Los Hechos 2 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Allempo xhapanet Parets Poekamkëñ

¹ Allempoñapaꞌ oꞌ meterrerr allponmat amnaroch xharramat, oꞌ xhap allempo koshena judioneshaꞌ ñeñth otenet Pentecostepo. Allempoña ñetpaꞌ alla apxherreterr eꞌñe parro ñeñthet ameꞌñetset.

² Allempoñapaꞌ machayotha eꞌmapoet ateth ñerraꞌm womenkëshaꞌ maꞌmoreꞌtos entoth. Allowenet ñeñth alloꞌtsaꞌyen pokollo eꞌñe eꞌmwet.

³ Añña ñeñthet apxhetsetpaꞌ oꞌ wapanet ateth ñerraꞌm tsoꞌ. Wapapaꞌ xha chapaꞌrrtosa poꞌworter ñesheto. Xhapyesanet eꞌñe poesheñaꞌttsokmoet ateth ñerraꞌm worteꞌ. Añña worteꞌpaꞌ alla aꞌprraꞌta ñesheto.

⁴ Añña ñeñth xhapyesawet eꞌñe poesheñaꞌttsokmoetpaꞌ añepaꞌt Parets Poekamkëñ ñeñthchaꞌ chorrawet. Allempoñapaꞌ allorokma eñosyeset poꞌpoñ ñoñtso ñeñth ama eñoseteꞌthe awaña. Añña Parets Poekamkëñpaꞌ awoꞌ eñoratyesanet poꞌpoñeꞌttsokma atthoch serrpareꞌtachet paꞌnamen acheñ eꞌñe ñet poꞌñoñeto.

⁵ Allempo Jerusaléñopaꞌ alloꞌtsaꞌyen shonteꞌ judioneshaꞌ ñeñth waxhetsa paꞌnamen anetsoth. Ñetpaꞌ kowen kothapeꞌcheteꞌth Partsokop.

⁶ Allempoña eꞌmarethtet xha anoꞌtenetpaꞌ oꞌ matrraꞌtosa shonteꞌ paꞌnamen acheñeneshaꞌ oꞌch enteñetaꞌ ñeñth anoꞌtatsets. Xhapoet all anoꞌtatsenetpaꞌ oꞌ entoset ñeñth ameꞌñetsapaꞌ año eñosyenet eꞌñe ñet poꞌñoñeto. Allempoñapaꞌ attha kowanrrortoset.

⁷ Poemoññeꞌteñothetpaꞌ ateth otyeset: —Taꞌ, errothenotheꞌkaꞌ eꞌmyennayetña yeñoñ. Yapaꞌ yeñotenanet ñetpaꞌ galileoꞌmarnesheta.

⁸ Amaꞌt poꞌpoñ ñeñth yenyoꞌmar ñoñetspaꞌ eꞌmoeñet. Alloweneypaꞌ oꞌ eꞌñe yeꞌmyes ateth eñosyenet eꞌñe kowen yeñoño.

⁹ Allempopaꞌ alla otannaꞌtyerreterr: —Yapaꞌ yeñen poꞌpoñeꞌttsokma ñoñets tharroꞌmar yapaꞌ paꞌnamen anetsoth yewena. Alloth anetsroth yewapyena ñeñthpaꞌ paꞌnamen paꞌsoꞌchñexhno —amaꞌt Partioth ñamha Medioth ñamha Elamoth ñamha Mesopotamioth, Judeoth, Capadocioth, Pontoth, Asioth,

¹⁰ Frigioth, Panfilioth, Egiptoth ñamha Africoꞌmaroth, alla allameꞌtets Cireneo. Ñamha ñeñth wetsa Romoth ñeñth xhokma aꞌpoetsa arr.

