San Juan 9 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Allempo Jesúspaꞌ aꞌkrraterran poesheñarr aporoꞌyeth ñeñth attha eñalletña

¹ All oñen Jesúspaꞌ allña entnoman poesheñarr yakma aporoꞌyeth. Ñeñthña aporoꞌyethpaꞌ attha eñalletña.

² Poeyochreshaꞌñapaꞌ allentha aꞌphthoꞌchet: —Maestro, ¿eseshaꞌtña ochñaꞌtats ñatoꞌ ña amapaꞌ pamoꞌmteꞌtheꞌ ñeñthoꞌmar eñalletaña ateth aporoꞌyeth?

³ Jesúsñapaꞌ ateth otanet: —Amakaꞌye poꞌchñarotheyaye amaꞌt ñamha pamoꞌmteꞌ; ñeñthpaꞌ añekopña allochñapaꞌ oꞌch norrtatoñ Yompor poꞌpartsoña ñesho.

⁴ Ñeñth poktetsa oꞌch norrtatoñ poꞌpartsoña ñeñth nellsenseꞌ thayepaꞌtñapaꞌ poetarmeñ. Ñerraꞌm oꞌch chekmetenpaꞌ amach eshkayeꞌ yetarwaso.

⁵ Thayepaꞌtña añe patsroꞌtsenmeñenpaꞌ na ñeñthen aꞌpoetarsampeneꞌ acheñeneshaꞌ pokthaphña añe patsro.

⁶ Allempoña ateth otwapaꞌ allentha aꞌxhonan paꞌsnom patso oꞌ aꞌxhaxhaꞌtach. Ñeñthña xhaxhaꞌteꞌpaꞌ alloña aꞌyaklleꞌchanña aporoꞌyeth.

⁷ Oꞌña aꞌyaklleꞌchwepaꞌ ateth och: —Theꞌpaꞌ orraph oño all apkoꞌsathtataretho ñeñthpaꞌ añ paꞌsoꞌcheñ Siloés. Allchaꞌ peꞌpaklleꞌcha. (Ñewa, añkaꞌye otenetña Siloés ñeñth oñ awaꞌñareth.) Ñañapaꞌ allentha awoꞌ oño allchaꞌ eꞌpaklleꞌchenaꞌ. Eꞌpaklleꞌchwatsapaꞌ eꞌñe errtsapaꞌ allenthepaꞌtchaꞌ kowenterraña paꞌklleꞌ eꞌñe kowen enterra.

⁸ Pamoꞌtseshaꞌña ñamha poꞌpoñexhno acheñ ñeñth eꞌñe chemeꞌteneꞌ all allempo enamaren kelle, ñetñapaꞌ ateth otyeset: —Añpaꞌ ¿amaꞌt añeyayeña ñeñth anorrtseꞌth ñeñth enamareꞌtatseꞌth kelle?

⁹ Patantarr acheñeneshaꞌpaꞌ ateth otyenet: —Ñeñthkaꞌye. Poꞌpotantañexhnopaꞌ ateth otyenet: —Amakaꞌye ñeñtheyaye, atthakaꞌ ñeñthemaꞌthtena. Aporoꞌyethñapaꞌ ateth otanet: —Napaꞌ ñeñthenkaꞌye.

¹⁰ Ñetñapaꞌ ateth otyeset: —¿Errothenotheꞌtña oꞌ pekwerr?

¹¹ Ñañapaꞌ ateth oterraneterr: —Añ yakmar ñeñth otenet Jesús ñakaꞌye aꞌxhaxhaꞌteꞌña paꞌsnomo patspaꞌ allokaꞌyeña aꞌyaklleꞌchen. Allempoñapaꞌ oten nepaklleꞌchenepaꞌtoꞌ oño Siloéso. Nañapaꞌ allña neꞌpaklleꞌchenaꞌ. Eꞌñe eꞌpaklleꞌchwatsanpaꞌ allenthepaꞌtchaꞌ nekwerr.

¹² Ñetñapaꞌ alla otereterr: —¿Erroꞌtsenaꞌtña ñeñth yakmar? Ñañapaꞌ ot: —Taꞌm, amakaꞌye neñoteñe.

Attho fariseoneshaꞌpaꞌ aꞌphthoꞌtareꞌtenan aporoꞌyeth ñeñth aꞌkrraterr Jesús

¹³ Allempoña ñeñth poroꞌyeꞌchatseꞌthpaꞌ anmet alloꞌtsen fariseoneshaꞌ.

¹⁴ Ñewa, allempo aꞌxhaxhaꞌtan Jesús paꞌsnomo pats allo aꞌyaklleꞌchan aporoꞌyeth ñeñth kowaterreꞌ allempopaꞌ añ yethro allempo amesenet.

