Los Hechos 21 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Allempo oꞌch alla xherrerr Pablo Jerusaléño

¹ Allempoña oꞌ yesaꞌnenanetpaꞌ oꞌ awamperryerr boto. Allothñapaꞌ paxharra yepeꞌpaꞌ oꞌ yexhap Koso. Tsapathñapaꞌ arr yexhap Rodaso. Allothñapaꞌ arr yetsotosa Pátaro.

² Pátaroñapaꞌ oꞌ yentos poꞌpoñ bote ñeñthchaꞌ tatsa Fenicio. Yañapaꞌ oꞌxhoꞌ yaꞌtapos allothñapaꞌ awamperryerr boto.

³ Allempoña yetampena saꞌpopaꞌ yentnom koñeꞌth pats ñeñth paꞌsoꞌcheñ Chipre, eꞌñe arroth yentnomh yeꞌchkotheroth. Attheñapaꞌ oꞌxhoꞌ yemhtampes boto, arr yesechena Sirio. Allempoñapaꞌ arr yetsotosa all oteñet Tiro, tharroꞌmar allpaꞌ oꞌch aꞌswatatsreꞌtet bototh.

⁴ Yañapaꞌ oꞌ yeswa atthoch yentnomh ñeñth ameꞌñetsa all. Allñapaꞌ alla yaꞌposa kanxherrmat. Ñeñthña ameꞌñetsa allpaꞌ, ñetñapaꞌ ochet Pablo: —Amach petatsto Jerusaléño. Tharroꞌmar Parets Poekamkëñpaꞌ awoꞌt eñotatanet atethchaꞌ pet Pablo all Jerusaléño.

⁵ Tharraña allempoña oꞌ met kanxherrmatpaꞌ oꞌ alla yawanerrerr. Allempoña allowen yakmaneshaꞌpaꞌ kothaꞌnemyet poebloth aꞌyeneth, ñamha poethaporeshowenet ñamha poechemerneshet. Allñapaꞌ all yekonkorposa ontapopaꞌ oꞌ yemaꞌyochosa all.

⁶ Allempoña oꞌ yemaꞌyochwapaꞌ oꞌ yesoꞌtenanet. Allempoña yapaꞌ oꞌ yaꞌtenerr boto, ñetñapaꞌ oꞌ awanerret paꞌpakllo.

⁷ Allempoña oꞌ yenerr Tirothpaꞌ arr yetsotwenerr Tolemaido. Allñapaꞌ all yewomhchaꞌtnomh ñeñth ameꞌñetsa. Allñapaꞌ all yepathrranom yeth.

⁸ Tsapathñapaꞌ oꞌ yawanenerr, allempoñapaꞌ arr yexhap Cesareo. Allñapaꞌ oꞌ yebeꞌthosos Felipe paꞌpakllo, allpaꞌ allchaꞌ yommosa. Añ Felipepaꞌ ñeñth serrpareꞌteneꞌ kowen ñoñets. Ñamha ñeñthara Felipe ñeñth net awaña ñach epatyesawet rreñets epoet poꞌpsheññexhno pechapsheña.

⁹ Añ ñeñthara Felipepaꞌ echenan paꞌtatssheña poꞌsñeshaꞌ. Ñetpaꞌ ama arrollaretheto. Ñetñapaꞌ nanak aꞌpotheññañet ñamet Yompor poꞌñoñ.

¹⁰ Allempoña yaꞌllponmatos allpaꞌ oꞌ wapa ñeñth aꞌmhteneꞌ Yompor poꞌñoñ añ paꞌsoꞌcheñ Agabo. Ñapaꞌ Judeoth wapa.

¹¹ Allempo wapapaꞌ oꞌ poeyosan Pablo poꞌchanar. Añña chanaretspaꞌ Agabo ñañeña wankatatsa eꞌñe pototh ñamha paꞌtkoth. Oꞌ wankaꞌwapaꞌ ateth otan Pablo: —Ñeñthpaꞌ ateth oten Parets Poekamkëñ, ñeñtheph echeneꞌ añ chanaretspaꞌ judioneshaꞌ ñeñth Jerusaléñoꞌtsaꞌyenpaꞌ atethchaꞌ wankapet ateth newanka theꞌ nañeña. Ewankarethchaꞌ oꞌch pomapet alloꞌtsen acheñeneshaꞌ ñeñth ama judioneshayayeto.

