San Juan 13 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Allempo Jesúspaꞌ eꞌpatkaꞌtyesan poeyochreshaꞌ

¹ Amaꞌt ama xhenaꞌ pascuapo allempoch kosherrerr judioneshaꞌ, Jesúsñapaꞌ eñoteñ eꞌñech ñeñtheshaña alloꞌtsen arr patsro oꞌch awerr Pomporesho. Ñapaꞌ xhokma atarr morrentenana allowen ñeñth poeyochreshaꞌ pen arr patsro. Ñeñthoꞌmarña allempopaꞌ eꞌñe poktakma morrentwenanet.

^2-4 Ñewa, Judas Iscariote ñeñth Simón poechemer, oneñethñapaꞌ awepaꞌt kothapeꞌchach poeyoxhro oꞌch pomoerran Jesús. Jesúsñapaꞌ eꞌñe eñoteñ ñapaꞌ tharroꞌmar llesenserña Pompor allowenakop. Tharroꞌmar ñapaꞌ eꞌñe eñoteñ Yomporeshothkaꞌye wapa, elloñapaꞌ oꞌch alla awerr ñesho. Ñeñthoꞌmarña allempo rrallmeꞌchnenet Jesúsña oꞌ thompaꞌ rrotana patherr paꞌshtam ñeñth nen enoth oꞌ chetan patherr eꞌshmokoꞌtametspaꞌ oꞌ chana allo.

⁵ Allothñapaꞌ oꞌ shan oñ wantejo alloña eꞌpatkaꞌtyesanña poeyochreshaꞌ. Eꞌshmokoꞌtamhtsoñapaꞌ alloña aꞌporrarraꞌtkayerranet ñeñth allo chanena.

⁶ Attheñapaꞌ ponmana Simón Pedro, ñañapaꞌ ateth och: —Partseshachaꞌ, amakaꞌye pokteyaye oꞌch peꞌpatkaꞌtonña netak. Tharroꞌmar phapaꞌ pha atarr sherbets, napaꞌ amakaꞌye esoyayno.

⁷ Jesúsñapaꞌ ateth och: —Ñeñth ateth nepenes theꞌ sapaꞌ amach señoche. Esempopaꞌ xhaponasach seyoxhro.

⁸ Pedroñapaꞌ ateth otererr: —Amaꞌt awatha napaꞌ amach nemnatape oꞌch peꞌpatkaꞌtenña na tharroꞌmar napaꞌ amakaꞌye nemno oꞌch nepenknaꞌntataph. Jesúsñapaꞌ ateth otererr: —Ñerraꞌm amach neꞌpatkaꞌtapepaꞌ amach errothenoth eꞌñeyeꞌ peyemtenno.

⁹ Simónña Pedropaꞌ ateth otererr: —Ñerraꞌm poꞌñoxhtheꞌ ateth, Partseshachaꞌ, amachña ñaptha netak peꞌpatkaꞌtono notaꞌnachña eꞌñe ora noñowen.

¹⁰ Jesúsñapaꞌ ateth otererr: —Ñeñth oꞌ apwapaꞌ amakaꞌye es pallteneto, añakaꞌyeña palltenet oꞌch eꞌpatkaꞌchet. Ateth sepena sa aꞌkowentatwarethes sa sokthaphñoth. Sapaꞌ eꞌñe kowen aꞌkowentatwaretheseñ tharraña ama allowenakmayeꞌ aꞌkowentatwaretheso.

¹¹ Ñewa, Jesúspaꞌ eꞌñe eñotenan ñeñthchaꞌ pomoerreꞌ ñeñthoꞌmarña ateth otanet: “Ama allowenakmayeꞌ aꞌkowentatwaretheso.”

¹² Allempoña eꞌpatkaꞌtwanet paꞌtakpaꞌ cheterran paꞌshtampaꞌ oꞌ alla anerr. Allempoñapaꞌ ateth oterraneterr: —Theꞌpaꞌ oꞌch neñotatas ñeñth neyxhatenes ñeñth attho neꞌpatkaꞌtenes.

¹³ Ñewa, sapaꞌ sotenen Maestro, ñamha sotenen Partseshaꞌ. Eꞌñe pokteꞌ poꞌñoxh sotenen tharroꞌmar poꞌñoxhpaꞌ ñeñthenkaꞌye.