¹¹ Amaꞌt ñamha judioneshaꞌ shonteꞌ, ñamha amaꞌt ñeñth ameꞌñaten judioneshaꞌ. Ñamha ñeñth wetsa Cretoth ñamha Arabioth. Ya theꞌpaꞌ oꞌ eꞌñe yeꞌmyes eꞌñe yokma yeñoño ateth ayeꞌchoxhtateññañet Parets poꞌkowenña eꞌñe yeñoño.

¹² Otannaꞌtyerreterr alla: —Taꞌm, ñetpaꞌ errothenettheꞌkaꞌyetheꞌ. Yapaꞌ amaꞌt awathapaꞌ ama yentareña galileoꞌmarneshaꞌpaꞌ oꞌch eñosyesña eꞌñe kowen yeñoño. Taꞌ, esokoptheꞌ.

¹³ Añña poꞌpotantañ acheñeneshaꞌpaꞌ oꞌ achmhareꞌtanet ateth otarethtet: —Tharroꞌmar ottenetñaꞌ xhokaꞌye posaꞌtyenet.

Attho Pedropaꞌ serrpareꞌtatan acheñeneshaꞌ

¹⁴ Añña Pedropaꞌ tanta oꞌ thom eꞌñe alla epoet poꞌpoñexhno yochreshats. Eñora womenk, otanet: —Masheñe judioneshachaꞌ ñamha allowenes ñeñthes arroꞌtsenes Jerusaléño, theꞌ oꞌch notas: Seꞌmhñoten oꞌch neñotatas atthoth ateth yepena ya.

¹⁵ Yapaꞌ ama yeposañotheyeꞌ oꞌ yoꞌnotaphsaꞌmoeno ateth soteney sa, tharroꞌmar ama xhoyeꞌ oꞌ yarepeno orrats.

¹⁶ Añña ñeñth sentyen theꞌ ñeñthpaꞌ añ oꞌ etsota ñeñth ateth oteꞌth Joel ñeñth aꞌmhtayeꞌth Yompor poꞌñoñ awath. Añña ñeñth kellkëꞌth awath Joel:

¹⁷ Añ ateth oteney Yompor: Allempoch mellapoterrmocha, atethchaꞌ perra, oꞌch nenanet Nekamkëñ poeyoxhreto, allowen arromñatheneshaꞌ oꞌch nechorratanet Nekamkëñ. Añña pemhreneñpaꞌ ñetchaꞌ aꞌpotherret neñoñ ñeñthchaꞌ neñotatwanet, amaꞌt ñamha koyaneshaxhno aꞌpotherrnanchaꞌ neñoñ. Añña ñeñth wepoeshareꞌ xhokmach es norrtatyesanet ñeñthchaꞌ entyesonet neshoth. Añña ñeñth poꞌnmeneshareꞌpaꞌ es norrtatyesanetchaꞌ poexhopoñeto.

¹⁸ Amaꞌt allowen ñeñth nesherbeneꞌ, ñamha amaꞌt koyaneshaxhno nenwanetchaꞌ Nekamkëñ poeyoxhreto atthoch aꞌpothonet neñoñ.

¹⁹ Allempoña enopaꞌ oꞌch nentatyesanet ñeñth amaꞌt awathapaꞌ ama poentareto. Patsopaꞌxhoꞌña oꞌch norrtatyesanet ñeñthchaꞌ eñotaterrawet. Kellareñtsothpaꞌ norrtatchaꞌ errasats. Poethomamphsannaꞌteñothet paꞌnetserpaꞌ orrterrach tsoꞌ errakmañen, chepoterrchaꞌ amos ñamha errapharen.

²⁰ Amaꞌt ñeñth yexhoyoꞌtampeneꞌ theꞌ allempopaꞌ poenaserrach chekmeteꞌ. Arrorrpaꞌxhoꞌña allempopaꞌ tsamaꞌthterrach ateth ñerraꞌmrratheꞌ errasats. Atethchaꞌ yoroxhterra allempoch werrmocha Yompor.

²¹ Allempopaꞌ amaꞌt erraꞌtsena xhoreꞌteꞌ Yompor poeyoxhrokmañen atthoch aꞌkeshphachpaꞌ, Yomporñapaꞌ aꞌkeshphatanetchaꞌ. Arrpaꞌ allowa ateth kellkëꞌth awath Joel.

²² Añpaꞌ ñeñthara alla oterraneterr Pedro: —Oꞌch, masheñe judioneshachaꞌ, noterrserr: Sapaꞌ señoteñ awañapaꞌ orrteꞌth Jesús ñeñth nazaretoꞌmarneshaꞌ. Ñapaꞌ xhokma orrtatonaseꞌth poꞌpartsoteña, ñamha xhokma orrtatyesonaseꞌth ñeñth ama sentare ñeñthchaꞌ señotateꞌ ñapaꞌxhoꞌña nanak Parets. Pompor apoeneꞌña poꞌpartsoña atthoch señotoñ Poechemer ña nanak Parets.

²³ Añña ñeñthara Jesús sañapaꞌ oꞌ sepomwer atthoch korsoꞌtamphset. Sañapaꞌ oꞌ saph poꞌpoñ acheñeneshaꞌ ñeñth athpareꞌteneꞌ Yompor atthoch ñetpaꞌ oꞌch moetset. Ateth oꞌ sephowa, Yomporpaꞌ awathotheñ eñotwaseꞌth atethchaꞌ sepha, tharroꞌmar ateth moeneꞌth ña.

²⁴ Tharraña amaꞌt rromwapaꞌ Pomporpaꞌ oꞌ alla tantater. Tharroꞌmar amatheꞌ errotheno theꞌpaꞌ alla aꞌpo rromoeꞌ.

²⁵ Amaꞌt ateth oteꞌth David awath, ateth ñerraꞌm Jesús eñoratseꞌth. Ateth oteꞌth: Napaꞌ neñoteñ Nompor xhokma alloꞌtsenen parro epan. Ñach nanak awamenkath nepeꞌ atthoch amach nemhchaꞌto.

²⁶ Ñeñthoꞌmarña nanak nokshena neyoxhro, noksheñeshokma neñen. Amaꞌt nerromapaꞌ neñoteñ amach alla naꞌpo rromoeꞌ.

²⁷ Napaꞌ neñoteñ amach aꞌypoꞌñono nekamkëñ alla oꞌpono. Nomporpaꞌ amach moeno oꞌch poetsowa alla nechets tharroꞌmar ñapaꞌ entenen eꞌñe kowenareꞌ es nepen ñokop.

²⁸ Añchaꞌña oꞌch entaterren atthoch yokrrerra eꞌñe kowen. Poparrokmateñoth epan ñapaꞌ ñach nokshaterreꞌ nanak. Allowa ateth oteꞌth David awath ateth ñerraꞌm Jesús eñostseꞌth.

²⁹ Allempopaꞌ alla oterraneterr Pedro: —Oꞌch masheñneshachaꞌ noterrserr, añ poktetsa eꞌñe eñotoxhen oꞌch notas: Yatañ David awathpaꞌ rroma. Rromapaꞌ pampoet. All pampoetpaꞌ yenteñ amaꞌt themeꞌttsen. Ñeñthoꞌmar yeñoteñ awath allempo oteꞌth añ ñoñetspaꞌ ama añekpayeꞌ serrpareꞌteꞌthe eꞌñe ñokop, añekopña serrpareꞌteꞌth Jesúsokop.

^30-31 Tharroꞌmar David ñapaꞌ ña aꞌmhtayeꞌth awath Yompor poꞌñoñ. Ñapaꞌ eꞌñe eñotweꞌth atethchaꞌ pha ñeñthchaꞌ Cristotats allempoch xhap añe patsro. Ñeñthoꞌmar amaꞌt awathotheñpaꞌ eñoseꞌth atethchaꞌ tanterra ñeñthchaꞌ Cristotats. Pomporpaꞌ amach aꞌypoꞌñano Poechemer oꞌpono. Amach moenatoñe oꞌch poetsowa poꞌchets. Yomporpaꞌ amaꞌt awathpaꞌ ateth otan David oꞌch noñ poesheñarr poꞌmhrenñoth ñeñthchaꞌ amhchaꞌtarethtatsa esempo. Davidpaꞌ eñotaneꞌth Yompor ñapaꞌ ama poeno poꞌñoñ.

³² Theꞌña yapaꞌ oꞌ yeñch Yomporpaꞌ oꞌ tantaterran Poechemer Jesús.

³³ Theꞌña ñapaꞌ eꞌñe alloꞌtsen epoet Pompor Parets all partsoten ento. Pomporpaꞌ oꞌ eꞌñe apwe Poekamkëñ. Theꞌñapaꞌ añ ñeñthara Poekamkëñ oꞌ chorratya yamha ateth otnerrey awaña. Ñeñthoꞌmarña oꞌ orrtonaya ateth sentyes ñorraꞌ, ñamha ateth seꞌmyes kowen ñoñets eꞌñe sa señoño.

³⁴ Ñeñthoꞌmarña yeñoteñ ama añekpayeꞌ serrpareꞌteꞌthe David eꞌñe ñokop, tharroꞌmar ñapaꞌ rromapaꞌ ama tanterro allothpaꞌ ama aꞌterro ento ateth ñerraꞌm Jesús. Ñamha poꞌpocheño awathpaꞌ eñoseꞌth David, atthoꞌ oteꞌth: Yompor Paretspaꞌ ateth otennan ñeñth eꞌñe Nepartseshar nepen na (ñeñthara ñeñthchaꞌ Cristoterrets): “Theꞌpaꞌ oꞌch phanorrwerr arr nekowenroth allchaꞌ pekowentapreterrna.

³⁵ Atthochña amaꞌt ñeñth peꞌmoñeꞌteneꞌ napaꞌ oꞌch eꞌñe nameꞌñatwerranet allochñapaꞌ oꞌch ateth perret ñeñth pemnen pha.” Añpaꞌ allowa ateth oteꞌth David awath.

³⁶ Allempoñapaꞌ alla oterraneterr Pedro: —Sapaꞌ israelenaꞌtares. Ñeñthoꞌmarña señochepaꞌch eꞌñe eñotoxhen attho Yompor Parets oꞌ nan Poechemer Jesús. Ñapaꞌ ña Partseshatets, ñeñthara Cristotats. Añ ñeñth Jesús sañapaꞌ oꞌ sekorsoꞌtamphsach. Añpaꞌ ñeñtha allowa serrpareꞌtatanet Pedro.

³⁷ Allempoñapaꞌ ñeñth matrraꞌtatsa allpaꞌ oꞌ xhapanet poeyoxhro añ ñoñets. Nanak llekanrrortet. Ateth ochet Pedro ñamha poꞌpotantañexhno Jesús poellsensar. Eꞌñe poellkëñothet ateth otet: —Masheñneshachaꞌ, errothenwachkaꞌye yeperraña theꞌ.

³⁸ Pedroñapaꞌ ateth otanet: —Theꞌpaꞌ aña poktetsa ñeñthchaꞌ seperra allowenes. Theꞌ sellkëñoth oꞌch sokthapeꞌcherr ello kowen Yomporekop. Allochñapaꞌ Yomporpaꞌ peretnaꞌwerrnaschaꞌ soꞌchñar. Eꞌñe sameꞌñeñoth Jesucristo añ pokteꞌ theꞌ oꞌch sapatarethterra Partsokop. Allochñapaꞌ Paretspaꞌ chorraterrsach Poekamkëñ.

³⁹ Ñeñthpaꞌ pokteꞌ atethchaꞌ sepha, tharroꞌmar ateth otnerrey Jesús oꞌch chorratwerrya eꞌñe poesheñaꞌttsoy Poekamkëñ, alloweney ñeñthey oꞌ waꞌñerrey Yeyomporer Parets oꞌch yameꞌñera. Ñamha oꞌch chorratwonasa amaꞌt sa sechemereshaꞌ Poekamkëñ, ñamha allowen amaꞌt ñeñth ellapharoꞌtsaꞌyenet.

⁴⁰ Allempoñapaꞌ oꞌ alla serrpareꞌtaterraneterr atthoch otanet paꞌnamen ñoñets. Atthoch kothapeꞌchatanetpaꞌ ateth otanet: —Amach sokthapeꞌchatsto ateth kothapeꞌchen poꞌpoñ acheñeneshaꞌ ñeñth ama ameꞌñetso. Atthothchaꞌ sekeshperrach.

⁴¹ Allempoña allowen ñeñth ameꞌñaya Pedro ateth otanetpaꞌ oꞌ apatarethtet. Allempopaꞌ ñatoꞌ allpon ameꞌñatsa maꞌpa mil acheñeneshaꞌ. Xha shontena ñeñth ameꞌñatsa.

⁴² Allempotheñ ñeñth ameꞌñatsapaꞌ eꞌñe maꞌyoxhrenet ateth yexhataneteꞌth Jesús poellsensar. Nanak kowen entannaꞌteteꞌth allekma apxheteꞌth parro. Poeyerpoeñothet Jesús oꞌ tomaꞌntatet pan ateth ñerraꞌm Jesús poꞌchets. Nanak maꞌyocheteꞌth eꞌñe parro.

Ateth korreꞌth awath ñeñth ameꞌñatseꞌth

⁴³ Ñeñth Jesús poellsensarpaꞌ orrtataneteꞌth shonteꞌ paꞌnamen ñeñth ama poentareto, orrtataneteꞌth partsoteñets atthoch eñochet añmapaꞌ Partsepaꞌt. Ñeñthoꞌmarña allowen acheñeneshaꞌpaꞌ nanak mechaꞌnaꞌteteꞌth.

⁴⁴ Ñeñth ameꞌñatsapaꞌ xhokma apxheteꞌth parro, poksheñoth apannaꞌtyeseteꞌth ñeñth es palltatseꞌth.

⁴⁵ Oꞌch vendaꞌyeseteꞌth ñeñth echyenet ñamha allpon ñeñth oꞌpatyeseteꞌth ñeñthpaꞌxhoꞌña vendaꞌyeseteꞌth. Allpon ganaꞌyeseteꞌthpaꞌ oꞌch apannaꞌtyeseteꞌth ñerraꞌm eseshaꞌ es palltatseꞌth.

⁴⁶ Patheꞌtets yethpaꞌ oꞌch awanenet eꞌñe parro Parets paꞌpakllo. Errothenopaꞌ poeyerpoeñothet Jesús oꞌch tomaꞌntacheteꞌth pan ateth ñerraꞌm Jesús poꞌchets. Ñamha xhokmach rrallmeꞌchapretannaꞌteteꞌth paꞌpaklleto. Eꞌñe poksheñeshet poeyoxhretopaꞌ xhokmach rrallmeꞌcheteꞌth. Allempopaꞌ nanak amoerañterret.

⁴⁷ Ñamha xhokmach ayeꞌchoxhtatoñeteꞌth Yompor. Allowen acheñeneshaꞌpaꞌ eꞌñe kowen entapretaneteꞌth ñeñth ateth peteꞌth. Patheꞌtets yeth Yomporothpaꞌ xhokmach ameꞌñacheteꞌth poꞌpoñexhno acheñeneshaꞌ. Attheñapaꞌ oꞌ xha shonta ñeñthchaꞌ aꞌkeshphatarethtatsa.