San Judas 1 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Attho Judaspaꞌ kellkan carta allowenakop ñeñth poeyochreshaꞌ pen Yompor

¹ Masheñneshachaꞌ ñamha noxhaneshachaꞌ, allowenes ñeñthes oꞌ waꞌñerres Yompor Parets atthoch poeyochreshaꞌ perres, ñeñthes oꞌ saꞌkowentatarethterra Partsokop, ñeñthes eꞌñe kowampen Yompor eꞌñe separrokmateñoth Jesucristo. Ñeñthoꞌmarña napaꞌ nekellkënnas añ carta na Judason ñeñthen thorretsa Jesucristokop.

² Eꞌñe newomhchaꞌteñothes sa napaꞌ oꞌch notas: Yomporepaꞌchña semoerenaya, ñamha nankëpaꞌchña morrentensa, nankëpaꞌchña koshatenes seyoxhro.

Ñeñth ashkañtetsa amach Yomporeyeꞌ poꞌñoñ serrpareꞌteno

³ Theꞌpaꞌ oꞌch notas, masheñneshachaꞌ ñamha noxhaneshachaꞌ napaꞌ atarr nemneñ oꞌtheꞌ nekellkonas atthoch neñotatas ñeñth eꞌñe errothenothchaꞌña aꞌkeshphatarethey eꞌñe alloweney ñeñthey ameꞌñenaya Jesucristo. Tharraña theꞌpaꞌ añ nenten ñeñth atarr palltetsa oꞌch notas, nankëpaꞌch semaꞌyoxhra añ ñeñth attho yameꞌñena atthochña eꞌñech kowen semoñena, atthoch amach semnateñe amaꞌt poesheñarra oꞌch aꞌpoꞌpoñetonaset ñeñth ateth yameꞌñeña Jesucristo.

⁴ Añekopña notenes tharroꞌmar xhokma orretyena acheñeneshaꞌ ñeñth ashkañtetsa ñeñth ama Yomporeyeꞌ poꞌñoñ kothapeꞌcheneto. Ñet poeshkëñothespaꞌ ñatoꞌrraña xhatheꞌ aꞌpoꞌpoñeterrnayet ñeñth attho poꞌñoxh yameꞌñerrñaña Yompor poꞌñoñ. Ñetpaꞌ atethchaꞌ otyeset, eꞌñekaꞌye pokteꞌ oꞌch sosyaꞌtsañexhna yeyxhen tharroꞌmar Yomporpaꞌ xhokma peretneney, ñapaꞌ atarr amoeraña ñeñthoꞌmar amach koñchaterrye. Ñetpaꞌ poꞌñoxh ama pamoꞌmtayeyeꞌ peñeto Yompor ñeñth ñapoeth Yamoꞌmteꞌ yepen ya. Ñamha ñetpaꞌ ama poꞌpartseshareyeꞌ peñetoña Jesucristo. Tharraña sapaꞌ señochepaꞌch eꞌñe awathotheñ anwarethta ñeñth ateth petsapaꞌ ñeñthña oꞌpatatenetña koñcheñets.

⁵ Ñewa, sapaꞌ poꞌñoxh eꞌñe señoteñ ñeñth ateth pha awath, tharraña theꞌpaꞌ oꞌch alla neyerpaterrsa attho Yomporpaꞌ xha koñchatwerran ñeñth alla kexhpoerreꞌ ñeñth eꞌñe ateth oteney Yompor. Ñeñthpaꞌ ateth pha allempo aꞌkeshphaterran israelneshaꞌ allempo erranetaꞌ Egiptoth all atarr amoeroxhtatarethteteꞌth. Tharraña amaꞌt aꞌkeshphaterranetañ allempo, elloña tsapathonethpaꞌ oꞌ alla aꞌkllatwerran allowen ñeñth ama kowenayeꞌ ameꞌñayeꞌthe. Eꞌñech atthekma perran allowen amaꞌt theꞌ ñeñth ama ameꞌñetso.

