San Juan 15 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Jesúspaꞌ tomaꞌntata ñapaꞌ ña uvachrexhmoꞌretets

¹ Jesúsñapaꞌ alla yexhaterraneterr ñapaꞌ añ tomaꞌntata ña uvachrexhmoꞌretets. Ñeñthoꞌmarña ateth otanet: —Napaꞌ na atthen ñerraꞌmrratheꞌ ñeñthen uvachrexhmoꞌretets ñeñth eꞌñe poꞌñoxh kowen sherbets. Nomporñapaꞌ ña amreꞌteneꞌ ñeñth uvachrexhmoꞌr.

² Sa ñeñthes neyemtenaya na sapaꞌ atthes ñerraꞌmrratheꞌ uvachmoꞌr poetakër. Allowen poetakër erraꞌtsen ñeñth ama meꞌtetso, Nomporñapaꞌ xhochña pechamphsoñ poetakër. Ñamha allowen ñeñth meꞌtetspaꞌ xhochña pechtakreꞌtyeset mameshaꞌtets atthoch eꞌñe kowen eꞌshtakreꞌchet allochñapaꞌ atthoch atarrchaꞌ nanak meꞌten.

³ Ñeñth ateth neserrpareꞌtatenes ñeñth neñoñpaꞌ alloña oꞌ saꞌkowentatarethetwa ateth ñerraꞌmrratheꞌ uvach oꞌ eꞌñe eꞌshtakreꞌtwet eꞌñe kowen.

⁴ Theꞌpaꞌ atthoña separrokmatenna atthoña napaꞌxhoꞌña neparrokmatennasa. Ateth pena tsachtakër ñerraꞌm ama parrokmateno poeꞌchoroth amach meꞌto eꞌñe ñotha, sapaꞌxhoꞌña ñerraꞌm ama separrokmatenno amach errothenoth semeꞌtoña samha eꞌñe sotha.

⁵ ‘Napaꞌ na atthen ñerraꞌmrratheꞌ uvachrexhmoꞌr poeꞌchor, sapaꞌ sa poetakres. Eseshaꞌ neparrokmaterreꞌ ñamha napaꞌ eꞌñech neparrokmatenanet, ñeñthchaꞌña nanak meꞌtats. Ñerraꞌm aꞌyoꞌtsensa neshoth amatheꞌ errothenoth sorrtatyesoña ñeñth kowen enten Yompor.

⁶ Eseshaꞌch ama neparrokmaterraye awaporeꞌtarethchaꞌ ateth ñerraꞌmrratheꞌ tsachtakër ñeñth ama meꞌtetso xhochña pechaꞌtamphsetña poetakër oꞌch eꞌñe porrarrkeꞌchwa allempochña aꞌyapaxhetpaꞌ oꞌch chamoet tso allchaꞌ poywa.

⁷ ‘Ñerraꞌm separrokmaterrna ñerraꞌm xhokma sokthapeꞌchennan neñoñ eschaꞌ senamoen napaꞌ napaschaꞌ.

⁸ Attho nanak kowen semeꞌtenpaꞌ ñeñthpaꞌ allochña sekowentateññañ Nompor tharroꞌmar sapaꞌ añchaꞌ sorrtatyen ñeñth kowen enten ña. Ñamha sapaꞌ atthochña eñoterres acheñeneshaꞌ poꞌñoxh ñeñthes neyochreshas.

⁹ Attho Apapaꞌ atarr nanak moerenna na, napaꞌxhoꞌña atarr nanak nemoerensa samha. Xhokmoepaꞌch seyemtennana ñeñth attho napaꞌ xhokma nemorrentensa.

¹⁰ Ñerraꞌm sameꞌñennana neñoñ ñeñth ateth notenes eꞌñech señotenen napaꞌ atarr nemorrentensa. Ateth nepena na eꞌñe nameꞌñeññaña Nompor poꞌñoñ ñeñth ateth otenen, ñeñthoꞌmarña napaꞌ eꞌñe neñoteñ ñapaꞌ atarr morrentenna namha.

¹¹ ‘Añmapaꞌ tharroꞌmar ateth notenes allochñapaꞌ ñeñth noksheña napaꞌ koshaterreschaꞌ samha. Allochñapaꞌ sapaꞌ oꞌch eꞌñe soksherra eꞌñe poktakma.

¹² Añña ñeñth notenes: Atarrepaꞌch semorrentannena allowenes ateth nepena namha atarr nemorrentensa samha.

¹³ Añmapaꞌ ñeñthña eꞌñe poꞌñoxh morrenteñets, oꞌch yaꞌrroya yañeña oꞌch yerroma añekop ñeñth atarr yemorrentyena.

¹⁴ Ñerraꞌm eꞌñe ateth sephowen ñeñth ateth notenes sañapaꞌ ñeñthes eꞌñe neyemtena.

¹⁵ Theꞌpaꞌ oꞌwañ attheyeꞌ nentenes ñerraꞌmrratheꞌ ñeñth yaꞌtarwasañer yepen, tharroꞌmar ñeñth yaꞌtarwasañer yepen ñapaꞌ ama eñotenanoña ñeñth ateth kothapeꞌchen pamoꞌmteꞌ. Tharraña na theꞌpaꞌ eꞌñe neyem nepenes tharroꞌmar ñeñth ateth neꞌmoeññañ Apapaꞌ sapaꞌxhoꞌña oꞌ neñotaterres.

