San Juan 3 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Allempo Nicodemopaꞌ wapa Jesúsesho

¹ Allempopaꞌ eñall poesheñarr yakma ñeñth fariseo ñeñth sochetsa Nicodemo. Ñeñthñapaꞌ poesheñarr ñeñth amhchaꞌtarethtetsa judioneshakop.

² Ñañapaꞌ wapa Jesúsesho tsapopaꞌ ateth otos: —Maestrochaꞌ yeñoteneph phapaꞌ añ pellsenseneꞌ Yompor atthoch peyxhatosey kowen tharroꞌmar yapaꞌ yeñoteñ añach orrtatyeneꞌ partsoteñets ñeñth awamenkath pen Yompor.

³ Jesúsñapaꞌ ateth otaph: —Eꞌñe poꞌñoxh notaph, eseshaꞌch ama eñalleterrtso ello ñetñapaꞌ amach errothenoth poeyochreshaꞌ perraneto Yompor.

⁴ Nicodemoñapaꞌ ateth otererr: —Amatheꞌ errothenoth yeꞌñalleterrerroña poꞌpocheñoñaꞌ oꞌkaꞌye yepoꞌnmeꞌten. Errothenothwatheꞌñakaꞌ yexherrerrña yachor paꞌtho atthothchaꞌ yeꞌñalleterrerr poꞌpocheño.

⁵ Jesúsñapaꞌ ateth otererr: —Eꞌñe poꞌñoxh noteneph, erraꞌtsenchaꞌ ama eñalleterrtso oñoth ñamha Yompor Poekamkëñoth, amatheꞌ errothenoth poeyochreshaꞌ perraneto Yompor ñeñthoꞌmarña amach eshek oꞌpatapreteretoña Yompor poꞌkowenña ñeñth attho ayochreshathtena ña.

⁶ Ñeñth attho eñalletena arromñatheneshaꞌpaꞌ ñeñthpaꞌ arromñatha. Tharraña ñeñthchaꞌ eñalleterrtsa Parets Poekamkëñoth, ñeñthpaꞌ ñeñthña kamoekñetsotets ñeñthñapaꞌ ama arromñatheshayaye.

⁷ Ñeñth ateth noteneph, “allowenespaꞌ añ sepalltena oꞌch seꞌñalleterrerr ello”, phapaꞌ amach xha peꞌcharrtatsto peyoxhro, amach xha photatsto añoꞌtheꞌ errothenoth peꞌñalleterrerroña ello poꞌpocheño.

⁸ Ñeñthpaꞌ eꞌñe ateth pena ñerraꞌmrratheꞌ mhorr. Mhorrpaꞌ erra moeneꞌpaꞌ allchaꞌ mhorraren. Peꞌmoentheꞌ ateth maꞌmoreten, ama peñoteñe erroththeꞌña wena ñamha erratheꞌña sen. Atethchaꞌ perra ñamha allowen erraꞌtsenchaꞌ eñalleterrtsa Yompor Poekamkëñoth.

⁹ Nicodemoñapaꞌ alla aꞌphthoꞌtererr: —Ñeñthpaꞌ ¿errothenaꞌtña añ?

¹⁰ Jesúsñapaꞌ ateth otererr: —Phapaꞌ amaꞌt añepeñ israelneshaꞌ poꞌmaestror, amaꞌt peñotenoña añ.

¹¹ Eꞌñe poꞌñoxh noteneph: Alloweney ya ñeñth yeñotenpaꞌ ñeñthchaꞌña yeserrpareꞌten ñamha ñeñth yentyenpaꞌ ñeñthchaꞌña yaꞌpothen tharraña sapaꞌ ama xhennasoña seyoxhro añ ñeñth yaꞌpothen.

¹² Ñerraꞌm aña notenes ñeñth ateth yeyxhena añe patsro, saña ñerraꞌm ama sameꞌñennopaꞌ errothenothwatheꞌñakaꞌye notasña ñamha entoꞌmar ñeñth Yomporekop.

¹³ ‘Ama eñalle amaꞌt poesheñarra ñeñthchaꞌ aꞌtapoets ento ñamha ñeñthchaꞌ sowerrtsa ñeñthara entoth. Napthaña na Ñeñthen Acheñetosets ñeñthen sowatsa entoth, naptha nentar Nompor poeꞌntaño tharroꞌmar napaꞌ ñeñth naꞌnetser nepen.

