Los Hechos 11 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Allempo Pedropaꞌ serrpareꞌtatwerranet Jerusaléño

¹ Oꞌ allponmat Jesúsña poellsensarneshaꞌ oꞌ eꞌmareꞌchet attho poꞌpoñ acheñ ñeñth ama judioneshayaye oꞌ ameꞌñerrñañet ñamet Yompor poꞌñoñ. Attho eꞌmareꞌch Jesús poellsensarneshaꞌ ñamha poꞌpoñexhno acheñ ñeñth ameꞌñetsa all Judeo.

² Allempoña awerr Pedro. Allempo xherr Jerusaléñopaꞌ judioneshaꞌ ñeñth ameꞌñetsa allpaꞌ oꞌ cheꞌptareꞌtapoeret Pedro.

³ Oꞌ cheꞌptareꞌchet Pedro, ateth ochet: —Esoꞌmareꞌtña petaña alloꞌtsen ñeñth ama judioneshayaye, amaꞌt allpaꞌ oꞌtheꞌ xha perrallmeꞌchapretosanet.

⁴ Allempoña Pedropaꞌ oꞌ serrpareꞌtatwerranet ñeñth eꞌñe ateth pha;

⁵ ateth otanet: —Napaꞌ alloꞌtsenen Jopo. Allempo nemaꞌyochena wapona ñeñth ateth ñerraꞌm xhoꞌ es yexhopoꞌten. Entoñapaꞌ oꞌ nent ñeñth ateth ñerraꞌmrratheꞌ shetamoets. Enothpaꞌ xha sowaꞌnena axharamphsareth eꞌñe paꞌtats poꞌtophñeꞌmaroth. Añña ñeñth axharamphsarethpaꞌ sowaꞌnetsa patsoneth eꞌñe neshoneth.

⁶ Napaꞌ oꞌ nekweꞌpaꞌ allña oꞌponopaꞌ nent paꞌnamen berroxhno ñamha ñeñth poetsathoꞌmar, amaꞌt poꞌpoñ berroxhno ñeñth ama arrapawoyeꞌ yenteno ya ñeñthey judioneshay. Nent ñamha paꞌnamen shechpexhno, amaꞌt ñamha paꞌnamen othexhno.

⁷ Allempoñapaꞌ neꞌm ñoñets, ateth oten: “Pedro oꞌch pemtsa añ berr oꞌch perreꞌ.”

⁸ Tharraña napaꞌ not: “Ama Nomporchaꞌ nerreñe. Napaꞌ amaꞌt awathapaꞌ ama nerrare ñeñth ama arrapawoyaye ateth yeyxhena ya judioneshay.”

⁹ Allempoñapaꞌ alla oterrerr ñeñth eñets entoth, ateth ot: “Ñeñth oꞌ aꞌkowentatwa Yomporpaꞌ phapaꞌ amach photatsto añmapaꞌ ama kowenayaye.”

¹⁰ Añpaꞌ eꞌñe maꞌpocha neꞌmhpaꞌ allempoñapaꞌ oꞌ alla aꞌterr enoneth oꞌ alla chenkërra —ora.

¹¹ Allempokma oꞌ xhap ñamha maꞌpsheña acheñ. Xhapoet all pokollo all nommoena. Añ maꞌpsheña acheñpaꞌ arroth moeñonet Cesareoth.

¹² Añña Yompor Poekamkëññapaꞌ oten oꞌch noktherranet. Oten amach nemhchaꞌtatsto. Añ pechapsheña ñeñth arroꞌtsen theꞌ oꞌ yawanma parro. Allempoñapaꞌ yexhap paꞌpakllo ñeñth nagotateneꞌ.

¹³ Allempoña oꞌ yexhap paꞌpakllopaꞌ ñañapaꞌ oꞌ serrpareꞌtatapoey atthoꞌ orrtoña Yompor poꞌmhllañotheñer. Orrtoñapaꞌ ateth otos: “Añ pokteꞌ oꞌch pemñe acheñ Jopo oꞌch phagotach poesheñarr añ paꞌsoꞌcheñ Simón ñeñthara ñeñth otenet Pedro.

¹⁴ Añña Pedropaꞌ ñeñthchaꞌ peñotateꞌ atthoch pekeshperra ñamha allowen phamoꞌtseshaꞌ.” Ateth oten Yompor poꞌmhllañotheñer.

¹⁵ Nañapaꞌ oꞌ neserrpareꞌtosñañ Yompor poꞌñoñ. Allempo neserrpareꞌtenpaꞌ añña Parets Poekamkëñpaꞌ awepaꞌt chorranet. Oꞌ chorranet ñet eꞌñe atthekma chorraꞌya awaña yamha.

¹⁶ Allempoñapaꞌ oꞌ neyerepya ateth otey awaña Yepartseshar Jesús: “Juanañpaꞌ eꞌñe oñochaya apateꞌth tharraña na añchaꞌña nechorratasa Parets Poekamkëñ.”

¹⁷ Ñewa, Yomporpaꞌ eꞌñe pokteꞌ enteñ oꞌch chorranet ñet eꞌñe atthekma ateth chorraꞌya ya allempo yameꞌñya Yepartseshar Jesucristo. Ñewa, ñerraꞌm eꞌñe pokteꞌ enteñ Yomporpaꞌ nañapaꞌ errothenothwatheꞌkaꞌye necheꞌptareꞌchña Yompor.

