Los Hechos 19 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Allempo xherrerr Pablo Efeso

¹ Allempo Corintoꞌtsenmeñ Apolos, Pabloñapaꞌ alla chopeñeꞌchen aspentharero. Attheñapaꞌ oꞌ alla xherr Efeso. Allñapaꞌ all entosan allponsheña ñeñth ameꞌñetsa. Tharraña ñetpaꞌ allpon eñotenet allpon serrpareꞌtateꞌth Juanañ.

² Pabloñapaꞌ aꞌphthoꞌtan ñeñth ameꞌñetsa, ateth otanet: —Sapaꞌ allempotheñ sameꞌña, ¿awoꞌt chorrasaña Parets Poekamkëñ? Ñetñapaꞌ oꞌ anapoet: —Yapaꞌ ama yeꞌmareña ñatoꞌ eñalltheꞌ Parets Poekamkëñ.

³ Pabloñapaꞌ alla oterrerr: —¿Errothenotheꞌtña sapatarethta? Ñetñapaꞌ ateth otet: —Yapaꞌ yameꞌñeñoth ateth otyeꞌth Juanañ atthothña yapatarethta.

⁴ Pabloñapaꞌ alla oterrerr: —Añothña apaten Juanañ attho oꞌ kothapeꞌcherret ello kowen Yomporekop allothñapaꞌ oꞌch apatarethtet atthoch ameꞌñeret ñeñthchaꞌ wapatsa chentaꞌ. Añña ñeñth wapatsa chentaꞌpaꞌ añepaꞌt Jesús.

⁵ Eꞌmoet atethpaꞌ apatarethterret pameꞌñeñothet Yepartseshar Jesús.

⁶ Allempoña Pablopaꞌ oꞌ aꞌphllanet pototh. Allempoñapaꞌ awepaꞌt chorranet Parets Poekamkëñ. Allempoñapaꞌ oꞌ eñosyeset poꞌpoñ ñoñtso, oꞌ aꞌpothoñet attho eñoranaꞌtanet Yompor.

⁷ Ñeñth eñosyesets poꞌpoñ ñoñtsopaꞌ alloꞌtsen ñatoꞌ xharrasheña poechena epsheña.

⁸ Pablopaꞌ nanak serrpareꞌtateꞌth all Efeso. Patheꞌtets semana oꞌchxhoꞌ beꞌthosos judioneshaꞌ poꞌprawo oꞌchxhoꞌ serrpareꞌtatanet ateth pena Yompor poꞌkowenña ñeñth attho atarr ayochreshathtena ña. Ama mechaꞌteꞌthe amaꞌt mamesha. Oꞌchxhoꞌ yexhatanet allochñapaꞌ oꞌch ameꞌñatanet. Attheñapaꞌ oꞌ maꞌpmha arrorr.

⁹ Tharraña poesheñaꞌtets acheñpaꞌ nanak athpareꞌcheteꞌth ama ameꞌñyeto ateth serrpareꞌtatanet Pablo. Pathpareꞌteñothetpaꞌ amaꞌt all shontena acheñeneshaꞌpaꞌ oꞌ sasareꞌtoñet Jesús pokthaphña. Allempoñapaꞌ awerr Pablo. Ñeñthña ameꞌñetsapaꞌ oꞌ kotheret. Oꞌ awanmoet alloꞌtsen Tiranno poeꞌscuela. Allñapaꞌ patheꞌtets yethpaꞌ añña Pablopaꞌ oꞌchxhoꞌ serrpareꞌtatanet poeꞌscuelapawo.

¹⁰ Attheñapaꞌ oꞌ met epa char. Allowen asioꞌmarneshaꞌ oꞌ eꞌmareꞌtoñet Yompor poꞌñoñ —allowen judioneshaꞌ amaꞌt ñamha allowen ñeñth ama judioneshayaye.

¹¹ Yomporpaꞌ nanak awamenkath phan Pablo. Ñeñthoꞌmarña nanak orrtatanet Yompor poꞌpartsoña ñeñth ama poentareto.

¹² Attheñapaꞌ añña acheñeneshaꞌpaꞌ oꞌchxhoꞌ anerret ñeñth es aꞌphllaꞌyen Pablo, ateth ñerraꞌm es pañell amapaꞌ pañosheꞌm. Oꞌchxhoꞌ anmet alloꞌtsen ñeñth atsnaꞌtets. Oꞌch xhapachet allpaꞌ oꞌchxhoꞌ korrerraña atsnañeth. Amaꞌt poꞌneñetheretpaꞌ oꞌchxhoꞌ kexhpaꞌnerranet.

^13-14 Eꞌñe allempopaꞌ alloꞌtsen poesheñaꞌtets judioneshaꞌ ñeñth achyoꞌtañneshaꞌ ñeñth xhokma chopeñeꞌchets errakmañen. Ñewa, ñetpaꞌ añ poechemereshanet ñeñth poesheñarr judioneshaꞌ ñeñthara ñeñth korneshaꞌ nanak amhchaꞌtareth añ paꞌsoꞌcheñ Esceva. Alloꞌtsen kanxherrsheña poechemereshaꞌ. Ñetpaꞌxhoꞌña oꞌ topachet awoꞌch kexhpatachet ñamet acheñeneshaꞌ poꞌneñether eꞌñe paꞌsoꞌchño Yepartseshar Jesús. Awoꞌch pet ateth pena Pablo. Poesheñarrña ñeñth chorrena oneñethpaꞌ otoñet poꞌneñether: —Napaꞌ oꞌch notaph, eꞌñe paꞌsoꞌchño Jesús ñeñth serrpareꞌten Pablo oꞌch pekexhpaꞌner añ acheñer.

¹⁵ Allempoña ateth ochet oneñethpaꞌ awepaꞌtchaꞌ eñoraña, oneñethpaꞌ ateth ot: —Jesúspaꞌ neñoteññañ poꞌwamenk, Pablopaꞌxhoꞌña neñoteññañ ateth poꞌwamenk echen. Tharraña sapaꞌ eseshaswañakaꞌye. Ama neñotennaso sewamenk.

¹⁶ Allempoña acheñ ñeñth chorrena oneñethpaꞌ omachanaꞌtanet, orrotet parro epoet achyoꞌtañneshaꞌ. Oneñethpaꞌ nanak atserrphatseꞌtanet allowenet. Moelleꞌmkoth atserrphatseꞌtwanet oꞌ matrraꞌtwet pokolloth.

¹⁷ Añña allowen efesoꞌmarneshaꞌpaꞌ oꞌ eꞌmareꞌchet ateth oꞌ pet —allowen judioneshaꞌ ñamha ñeñth ama judioneshayaye. Atarr yoreꞌtanet. Allempoñapaꞌ amhchaꞌnaꞌtpoꞌ enteñet Yepartseshar Jesús.

¹⁸ Shonteꞌ acheñ ñeñth ameꞌñetset allempoñapaꞌ wapyeset, oꞌ aꞌmethaꞌyesoset attho achyoꞌtyeseteꞌth.

¹⁹ Patantarrpaꞌ oꞌ wapatyeset poꞌlibro ñeñth allo eñotet achyoꞌtatset. Eꞌñe all shontena acheñeneshaꞌ oꞌ chamaꞌtwet poꞌlibro. Allempoñapaꞌ oꞌ somoerret errpontheꞌ tsaꞌtena allpon libropaꞌ oꞌ sala amnaroch xharraꞌ mil pokhllayoret. Ñeñth allpon tsaꞌtena allowen libro.

²⁰ Ñeñthoꞌmarña atarr amhchaꞌnaꞌtpoꞌ entoñet Yompor poꞌñoñ. Atarr ameꞌñet.

²¹ Allempoña eꞌñe Yompor Poekamkëñothpaꞌ oꞌ secherrerr Pablo oꞌch awerrerr Macedonio ñamha Acayo, allothña oꞌch aswanerrpaꞌ oꞌch awerr ñamha Jerusaléño. Allothñapaꞌ ateth ot Pablo: —Theꞌpaꞌ aña palltetsa oꞌch awen ñamha Romo.