⁶ Theꞌpaꞌ oꞌch alla neyerpaterrserr poꞌpoñ ñeñth ateth pha ñamha patantaꞌtets mellañotheñneshaꞌ. Ñetpaꞌ anarethetañ ñetchaꞌ sherbenet Yompor, tharraña amaꞌt ateth anarethetañpaꞌ ñetña ellopaꞌ oꞌ aꞌypoꞌñaꞌnmoet poeꞌntañ eꞌñe pathpareꞌteñothet Yompor. Ñeñthoꞌmarña Yomporpaꞌ alla wankanet cadeno ñeñth ama apyapawoyaye amaꞌt errponaña alla waporeꞌtanet nanak chekmeto. Ñetñapaꞌ alletach tharrempowa esempoch mellapoterra allempochña moeñerranet ñamha koñchaꞌpoetso.

⁷ Theꞌpaꞌ oꞌch alla neyerpaterrserr ñamha ñeñth ateth peꞌth sodomoꞌmarneshaꞌ ñamha gomorroꞌmarneshaꞌ ñamha allowen ñeñth allampañoꞌmarneshaꞌ all. Ñetpaꞌ eꞌñe ateth peteꞌth ateth pha patantarr mellañotheñneshaꞌ attho nanak yexhkatenet ñeñth nanak sosey enten Yompor. Kañoreshaꞌtyenet nanak amaꞌt yakmapaꞌ agapannena eꞌñe parro yakmakma, ñeñthpaꞌ amakaꞌye attheyeꞌ anaretheye. Ñeñthoꞌmarña Yompor allpaꞌ atthoña koñchatanet oꞌ ethomamphsanet atthoch eꞌñe aꞌpoyatatwerranet tsoꞌ ñeñth ama emayaꞌpawoyaye. Ñeñthoꞌmarña yeñoteñ alloweney eñall koñcheñets ñeñth ama awañaño.

⁸ Eꞌñe atthekma phatseꞌtyena ñamha ashkañneshaꞌ ñeñth orretyetsa theꞌ. Ñamha ñetpaꞌ poꞌpoñontha es kothapeꞌchyenet ñeñth ama poꞌñoxh attheyaye. Atthoña ñetpaꞌ aꞌsosyatenet poꞌchets eꞌñe ñañeñeta. Ñeñthoꞌmarña amaꞌt Yepartsesharpaꞌ ama amhchaꞌnaꞌtpawoyeꞌ enteñeto, atthoña amaꞌt ñamha allowen ñeñth awamenkathetyetsapaꞌxhoꞌña eꞌñe achmhareꞌtweñet.

⁹ Tharraña ama achmhareꞌtpawoyaye amaꞌt Yepartseshar amaꞌt ñamha allowen ñeñth awamenkathetyetsa. Ñewa, amaꞌt Miguel ñeñth paꞌmhchaꞌtarether pen mellañotheñnaneshaꞌ ñapaꞌ ama achmhareꞌtapanoña oneñeth. Allempo rroma Moisés oneñethñapaꞌ wapa, ñapaꞌ añ atarr moeneñ oꞌch enanaꞌ arromñath, tharraña Miguelñapaꞌ ama moenache oꞌch aner. Amaꞌt moeneꞌ es otnareꞌtannaꞌtetañpaꞌ Miguelñapaꞌ amakaꞌye achmhareꞌtanoña oneñeth. Ñeñthpaꞌ attha och: “Ñewa, ñeñth ateth pepena theꞌ Yomporpaꞌ ñach photteñeꞌcheꞌ.”

