Hebreos 9 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Ñeñth patsoꞌmar Yompor poꞌprawaꞌpaꞌ añ tomaꞌntateññañet ñeñth eꞌñe ña poeꞌntañoꞌtsen poꞌprawaꞌ

¹ Ñewa, yeñoteñ ñeñth ateth aꞌpoktatanetañ awath Yompor ñeñthpaꞌ echenan ñoñets anareth ñeñthchaꞌ ateth sherbhaꞌyeset Parets. Ñamha arrchaꞌ eꞌñe etsotetña ñeñth Yomporekop eꞌñe ña poꞌprawo, ñeñth poerawaꞌpaꞌ amaꞌt acheña thomateneꞌ arr patsro.

² Ñewa, ñeñth poerawatatseꞌth awath ñeñthpaꞌ shetamtsopoꞌ. Ñeñth thomatenet ñewapothpaꞌ ñeñth otenet Partsopawesho alloꞌtsen all orratenet werare ñamha alloꞌtsen mesa allekma nenet pan Partsokop.

³ Allowanen allowa ayottamphsareth besmo poꞌppaweñ shetamtsopoꞌ ñeñth otenet, Eꞌñe Partsopawesho Poꞌponro.

⁴ Allñapaꞌ alloꞌtsen altar, enothñapaꞌ allekma aꞌkrratenet tsach poeseꞌ ñeñth atarr eñmosathtetsa Partsokop; ñeñthña altar enoꞌmarpaꞌ eꞌñe kowen orotattena. Ñamha allowanen poꞌppawño alloꞌtsen tsapot; ñeñthpaꞌxhoꞌña enoꞌmarpaꞌ orotaten. Allña aññoꞌtenet mapoettall allo akellkareth Yompor poꞌñoñ ñeñth aꞌpoktat Yompor awath acheñeneshakop. All aññoꞌtenet ñamha pajoꞌ orotaten, allña eshaꞌtareth koñeꞌth maná ñamha tsapoto alloꞌtsen Aarón poꞌkarr ñeñth tapaꞌllatseꞌth awath.

⁵ Tsapoto enoth all then epsheña mellañotheñmaꞌth ñeñth ayexhkatareth ñeñth otenet querubíñ ñeñth tomaꞌntenaya Parets poꞌpartsoña ñeñth chorrets all. Querubíñ paꞌpaꞌyopaꞌ alloña kaꞌmatenan tsapot enoth alloth eꞌtampenet tsapot. Allñapaꞌ allekma peretnaneteꞌth Yompor poꞌchñaret. Ñewa, theꞌpaꞌ oꞌch noterrserr poꞌpoñexhno ñeñth paꞌnamen atmaꞌntatareth all.

⁶ Allpaꞌ paꞌnamen aññoꞌtarethetyetsa ñeñth all poerawo. Ñamha ñeñth kornaneshatyets Partsokoppaꞌ xhokmach beꞌthosyenet ñeñth all poerawo ñewapoth, allchaꞌña etsotayenet ñeñth ateth anareth Partsokop.

⁷ Tharraña ñeñth allowanen poꞌppaweñ Parets poꞌponer ama eseshayeꞌ beꞌthetsoña all. Allpaꞌ añach beꞌthets poesheñarr korneshaꞌ ñeñth paꞌmhchaꞌtarether pen poꞌpotantañ kornaneshaxhno. Amaꞌt ñapaꞌ patherr charpaꞌ eꞌñech parrocha beꞌthen. Ñamha xhokmach anman eyarra poꞌrras alloch peretnenanet Yompor poꞌchñaret. Ñeñthpaꞌ eꞌñe ñokpaꞌna poꞌchñarekop amaꞌt ñamha allowen acheñeneshaꞌ poꞌchñarekpoet.

⁸ Amaꞌt ñeñth ñewapotheꞌtsen poerawaꞌ allekma sherbhaꞌyen kornaneshaxhno ñeñth ateth anareth Partsokop, tharraña eꞌñe allowanen Parets poꞌponro añach beꞌthets ñeñth nanak korneshatets eꞌñe ñapoeth. Ñeñthoꞌmarña theꞌpaꞌ Parets Poekamkëñña yeñotateneꞌ attho ama atoramphsaretheyayye allowenakpay atthoch yexhapampeña Yompor all partsoten.