¹⁴ Ñewa, awath Moiséspaꞌ yexhkatan ñeñth atmaꞌntatareth shecheph all amayo, ñeñthñapaꞌ wankëꞌ tsachopaꞌ oꞌ echantampes enoneth. Attho Moisés echantamphsan shecheph all amayopaꞌ, napaꞌxhoꞌña ñeñth poktetsa nokop atethchaꞌ perrnet namha, korsochothchaꞌ echantamphsarethen.

¹⁵ Allochñapaꞌ allowen amaꞌt erraꞌtsena ñeñthchaꞌ nameꞌñerraya na, ñetñapaꞌ amach chenkërreto, eꞌñech korretseta poksheñeshokmañen eꞌñe thayotheñ errponañowen.

Attho atarr morrentenya Yompor alloweney acheñeneshay

¹⁶ ‘Attho atarr morrentenya Yompor alloweney acheñeneshay arr patsro ñeñthoꞌmarña apoey Poechemer ñeñth poꞌpathrror pen, allochñapaꞌ allowen ñerraꞌm eseshaꞌ ameꞌñerraya ña amach chenkërreto, ñetñapaꞌ korretsetach poksheñeshokmañen eꞌñe thayotheñ errponañowen.

¹⁷ Yomporpaꞌ amakaꞌye añekpayeꞌ moeñanoña Poechemer arr patsro atthoch moeñosan acheñeneshaꞌ koñcheñtso. Ñapaꞌ añekopña moeñe atthoch ñach aꞌkeshphatoseꞌña acheñeneshaꞌ arr patsro.

¹⁸ ‘Erraꞌtsenchaꞌ ameꞌñerraya ña ñetñapaꞌ amach amñarethterreto koñcheñtso. Tharraña ñeñthchaꞌ ama ameꞌñerrayo ñokpoetñapaꞌ anarethtet atthoch amñarethterret koñcheñtso tharroꞌmar ñetpaꞌ ama ameꞌñoñeto Yompor Poechemer ñeñth poꞌpathrror pen.

¹⁹ Ñañapaꞌ oꞌ wapa arr patsro atthoch yexhatosey ñeñth eꞌñe kowen enten Yompor, atthoña aꞌpoetarsamphsosnay yokthaphña. Tharraña shonteꞌ acheñeneshaꞌ ñetñapaꞌ ama moeneto oꞌch aꞌpoetarsamphsarethtet pokthaphñet. Ñetpaꞌ aña moenenet chekmeteꞌ tharroꞌmar amakaꞌye masosyayeꞌ kothapeꞌchyeneto. Ñeñthoꞌmarña ñetpaꞌ atthothchaꞌña amñarethterret koñcheñtso.

²⁰ Allowen ñeñth ama masosyayeꞌ kothapeꞌchyeneto ñetpaꞌ ama kowenayeꞌ enteñetoña Cristo ñeñth aꞌpoetarsampeneꞌ alloweney yokthaphña. Ñeñthoꞌmarña ama eneto alloꞌtsen ñeñth aꞌpoetarsamphsañtetsa thayeꞌtoꞌtheꞌ orrtatarethtet pokthaphñet ñeñth ama masosyo.

²¹ Añña ñeñth eꞌñe ateth peneꞌ ñeñth poꞌñoxh kowen enten Yompor, ñetpaꞌ eꞌñe pokteꞌ enteñet oꞌch onet alloꞌtsen ñeñth aꞌpoetarsamphsañtetsa tharroꞌmar ñetpaꞌ añ moenenet oꞌch eñotateret poꞌpotantañ ñetpaꞌ Yompor awamenkath penawet ñeñthoꞌmarña ñetpaꞌ añ orrtatyenet ñeñth kowen enten Yompor.

Allempo Juan ñeñth apatañtetsa Yomporekop, ñapaꞌ alla kowentaterranerr Jesús

²² Allempoña Jesúspaꞌ awerrerr Judeo epoet poeyochreshaꞌ. Allñapaꞌ alla allponmat epoet poeyochreshaꞌ. Allña Jesúspaꞌ apatyesan acheñeneshaꞌ Yomporekop.

²³ Ñamha allempo Juanpaꞌxhoꞌña arr apatyenan acheñeneshaꞌ all oteñet Enón eꞌñe alla allameꞌtets Salimo, tharroꞌmar allpaꞌ shonteꞌ oñexhno. Acheñeneshaꞌpaꞌxhoꞌña shonteꞌ waxhaꞌtyeset atthoch apatarethetyeset Yomporekop.

²⁴ Ñewa, allempopaꞌ ama yottampeñetaꞌ Juan.