¹² Ñeñthña ateth yeꞌmpaꞌ yotareꞌch Pablo: —Amach petatsterro Jerusaléño. Ñamha ñeñth acheñeneshaꞌ ñeñth alloꞌtsaꞌyenpaꞌ ateth otareꞌchet Pablo ñamet.

¹³ Allempoña Pablopaꞌ otanet: —Esoꞌmareꞌtña nanak seyawena, theꞌpaꞌ oꞌch sellkaten. Napaꞌ eꞌñe pokteꞌ nenteñ wankaꞌnetepaꞌ. Ñamha eꞌñe pokteꞌ nenteñ nerromoepaꞌ Jerusaléño, atthoch nerroma eꞌñe neserrpareꞌteñoth Yepartseshar Jesús poꞌñoñ.

¹⁴ Pabloñapaꞌ ama eꞌmhñotye. Allempoña ama erroth yepepaꞌ oꞌwañ erroth yoch, aña yoter: —Ñewa, ñerraꞌm ateththeꞌ moenen Yomporpaꞌ amaꞌtpaꞌ atthepaꞌch.

¹⁵ Allempoñapaꞌ oꞌ yaññoꞌtatsreꞌtena. Allempoña oꞌ yaññoꞌtatsreꞌtwapaꞌ yawanenerr Jerusaléño.

¹⁶ Añña poesheñaꞌtets cesareoꞌmarneshaꞌ ñeñth ameꞌñetsapaꞌ allentha kothaꞌnenyet, arr newerryetaꞌ all yexhena Mnasón ñeñthara ñeñth chiproꞌmarneshaꞌ. Ñañapaꞌ awathotheñ ameꞌñaꞌwa. Paꞌpaklloñapaꞌ all yaꞌposa.

Allempo Pablopaꞌ emoꞌtwerr Jacobo ñeñth Jesús paꞌmoꞌnasheñ

¹⁷ Allempoña oꞌ yexherr Jerusaléñopaꞌ añña ñeñth ameꞌñetsa allpaꞌ eꞌñe poksheñeshaꞌ agapyet.

¹⁸ Tsapathña poetarenpaꞌ yawanma parrokma Pablo oꞌch yenteñaꞌ Jacobo. Añña allowen ñeñth pomporneshaꞌ pen acheñeneshaꞌ ñetpaꞌxhoꞌña alla yentosanet, alloꞌtsaꞌyenet ñamet.

¹⁹ Pabloñapaꞌ oꞌ womhchaꞌtosanet allowenet. Womhchaꞌtwanetpaꞌ allempoñapaꞌ serrpareꞌtatwerranet eꞌñe ora allpon Yompor poꞌwamenkoth oꞌ etsotwoñ eꞌñe ñokop. Serrpareꞌtatwerranet attho acheñeneshaꞌ amaꞌt ñeñth ama judioneshayayetopaꞌ oꞌ ameꞌñatwanet ñamet.

²⁰ Ñeñtha eꞌmwetpaꞌ nanak ayeꞌchoxhtatoñet Yompor. Tharraña allempoñapaꞌ ateth ochet: —Tharraña masheñe, awoꞌt peñoch theꞌpaꞌ shonteꞌ mil judioneshaꞌ oꞌ ameꞌñenet ñamet. Ñetpaꞌ eꞌñe womenko otenet añ palltetsa alloweney ñeñthey judioneshay oꞌch yephowa ateth otyeꞌth Moisés.

²¹ Ñetpaꞌ oꞌ eꞌmareꞌtonapet peñoñ añeꞌnoꞌ peyxhaten judioneshaꞌ ñeñth yexhaꞌyetsa poꞌpoñ anetso all yexhaꞌyena ñeñth ama judioneshayaye attho añoꞌ pokteꞌ oꞌch poeswerret Moisés poꞌñoñ. Ñamha oꞌ eꞌmareꞌtapet awoꞌ photwanet amach tsorratsteto poechemeretholleshaꞌ, ñamha amoꞌch phatsteto ateth yeyxhena awathotheñ.

²² Allempoñapaꞌ alla otereterr Pablo: —Ñewa, theꞌpaꞌ ¿errotheꞌtchaꞌña yephaña theꞌ tharroꞌmar poꞌñoxhpaꞌ oꞌch eꞌmareꞌtapet oꞌ pexherr arr?

²³ Ñewa, theꞌpaꞌ oꞌch peꞌmhñotey oꞌch yotaph ñeñthchaꞌ ateth pepha. Ñewa, arrpaꞌ arroꞌtsen paꞌtatssheña ñeñth netset ñetañeña ñeñthchaꞌ ateth pet Yomporekop, ñeñth ateth yeyxhena ya ñeñthey judioneshay.