⁹ Ñeñth allempopaꞌ aña tomaꞌntena ñeñthchaꞌ ateth kowen phosa tsapathoneth Cristo allempoch wapa; ateth ñerraꞌm theꞌña oꞌ wapa Cristopaꞌ oꞌ etsotwa. Tharroꞌmar allempo all Parets poꞌprawo amaꞌt es apoenetañ Yomporekop ñamha amaꞌt es moetsayenetañ Yomporekop, ñeñthpaꞌ arepaꞌt aꞌkowentatenanoña añ pokthaphña ñeñth ateth sherbenayeñ Yompor.

¹⁰ Tharroꞌmar ora ateth anarethtet allempo ñeñthpaꞌ añekpa sherben ñeñth eꞌñe poꞌchtsokpoeta ñeñth ateth ñerraꞌm ñeñthchaꞌ rrenet ñamha ñeñthchaꞌ orrenet ñamha attho apaꞌyeseteꞌth Partsokop. Ñeñth orapaꞌ añekpa sherbeꞌth atthoch aꞌpoktatenet poꞌchets Partsokop. Ñamha ñeñthpaꞌ mamekpa anarethta esempowañenña Yomporpaꞌ orrtaterrnaychaꞌ poꞌpoñ ñeñthchaꞌ ello nanak yesherberreꞌ.

¹¹ Ñeñthpaꞌ eꞌñe tharrempowa eꞌñe etsoterra allempo wapa Cristo, ñeñthña orrtatoseꞌ ñeñth ello nanak sherbets theꞌ yokop. Ñapaꞌ attho korneshatospaꞌ oꞌ alla beꞌthoswerr allowanen Partsopawesho all poeꞌntaño ñeñthña ello nanak sherbets Partsokop. Ñapaꞌ eꞌñe metanaꞌtwerran ñeñth sherbhaꞌyestseꞌth awath poerawo Partsokop ñeñth thomaten acheñ arr patsro. Tharroꞌmar ñeñth Parets poꞌprawaꞌ ñeñth poeꞌntañoꞌtsenpaꞌ ama acheñeyeꞌ thomatenaye ñamha ñeñthpaꞌ ama añe patsroyeꞌ athomataretheyaye.

¹² Ñamha Cristo allempo beꞌthoswerr allowanen Partsopawesho ñeñthpaꞌ eꞌñe parrocha beꞌthoswerr all poeꞌntaño. Ñamha ñapaꞌ ama añeyeꞌ anmo eyarra poꞌrras —cabra amapaꞌ wakshetholl. Ñapaꞌ eꞌñe ñañeña poꞌrras pomwerr. Ñamha ñapaꞌ eꞌñe parrocha pomanña poꞌrras all amaꞌt allowen paꞌnamen acheñeneshakop poꞌchñarekop. Atthoña eꞌñe kowen aꞌpoktatonay atthothchaꞌ aꞌkeshphaterrey, ñamha ñeñthpaꞌ amach awañañathterro amaꞌt errponaña.

¹³ Ñewa, yeñoteñ ñeñth attho shellkapechyesaneꞌth korneshaꞌ acheñeneshaꞌ cabra poꞌrraso amapaꞌ wakësh poꞌrraso amapaꞌ wakshetholl poꞌtsapñero ñeñth aꞌpoyenet altaro, ñeñthpaꞌ atthoña aꞌpoktatenan amaꞌt erraꞌtsena acheñer poꞌchets Partsokop, amaꞌt errotheno aꞌsosyatena Partsokop.

¹⁴ Tharraña ñeñthpaꞌ eꞌñe poꞌchtsochaya aꞌpoktatarethtenet Partsokop. Tharraña allempo ashatarethta Cristo poꞌrras, ñeñthpaꞌ elloneth añekopña nanak sherbhos atthoch aꞌpoktaterrnay amaꞌt ñeñth ateth yokthapeꞌchyen yeyoxhro. Ñeñthoꞌmarña allempotheñpaꞌ amach alla yeyemterrerro ñeñth ateth yeyexhkatyen arr patsro ñeñth ama aꞌkeshphatañeyaye. Añchaꞌña eꞌñe kowen yesherben Yompor ñeñth ama arromñatheshayaye. Cristopaꞌ ñeñthoꞌmarña ello atarr sherbeney attho pomoerra ñañeña oꞌch rroma yokop amaꞌt ñapaꞌ ama eñalle poꞌchñar amaꞌt eꞌñe mamesha. Ñeñthpaꞌ eꞌñe Yompor Poekamkëñoth ateth phosa; ñeñthña Kamoekñetserpaꞌ ama awañaño.

