Los Hechos 12 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Allempo amhchaꞌtareth Herodes moetsaterran Jacobo, yottamphsatan ñamha Pedro

¹ Allempopaꞌ añña amhchaꞌtareth Herodespaꞌ rromatan poesheñaꞌtets ñeñth ameꞌñetsa atthoch moeroxhtachet.

² Rromoet Jacobo oꞌ moetset. Añ Jacoboñpaꞌ ñeñthara ñeñth Juan paꞌmoꞌnasheñ. Attho moetsetpaꞌ xho pechoñet poñ.

³ Ñeñthña moetseꞌpaꞌ nanak koshatan judioneshaꞌ ñeñth ama ameꞌñetso. Allempoña amhchaꞌtarethpaꞌ nanak moeneñ oꞌch alla koshaterranerr judioneshaꞌ. Ñeñthoꞌmarña pascuapopaꞌ allempoch rrerreterr pan ñeñth ama aꞌchasaretheyayepaꞌ oꞌ alla rromaterranerr ñamha Pedro.

⁴ Rromoet Pedropaꞌ oꞌ abeꞌthet cárcelo. Net xharraꞌ poechena pechap solltarneshaꞌ ñeñthchaꞌ kowamphseꞌ. Ñanompaꞌ oꞌch neñet paꞌtatssheña solltarneshaꞌ ñeñthchaꞌ kowampeneꞌ. Allothpaꞌ oꞌchña moenmeꞌcheñetpaꞌ oꞌch wena poꞌpotantañ paꞌtatssheña ñeñthchaꞌ kowampeneꞌ ñamha. Ñeñthña xharraꞌ poechena pechap solltarpaꞌ atthach penet, xhach kamhyannenet. Añ kothapeꞌchña Herodes oꞌch metwa pascuapopaꞌ oꞌch orrtatan Pedro alloꞌtsaꞌyen acheñeneshaꞌ.

⁵ Attheñapaꞌ nanak womenk koweñet Pedro cárcelo. Tharraña ñeñth ameꞌñetsapaꞌ atarr maꞌyochampeñet Pedro.

Attho Yompor poꞌmhllañotheñerpaꞌ xhaꞌnmaterran Pedro cárceloth

⁶ Attheñapaꞌ allponmat oꞌ xhap allempoch tsapathchaꞌ Herodespaꞌ oꞌch orrtataꞌmoenan Pedro alloꞌtsaꞌyen acheñeneshaꞌ. Tsapoña Pedropaꞌ all moenpaꞌ all rroxhtampeñ epsheña guardia all rromampeñet allo ewankareth cadeno epoꞌmar poekhoth. Ñamha aꞌyothpaꞌ all kowampeñ poꞌpotantañ solltar eꞌñe alloth beꞌthenet.

⁷ Attheñapaꞌ machayotha poetareswa eꞌñe alla oꞌpono. Orrtoña Yompor poꞌmhllañotheñer. Añña mellañotheñpaꞌ oꞌ aꞌphllan Pedro poephotothpaꞌ oꞌ opoepaꞌ ateth och: —Petanta thekma. Añña cadena alloꞌ wankëñetpaꞌ xha poeyaꞌnets eꞌñe ñotha.

⁸ Añña mellañotheñpaꞌ ateth och: —Pechanaꞌpena peshtam, oꞌch penen ñamha pesapat. Ateth och mellañotheñpaꞌ atthoꞌxhoꞌ pha. Allempoñapaꞌ alla otererr: —Theꞌpaꞌ pechorrena ñamha peshtam ñeñth penen enoth. Allempoñapaꞌ oꞌch phokthenen.

⁹ Allempoñapaꞌ oꞌ xhaꞌnen kothaꞌnenan mellañotheñ. Pedroñapaꞌ xha otenapañ atthatheꞌ xhopoꞌteñ, tharraña ama xhoyeꞌ xhopoꞌteñe. Allempoñapaꞌ oꞌ awanenet.

¹⁰ Awanenetpaꞌ oꞌ metenet all kowen poesheñarr guardia. Awerreterr allponpaꞌ oꞌ meterreterr all kowen poꞌpsheñeñ guardia. Allempoñapaꞌ oꞌ xhenet alloth eꞌñe xhaꞌnenet allekma chopeñeꞌchen acheñeneshaꞌ. Xhenet yetarropaꞌ ñeñthña yetarrpaꞌ asret nanak echarr. Oꞌ xhenet eꞌñe allpaꞌ añña yetarrpaꞌ oꞌ toraꞌnom eꞌñe ñotha. Toraꞌnenpaꞌ ñetñapaꞌ oꞌ xhaꞌnenet. Xhenet aꞌyothpaꞌ allñapaꞌ all chopeꞌchnomoet eꞌñe parro mameꞌpaꞌ allothñapaꞌ oꞌ awerrña Yompor poꞌmhllañotheñer allothñapaꞌ oꞌ ñapthamena Pedro.

¹¹ Allempoñapaꞌ xhapoña Pedro poeyoxhro, ateth ot: —Poꞌñoxhepaꞌt ama xhoyeꞌ nexhopoꞌteñe. Yomporepaꞌt moeñeneꞌ poꞌmhllañotheñer atthoch aꞌkeshphaten. Theꞌpaꞌ Herodespaꞌ amach erroth phaꞌno. Judioneshaꞌpaꞌxhoꞌña eꞌñe orrena oꞌpatenna.

¹² Oꞌ xhapoña poeyoxhro thematenñapaꞌ oꞌ xhap alloꞌtsen María paꞌpakëll. Añña Maríapaꞌ ñeñth pachor Juan Marcos. Xhap all paꞌpakllopaꞌ allñapaꞌ alloꞌtsaꞌyen shonteꞌ acheñ all maꞌyochenet oꞌpono.

¹³ Oꞌ xhap alloth beꞌthenetpaꞌ xhoreꞌtosanet. Oꞌponothñapaꞌ xhaꞌnom poesheñarr shopsheshaꞌ añ paꞌsoꞌcheñ Rode.

¹⁴ Wapapaꞌ oꞌ chemeꞌtan Pedro poꞌñoñ. Poksheñeshaꞌ materra oꞌpono oꞌch oterranaꞌ acheñeneshaꞌ ñeñth oꞌponoꞌtsaꞌyen. Tharraña ama toramphsano Pedro. Xherr oꞌponopaꞌ ateth otanet: —Pedrepaꞌt oꞌ wena, alloꞌtsena aꞌyoth.

¹⁵ Ñetñapaꞌ xha otet: —Amatheꞌkaꞌye ñeñtheyaye, attha photyen xhatheꞌ pemospoena. Ñañapaꞌ alla oterrerr: —Poꞌñoxhkaꞌye Pedro. Ñetñapaꞌ oterreterr: —Amatheꞌ Pedroyaye. Ñatoꞌ añtheꞌ Yompor poꞌmhllañotheñer ñeñthchaꞌ kowamphseꞌ Pedro.

¹⁶ Attheñapaꞌ Pedroñapaꞌ alla xhoreꞌterraneterr yetarroth. Allempoñapaꞌ toramphset. Toramphsetpaꞌ añepaꞌt Pedro. Allempoñapaꞌ attha kowanrrortet.

¹⁷ Pedroñapaꞌ oꞌ echantan pot atthoch oꞌch moetsoñeñtet allochñapaꞌ oꞌch serrpareꞌtatwenanet. Allempoña oꞌ moetsoñeñtwetpaꞌ ateth otanet attho Yomporpaꞌ oꞌ xhaꞌnmater cárceloth. Otanet ñamha: —Oꞌch soteñaꞌ Jacobo ñamha poꞌpotantañ masheñneshaꞌ attho xhaꞌnmaterren Yompor poꞌmhllañotheñer. Allempoñapaꞌ alla awerr Pedro.

¹⁸ Attheñapaꞌ oꞌ poetaren. Arrña cárcelo solltarneshaꞌñapaꞌ poemhchañothetpaꞌ otannaꞌtyeset: —Errothenothwañakaꞌye xhaꞌnenña Pedro. Errawañakaꞌye oꞌ awen.

¹⁹ Attheñapaꞌ oꞌ eꞌnater Herodespaꞌ ama eseshaꞌ entaye. Oꞌ alla aꞌphthoꞌtareꞌtereterr solltarneshaꞌ ñeñth koweneꞌ cárcel ama eseshaꞌ entaye errothenotheꞌ oꞌ awen. Allempoña Herodesñapaꞌ oꞌ moeñoꞌtwan solltarneshaꞌ aꞌyo allchaꞌ moetsanatatwanet. Oꞌ allponmat Herodesñapaꞌ oꞌxhoꞌ awoꞌ Judeoth oꞌch awoꞌ Cesareo allñapaꞌ allach allponmatenaꞌ.

²⁰ Allempoña Herodesñapaꞌ nanak eꞌmoñeꞌtenan tiroꞌmarneshaꞌ ñamha sidónoꞌmarneshaꞌ. Ñeñthoꞌmarña oꞌwañ apanet rreñets ñeñth nanak palltenet paꞌnyeto. Ñeñthoꞌmarña ñetpaꞌ moeneñet oꞌch alla amoꞌtsteret Herodes atthoch oꞌch alla apoerranet ñeñth palltenet. Ñeñthoꞌmarña waxhaꞌta shonteꞌ tiroꞌmarneshaꞌ ñamha sidónoꞌmarneshaꞌ oꞌch enteñetaꞌ Herodes. Añña Herodes paꞌtarwasañer añ paꞌsoꞌcheñ Blastopaꞌ eꞌñe kowen entapanet. Ñañapaꞌ oꞌ aꞌpoktatanet atthoch ñetpaꞌ serrpareꞌtet epoet amhchaꞌtareth.

²¹ Xhap allempoꞌch serrpareꞌtet epoet amhchaꞌtarethpaꞌ Herodesñapaꞌ oꞌ chorrana nanak koxhneshaꞌ paꞌshtampaꞌ anorros poꞌkonañopaꞌ eñosos. Oꞌ eños ateth ñerraꞌm ñeñth amhchaꞌtareth nanak.

²² Oꞌña eñoswa acheñeneshaꞌñapaꞌ oꞌ rrannartetpaꞌ ateth otyeset: —Ama acheñenocheyeꞌ eñetso, Partsepaꞌt eñets.

²³ Eꞌñepaꞌtchaꞌ allempokma wapoña Yompor poꞌmhllañotheñer oꞌ atsnaꞌtatosan Herodes. Oꞌ atsnaꞌtpaꞌ eꞌñe rrowe poeñpaꞌ oꞌ rroma. Tharroꞌmar Herodespaꞌ moeneñ oꞌch Partsokoptarta. Acheñeneshaꞌñapaꞌ oꞌ ayeꞌchoxhtatoñet ateth ñerraꞌm Parets. Amaña xhoyeꞌ otaneto eñallña patherr Yompor. Añpaꞌ allowa ateth peꞌth Herodesoñ.

²⁴ Allempoñapaꞌ oꞌ epaꞌwa Yompor poꞌñoñ errakmañen. Alloꞌna ameꞌñaꞌwanena shonteꞌ acheñeneshaꞌ.

²⁵ Añña Bernabé epoet Saulopaꞌ oꞌ aswenetaꞌ Jerusaléño, pomwenetaꞌ kelle. Pomwenetaꞌ kellepaꞌ oꞌ poerraxherret Jerusaléñoth. Añña Juan Marcospaꞌ oꞌ kotherranet.