¹⁴ Attho na neꞌpatkaꞌtas sa, amaꞌt na ñeñthen Separtseshar sepen ñamha Semaestror sepenen, sapaꞌxhoꞌña ñeñth eꞌñe poktetsa sokop seꞌpatkaꞌtannaꞌtepaꞌch samha. Ñewa, ñeñth poꞌñoxh notenes, ñeñthpaꞌ ateth: Amach sañeña atarr kowen entetso, atthochña eꞌñe kowen sesherbhannena.

¹⁵ Oꞌ neñotatas atethchaꞌ sepha samha. Sapaꞌxhoꞌña atthepaꞌch sepha ateth oꞌ nephowas sa.

¹⁶ Poꞌñoxhkaꞌye oꞌch notas: Ñeñth ayochreshath ñerraꞌm ama esoyeꞌ enteno ñañeña amaꞌt eꞌñe mamesha, ñeñthña poeyochreshaxhno pen eꞌñepaꞌch atthekmoet amach esoyeꞌ enteneto eꞌñe ñañeñeta. Amaꞌt na ñeñthen allsensarethen ama esoyeꞌ nenteno amaꞌt mamesha, ñeñthchaꞌ nellsensaꞌyes namhapaꞌ amoepaꞌchña esoyeꞌ enteneto eꞌñe ñañeñeta.

¹⁷ Ñerraꞌm ñeñthña sexhapoya seyoxhropaꞌ ñeñth ateth neyxhatenes, sañapaꞌ atarrchaꞌ kosheñtsoꞌtsenes ñerraꞌm eꞌñe poꞌñoxh ateth sephowa.

¹⁸ ‘Ama allowenakpayaysoyeꞌ neñeno. Napaꞌ neñotenes eꞌñe poesheñaꞌttsospaꞌ ateth sokthapeꞌchyen seyoxhro. Amaꞌt neñotensoñ attheseñpaꞌ tharraña eꞌñe attha naꞌkrerres allochñapaꞌ atthoch etsoterra Yompor poꞌñoñ ñeñth ateth anwareth nokop awathotheñ, ñeñthpaꞌ ateth oten: “Ñeñth parro yerrallmeꞌchenpaꞌ ñepaꞌtchaꞌña tanterrtsa nokop.”

¹⁹ Eꞌñe thayotheñpaꞌ ateth notenes amaꞌt ama etsotenaꞌ allochñapaꞌ esempoch etsoterra, sapaꞌ sameꞌñach napaꞌ ñeñthen poꞌñoxh Cristotets.

²⁰ Poꞌñoxhkaꞌye oꞌch notas: Ñerraꞌm eseshaꞌ eꞌñe kowen agëneꞌ ñeñth nellsensen na ñetpaꞌ naꞌnakaꞌyeña agënet eꞌñe kowen. Ñamha ñeñth eꞌñe kowen nagëneꞌ na, ñetpaꞌ Nomporeꞌnakaꞌyeña agënet ñeñth nellsenseneꞌ na.

Allempo Jesúspaꞌ eñotatanet Judaspaꞌ ñach pomoerreꞌ

²¹ Jesúsña allempo ateth otwapaꞌ poeyoxhroñapaꞌ xha llekaꞌwena. Allempoñapaꞌ ateth otanet: —Poꞌñoxh theꞌpaꞌ oꞌch notas, poesheñarrothes sapaꞌ ñeñtheschaꞌ nepomoerreꞌ.

²² Poeyochreshaꞌñapaꞌ allentha kowannaꞌtyeset. Amaña eseshaꞌ eñotaye erraꞌtsenakoptheꞌña eñen.

²³ Poesheñarrña poeyochreshaꞌ ñeñth atarr moerena Jesús, ñañapaꞌ eꞌñe epoet Jesús anen all rrallmeꞌchenet parro.

²⁴ Ñeñthoꞌmarña Simón Pedropaꞌ agotan ñeñth anets epoet Jesús, ñeñthpaꞌ ateth och: —Ñewa, phaꞌphthoꞌch yemaestror erraꞌtsenakoptheꞌña eñorena ñeñthchaꞌ pomoerreꞌ.

²⁵ Ñañapaꞌ eꞌñe allameꞌttsa ateth otan Jesús: —Partseshachaꞌ, ¿erraꞌtsenakpaꞌtña peꞌñorena ñeñthchaꞌ pepomoerreꞌ?