²⁴ Theꞌpaꞌ aña pokteꞌ ñeñthchaꞌ ateth pepha. Oꞌch phanemh añ paꞌtatssheña eꞌñe epaspaꞌ oꞌch saꞌkowentatenaꞌ ñeñth ateth anareth Yomporekop ñeñth ateth yeyxhena ya ñeñthey judioneshay. Ñamha añ paꞌtatssheñapaꞌ oꞌch petsaꞌtanet atthoch shopenaꞌtatet, ñamha ora ñeñth palltetsapaꞌ oꞌch petsaꞌtanet. Allochñapaꞌ allowen judioneshaꞌ oꞌch eñochet poꞌñoxhpaꞌ ama attheyaye ñeñth ateth eꞌmareꞌtet phokop, tharroꞌmar allempopaꞌ oꞌch eñotapet phapaꞌxhoꞌña oꞌ pephowa ñeñth ateth oteney Moisés poꞌñoñoth.

²⁵ Tharraña añekop ñeñth ama judioneshayaye ñeñth oꞌ ameꞌñapaꞌ yapaꞌ oꞌ yemñanet carta, oꞌ yotwanet cartoth ñeñth pokteꞌ yenten ñokpoet ñeñthchaꞌ ateth pet. Ñeñthpaꞌ añexhno: Amach rratsteto poꞌchets ñeñth moetsenet ayexhkatarethekop ñeñth poꞌyomporer penet. Ñamha oꞌ yotwanet amach rratsteto es poꞌrras, ñamha amach rratsteto ñeñth moetsenet ñeñth attha aꞌpamhareth. Ñamha oꞌ yotwanet amach chetapretatsteto thaporets. Ñeñtha yotanet yecartoth.

Allempo rromapoeret Pablo all Parets paꞌpakllo

²⁶ Allempoña Pablopaꞌ oꞌ anman añ paꞌtatssheña. Tsapathñapaꞌ oꞌ aꞌkowentatet eꞌñe parro, ñeñth ateth yexhena judioneshaꞌ. Allempoñapaꞌ awanmoet Parets paꞌpakllo oꞌch eñotatenanetaꞌ esempoch oꞌch met allponmat eꞌñe allempoch oꞌch aꞌkowentatwet. Allempochña Pablopaꞌ oꞌch moetsatanet Partsokop carnero poesheñaꞌttsokmoet, ñeñthpaꞌ ateth pena judioneshaꞌ Yomporekop.

²⁷ Tharraña oꞌ thaya xhapmoch kanxherrmat allempoch oꞌch aꞌkowentatwetpaꞌ añña judioneshaꞌ ñeñth wetsa Asiothpaꞌ oꞌ eñchet Pablo all Parets paꞌpakllo. Ñetñapaꞌ oꞌ atsrreꞌmatachet acheñeneshaꞌ atthoch oꞌch eꞌmoñeꞌchet Pablo. Allempoñapaꞌ oꞌch rromoet Pablo.

²⁸ Paꞌtsrreꞌmoeñothetpaꞌ oꞌ rranareꞌtyeset, otyeset: —Masheñnesha judioneshachaꞌ, oꞌch seyenpaꞌy. Theꞌpaꞌ oꞌ yenter añ acheñ ñeñth yeꞌmoñeꞌteneꞌ ñeñthey judioneshay ñeñthara ñeñth oꞌ poeswerran Moisés poꞌñoñ ñamha ñeñth oꞌ aꞌsosyatwan Parets paꞌpakëll. Theꞌpaꞌ oꞌ errakmañen ateth oꞌ yexhatyeswan acheñeneshaꞌ. Elloña theꞌpaꞌ oꞌ abeꞌthatan ñamha acheñ ñeñth ama judioneshayaye arr Parets paꞌpakllo. Allochñapaꞌ awoꞌch aꞌsosyatwan Parets paꞌpakëll.

²⁹ Tharroꞌmar ateth otet oꞌ eñchet Pablo epoet Trófimo all chopeñeꞌchen epoet Jerusaléño. Trófimo ñeñthpaꞌ efesoꞌmarneshaꞌ, ama judioneshayaye. Ñetpaꞌ xhoꞌ otenapoetañ ñatoꞌ Pablopaꞌ oꞌtheꞌ abeꞌthatan Trófimo all Parets paꞌpakllo ñeñth ama pokteyeꞌ enteno judioneshaꞌ.

