Los Hechos 14 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Allempo xhapoet ñamha anetso paꞌsoꞌcheñ Iconio

¹ Allempoña xhapoet Iconiopaꞌ oꞌ beꞌthosxhaꞌtet parro judioneshaꞌ poꞌprawopaꞌ oꞌ serrpareꞌtatoset all. Nanak kowen serrpareꞌtatet ñeñthoꞌmarña ameꞌñachet shonteꞌ acheñeneshaꞌ —amaꞌt judioneshaꞌ ñamha amaꞌt ñeñth griegoneshaꞌ.

² Añña judioneshaꞌ ñeñth athpareꞌteneꞌ Yompor poꞌñoñ ñetñapaꞌ tomaꞌtamphset Pablo ñamha Bernabé. Nanak sasareꞌteñet thayeꞌtoꞌ acheñeneshaꞌ ñeñth ama judioneshayayepaꞌ kowen enteññañet attho serrpareꞌten.

³ Tharraña amaꞌt eꞌmoñeꞌtanet patantarr acheñeneshaꞌpaꞌ ñetñapaꞌ ama mechaꞌteto. Alla atomatet serrpareꞌtet Yompor poꞌñoñ. Orrtatet ñeñth acheñeneshaꞌ ama poentareto ñeñthña eñotatawet poꞌñoxh attho serrpareꞌtenetpaꞌ añmapaꞌ Yompor pomoereñoth wapanet añ ñoñets. Yomporpaꞌ nanak awamenkath phanet.

⁴ Attheñapaꞌ añña patantarr acheñeneshaꞌpaꞌ eꞌñe kowen enteñet ateth serrpareꞌtatanet Pablo ñamha Bernabé. Tharraña poꞌpotantaññapaꞌ ama. Ñetñapaꞌ aña ameꞌñatawet judioneshaꞌ. Ñeñthoꞌmarña ama pathrrayeꞌ kothapeꞌchenoña acheñeneshaꞌ all.

⁵ Attheñapaꞌ oꞌpacha shonteꞌ judioneshaꞌ amaꞌt ñamha ñeñth ama judioneshayaye ñamha ñeñth amhchaꞌtarethexhnopaꞌ oꞌpacha oꞌch rromoet womenkpaꞌ oꞌch rrolleꞌchet.

⁶ Oꞌ eꞌmareꞌchet xha oꞌpatarethtenetpaꞌ añña Pablo ñamha Bernabépaꞌ oꞌ yeterretpaꞌ awanmoet ñamha Listro. Xhapoet Listropaꞌ xha aswanmoetpaꞌ oꞌ metet ñamha Derbho. Añpaꞌ ñeñthara anets all otenet Licaonia. Errakmañen chopeñeꞌchet alloꞌmar.

⁷ All chopeñeꞌchnenetpaꞌ all serrpareꞌtnenet Yompor poꞌñoñ.

Allempo xhapoet ñamha anetso paꞌsoꞌcheñ Listra

⁸ Allempo Listroꞌtsenetpaꞌ allñapaꞌ alloꞌtsen poesheñarr acheñ, xha echarrtena paꞌtak, ama eshkayeꞌ chopeꞌcheno, amaꞌt awathotheñ ñapaꞌ attha eñalletña. Ñañapaꞌ alla anen.

⁹ Allña anenpaꞌ alla eꞌmhñotenan ateth serrpareꞌten Pablo. Pabloñapaꞌ koweꞌ allapaꞌ oꞌ eñoch añ acheñpaꞌ oꞌ yemtana Yompor ñapaꞌ oꞌch aꞌkrrater.

¹⁰ Ñeñthoꞌmarña Pablopaꞌ ateth och womenk: —Oꞌch notaph, oꞌch phathen. Awepaꞌtchaꞌ tanta allempokma allorokma xha chopeꞌchnets.