¹⁰ Tharraña ñeñthña ashkañneshaꞌ ñeñth orretyetsa theꞌpaꞌ ñetñapaꞌ xhokma achmhareꞌteñet amaꞌt ñeñth atarr awamenkatheshaꞌ tharroꞌmar ñetpaꞌ ama eñoteññañeto poꞌwamenk. Añach eꞌñe patherr eñotenet ñeñth eꞌñe patsoꞌmarekpa. Ñetpaꞌ eꞌñe ateth penet ñerraꞌmrratheꞌ berr ñeñth añach phaꞌyen ñeñth ateth moenatyenanet poꞌchets, ama es kothapeꞌchpenayeña oꞌch eñotet erraꞌtsentheꞌña ñeñth poꞌñoxh kowentetsa. Ñeñthoꞌmarña ñetpaꞌ aꞌchenkataterretchaꞌ eꞌñe ñañeñeta.

¹¹ Atarr yoroxhenoꞌtsaꞌyenet tharroꞌmar ñetpaꞌ ama morrenteñeto pamoꞌts, eꞌñe ateth penet ñerraꞌmrratheꞌ ateth peꞌth Caín allempo moetsan paꞌmoꞌnasheñ Abel. Atthoch aparethtet kelle, ñetpaꞌ añach kothapeꞌchenet oꞌch shekareꞌteñet acheñeneshaꞌ ateth peꞌth Balaam. Ñeñthoꞌmarña ñetpaꞌ chenkërretchaꞌ tharroꞌmar eꞌñe ateth penet ñeñth ateth peꞌth Coré ñeñth amtsarethtatsa awath eꞌñe ña pathpareꞌteñoth.

¹² Ñeñthña ashkañneshaꞌpaꞌ sapaꞌ ñeñthña sepenknaꞌntateneꞌ allempo sapxhena oꞌch serratallmeꞌchannena ñeñthes ameꞌñenaya Yompor. Sapaꞌ serratallmeꞌchannena eꞌñe semorrentannaꞌteñoth, tharraña ñetpaꞌ atthach nanak rratseꞌtyenet amach ayetñathteneto amach kowaꞌpeñetoña ñamha poꞌpsheñeñ ñeñth cheporretsa ñeñth moenets oꞌch rraꞌ ñamha. Ñetpaꞌ eꞌñe ateth penetañ ñerraꞌmrratheꞌ ñeñth kowampenayeñ carnero ñeñthchaꞌ rratenayeñ tharraña amachña carneroyeꞌña rrateno, ñeñthapaꞌ ñañeñetach atarr rretset. Ñetpaꞌ ama es sherbeneto eꞌñe attha penet ateth ñerraꞌmrratheꞌ os ñeñth ama watetso atthach matateñ mhorr. Ñamha eꞌñe atthet ñerraꞌmrratheꞌ narmetsoch ñeñth ama ameꞌtño, amaꞌtchaꞌ xhen poemeꞌteñporopaꞌ amach meꞌteno. Ñamha ñeñthña narmetsocherpaꞌ eꞌñech ateth pena ñerraꞌmrratheꞌ rromoech oꞌch yaꞌmare ora poerxhowenpaꞌ oꞌch eꞌñe poetsowa oꞌch wañ. Ñeñthña amaꞌt mameshapaꞌ amach es sherberrye.

¹³ Amach poeñmañeshotheyeꞌ es orrtatyeneto eꞌñech pommoꞌcheñotheta es orrtatyenet. Eꞌñe ateth penet ñerraꞌmrratheꞌ oñ apellcheꞌ poemoꞌyer. Amaꞌt mameshapaꞌ amach moechecheno. Ñeñthña emoꞌypaꞌ xhach waporeꞌtenan sosyareꞌ tophñaꞌso all paꞌsoꞌten. Ñeñthpaꞌ eꞌñe ateth penaña ashkañneshaꞌ amach pasayaya orrtatenetoña apenkoxhen. Ñetpaꞌ eꞌñe atthet ñerraꞌmrratheꞌ shepramhoꞌ ñeñth yenten oꞌch shoraꞌnom oꞌch awoꞌ patso ñeñthpaꞌ ama es sherbeno. Yomporpaꞌ oꞌpatenanet oꞌch moeñanet koñchaꞌpoetso all atarr nanak chekmeteꞌ, allothña ñetpaꞌ amach xhaꞌnerreto amaꞌt errponaña.