³⁰ Allempoñapaꞌ allowen acheñeneshaꞌpaꞌ oꞌ atsrreꞌmoetpaꞌ matrraꞌtet alloꞌtsen Pablo oꞌ rromoetpaꞌ oꞌ chetaꞌnmet aꞌyeneth Parets paꞌpaklloth. Allorokma yotetwet Parets paꞌpakllo.

³¹ Oꞌ moetsamochet Pablopaꞌ añña ñeñth solltarneshaꞌ paꞌmhchaꞌtaretherpaꞌ oꞌ eꞌmanet ateth nanak amaꞌtoxhtena allowen acheñeneshaꞌ all Jerusaléño.

³² Ñañapaꞌ oꞌ anman allpon solltarneshaꞌ ñamha allpon capitánneshaꞌpaꞌ oꞌ matrraꞌtet alloꞌtsaꞌyen acheñeneshaꞌ. Allempoña acheñeneshaꞌpaꞌ oꞌ entapan solltarneshaꞌ epoet paꞌmhchaꞌtaretherpaꞌ oꞌwañ xhotaꞌchet Pablo.

³³ Allempoña xhap amhchaꞌtarethpaꞌ oꞌ rromatan Pablopaꞌ oꞌ wankët epa cadeno. Allempoñapaꞌ aꞌphthoꞌtanet: —¿Esoꞌtña paꞌsoꞌcheñ añ acheñer? Ñamha oꞌ aꞌphthoꞌtanet: —¿Estheꞌña oꞌ phowa ña?

³⁴ Oꞌ anapyeset poꞌpoñeꞌttsokma. Poesheñaꞌtets acheñpaꞌ otyeset ateth kothapeꞌchet ñet, poꞌpotantaññapaꞌ ateth otet poꞌpoñ ñeñth ateth kothapeꞌchenet ñamet. Nanak amaꞌtoxhtenet ñeñthoꞌmarña ama eñocheto eꞌñe poꞌñoxh ñeñth ateth oꞌ phowa Pablo. Ñeñthoꞌmarña amhchaꞌtarethpaꞌ anmatan Pablo pokollo all shontena solltarneshaꞌ.

³⁵ Allempoña oꞌ xhapoet alloth aꞌtenet pokollopaꞌ añña solltarneshaꞌpaꞌ oꞌ enatnomet Pablo eno, tharroꞌmar thayeꞌtoꞌ acheñeneshaꞌ paꞌtsrreꞌmoeñothpaꞌ moetseñet.

³⁶ Tharroꞌmar acheñeneshaꞌpaꞌ oꞌ kothaꞌwanmet. Poerranareꞌteñoth otyesnomoet: —¡Semtseñakaꞌye!

Allempo Pablopaꞌ eꞌñe kowen eños ñokop alloꞌtsaꞌyen ñeñth eꞌmoñeꞌteneꞌ

³⁷ Aꞌtapachet pokollopaꞌ Pabloñapaꞌ otosan solltarneshaꞌ paꞌmhchaꞌtarether, eños griegaxho, ot: —Theꞌ napaꞌ nemneñ oꞌch notaph patherr ñoñets. Amhchaꞌtarethñapaꞌ och: —¿Poꞌñoxhaꞌt peꞌmoen griegaxh?

³⁸ Alla otererr amhchaꞌtareth: —Phapaꞌ ¿amaꞌt añeyaype egiptoꞌmarneshaꞌ ñeñth atsrreꞌmateꞌ awaña acheñeneshaꞌ attho ñetpaꞌ athpareꞌchet gobiernoꞌ, ñeñthara ñeñth awanmoeꞌ paꞌtatsoch mil amtsañneshaꞌ aꞌyo amaratho?

³⁹ Pabloñapaꞌ alla otererr: —Napaꞌ amakaꞌye ñeñtheyayno, napaꞌ judioneshan ñeñthen tarsoꞌmarneshan, ñeñthara anets nanak atarr ñeñth allara Cilicia. Napaꞌ oꞌch notareꞌtaph atthoch pemnaten oꞌch neños acheñeneshakop.

⁴⁰ Allempoñapaꞌ oꞌ moenatan Pablo oꞌch eños. Pabloñapaꞌ alla thomos allothekma aꞌtenetpaꞌ echantosan pot atthoch moetsoñeñtwa acheñeneshaꞌ. Allempoña oꞌ moetsoñeñtwetpaꞌ Pabloñapaꞌ oꞌ eños hebreyaxho, ateth otanet: