San Juan 10 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Attho Jesúspaꞌ añ tomaꞌntatanet all yottampeñet carnero

¹ Allempoña Jesúspaꞌ alla yexhaterraneterr, ñeñthpaꞌ ateth tomaꞌntaterraneterr: —Poꞌñoxhkaꞌ notenes: All yottampeñet carnero ñerraꞌm eseshaꞌ ama beꞌthetso allothekma beꞌthenet ñerraꞌm poꞌpshemhtañotha aꞌtenet, ñeñthña poꞌñoxhpaꞌ eñethkaꞌye ñeñth aprratamphsañtetsa.

² Tharraña ñerraꞌm eseshaꞌ beꞌthets eꞌñe allothekma beꞌthenet ñeñthña poꞌñoxhpaꞌ ñeñth kowampeneꞌ carnero.

³ Ñeñth kowampeneꞌ yetarrpaꞌ ñerraꞌm esempo waxherra ñeñth kowampeneꞌ carnero ñapaꞌ xhokmach toramphsapoerranet. Carneropaꞌ eꞌñe eñoteññañet pamoꞌmteꞌ poꞌñoñ. Ñañapaꞌ oꞌch xhoreꞌtyesan poꞌcarneror paꞌsoꞌchñopaꞌ oꞌch xhaꞌnmaxhaꞌtatan poꞌcarneror.

⁴ Allempoña xhaꞌnmatwe allowen aꞌyothpaꞌ ñañapaꞌ oꞌch ota. Poꞌcarnerorñapaꞌ allenthach kothaꞌwanemh chentaꞌ. Ñetñapaꞌ eꞌñe chemeꞌteññañet pamoꞌmteꞌ poꞌñoñ.

⁵ Tharraña awapñapaꞌ ama kotheñe, xhach matampesya tharroꞌmar ama eñotenano awapña poꞌñoñ.

⁶ Ñeñthpaꞌ ateth oterranerr fariseoneshaꞌ tomaꞌnteñtso tharraña ñetñapaꞌ ama eñotoñeto ñeñth otenanet.

Attho Jesúspaꞌ añ tomaꞌntena ñeñth eꞌñe kowen kowampeneꞌ poꞌcarneror

⁷ Allothñapaꞌ alla oterraneterr Jesús: —Poꞌñoxhkaꞌ notenes: Napaꞌ na yetarrotets allothchaꞌ beꞌthen carnero.

⁸ Allowen ashkañneshaꞌ ñeñth wapyestseꞌth allempo ama nowenaꞌ na, ñetpaꞌ eñethareret ñeñthet aprratamphsañtetsa, tharraña ñetpaꞌ ama eꞌmhñotenanetoña carnero.

⁹ Napaꞌ na yetarrotets. Ñerraꞌm eseshaꞌch beꞌthets nesho ñeñthpaꞌ keshperrach, beꞌtherretchaꞌ ñamha xhaꞌnerretchaꞌ enterretchaꞌ eꞌñe kowen poerrar. Ñewa, ñeñthpaꞌ añ otenanet: Ñerraꞌm eseshaꞌch ameꞌñaya ña ñetñapaꞌ keshperretchaꞌ. Ñachña kowamperrawet eꞌñe kowen amach es pallterreto.

¹⁰ Jesúsñapaꞌ alla oterraneterr: —Eñethpaꞌ amakaꞌye wenoña eꞌñe attha, añekopña wena oꞌch etyes, oꞌch es moetsa, oꞌch es aꞌchenkatwa. Tharraña napaꞌ añekopña nowapa atthochña sapaꞌ korretsasach soksheñeshokmañen eꞌñe thayotheñ errponañowen.

¹¹ Napaꞌ na ñeñthen kowen kowampeneꞌ carnero. Ñeñth eꞌñe kowen kowampeneꞌ carnero ñapaꞌ eꞌñe ñañeña aꞌrroyerrtsa oꞌch rroma poꞌcarnerorekop.

¹² Tharraña poꞌpsheñeñ ñeñth atsaꞌtarethtatsa atthoch kowampenan carnero ñeñthpaꞌ ama pamoꞌmtayeyaye; ñañapaꞌ ñerraꞌm entapan maꞌyarrpaꞌ xhach mata oꞌch saꞌnmanña carnero. Maꞌyarrñapaꞌ oꞌch rromaꞌyesosan carnero, patantarrña carneropaꞌ oꞌch attha aꞌparratseꞌtach.

¹³ Ñeñth attha atsaꞌtarethtetsapaꞌ poꞌñoxhpaꞌ ama llekaꞌpenanoña carnero amaꞌt mamesha. Ñeñthoꞌmarña xhach saꞌnmanña carnero.

¹⁴ ‘Napaꞌ na ñeñthen kowen kowampeneꞌ carnero. Napaꞌ eꞌñe nechmeꞌteñ ñeñth necarneror. Ñeñthña nopaꞌ eꞌñe chemeꞌtenen namha.

¹⁵ Ateth pena Apa eꞌñe eñotenen, nañapaꞌ eꞌñe neñoteñ namha Apa. Napaꞌ eꞌñe nañeña oꞌch naꞌrroyerra atthoch nerroma necarnerorekop.

¹⁶ Eñall poꞌpoñexhño ñeñthchaꞌ necarneror neperr, ñetpaꞌ ama parrokmateneto arr alloꞌtsen ñeñth necarneror nepen theꞌ. Añ poktetsa oꞌch nerranetaꞌ atthoch eꞌmhñoterrnanet neñoñ, allochñapaꞌ oꞌch eꞌñe parrokmaterret. Poesheñarrana ñeñthenchaꞌ kowamperrawet.

¹⁷ ‘Apapaꞌ ello atarr morrentenna tharroꞌmar napaꞌ naꞌrroyena nañeña oꞌch nerroma acheñeneshakop, elloñapaꞌ oꞌch alla netanterra.

¹⁸ Amaꞌt eseshapaꞌ amach poerratampesnoña nokrreña, napaꞌ na ñeñthen aꞌrroyetsa eꞌñe nañeña. Napaꞌ anarethen atthoch naꞌrroya oꞌch nerroma; anarethen ñamha atthoch ellopaꞌ oꞌch alla netanterra. Ñeñthpaꞌ Apaña noteneꞌ atethchaꞌ nepha. Arrpaꞌ allowa ateth tomaꞌntatenanet allowen ñeñthchaꞌ ameꞌñerraya ñeñthña poꞌcarneror pen ñeñthchaꞌ atarr kowen kowampen.

¹⁹ Ñeñth attho serrpareꞌtatenanet Jesús, allña judioneshaꞌpaꞌ ellopaꞌtetstatenet pokthaphña Jesúsokop.

²⁰ Shonteꞌ acheñeneshaꞌ ñeñth ateth otyesets: —Añmapaꞌ xhakaꞌye chorreña oneñeth, xhakaꞌye mospoena. Esoꞌmareꞌtña seꞌmhñoteñ.

²¹ Poꞌpotantañexhnoñapaꞌ ñetpaꞌ ateth otyenet: Ñerraꞌm xho chorreña oneñethpaꞌ amatheꞌ errothenoth eñosoña ateth eꞌñe kowen. Oneñethpaꞌ amatheꞌ errothenoth kowaterranoña aporoꞌyeth.

Allempo judioneshaꞌpaꞌ achmhareꞌteñet Jesús

²² Allempoñapaꞌ xherrerr allempo alla kosherrerr judioneshaꞌ Jerusaléño allempoch yerpoerret ñeñth attho neteꞌth awath Parets paꞌpakëll ñokop. Allempo alla kosherreterrpaꞌ allempopaꞌ wapo.

²³ Jesúsñapaꞌ alla chopeñen Parets paꞌpakllo all oteñet Salomón poechaꞌpetaro.

²⁴ Allñapaꞌ arrotampesya judioneshaꞌpaꞌ ateth ochet: —Esempowachñakaꞌye peꞌnwaña ñeñth attho pemoññeꞌtatenya. Ñerraꞌm poꞌñoxhtheꞌ pha Cristotetspaꞌ photeyñakaꞌye eꞌñe poꞌñoxh.

²⁵ Jesúsñapaꞌ ateth otanet: —Amaꞌt notatstas sapaꞌ amachkaꞌ sameꞌñaꞌno. Napaꞌ eꞌñe neyemteñoth Apa ateth es nephaꞌyen. Ñeñth norrtatyenpaꞌ ñeñthchaꞌña señotateꞌ napaꞌ ñeñthen Cristotets.

²⁶ Tharraña sapaꞌ ama sameꞌñenno tharroꞌmar sapaꞌ ama necarneroreyayso ñeñth ateth oꞌ notwas.

²⁷ Ñeñth poꞌñoxh necarnerorpaꞌ eꞌmhñotennanet neñoñ, nañapaꞌ neñotenanet. Ñetñapaꞌ kothennet.

²⁸ Nañapaꞌ napoerranetchaꞌ atthochña ñetpaꞌ korretsetach thayotheñ errponañowen, ñetñapaꞌ amaꞌt awathapaꞌ amach chenkërreto. Amaꞌt eseshapaꞌ amach poerraterrnetoña eꞌñe na nototh.

²⁹ Nomporpaꞌ ña napoeneꞌña ñeñth nameꞌñenaya. Ñapaꞌ atarr awamenkatheshaꞌ. Ña poꞌwamenkpaꞌ ama eseshayeꞌ metanenaye. Amaꞌt eseshapaꞌ amatheꞌ errothenoth poerratamphsetoña Nompor eꞌñe ña pototh.

³⁰ Napaꞌ eꞌñe parro atthekman epan ña.

³¹ Ñeñthoꞌmarña allempo judioneshaꞌ ñetpaꞌ chetet mapoeꞌ alloꞌch rrolleꞌchet.

³² Jesúsñapaꞌ ateth oterraneterr: —Shonteꞌ koxhneshaꞌ norrtatyesonas Nompor poꞌwamenkoth. ¿Erraꞌtsenotheꞌtña añ ñeñth eꞌñe koxhnesharoth sapaꞌ semneñ oꞌch sarrollaꞌn?

³³ Judioneshaꞌñapaꞌ ateth otereterr: —Ama phorrtateñotheyeꞌ koxhneshaꞌ yemneñe oꞌch yarrolleꞌtaph. Yapaꞌ añekopña yemneñ oꞌch yarrolleꞌtaph attho phapaꞌ atarr phachmhareꞌteñ Parets. Phapaꞌ acheñothakaꞌye pemneñ oꞌch pepartsokoptarta.

³⁴ Jesúsñapaꞌ alla oterraneterr: —Ñoñets ñeñth ateth anareth awathotheñ sokop allpaꞌ atethkaꞌye anwareth añekop ñeñth eꞌñe ñenmath aꞌpotheꞌ Yompor poꞌñoñ, ñeñthpaꞌ ateth otaneteꞌth Yompor: “Sapaꞌ atethchaꞌ entenes acheñeneshaꞌ ñerraꞌmrratheꞌ yompores.”

³⁵ Yompor poꞌñoñ ñeñth anwareth awathotheñ ama poenesho. Ateth otaneteꞌth ñetpaꞌ yomporoꞌch entenanet acheñeneshaꞌ,

³⁶ naña ñeñthen oꞌ nerren Yompor ñeñthen oꞌ moeñerren arr patsro, sapaꞌ achmharñathach sepenen tharroꞌmarothña napaꞌ noten Yompor Poechemeren.

³⁷ Ñerraꞌm amatheꞌ añeyeꞌ norrtateno Yompor poꞌpartsoña ñeñthepñapaꞌ amach sameꞌñatsetno.

³⁸ Tharraña attho poꞌñoxh norrtateññañ poꞌpartsoña amaꞌt ñeñthapaꞌ sameꞌñya, amaꞌt napaꞌ ama ameꞌñoyen sentenno. Atthochña poꞌñoxh xhaponasa seyoxhro attho Apapaꞌ eꞌñe parrokmatenna, napaꞌxhoꞌña neparrokmaten epan Apa.

³⁹ Ellopaꞌ moeneñetañ oꞌch rromoet tharraña ñet allempopaꞌ xha aꞌkeshphachet.

⁴⁰ Allempoña Jesúspaꞌ awerr yomhtaꞌn Jordanaso all eꞌñe ñenmath apatyeseꞌth Juan Yomporekop. Allñapaꞌ alla aꞌpa.

⁴¹ Shonteꞌ waxhaꞌtyestsa ñeshopaꞌ ñetñapaꞌ ateth otyesoset: —Juanpaꞌ amaꞌt koñeꞌtha ama orrtatano partsoteñets, tharraña allowen allpon otyesyeꞌth Juan añekop ñeñthchaꞌ Cristoterrets ñeñthña theꞌpaꞌ eꞌñe poꞌñoxh ateth pena.

⁴² Allñapaꞌ shonteꞌ acheñeneshaꞌ ñeñth ameꞌñaya Jesús.