¹⁵ Fariseoneshaꞌñapaꞌ ello alla otereterr: —¿Errothenotheꞌtña oꞌ kowaterrpet? Ñañapaꞌ ateth otosanet: —Añokaꞌye aꞌyaklleꞌcherrnet senmatso ñeñth aꞌxhaxhaꞌtareth epoet pats oꞌña neꞌpaklleꞌcherrapaꞌ allentha nekwerr.

¹⁶ Patantarrña fariseoneshaꞌpaꞌ ateth otyeset: —Ñeñth yakmarpaꞌ amatheꞌkaꞌye Partseshotheyeꞌ wapo ñeñthoꞌmar ama esoyeꞌ entenanoña ñeñth anareth patherr yeth allempokma yamesen. Poꞌpotantaññapaꞌ ateth otyeset: —Taꞌ, elloña ñerraꞌm ochñath acheñ amatheꞌ errothenoth orrtatonayeña partsoteñets. Atthoña eꞌñe all ellopaꞌtetstatet pokthaphña ñokop.

¹⁷ Ellopaꞌ alla otereterr ñeñth poroꞌyeꞌchatseꞌth: —¿Errothenaꞌt photenña pha añekop ñeñth oꞌ kowaterreph? Ñañapaꞌ ateth ot: —Ñapaꞌ ñeñthkaꞌye aꞌmhteneꞌ Yompor poꞌñoñ.

¹⁸ Judioneshaꞌñapaꞌ ateth otyeset: —Ñapaꞌ amakaꞌye poꞌñoxh aporoꞌyetheyaye, eꞌñekaꞌye kowen entena. Allempoñapaꞌ xhoreꞌtoñet pamoꞌmteꞌ ñeñth oꞌ kowerr.

¹⁹ Ñetñapaꞌ ateth otapoñet pamoꞌmteꞌ: —Añpaꞌ ¿añeꞌtña sakñeꞌther ñeñth sotyeseꞌth awoꞌ eñalletaña sakñeꞌther aporoꞌyeth? Theꞌñapaꞌ ¿errothenotheꞌtña oꞌ kowerr?

²⁰ Pamoꞌmteꞌñapaꞌ ateth otosanet: —Poꞌñoxh añkaꞌyeña yakñeꞌther ñeñth attha eñalletatsa aporoꞌyeth.

²¹ Attho oꞌ kowerrpaꞌ yapaꞌ amakaꞌyeña yeñoteñe. Taꞌ, eseshaꞌtheꞌ oꞌ kowater, yapaꞌ ama yeñoteñe. Saꞌphthoꞌch eꞌñe ña, ñapaꞌ oꞌkaꞌye attha poꞌnapen, ñothachkaꞌye eñora. Judioneshaꞌña allempopaꞌ ateth otyeset: —Poꞌñoxhepaꞌtkaꞌye aporoꞌyeth oꞌ kowerr.

²² Ñewa, pamoꞌmteꞌ ateth otanet tharroꞌmar ñetpaꞌ mechaꞌteñet judioneshaꞌ. Ñewa, judioneshaꞌ ñetpaꞌ ateth aꞌpoktatenet ñerraꞌm eseshaꞌ otets: Jesúspaꞌ ñeñthkaꞌye Cristotets, ñeñthña ateth otetspaꞌ oꞌch moeñoꞌchet ñet poꞌprawoth.

²³ Ñeñthoꞌmarña pamoꞌmteꞌpaꞌ ateth otanet: —Ñapaꞌ oꞌkaꞌye attha poꞌnapen, ñothachkaꞌye eñora.

²⁴ Poepocheñopaꞌ alla xhoreꞌtereterr ñeñth poroꞌyeꞌchatseꞌth ateth otapet: —Theꞌ phapaꞌ oꞌch pekowentaterrñañ Yompor. Yapaꞌ yeñoteñ añ yakmapaꞌ atarrkaꞌye ochñath.

²⁵ Ñañapaꞌ ateth oterraneterr: —Taꞌ, ñatoꞌ ochñatheñtheꞌ napaꞌ ama neñoteñe. Napaꞌ añakaꞌye neñoten napaꞌ aporoꞌyethen theꞌñapaꞌ oꞌ kowen nekwerr.

²⁶ Ñetñapaꞌ alla otereterr: —¿Errotheꞌtña perreph? ¿Errothenotheꞌtña oꞌ kowaterreph?

²⁷ Ñañapaꞌ oterraneterr: —Amaꞌtña napaꞌ oꞌkaꞌye notwas sañapaꞌ areꞌtña señoteñe. ¿Esoꞌmareꞌtña semneñ oꞌch alla noterrserr? Ñatoꞌ ¿añekoptheꞌ semneñ oꞌch yochreshaꞌtasa samha?

