Los Hechos 24 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Allempo judioneshaꞌpaꞌ otteñeꞌchoset Pablo alloꞌtsen amhchaꞌtareth Félix

¹ Paꞌmnarmatñoñapaꞌ wapa ñeñth paꞌmhchaꞌtarether pen allowen judioneshaꞌ poꞌkornaneshar, ñeñthpaꞌ añ paꞌsoꞌcheñ Ananías. Oꞌ wapa ñamha allponsheña ñeñth pomporneshaꞌ penet. Allothpaꞌ wapa ñamha poesheñarr ñeñth paꞌsoꞌcheñ Tértulo ñeñthpaꞌ ñeñthchaꞌ eñosapretawet. Allempoña wapoetpaꞌ oꞌ awanmoet alloꞌtsen gobernador atthoch otteñeꞌchoset Pablo.

² Allempoñapaꞌ wapachet ñamha Pablopaꞌ oꞌ xhoreꞌchet ñanom Tértulo atthoch eños ñanom. Ñañapaꞌ añekpa eños atthoch otteñeꞌchet Pablo. Ñanompaꞌ oꞌ eños eꞌñe kowen gobernadorokop ñeñth Félix, ateth ot:

³ —Pha gobernadoro, nanak kowen yenteneph tharroꞌmar eꞌñe phothoth yokrrena eꞌne kowen ama eñalle atthoch yekhllarannaꞌta. Ñamha phapaꞌ oꞌ phaꞌpoktatonay eꞌñe kowen ñeñth yepalltena arr yenyo. Ñeñthoꞌmar ya theꞌpaꞌ yemneñ oꞌch yeparasyosoꞌt phokop atthoch xhokma peyenpoeney kowen.

⁴ Theꞌpaꞌ atthoch amach alla nellaphso eñosetspaꞌ napaꞌ nemneñ eꞌñe pemorrenteñothpaꞌ oꞌch peꞌmhñoten mameꞌ ñeñthchaꞌ notaph.

⁵ Yapaꞌ yeñoteñ añ yakmapaꞌ nanak atsrreꞌmoxhtena, nanak moññeꞌtatyenana ora allowen judioneshaꞌ attho theꞌpaꞌ ama pathrrayeꞌ kothapeꞌcheneto. Ñamha añmapaꞌ ñeñth pompor pen allowen ñeñth kotheneꞌ pokthaphña ñeñth wapatsa Nazaretoth.

⁶ Elloña theꞌpaꞌ moeneñeñ oꞌch aꞌsosyatwaneñ ñamha Parets paꞌpakëll, tharraña yañapaꞌ oꞌ yerrmoeꞌ. Ñamha yapaꞌ yemneñeñ oꞌch yaꞌpoktacheñ ateth anareth yokoppaꞌ

⁷ tharraña oꞌ wapa amhchaꞌtareth Lisias epoet poꞌsolltarnesharpaꞌ eꞌñe poꞌwamenkokma oꞌ poerratampenyetaꞌ.

⁸ Allothñapaꞌ ateth otey ñeñthey otteñeꞌcheneꞌ yewapoepaꞌtoꞌ pesho. Theꞌpaꞌ phachña aꞌphthoꞌtareꞌteꞌ atthoch peñoch phamha ora allowen atthoth yotteñeꞌcheñ. Añpaꞌ allowa ateth eños Tértulo ñeñth eñosapretawet.

⁹ Judioneshaꞌpaꞌxhoꞌña ateth otet: —Poꞌñoxhkaꞌye ateth.

¹⁰ Allempoña gobernadorpaꞌ oꞌ yochan Pablo atthoch eños ñamha. Allempoña Pablopaꞌ ateth ot: —Napaꞌ eꞌñe noksheñeshaꞌ oꞌch neños pesho eꞌñe nokop, tharroꞌmar napaꞌ neñoteneph oꞌ shonteꞌ char attho phaꞌmhchaꞌtarethtena arr yenyo.

¹¹ Eꞌñe thaya oꞌ met xharramat poechena epomoet attho oꞌ nemaꞌyochwenaꞌ Parets paꞌpakllo all Jerusaléño. Amaꞌt eseshaꞌ phaꞌphthoꞌtpaꞌ atethchaꞌ otapet.

¹² Tharraña allempo ñetpaꞌ ama entneto oꞌ eseshaꞌ notnareꞌt, ñamha ama naꞌtsrreꞌmoxhtanaꞌche acheñeneshaꞌ. Ñamha ama naꞌtsrreꞌmoxhto amaꞌt Parets paꞌpakllo, amaꞌt ñamha judioneshaꞌ poꞌprawo, ñamha amaꞌt all chopeñeꞌchyen acheñeneshaꞌ.

¹³ Ñeñthoꞌmarña theꞌpaꞌ amatheꞌ errothen eñotatapeto añmapaꞌ ñeñth eꞌñe poꞌñoxh atthotha otteñeꞌchennet.

¹⁴ Napaꞌ theꞌpaꞌ añach naꞌmethaꞌ pesho, napaꞌ nameꞌñena ñeñth eꞌñe alloch yekeshperra. Poꞌñoxh napaꞌ añ nameꞌñena ñeñthara Yompor ñeñth Poꞌyomporer peꞌth yatañneshañ. Ñamha añ nameꞌñena ora allowen ñoñets ñeñth ateth anareth judioneshakop. Ñamha añ nameꞌñena ñeñth ateth kellkëꞌth awath ñeñth aꞌmhtayeꞌth Yompor poꞌñoñ.