¹⁴ Ñamha theꞌpaꞌ oꞌch notas, awathpaꞌ eñall poesheñarr yakma añ paꞌsoꞌcheñ Enoc ñeñth Adán poꞌmhreneñ poꞌkanxhrroñowa. Ñañapaꞌ ñeñth aꞌmhtayeꞌth Yompor poꞌñoñ. Ñapaꞌ eñotatan acheñeneshaꞌ atethchaꞌ apharethterra amaꞌt ñeñth ashkañneshaꞌ. Ñokpoetaꞌnaña ateth oteꞌth: “Werrach Partseshaꞌ eꞌñe poeyochreshaxhnowen ñeñth nanak poꞌnnakaren patsopoeñ.

¹⁵ Werrach allochñapaꞌ oꞌch entwerran allowen acheñeneshaꞌ ñatoꞌ kowenettheꞌ ñatoꞌ amatheꞌ kowenayayeto. Allowen ñeñthchaꞌ ama kowenayeꞌ entwerro Yompor, ñetñapaꞌ amñarethterretchaꞌ koñcheñtso. Atthochña tsaꞌtatwerrana allowen ochñatheneshaꞌ ora allpon phatseꞌtyeseteꞌth ñeñth ama pokteyeꞌ enteno Yompor Parets amaꞌt mamesha. Ñamha atethchaꞌ tsaꞌtatwerranet ora allpon attho sasareꞌcheteꞌth Yompor eꞌñe pachmhareꞌteñothet.” Arrpaꞌ allowa wañ ñeñth ateth eñoseꞌth Enoc awath.

¹⁶ Ñamha ñeñth ashkañneshaꞌpaꞌ atarrchaꞌ thanmareꞌtyeñet, xhach poꞌpoñ entwenet. Añach kothapeꞌchyenet ñeñth moenaꞌyenet eꞌñe ñokpoeta. Xhoꞌnatheꞌ ñetpaꞌ atarrchaꞌ ommoñathet. Ñamha ñerraꞌm esempo eꞌñe kowen eñosyenet acheñeneshakop, ñetpaꞌ añekpach eꞌñe kowen eñosyenet atthoch es apoenanet acheñeneshaꞌ.

Attho paꞌnamen kothapeꞌchatenan allowen ñeñth ameꞌñetsa

¹⁷ Tharraña sa, masheñneshachaꞌ ñamha noxhaneshachaꞌ, amachña ñeñtha sameꞌñatsto. Sapaꞌ añchaꞌña seyerpa ñeñth ateth otyeseꞌth Yepartseshar Jesucristo poellsensarneshaꞌ. Ñetpaꞌ awathotheñ ateth oteteꞌth ñeñthchaꞌ orretyerrtsa tsapathoneth.

¹⁸ Ñeñthpaꞌ ateth otyeteꞌth: “Allempoch mellapoterrmochapaꞌ orrterrach ñeñthchaꞌ achmhareꞌterreꞌ Parets. Añach yexhenet ñeñth moenatseꞌtyenet ñañeñeta, ñeñthpaꞌ amaꞌt mameshapaꞌ ama kowenayeꞌ enteñe Parets.”

¹⁹ Ñeñth ashkañneshaꞌpaꞌ xhokmach moeneñet oꞌch ellopaꞌtetstateret ñeñth ameꞌñenaya Yompor. Ñeñthara ashkañneshaꞌpaꞌ añach kothapeꞌchenet ñeñth ateth moenatenanet ñet poꞌchets; ñetpaꞌ ama chorrenaneto Parets Poekamkëñ.