¹⁸ Ñeñtha otwapaꞌ allempoñapaꞌ alla momaꞌwet allowenet. Allempoñapaꞌ oꞌ ayeꞌchoxhtatoñet Yompor, ateth otet: —Amaꞌt poꞌpoñ acheñ ñeñth ama judioneshayaye Yomporpaꞌ moeneñ oꞌch kothapeꞌcherret ello kowen alloch ñetpaꞌxhoꞌña korretsetach poksheñeshokmañen eꞌñe thayotheñ errponañowen. Allowa ñeñth ateth pha Pedro ñamha Cornelio.

Attho epaꞌwa Yompor poꞌñoñ errapharen

¹⁹ Allempo moetset Estebanpaꞌ allempotheñña orrta moeroxhteñets. Nanak moeroxhtacheteꞌth ñeñth ameꞌñetsa. Ñeñthoꞌmarña yetrraꞌtyeset allemeña, parratseꞌtyeset poꞌpoñ anetsoꞌmar. Poesheñaꞌtetspaꞌ awanmoet Fenicioꞌmar, poꞌpotantaññapaꞌ awanmoet Chipro, poꞌpotantañpaꞌ awanomyeset Antioquío. All chopeñeꞌchyesnomoetpaꞌ all serrpareꞌtyesnomoet Yompor poꞌñoñ, tharraña aña serrpareꞌtatnomoet ñapoeth judioneshaꞌ.

²⁰ Tharraña poesheñaꞌtets chiproꞌmarneshaꞌ ñamha cireneoꞌmarneshaꞌ ñeñth ameꞌñetsapaꞌ oꞌ xhapoet Antioquío. Allñapaꞌ aña serrpareꞌtatoset ñeñth griegoneshaꞌ. Añ serrpareꞌtet ñeñth ateth pena Yepartseshar Jesús.

²¹ Yomporpaꞌ nanak awamenkath phanet. Ñeñthoꞌmarña shonteꞌ acheñ ameꞌñachet Yepartseshar Jesús, oꞌ aꞌypoꞌñaꞌwerret ñeñth awath pokthaphñet.

²² Añña ñeñth ameꞌñetsa Jerusaléñopaꞌ oꞌ eꞌmareꞌchet attho shonteꞌ ameꞌñetsa Antioquío. Ñeñthoꞌmarña moeñet Bernabé Antioquío, oꞌch yenpoenanetaꞌ.

²³ Allempo xhap Bernabé allpaꞌ entosan poꞌñoxh oꞌ orrta Yompor poemoereña all. Ñeñthoꞌmarña nanak koshosa. Oꞌ kothapeꞌchatosanet, ateth otanet: —Amach sekexhpatstere Yompor poꞌñoñ. Womenkchaꞌ sephaꞌ seyoxher.

²⁴ Añña Bernabépaꞌ ñapaꞌ nanak amoeraña, nanak chorreña Parets Poekamkëñ. Atarr ameꞌñena. Ñeñthoꞌmarña shonteꞌ ameꞌñatana acheñeneshaꞌ atthoch kotheret Yepartseshar.

²⁵ Allempoña awoꞌ Bernabé. Oꞌ xhap Tarso allchaꞌ eꞌnerranaꞌ Saulo. Allña entospaꞌ aꞌsecher oꞌch aner Antioquío.

²⁶ Epsheñoꞌmaret alla aꞌpoet patherr char Antioquío. Allñapaꞌ nanak yexhacheteꞌth ñeñth aꞌpxhatseꞌth all pameꞌñeñothet Yompor. Shonteꞌ acheñ ameꞌñatsa all. All Antioquíopaꞌ añ asocharethtet ñeñth ameꞌñetsa “Cristonaꞌtarneshaꞌ.” Ñanom arr Antioquío asocharethtet ateth.

²⁷ Allempoña Jerusaléñopaꞌ alloꞌtsen poesheñaꞌtets ñeñth aꞌmhteneꞌ Yompor poꞌñoñ. Parrochpaꞌ onaxhaꞌtet. Xhapoet Antioquíopaꞌ

²⁸ añña ñeñth paꞌsoꞌcheñ Agabopaꞌ oꞌ thomospaꞌ serrpareꞌtatosanet, ateth otanet: —Orrtach moexheñets esempo errapharen patso. Añpaꞌ allowa ñeñth ateth ot Agabo. Añ eñotateꞌ Yompor Poekamkëñ, amaꞌt allempopaꞌ ama orrtenaꞌ moexheñets. Allempo amhchaꞌtarethta Claudiopaꞌ allempoꞌña orrta moexheñets.

²⁹ Ñeñthoꞌmarña allowen ñeñth ameꞌñetsa Antioquíopaꞌ oꞌ aꞌpoktachet oꞌch moeñet ñeñthchaꞌ yenpoeꞌ paꞌmoꞌnasheñneshaꞌ ñeñth yexhetsa Judeo.

³⁰ Allpon echyenetpaꞌ allpon apaꞌyeset. Ateth aꞌpoktachetpaꞌ atethxhoꞌ pet. Oꞌ apoeñet Bernabé ñamha Saulo, ñetñapaꞌ anmet Jerusaléño, allñapaꞌ aposet ñeñth pomporneshaꞌ pen ñeñth ameꞌñetsa Jerusaléño.