¹¹ Allempo eñch allowen acheñeneshaꞌpaꞌ xha rrannartet. Poksheñothetpaꞌ ateth otet: —¡Partsepaꞌt! Ñeñth Parets yepen ñeñthepaꞌt poenasetsa acheñ. Theꞌpaꞌ oꞌ xhap eꞌñe yesho. Añpaꞌ ateth otet poꞌñoñeto ñeñth Licaonaxh.

¹² Añña Bernabépaꞌ oꞌ sochet, ateth otet: —Añepaꞌt ñeñth yeyomporer Júpiter. Pabloñapaꞌ sochet ñapaꞌ añ ñeñth poꞌyompor-ret Mercurio. Tharroꞌmar sochet ateth ñapaꞌ nanak serrpareꞌten kowen ateth ñerraꞌm poꞌyompor-ret Mercurio.

¹³ Ñewa, acheñeneshaꞌ allpaꞌ echenet poꞌprawaꞌ allekmach maꞌyochyeteꞌth poꞌyompor-ret ñeñth otenet Júpiter. Ñeñthpaꞌ eꞌñe ñewapoth anareth allempopaꞌ oꞌch thaya yerrothaꞌnmos paꞌnetsreto. Ñeñth korneshatets poerawopaꞌ oꞌ wapa. Wapatan wakësh, wapatan ñamha shonteꞌ ror. Moeneñ oꞌch moetset wakësh Pablokop ñamha Bernabékop tharroꞌmar xhokma moetseteꞌth wakësh poꞌyompor-rekop. Ñamha tharroꞌmar ateth moenen acheñeneshaꞌ. Ñetpaꞌ xha otenapoetañ Pablo ñamha Bernabépaꞌ añtheꞌ ñeñth poꞌyomporer penet.

¹⁴ Allempoña eñoch Pablo ñamha Bernabé ñeñth atet pena acheñeneshaꞌpaꞌ nanak llekaꞌrrtet. Poellkëñothetpaꞌ oꞌ rrarreꞌtet paꞌshtampaꞌ oꞌ matrraꞌtet alloꞌtsaꞌyen acheñeneshaꞌ. Oꞌ rrannaretnomoet, poerranarothetpaꞌ

¹⁵ ateth otet: —Esoꞌmartheꞌkaꞌye, masheñneshachaꞌ, ateth sepena. Yapaꞌxhoꞌ arromñatheya atthey ñerraꞌm sa. Ñeñthoꞌmarña oꞌ yeserrpareꞌtatas kowen ñoñets atthothchaꞌ sekexhpoerr ñeñth ateth sepena ñeñth eꞌñe orrena. Theꞌpaꞌ añña poktetsa oꞌch sameꞌñera Yompor ñeñth ama arromñatheshayaye, ñeñthara Yompor ñeñth yexhkateꞌ enet ñamha pats ñamha ñeñth añekmoen saꞌp. Ñamha ora allowen ñeñth yentyen ento ñamha ñeñth yentyen patsopaꞌ ña yexhkatweꞌ ñamha ñeñth saꞌpoꞌtsen ña yexhkatweꞌ.

¹⁶ Alla oterraneterr Pablo: —Awath Yomporpaꞌ moenatan acheñeneshaꞌ oꞌch phaꞌyeset ñeñth ateth moenaꞌyenet eꞌñe ñañeñeta.

¹⁷ Tharraña ama aꞌypoꞌñano acheñeneshaꞌ. Xhokma apaneteꞌth atthoch eñochet poꞌñoxh eñall Yompor. Xhokma moeraneteꞌth ñeñthoꞌmarña xhokma watacheꞌth ñokpoet atthoth yexhkaneteꞌth poenarmet, attho eñalleteteꞌth poerraret attho kosheteꞌth. Añpaꞌ ñeñtha ñeñth ateth otan Pablo allowen acheñeneshaꞌ.

¹⁸ Tharraña amaꞌt ateth otan acheñeneshaꞌpaꞌ oꞌ alla moenereterr oꞌch moetset wakësh ñokpoet ateth peteꞌth poꞌyompor-rekop. Tharraña Pablo ñamha Bernabépaꞌ ama moenataneto.

¹⁹ Oꞌ atomatpaꞌ waxhaꞌta poesheñaꞌtets judioneshaꞌ ñeñth wetsa Antioquíoth ñamha Iconioth. Kothapeꞌchatoset acheñeneshaꞌ poꞌpoñ. Eꞌmoñeꞌtachet Pablo. Attheñapaꞌ rrolleꞌchet Pablo. Rrolleꞌtwetpaꞌ xha otapoetañ oꞌtheꞌ rroma. Chetareꞌtnomet poebloth aꞌyeneth.

²⁰ Ñeñthña ameꞌñatsapaꞌ alla arrotampeñet alla koweñetpaꞌ ñañapaꞌ awepaꞌtchaꞌ alla tanterra, oꞌ alla awerrerr poeblo. Tsapathñapaꞌ Pablo ñamha Bernabépaꞌ awanerret alla Derbho.

²¹ Xhapoet Derbhopaꞌ serrpareꞌtwerreterr Yompor poꞌñoñ ñamha all. Shonteꞌ acheñ ñeñth alloꞌtsen ameꞌñenet ñamet. Allempoñapaꞌ awanerreterr Listro, ñamha aswerretaꞌ Iconio ñamha Antioquío.

²² Ora allowanen taꞌyeset yenpoet ñeñth ameꞌñetsa atthothchaꞌ womenk pet poeyoxher. Oꞌ kothapeꞌchatanet ñamha atthoch xhokma yemchet Yompor amaꞌt esempo wapanet moeroxhteñets. Tharroꞌmar eꞌñe yemoeroxhteñoth yexhapchaꞌ all amhchaꞌtarethtena Yompor.

²³ Oꞌ naꞌyeset poesheñaꞌtets acheñ ñeñthchaꞌ pompor phaꞌyes ñeñth pameꞌñeñoth apxhaꞌyetsa. Poethoreꞌteñothetpaꞌ oꞌ maꞌyochampesyet ñeñthchaꞌ pomporneshaꞌ phaꞌyeset, ateth ochet: —Yomporepaꞌch seyenpoeꞌ, ñeñthara Yompor ñeñth oꞌ sameꞌñaꞌwerra. Ateth phaꞌyeset ora allowen anetso all ameꞌñaꞌyesa acheñeneshaꞌ.

Allempo xhaxherret alla Antioquío alloth awanmoet awaña

²⁴ Allempoñapaꞌ aswanerret Pisidioꞌmar allothpaꞌ awanerret Panfilio. Xherret anetso ñeñth paꞌsoꞌcheñ Perge.

²⁵ Serrpareꞌtwerreterr Yompor poꞌñoñ all Pergo, allempoñapaꞌ awanmoet ñamha Atalio.

²⁶ Xhapoet Ataliopaꞌ allothñapaꞌ awamphset boto, oꞌ alla xhaxherret Antioquío ñeñthara anets alloth awaña ñeñth ameꞌñetsa all maꞌyochamphsapanet atthoch yenpanet Yompor eshekchaꞌ etsotoñet poꞌtarwas. Theꞌñapaꞌ oꞌ eꞌnwet.

²⁷ Oꞌ xhaxherret allpaꞌ apxhachet allowen ñeñth ameꞌñetsapaꞌ serrpareꞌtatweret ora allowen attho Yomporpaꞌ yenpanet. Oꞌ serrpareꞌtatanet attho Yompor aꞌpoktatanet, añeꞌna serrpareꞌtatet ñeñth ama judioneshayaye, añekop atthoch ameꞌñerret ñamet.

²⁸ Alla atomatet parro epoet ñeñth ameꞌñetsa.