¹⁵ Attho Jesucristopaꞌ ña eñosets yokop atthoch aꞌpoktatwerrnay eꞌñe kowen etserra. Tharroꞌmar allempo rroma Cristo ñeñthpaꞌ añekopña sherben atthoch peretnaꞌwerrnay yoꞌchñar ñeñth oꞌ allpon yephowen awathotheñ allempotheñ yokthaꞌnom ñeñth ñanom aꞌpoktatañtatsañ. Allochñapaꞌ alloweney ñeñthey oꞌ yaꞌwaꞌñarethterra oꞌch yameꞌñera, ñapaꞌ apwerreychaꞌ ñeñth oꞌpatatenya ñeñth ateth oteney atthochña yapaꞌ korretsayach errponowañen.

^16-17 Ñewa, yeñoteñ arr patsro xhokma eñall poesheñaꞌtets acheñ ñeñth ateth petsa oꞌch kellkaꞌnman ñoñets all oten ñeñthchaꞌ allpon poechatsrexhno apaꞌnman pamoꞌtseshaꞌ ñerraꞌm esempoch rroma. Tharraña allempo orameñ korrena ñeñth kellkëneꞌ eꞌñe ña poꞌñoñ, añña ñeñth oꞌpatatyenapaꞌ amach errothenoth amnatarethteto oꞌch yoret eꞌñe allempokma. Tharraña ñerraꞌm esempoch eñoteñet poꞌñoxh oꞌ rromoen ñeñth oꞌpatatenawet, allempoñapaꞌ aparethetyesetchaꞌ ñeñth allpon oꞌpatatarethetyenet. (Ñeñthoꞌmarña yapaꞌ yeñoteñ allempo rroma Cristo attho ashatarethta poꞌrraspaꞌ ñeñth allpon oꞌpatatyenya yamha ñeñthpaꞌxhoꞌña eꞌñe yokma.)

¹⁸ Ñeñthoꞌmarña awath allempo ñenmath aꞌpoktateteꞌth Partsokop, amaꞌt allempopaꞌxhoꞌña oꞌch moetset eyarra, poꞌrrasoñapaꞌ allochña shellkataꞌtyeset. Ñeñthpaꞌ atthoña eꞌñe aꞌpoktateteꞌthña poꞌñoñ.

¹⁹ Ñewa, Moiséspaꞌ ateth pha allempo. Eꞌñe eñotatwan acheñeneshaꞌ ora allpon ateth oten Yompor poꞌñoñ ñeñthchaꞌ ateth pet, allempoña ñapaꞌ oꞌ yoran carnero poeꞌch ñeñth eꞌxhomareth tsamaꞌtho ñeñthñapaꞌ wankëꞌ hisopoch poetakro, allothñapaꞌ yoran ñamha wakshetholl poꞌrras ñamha cabra poꞌrras, tsech epoet oñ. Allña eꞌxhoman carnero poeꞌch ñeñth wankën tsachpho allempoñapaꞌ shellkataꞌtan allo libro ñeñth all anareth Yompor poꞌñoñ, atthoña shellkanaꞌtampeswan ñamha allowen acheñeneshaꞌ.

²⁰ Allempoñapaꞌ ateth otan acheñeneshaꞌ: “Añ poꞌrras ñeñthpaꞌ alloña Yomporpaꞌ aꞌpoktatennas ñeñth ateth nenan poꞌñoñ sokop ñeñthchaꞌ ateth sepha.”

²¹ Ñamha atthekma phan ñamha poerawaꞌ ñeñth shetamtsopoꞌ oꞌ shellkapoꞌch ñeñthara errasatso. Ñamha ora allpon koymexhno ñeñth alloꞌtsaꞌyen allekma sherbeñet Parets, ñeñthpaꞌxhoꞌña eꞌñe shellkaꞌtaꞌtwe.

²² Ñewa, yeñoteñ ñeñth ateth oten ñoñets ñeñth ateth anareth, allowen es poꞌrrasochña eꞌñe aꞌkowentatenet Partsokop. Allowen paꞌnamen ñeñth alloꞌtsaꞌyenpaꞌ eꞌñe awtsa allowen aꞌkowentatwe attho ashellkanaꞌtarethta eyarra poꞌrraso. Ñeñthoꞌmarña yeñoteñ ñerraