Los Hechos 18 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Allempo xhap Pablo Corinto

¹ Allempo awoꞌ ñamha anetso all oteñet Corinto.

² Xhap Corintopaꞌ entosan poesheñarr judioneshaꞌ añ paꞌsoꞌcheñ Aquila. Ñapaꞌ errteꞌ wetsa Italioth epoet poethapor ñeñth paꞌsoꞌcheñ Priscila. Añoꞌmar wenet Italioth tharroꞌmar amhchaꞌtareth Claudiopaꞌ oꞌ nan patherr ñoñets all Italio. Ñeñthpaꞌ ateth ot: Allowen judioneshaꞌpaꞌ awanerretepaꞌtoꞌ Romoth. Aquilapaꞌ arr eñalletña Ponto. Pabloñapaꞌ awoꞌ oꞌch entenanaꞌ Aquila epoet poethapor.

³ Ñetpaꞌ ñeñtha poꞌtarwas penet attho yexhkatenet shetamtsopoꞌ. Pabloñapaꞌ alla aꞌpa epoet atthoch tarwaset parro.

⁴ Patheꞌtets semana allempo xhen yeth allempo amesenet Pabloñapaꞌ oꞌchxhoꞌ awoꞌ judioneshaꞌ poꞌprawo. Allñapaꞌ allchaꞌ serrpareꞌt epoet judioneshaꞌ ñamha ñeñth ama judioneshayaye. Ñapaꞌ atarr moeneñ oꞌch ameꞌñatanet.

⁵ Allempoñapaꞌ wapa ñamha Silas epoet Timoteo. Thaya wapoet Macedonioth. Allempopaꞌ añ nanak thorrena Pablo serrpareꞌteꞌ. Ñapaꞌ añ eñotatenan judioneshaꞌ Jesúspaꞌ ñeñtharakaꞌye Cristoterrets ñeñth atarr kowenet awathotheñ.

⁶ Judioneshaꞌñapaꞌ nanak eꞌmoñeꞌchet Pablo, oꞌ achmhareꞌchet. Allempoña Pablopaꞌ oꞌ paꞌshman paꞌshtam atthoch eñochet nanak athpareꞌtenet. Allempoñapaꞌ ateth otanet: —Sapaꞌ sañeñach aꞌchenkatwerrtsa. Tharraña napaꞌ amach es seyowaꞌno. Theꞌpaꞌ thayotheñ añach neserrpareꞌtat ñeñth ama judioneshayaye.

⁷ Allempoñapaꞌ awerr. Xhap añ ñeñth paꞌsoꞌcheñ Justo paꞌpakllo ñeñth ameꞌñenaya Yompor. Paꞌpakëllpaꞌ allameꞌttsoꞌtsen alloꞌtsen judioneshaꞌ poꞌprawaꞌ.

⁸ Ñeñth amhchaꞌtarethtetsa judioneshaꞌ poꞌprawo ñeñthpaꞌ añ paꞌsoꞌcheñ Crispo. Crispopaꞌ oꞌ ameꞌñerrana Yepartseshar Cristo ñamha allowen ñeñth paꞌpaklloꞌtsen. Shonteꞌ corintoꞌmarneshaꞌ eꞌmhñotoñet Yompor poꞌñoñ, oꞌ ameꞌñerret ñamha oꞌ apatarethtet Yomporekop.

⁹ Attheñapaꞌ orrtoña Pablo ateth ñerraꞌm xho es yexhopoꞌten. Yomporpaꞌ awoꞌt otan Pablo: —Amach pemhchaꞌtatsto, xhokmach peserrpareꞌt, amach attha pemamthetatsto.

¹⁰ Napaꞌ oꞌch nekwampeneph atthoch amach eseshaꞌ erroth es pephaye. Tharroꞌmar napaꞌ nechen shonteꞌ acheñ añ anetsroth ñeñthchaꞌ nameꞌñaya.

¹¹ Allñapaꞌ allena alla patherr char ñamha meterrerr pechapmha arrorr. Allpaꞌ nanak yexhatanet Yompor poꞌñoñ.

¹² Allempoña amhchaꞌtarethta Galión eꞌñe alla Acayopaꞌ judioneshaꞌña oꞌ apxhetpaꞌ, oꞌpachet Pablo. Allempoña oꞌ rromoetpaꞌ anmet amhchaꞌtarethesho allekma aꞌpoktatenet ñoñets.

¹³ Xhapoet allpaꞌ ateth otoset: —Añ acheñpaꞌ aña yexhatenan acheñeneshaꞌ atthoꞌch ameꞌñyet Yompor, tharraña ñeñthpaꞌ ama attheyaye ateth oteney Moisés poꞌñoñ ñeñth ateth anareth.

¹⁴ Awoꞌch eñoseñ Pablopaꞌ Galiónñapaꞌ ateth otanet: —Oꞌch notas ñeñthes judioneshas, ñerraꞌm añ acheñ añtheꞌ oꞌ phowa ñeñth ama kowenopaꞌ amapaꞌ ateth ñerraꞌm xho moetsenan acheñ, ñewa, pokteꞌ napaꞌ oꞌch neꞌmhñotas attho sotteñeꞌcheñ.

¹⁵ Tharraña ñerraꞌm amatheꞌ attheyaye, añpaꞌ eꞌñe sokpa —ateth seyxhaten sa ñeñthes judioneshas, amapaꞌ eseshaꞌtheꞌ sameꞌñena, amapaꞌ ñeñth ateth oten ñoñets ñeñth ateth anareth sokop. Ñeñthoꞌmarña napaꞌ notenes ñeñthpaꞌ sokpa. Ñeñthoꞌmarña napaꞌ amach neñoso añekop ñeñth eꞌñe sokpa.