¹⁶ Sapaꞌ ama sayeꞌ naꞌkrerraye, napaꞌ naña saꞌkrerreꞌña sa. Atthoña oꞌ napoerresña llesens atthoch seta meꞌtarsats atthoch eꞌñe kowen es sorrtatyen ñeñth kowen enten Yompor. Ñeñthpaꞌ ñeñthchaꞌ seꞌmer seperr ñeñthña seꞌmerpaꞌ amach awañañathterro amaꞌt awatha. Allochñapaꞌ amaꞌt erraꞌtsena senamoeñ Apa eꞌñe na nesoꞌchño eꞌñe seyemteñothen na, ñapaꞌ apaschaꞌ.

¹⁷ Añkaꞌyeña notenes: Xhokmoepaꞌch atarr kowen semorrentannena.

Allempo Jesúspaꞌ eñotatan poeyochreshaꞌ xhokmach eꞌmoñeꞌtenanet acheñeneshaꞌ arr patsro

¹⁸ Jesúsñapaꞌ alla oterraneterr: —Ñerraꞌm acheñeneshaꞌ añ patsro eꞌmoñeꞌtenset sapaꞌ señochepaꞌch na eꞌñe nanom eꞌmoñeꞌtenet.

¹⁹ Ñerraꞌm sa eꞌñe parro atthekmaseñ ñeñth ama ameꞌñetso arr patsro, ñetñapaꞌ eꞌñetheꞌ kowen moerensetañ tharroꞌmar eꞌñekaꞌye ñeñthenaꞌtarekmas. Tharraña sapaꞌ ama eꞌñe atthekmayeꞌ separroꞌmarneshakmateno ateth pena allowen acheñeneshaꞌ ñeñth ama ameꞌñetso arr patsro. Sañapaꞌ oꞌ naꞌkrerres elloneth nokop. Ñeñthoꞌmarña acheñeneshaꞌ añ patsropaꞌ oꞌ eꞌmoñeꞌtaset samha.

²⁰ Seyerpach añ ñoñtsor ñeñth oꞌ notwas: “Allowen ñeñth yochreshats errothenchaꞌ perrñañet ñeñth yochreshaꞌtenawet, ñetpaꞌxhoꞌña eꞌñech atthekma apharethterret ñamet.” Attho napaꞌ kothareꞌtennet poeꞌmoñeꞌteñothetan, sapaꞌxhoꞌña poeꞌmoñeꞌteñothetaspaꞌ kothareꞌtasetchaꞌ samha. Attho napaꞌ ama ameꞌñerrnaneto neñoñ, sapaꞌxhoꞌña amach ameꞌñerrnaseto samha señoñ.

²¹ Ñeñthpaꞌ atethchaꞌ perrset tharroꞌmar sapaꞌ nakaꞌye sameꞌñena tharroꞌmar ama eseshayeꞌ eñotenaye Yompor ñeñth nellsenseneꞌ.

²² ‘Ñerraꞌm ama nowapañe amach neserrpareꞌtatosanetañe, amatheꞌ eñallñeña atthoch neyowaꞌyesanet poꞌchñarothet. Ñeñthoꞌmar theꞌpaꞌ ama eñalle atthoch aꞌnasotet poꞌchñaret.

²³ Ñeñthoꞌmarña ñerraꞌm eseshaꞌ neꞌmoñeꞌteneꞌ na, Nomporeꞌnaña eꞌmoñeꞌtennanet.

²⁴ Ñerraꞌm amach norrtatanetañe kowenñats ñeñth amaꞌt awatha poꞌpsheññexhnopaꞌ ama orrtataneteꞌthe eꞌñe atthothapaꞌ amatheꞌ eñallñeña atthoch neyowaꞌyesanet poꞌchñarothet. Tharraña theꞌña ñetpaꞌ amaꞌt eꞌñe entennetañpaꞌ xhaña eꞌmoñeꞌtennet ñamha Nomporeꞌna eꞌmoñeꞌtennanet.

²⁵ Tharraña ñeñthpaꞌ tharroꞌmara ateth penet allochñapaꞌ atthoch etsoterra ñoñets ñeñth eꞌñe ateth anwareth awathotheñ, ñeñthpaꞌ ateth oten nokop: “Eꞌñech atthotha eꞌmoñeꞌterrnet.”

²⁶ ‘Ñeñthchaꞌ sokthapeꞌchaterreꞌ eꞌñe kowen seyoxhro ñeñthchaꞌ nemñowerrnas Apoeshoth. Ñeñthpaꞌ ñeñthña Apa Poekamkëñ ñeñthchaꞌña señotaterreꞌña ñeñth eꞌñe poꞌñoxh Yompor pokthaphña tharroꞌmar ñeñthpaꞌ Apoeshoth wena. Ñerraꞌm esempoch xhaponasa ñachña naꞌpothoseꞌ.

²⁷ Sapaꞌxhoꞌña saꞌpothanchaꞌ tharroꞌmar eꞌñe allempotheñ nethorrosa, sapaꞌ eꞌñe allempotheñ parroꞌtseney.