¹⁵ Ñamha napaꞌ añ nameꞌñena ñeñth atthoch esempowañen Yomporpaꞌ tantaterranchaꞌ allowen acheñ —ñeñth eꞌñe kowen acheñ ñamha amaꞌt ñeñth ama kowenayaye acheñ. Ñetpaꞌxhoꞌña ñeñthara ameꞌñenet.

¹⁶ Ñeñthoꞌmarña napaꞌ xhokma nemaꞌyoxhrena atthoch Yomporpaꞌ enten eꞌñe kowen, ñamha atthoch acheñeneshaꞌpaꞌxhoꞌña oꞌch entennet eꞌñe kowen ñamet.

¹⁷ ‘Napaꞌ shonteꞌ char xhokma nechopeñen errapharen anetsoꞌmar. Theꞌpaꞌ oꞌ thaya nowerra arr atthoch napaꞌyeswer namoꞌtseshaꞌ kelle ñeñth wokchañneshaxhno. Añ kellepaꞌ ñeñthara apaꞌyesen ñeñth ameꞌñenaya Yompor. Napaꞌxhoꞌña eñalleñ ñeñthchaꞌ nepomañ Yomporekop.

¹⁸ Oꞌ thaya xhapmochañ allempoch oꞌch naꞌkowentatwañ Yomporekoppaꞌ judioneshaꞌñapaꞌ oꞌ entnet all Parets paꞌpakllo. Tharraña allempopaꞌ ama tama shonteyaye acheñ ñeñthoꞌmar ama tama eseshaꞌ amaꞌtoxhtetso.

¹⁹ Tharraña eꞌñe allempopaꞌ oꞌ xhaxhaꞌt ñamha judioneshaꞌ ñeñth waxhetsa Asioth. Taꞌ, theꞌñapaꞌ esoꞌmartheꞌña ama ñetayeꞌña wapatseto arr atthoch ñerraꞌm poꞌñoxh moeneñet oꞌch otteñeꞌchnet na.

²⁰ Tharraña theꞌpaꞌ ama wapoeto ñetpaꞌ ñewa, theꞌpaꞌ otetepaꞌ ñeñth waxhaꞌtatsa theꞌ. Aꞌmethetepaꞌ ñerraꞌm poꞌñoxhtheꞌ estheꞌ nepantaꞌ allempo nathomos alloꞌtsaꞌyen ñeñth xhokma aꞌpoktatyeneꞌ ñoñets.

²¹ Allempopaꞌ aña neños patherr womenk attho notanet. Añekop napaꞌ otteñeꞌchennet tharroꞌmar napaꞌ nameꞌñena attho ñerraꞌm yerromapaꞌ yetanterrach esempo. Ñewa, ñatoꞌ ñeñthekpatheꞌ otteñeꞌchennetña theꞌ.

²² Ñeñtha otwa Pablopaꞌ añña Félixpaꞌ ama moeno oꞌch alla serrpareꞌterreterr, tharroꞌmar ñapaꞌ oꞌ eñotmoch ateth ameꞌñena ñeñth kotheneꞌ Cristo. Ñeñthoꞌmarña ateth otanet: —Ñewa, theꞌpaꞌ ñeñthach yot. Esempochña wapa ñamha amhchaꞌtareth Lisiaspaꞌ allempochña yaꞌpoktat ñoñets.

²³ Allempoña ateth oterran poꞌcapitáner: —Theꞌpaꞌ allach sekwampererr Pablo. Amach tama saꞌmontsatsche. Ñamha xhokmach semnach ñeñth yemtenaya oꞌch es aph ñeñth palltena.

²⁴ Allponmaterrerrpaꞌ oꞌ werra Félix Cesareo epoet poethapor ñeñth paꞌsoꞌcheñ Drusila, ñeñthpaꞌ judioneshaꞌ. Oꞌña xherr Félix oꞌ agotatwenan Pablo tharroꞌmar ñetpaꞌ moeneñet oꞌch serrpareꞌtatanet ñamet Pablo errothentheꞌ ameꞌñenana Jesucristo.

²⁵ Allempoña xhap Pablopaꞌ oꞌ serrpareꞌtatanet kowen ñeñth ateth yepena ya ñeñthey ameꞌñetsa. Ñamha ateth otanet añchaꞌ yemaꞌyoxhra atthoch eꞌñe pokteꞌ es yephaꞌyen, ñamha amach yephatsto ñeñth ama kowenayaye tharroꞌmar Yomporpaꞌ tsaꞌtatwerryach allempoch akrerran allowen acheñeneshaꞌ. Ñeñtha otwa Pablopaꞌ añña Félixpaꞌ xha yoren. Allempopaꞌ alla oter: —Theꞌpaꞌ orrerreph, esempochña eꞌñe poktaꞌwerrnanerrpaꞌ oꞌch alla nexhoreꞌtaterrperr.

²⁶ Félixñapaꞌ attha kowenan Pablo ñatoꞌ oꞌch aph kelle añekop atthoch aꞌrroyer. Ñeñthoꞌmar errothenopaꞌ oꞌchxhoꞌña agotach atthoch serrpareꞌtet epoet.

²⁷ Attheñapaꞌ oꞌ met epa charpaꞌ oꞌ kamhyerra gobernador, wapa poꞌpsheñeñ amhchaꞌtareth añ paꞌsoꞌcheñ Porcio Festo. Ñañapaꞌ nanak moeneñ oꞌch koshatan judioneshaꞌ ñeñthoꞌmarña ama aꞌrroyerrano Pablo, ateth ot: —Allepaꞌ preso.