²² Oꞌ moeñan epsheña acheñ ñeñth yenpoeneꞌ ñeñthchaꞌ ñanom tatsa Macedonio. Añña ñeñth epsheñapaꞌ añ paꞌsoꞌcheñ Timoteo ñamha Erasto. Pabloñapaꞌ oꞌ aꞌpowerra allponmat Asio.

Allempo nanak amaꞌtoxhtena acheñeneshaꞌ all Efeso

²³ Allempopaꞌ oꞌ atsrreꞌma poesheñaꞌtets acheñ. Añ atsrreꞌmatawet atthoꞌ pena ñeñth ameꞌñetsa.

²⁴ Alloꞌtsen poesheñarr añ paꞌsoꞌcheñ Demetrio ñeñth ñanom eꞌmoñeꞌteꞌ ñeñth ameꞌñetsa. Ñapaꞌ añ poꞌtarwas pen oꞌch yexhkatyesan pokollatholleshaꞌ añ tomaꞌntatena pokoll ñeñth allekma moechatseꞌtenet ñeñth poꞌyachorer penet ñeñth otenet yachor Diana. Añ pokollatholleshaꞌpaꞌ arrothoꞌ ayexhkatarethta asertalloth. Shonteꞌ acheñ ñeñthara poꞌtarwas penet, Demetrio ña apaweteꞌth poꞌtarwas ateth. Shonteꞌ kelle ganeteꞌth poꞌtarwasoth.

²⁵ Attheñapaꞌ Demetriopaꞌ oꞌ apxhatwan allowen paꞌtarwasañer ñamha poꞌpsheññexhno, ñetpaꞌxhoꞌña ñeñthara poꞌtarwas penet. Apxhatwanetpaꞌ ateth otanet: —Masheñneshachaꞌ sapaꞌ señoteñ añ yetarwas ñeñthpaꞌ alloch yegana shonteꞌ kelle.

²⁶ Theꞌpaꞌ señoteñ ñamha añ ñeñth otenet Pablopaꞌ awoꞌt otwan acheñeneshaꞌ añ ñeñth yeyoser ñeñth yeyexhkaten yapaꞌ ñapaꞌ oten amoꞌ Partsoyaye. Ñapaꞌ oꞌ kothapeꞌchatwan shonteꞌ acheñeneshaꞌ, theꞌpaꞌ shonteꞌ oꞌ ameꞌñatwa. Ñetpaꞌ oꞌ waporeꞌtwerret shonteꞌ ñeñth yapoenanet ñeñthchaꞌ maꞌyochet. Sapaꞌ oꞌ sentwe ateth penet arr Efeso ñamha oꞌ seꞌmareꞌch ateth phaꞌyenet ora errapharen Asioꞌmar.

²⁷ Alla oterraneterr Demetrio: —Ñeñthoꞌmar theꞌpaꞌ oꞌch notas, ñatoꞌ oꞌch wañerr yetarwas alloch yeganerra kelle. Tharraña ñeñthpaꞌ ama pokteyaye. Ñatoꞌ ellopaꞌ oꞌch aꞌypoꞌñaꞌweret ñamha yachor Diana ñeñth poerawoꞌtsen. Ñatoꞌ allempopaꞌ amaꞌt yachor Dianapaꞌ oꞌwañchaꞌ amhchaꞌnaꞌtpoꞌ eñchet, amaꞌt ñamha ora allowen asioꞌmarneshaꞌ ñeñth poꞌyachorer peneꞌ.

²⁸ Ñeñtha eꞌm allowen acheñeneshaꞌpaꞌ nanak atsrreꞌmatanet. Paꞌtsrreꞌmoeñothetpaꞌ oꞌ rranareꞌtyeset, alla oterreteꞌth: —¡Paretsñaxhoꞌ yachor Diana!

²⁹ Shonteꞌ acheñ nanak amaꞌtoxhtenet allowenet. Oꞌ rromoet Gayo ñamha Aristarco ñeñth macedonioꞌmarneshaꞌ ñeñth parro chopeñeꞌchen Pablo. Oꞌ matrraꞌtet alloꞌtsen pokoll atarrpoꞌ allekma apxhena acheñeneshaꞌ.