²⁸ Ñetña allentha otnareꞌchetpaꞌ ateth otereterr: —Phapaꞌ poeyochreshaꞌ peneph ñeñth yakmar, yañapaꞌ Moiséskaꞌye poeyochreshay.

²⁹ Yapaꞌ yeñoteñ Paretspaꞌ eñoranaꞌtana Moisés, tharraña ñeñth yakmarpaꞌ ama yeñoteñe erroththeꞌña wapa.

³⁰ Ñeñth poroꞌyeꞌchatseꞌthpaꞌ ateth oterraneterr: —Errothenothwakaꞌye ama señoteñetheꞌña erroththeꞌ wapaña amaꞌt napaꞌ oꞌkaꞌye eꞌñe kowen kowaterren.

³¹ Yapaꞌ yeñoteñ ñeñth ochñath acheñpaꞌ amakaꞌye eꞌmhñoteñe Yompor, tharraña ñerraꞌm ya yemhchaꞌnaꞌteñoth Yompor ateth yepena ñeñth moenen ñapaꞌ xhokmach eꞌmhñoteney.

³² Ya amaꞌt awathapaꞌ ama yeꞌmareña eseshaꞌpaꞌ oꞌ kowaterranña ñeñth attha eñalletña aporoꞌyeth.

³³ Ñerraꞌm ñapaꞌ ama Yomporeshoth wapañe amatheꞌ errothenoth kowaterrnoñe.

³⁴ Ñetñapaꞌ alla otereterr: —Phapaꞌ peꞌñalleta eꞌñe ochñartsoth. Theꞌñapaꞌ xha pemneñ oꞌch peyxhatey ya. Allentha moeñoꞌchet eꞌñe ñet poꞌprawoth.

Ñeñth ama ameꞌñetso Jesúsñapaꞌ ateth entenanet ñerraꞌm aporoꞌyeth

³⁵ Jesúsñapaꞌ oꞌ eꞌmareꞌch ñeñth aporoꞌyethtatseꞌthpaꞌ oꞌ moeñoꞌchet. Allempoña enter Jesúspaꞌ ateth oter: —¿Phameꞌñeñaꞌt ñeñth Yompor Poechemer?

³⁶ Ñañapaꞌ ateth och: —Ayochreshathe, ¿eseshaꞌtña ñeñth Yompor Poechemer ñeñthchaꞌ nameꞌña?

³⁷ Jesúsñapaꞌ ateth otererr: —Ñeñth pekwen, ñeñthen ateth photeneꞌ, nakaꞌye.

³⁸ Ñañapaꞌ allentha konkorpa ñeshopaꞌ ateth otererr: —Nameꞌñerrphach, Partseshachaꞌ.

³⁹ Jesúsñapaꞌ alla oterrerr: —Napaꞌ añekopña nowapa arr patsro allochñapaꞌ atthoch akrarethterra acheñeneshaꞌ errothenchaꞌ nentyesanet, allochñapaꞌ ñeñth ama entetsopaꞌ oꞌch eꞌñe kowen enterra. Ñeñthña entetsañpaꞌ oꞌch alla aporoꞌyethterra. Ñeñthpaꞌ añ tomaꞌntata, ñeñth atarr ochñath entetsa ñerraꞌm ameꞌñerrana Jesús, ñetpaꞌ xherranetchaꞌ Yompor poꞌkowenña poeyoxhreto. Ñeñthña ama ochñatheyeꞌ entetsañe ñeñthoꞌmarña ñetpaꞌ amach ameꞌñereto Jesús, ñetñapaꞌ amach xherraneto Yompor poꞌkowenña poeyoxhreto.

⁴⁰ Patantaꞌtetsña fariseoneshaꞌ ñeñth allameꞌttsoꞌtsaꞌyenet ñesho, ñetñapaꞌ eꞌmoeñet ñeñth ateth oten Jesús. Ñetpaꞌ ateth ochet: —Taꞌm yapaꞌ ¿amatheꞌ aporoꞌyetheyeꞌ pentenye?

⁴¹ Jesúsñapaꞌ ateth otanet: —Ñerraꞌm poꞌñoxh sa aporoꞌyeth sentenañ amatheꞌ eñallmeñeña soꞌchñar. Tharraña sapaꞌ ateth soten, sapaꞌ añoꞌ aporoꞌyetheyayso, eꞌñoꞌ kowen sekwen, ñeñthoꞌmarña theꞌpaꞌ oꞌch notas, soꞌchñarpaꞌ xhokma eñall.