²⁶ Jesúsñapaꞌ ateth och: —Ñeñthchaꞌ nap añ pan ñeñthchaꞌ neꞌxhomaꞌ ñeñthchaꞌkaꞌyeña nepomoerreꞌ. Allempoña eꞌxhoman panpaꞌ apan Judas Iscariote ñeñth Simón poechemer.

²⁷ Allempoña apwe panpaꞌ allempokmoepaꞌt chorrya oneñeth. Jesúsñapaꞌ ateth och: —Errothentheꞌ pephaꞌchpaꞌ eꞌñeñakaꞌyeña thayekma ateth pepeꞌ.

²⁸ Poeyochreshaꞌñapaꞌ amaꞌt poesheñarra ñeñthet alloꞌtsaꞌyenet, ñetñapaꞌ ama eseshayeꞌ eñotaye esokoptheꞌ ateth otenan Judas.

²⁹ Poesheñaꞌttsetpaꞌ xha otapoetañ Jesúspaꞌ ñatoꞌ añtheꞌ oteñ oꞌch rañthenanaꞌ ñeñth moenenet allchaꞌ koshapretet, tharroꞌmar Judaspaꞌ ñakaꞌye anmapeꞌchampeneꞌña kellayepoꞌr. Amapaꞌ ñatoꞌ añtheꞌ oteñ oꞌch es apaꞌyesan wokchañneshaxhno.

³⁰ Allempoña Judaspaꞌ agapwan panpaꞌ allentha xhaꞌnerr. Allempopaꞌ oꞌ tsapoen.

Atethchaꞌ yepha ñeñth eꞌñe etserra, yemoerannaꞌtepaꞌch

³¹ Allempoña Jesús xhaꞌnompaꞌ ateth oterraneterr: —Theꞌña poꞌñoxhpaꞌ eꞌñe xhapmoch allempoch kowentaterrnan Parets na Ñeñthen Acheñetosets. Atthochña napaꞌxhoꞌña nekowentaterrñañchaꞌ Nompor Parets.

³² Attho napaꞌ nekowentaterrñañ Nompor Parets, ñapaꞌxhoꞌña kowentaterrnanchaꞌ na, ñeñthpaꞌ eꞌñech mametholla oꞌch eꞌñe kowentaterrnan.

³³ Jesúsñapaꞌ alla oterraneterr: —Naꞌkñetharneshachaꞌ, oꞌ eꞌñe koñeꞌthamha pallta alloꞌtsenmeñenchaꞌ na eꞌñe arr parro. Napaꞌ oꞌch awerren. Allempoña sapaꞌ seꞌnerrnaꞌch. Ateth noteñ awaña judioneshaꞌ, allchaꞌ neserr napaꞌ sañapaꞌ amach errothenoth sexhapo, theꞌpaꞌxhoꞌ sapaꞌ eꞌñe ateth notenes.

³⁴ Ñamha oꞌch notas atethchaꞌ sephannena ñeñth eꞌñe etserra: Semoerannaꞌtepaꞌch. Ateth nepenes sa atarr nemoerensa, sapaꞌxhoꞌña atarrepaꞌchña semoerannena.

³⁵ Allochñapaꞌ eꞌñe semorrentannaꞌteñothpaꞌ eñotasetchaꞌ sapaꞌ sa eꞌñe poꞌñoxh neyochreshas.

Attho Jesúspaꞌ eñotatan Pedro ñapaꞌ xhokmach aꞌnasocha

³⁶ Simónña Pedropaꞌ ateth och: —Partseshachaꞌ, phapaꞌ ¿erraꞌtchaꞌña peserr? Jesúsñapaꞌ ateth och: —Allchaꞌ neserr napaꞌ phapaꞌ amach errothenoth phokthaꞌnoña na theꞌ. Esempoña poꞌñoxhpaꞌ amaꞌt chenta seserrchaꞌ samha.

³⁷ Pedroñapaꞌ ateth otererr: —Partseshachaꞌ, ¿esoꞌmareꞌtchaꞌña ama thayekma noktherrpe? Napaꞌ eꞌñe pokteꞌ nenteñ yerromoepaꞌ eꞌñe parro.

³⁸ Jesúsñapaꞌ ateth otererr: —¿Poꞌñoxhaꞌt eꞌñe pokteꞌ penteñ oꞌch yerroma parro? Poꞌñoxhkaꞌye theꞌ napaꞌ oꞌch notaph: Amach eñenaꞌ atollop phañapaꞌ oꞌch maꞌpoch phaꞌnasotenna.