³⁰ Pabloñapaꞌ moeneñeñ oꞌch beꞌthos ñamha all amaꞌtoxhtenetpaꞌ tharraña añña ñeñth ameꞌñetsapaꞌ ama moenacheto.

³¹ Ñamha poesheñaꞌtets ñeñth amhchaꞌtarethtetsa all Asio ñeñth moerenaya Pablopaꞌ oꞌ moeñoñet ñoñets atthoch amach tatsto all apxhenet theꞌt moetseñet.

³² Allña apxhenetpaꞌ attha rranareꞌtyenet. Poesheñaꞌtetspaꞌ ateth otyeset ateth kothapeꞌchyenet ñet, poꞌpotantaññapaꞌ ateth otyeset poꞌpoñ ñeñth ateth kothapeꞌchyenet ñamet. Allowenet amaꞌt ama eñotweñeto esokoptheꞌña apxhenet, tharraña atthaña nanak amaꞌtoxhtenet.

³³ Poesheñaꞌtets judioneshaꞌ oꞌ chetaꞌnmet Alejandro oꞌ wapachet atthoch eñosachet. Ñañapaꞌ oꞌ echantosan pot atthoch oꞌch moetsoñeñtet añekop atthoch oꞌch aꞌpoktatan ñoñets judioneshakop.

³⁴ Tharraña allempo acheñeneshaꞌ ñeñth ama judioneshayaye oꞌ eñchet Alejandro ñapaꞌ judioneshaꞌ ñetñapaꞌ alla rranareꞌterreterr. Atarr thematen rrannartenet. Oꞌchxhoꞌ alla oterret allowenet parro: —¡Paretsñaxhoꞌ yachor Diana! ¡Paretsñaxhoꞌ yachor Diana!

³⁵ Allempoñapaꞌ poesheñarr amhchaꞌtareth ñeñth tarwasets gobiernokoppaꞌ oꞌ emmaꞌwanet, ateth otanet: —Masheñneshachaꞌ, oꞌch notas ñeñthes yexhetsa arr Efeso. Amaꞌt allowen acheñeneshaꞌ errapharen eꞌñe eñotweñet efesoꞌmarneshaypaꞌ yapaꞌ ñeñthey kowampeneꞌ yachor Diana ñeñth poerawoꞌtsen, ñeñthara yachor Diana ñeñth nanak Parets, ñeñth sowatsa entoth.

³⁶ Ñeñthpaꞌ yeñotweñ alloweney acheñey. Amatheꞌ errothenoth yoto ama attheyaye. Ñeñthoꞌmarña eꞌñe pokteꞌ oꞌch semtsoñeñta. Amachña xha samaꞌtoxhtatsto.

³⁷ Oꞌ alla oterraneterr amhchaꞌtareth, ateth otanet: —Sekwaꞌ awoꞌt sewapach arr añ epsheña acheñ. Tharraña ñetpaꞌ ama es yoreneto yachor poꞌprawoth ñamha ama achmhareꞌteñeto yachor.

³⁸ Ñeñthoꞌmarña theꞌpaꞌ oꞌch notas, ñerraꞌm moeneñ Demetrio ñamha paꞌtarwasañrexhno oꞌch otteñeꞌchatanetpaꞌ theꞌpaꞌ eꞌñe pokteꞌ temantanetepaꞌ. Tharroꞌmar theꞌpaꞌ atorareth allchaꞌ aꞌpoktatet ñoñets. Ñeñthchaꞌ aꞌpoktateꞌ ñoñetspaꞌ alloꞌtsena.

³⁹ Tharraña ñerraꞌm estheꞌ semnen oꞌch saꞌpoktat poꞌpoñpaꞌ ñeñthpaꞌ añ pokteꞌ oꞌch saꞌpoktach allekma apxhena ñeñth nanak amhchaꞌtarethexhno.

⁴⁰ Ñatoꞌ temantaꞌyet ya tharroꞌmar yapaꞌ eꞌñe atthotha yamaꞌtoxhtena.

⁴¹ Ñeñtha otwanetpaꞌ oꞌ moeñwerranet. Allempoñapaꞌ awanomwerret.