¹⁶ Allempoñapaꞌ oꞌ xhaꞌnmaxhaꞌtaterranet.

¹⁷ Allempoña acheñeneshaꞌ aña rromoet Sóstenes. Sóstenespaꞌ ñeñth amhchaꞌtarethtetsa judioneshaꞌ poꞌprawo. Oꞌ rromoetpaꞌ oꞌ nalleꞌchet eꞌñe alla allameꞌtets amhchaꞌtarethesho. Amhchaꞌtareth Galiónpaꞌ ama kowaꞌphsaneto.

Allempo xherrerr Pablo Antioquío

¹⁸ Oꞌ atomaterrerr Pablo alla Corinto allempoñapaꞌ oꞌ soꞌtnerran ñeñth ameꞌñetsa. Aña kotherreꞌ Priscila ñamha Aquila. Allothpaꞌ año awamphset boto, arrchaꞌ tet Sirioꞌmar. Arr aswanmoet anets Cencrea. Allñapaꞌ oꞌ shopenaꞌtatosa Pablo. Añekop shopenaꞌtata atthoch eñochet oꞌ etsotwan poꞌñoñ ña ñeñth ateth otan awaña Yompor ñeñthchaꞌ ateth pha Yomporekop.

¹⁹ Allempoña xhapoet Efesopaꞌ allñapaꞌ oꞌ saꞌnerran Aquila ñamha Priscila. Ñañapaꞌ oꞌ awoꞌ judioneshaꞌ poꞌprawo allchaꞌ serrpareꞌtet parro judioneshaꞌ.

²⁰ Allñapaꞌ otareꞌchet Pablo aꞌpoepaꞌtoꞌ alla atomat, tharraña Pablopaꞌ amoꞌ moeno.

²¹ Allempoña soꞌtnerranetpaꞌ ateth otanet: —Napaꞌ oꞌch alla awerren Jerusaléño allchaꞌ nokshapretwerra añ yether ñeñth anareth Partsokop allempoch alla kosherrerr judioneshaꞌ. Ñerraꞌm Yomporchaꞌ moenatspaꞌ ñatoꞌ oꞌch nowerrerr esempo. Allempoñapaꞌ awamperrerr boto.

²² Allempoñapaꞌ arr etsotamphsosa Cesareo. Cesareothñapaꞌ aswanom Jerusaléño allchaꞌ abechnoman ñeñth ameꞌñetsa all. Allempoñapaꞌ oꞌ alla awerr Antioquío.

Allempo pomaꞌpocheño awerrerr Pablo serrpareꞌtats allemeñ anetsoꞌmar

²³ Antioquíopaꞌ alla allponmatnerr, allothñapaꞌ oꞌ awerrerr. Arr aswanerr Galacioꞌmar allothpaꞌ awerr Frigioꞌmar. Ñeñth ameꞌñaꞌyetsa allpaꞌ oꞌ yenpanet atthoch womenk perret poeyoxher.

Allempo Apolos atarr kowen serrpareꞌtatosanet all anetso Efeso

²⁴ Ñewa, allempopaꞌ eñall poesheñarr judioneshaꞌ añ paꞌsoꞌcheñ Apolos ñeñth wetsa Alejandrioth. Ñañapaꞌ oꞌ xhap Efeso. Atarr kowen serrpareꞌtenan Yompor poꞌñoñ, atarr etsotenan Yompor poꞌñoñ ñeñth ateth akellkareth awathotheñ.

²⁵ Ñapaꞌ ayxhatareth ñeñth atethchaꞌ perra Yepartseshar ñeñthara ñeñth Cristotats. Ñapaꞌ eꞌñe poꞌñoxh serrpareꞌt womenk, yexhatanet ñeñthchaꞌ ateth perra Jesús. Añaña ama eꞌñe eñotweno ora ateth pena Jesús. Aña eñoten ateth yexhateꞌth Juanañ ñamha ateth apateꞌth Juanañ.

²⁶ Ñapaꞌ serrpareꞌteꞌth womenk judioneshaꞌ poꞌprawo. Allempoña eꞌmh Priscila ñamha Aquila, ñetñapaꞌ anmet elloneth allchaꞌ eñotachet eꞌñe ora ñeñth ateth pha Yompor ñeñthaña palltena oꞌch eñoch eꞌñe poktakma.

²⁷ Allempoñapaꞌ secha Apolos Acayo. Añña ñeñth ameꞌñetsapaꞌ oꞌ yenpoet. Ñetpaꞌ oꞌ kellkët carta añekop ñeñth ameꞌñetsa all Acayo atthoch ñetpaꞌ oꞌch agapet Apolos eꞌñe kowen. Allempoña oꞌ xhap all Acayopaꞌ nanak yenpan ñeñth ameꞌñenaya kowen ñoñets all.

²⁸ Oꞌ eñotatanet poꞌñoxh Jesúspaꞌ ñeñthkaꞌyeña Cristoterrets ñeñth atarr kowenet awathotheñ. Yompor poꞌñoñoth ñeñth akellkareth awathotheñ oꞌ gatyesanet attho Jesús oꞌ etsotatwan ñeñth akellkareth awathotheñ. Ñeñth alloꞌtsaꞌyen allowen acheñpaꞌ eꞌñe poꞌwamenkokma yexhatanet. Allempoña amaꞌt poesheñarra judioneshaꞌpaꞌ ama erroth otenayeꞌ enteto.