²⁰ Tharraña sa masheñneshachaꞌ ñamha noxhaneshachaꞌ eꞌñe nemoereñothespaꞌ oꞌch notas, amach seyxhatstaneto ñeñth ateth penet ñet. Sapaꞌ eꞌñechña sameꞌñeñoth Yompor womenkëpaꞌch sephaꞌ seyoxher tharroꞌmar ñeñth sameꞌñena sapaꞌ eꞌñekaꞌye Partseshothekma wena. Xhokmach semaꞌyochena. Sapaꞌ amach sothayeꞌ seꞌñoreno allempo semaꞌyochena. Añchaꞌña seꞌñorateneꞌ Parets Poekamkëñ ñeñth atarr awamenkatheshaꞌ.

²¹ Atethchaꞌ sephaña sa allochñapaꞌ xhokmach señoteñ attho atarr morrentenya Yompor, amach sepoerratsterro. Soksheñeshaꞌpaꞌ xhokmach seyemteña Yepartseshar Jesucristo; ña eꞌñe poemoereñothey esempowañen aꞌkeshphaterreychaꞌ, atthochña yañapaꞌ korretsayach yoksheñeshokmañen errponañowen.

²² Ñewa, oꞌch notas ñamha atethchaꞌ sepeꞌ poꞌpotantañexhno. Patantaꞌtets acheñpaꞌ atarr echarr enteñet oꞌch ameꞌñerrñañet Yompor poꞌñoñ. Ñetpaꞌ xhoch sokthapeꞌchaterranet eꞌñe kowen atthoch ameꞌñerret ñeñth eꞌñe poꞌñoxh Yompor poꞌñoñ,

²³ atarr yoroxhenoꞌtsenet poꞌchñarothet. Ñeñthoꞌmarña sapaꞌ oꞌch saꞌkeshphataterranet, ñeñthpaꞌ eꞌñech ateth sepenanet ñerraꞌmrratheꞌ cheshatholl yaꞌkeshphaten oꞌch yechter all poyapen pokoll. Poꞌpotantañexhno ñeñth yexheneꞌ atarr sosyaꞌtsañexhno, ñetpaꞌ xhochña semoerenanet tharraña amaꞌtchaꞌ semoerenanetañpaꞌ amach sokshapretatstanetoña ñeñth ateth yexhenet sosyaꞌtsañ. Sapaꞌ xhochña setsenaꞌtapretanet ñeñth ateth phaꞌyenet sosey, theꞌt saꞌnaña aꞌshoratatenet.

Eꞌñe yameꞌñeñoth Yepartseshar Jesucristo ayeꞌchoxhtaterrapoꞌch Yompor

^24-25 Theꞌña Yompor ñeñth eꞌñe ñapoeth partsotets, ñeñth allowen es eñotyets, ñamha ñeñth Yaꞌkeshphatañer yepen, ñañapaꞌ atarr awamenkatheshaꞌ, ñachña awamenkath sepeneꞌ allochñapaꞌ amach alla seshoraꞌnerro. Atthochña sapaꞌ xhapatwerreschaꞌ eꞌñe ñesho all atarr kowentena ña. Eꞌñech soksheñeshokmañen sexhaxherr, amach eñalle amaꞌt koñeꞌtha ñeñthchaꞌ entapreterres ñeñth ama pokteyeꞌ enteno ña. Theꞌpaꞌ eꞌñe yameꞌñeñoth Yepartseshar Jesucristo ayeꞌchoxhtaterrapoꞌch Yompor atthoch eꞌñe kowen yekowentaterrñañ. Xhokmoepaꞌch eꞌñe ñapoeth Yepartseshar yepeñ, xhokmoepaꞌch amhchaꞌtarethtena eꞌñe thayotheñ errponañowen ñeñth ateth pha awathotheñ. Theꞌpaꞌ ñeñthach notas, ñeñthpaꞌ atthetepaꞌch Nompore. Allowa. Judas