²⁵ Allempoña Juan poeyochreshaꞌpaꞌ serrpareꞌtet epoet judioneshaꞌ. Allpaꞌ añ serrpareꞌtatannaꞌtet estheꞌ poktetsaña atthoch yaꞌkowentatarethta Partsokop, añtheꞌ ñeñth attho apatyen Juan amapaꞌ ñatoꞌ añtheꞌ attho apatyen Jesús.

²⁶ Ñeñthoꞌmarña awanmoet Juaneshopaꞌ ñetñapaꞌ ateth otoset: —Maestrochaꞌ ñeñth epaph awaña yomhtaꞌn Jordanaso, ñeñth peserrpareꞌtatosey, ñapaꞌxhoꞌña ñepaꞌtkaꞌyeña apatyets ñamha. Ñeñthoꞌmarña allowenetpaꞌ oꞌkaꞌye awanmoet ñesho.

²⁷ Juanñapaꞌ ateth otapanet: —Amaꞌt poesheñarrotheyapaꞌ ama awamenkatheyayye ñerraꞌm ama Yompor awamenkath yephaye.

²⁸ Sapaꞌ amaꞌt señoteñe ñeñth ateth notwanmas awaña, napaꞌ ama añeyayno ñeñthenchaꞌ Cristoterrets. Napaꞌ attha moeñan nanom atthoch nota.

²⁹ Jesúspaꞌ eꞌñech ateth netmaꞌntacha ateth ñerraꞌmrratheꞌ yakma ñeñth senaꞌtetsa. Ñewa, ñeñth senaꞌtetsa ñeñthñakaꞌyeña agëneꞌña koyaneshaꞌ ñeñthchaꞌ poethapor phaꞌ. Tharraña ñeñthña poeyempaꞌ ñeñth parro epoet then ñerraꞌm añ eꞌm poeyem poꞌñoñ ñeñth senaꞌtetsapaꞌ ñañapaꞌ atarrchaꞌ koshapretana poeyem. Ñeñthoꞌmarña na theꞌpaꞌ atarr nokshapreteña Jesús.

³⁰ Jesúspaꞌ eꞌñe pokteꞌ alloꞌnepaꞌñakaꞌyeña enteñet poꞌñoxhpaꞌ ñakaꞌyeña atarr sherbets. Nañapaꞌ eꞌñe pokteꞌ alloꞌnepaꞌña entennet napaꞌ ama eꞌñeyeꞌ nesherbeno. Arrpaꞌ allowa ateth ot Juan Cristokop.

Attho yeñoteñ ñeñth wetsa entoth Yomporeshoth ñeñthkaꞌyeña atarr sherbets

³¹ Ñewa, yeñoteñ ñeñth wetsa entoth Yomporeshoth eñchetepaꞌ ñapaꞌ atarrkaꞌye amhchaꞌtareth. Tharraña ñeñth patsoꞌmarneshaꞌ ñeñthpaꞌ alla eñorena patsoꞌmar. Ñeñth wetsa entoth Yomporeshoth eñchetepaꞌ ñapaꞌ atarrkaꞌye amhchaꞌtareth.

³² Tharroꞌmar allowen ñeñth entyen Pomporesho ñamha ñeñth allpon eꞌmyen all, ñapaꞌ ñeñthkaꞌyeña serrpareꞌtateney, tharraña amaꞌt poesheñarrothapaꞌ ama eseshayeꞌ xhapawetoña poeyoxhreto ñeñth ateth otenanet.

³³ Ñeñth xhapa poeyoxhro ñeñth ateth serrpareꞌtatenanet ñeñth wapatsa Yomporeshoth ñetñapaꞌ ateth otet: Yomporpaꞌ eꞌñetheꞌ poꞌñoxh ateth oten Poechemerekop.

³⁴ Tharroꞌmar ñeñth llesensaꞌ Yomporpaꞌ Yomporo poꞌñoño eñorena tharroꞌmar Yomporpaꞌ ama atparethayaya chorratenanetoña Poekamkëñ.

³⁵ Yomporpaꞌ atarrkaꞌye nanak moerenanaña Poechemer. Ñeñthoꞌmarña apwaweñ allowen allpon eñall allochñapaꞌ ñach pomnaren penawet.

³⁶ Eseshaꞌch ameꞌñenaya Yompor Poechemer ñetpaꞌ korretsetach poksheñeshokmañen thayotheñ amaꞌt errponañowen. Añña ñeñth athpareꞌteneꞌ Yompor Poechemer ñetpaꞌ amach enterreto ñeñth korreñtsor. Ñetñapaꞌ xhachkaꞌye koñchaterranet Yompor.