꞌxhoꞌ awamphsey poemeꞌtaroneth.

⁴¹ Allempoñapaꞌ oꞌ xhap bote all epchakraꞌstena saꞌp all nanak epopaꞌ rroxhoñapaꞌ xha moelleꞌsathtena. Xhap all botepaꞌ xha axhtosa poñeꞌmhagoth, ama erroth yepere. Arrothña poekëꞌnareꞌtoth nanak emoꞌyarertena saꞌp. Poꞌwamenkpaꞌ oꞌ taramphsey yebote.

⁴² Allempoña solltarneshaꞌpaꞌ moeneñ oꞌch moetsanatwan ñeñth ayottamphsareth thayeꞌtoꞌ ñerraꞌm pathetpaꞌ awoꞌtheꞌ yetet.

⁴³ Tharraña capitánpaꞌ nanak moeneñ oꞌch aꞌkeshphatan Pablo ñeñthoꞌmarña ama moenataneto oꞌch moetsanachet. Ateth otanet: —Ñerraꞌm eseshaꞌtheꞌ eñoteneꞌ pathatsapaꞌ oꞌch sepatha sanom atthoch sephchata yomhtaꞌn.

⁴⁴ Allothñapaꞌ samha ñeñthes ama eñotenaye pathatsapaꞌ ñatoꞌ oꞌch sanemyes tabla amapaꞌ poꞌpoñexhno ñeñth echyen bote, allochñapaꞌ atthoch sephchata samha. Allempoñapaꞌ oꞌxhoꞌ pechatwet allowenet.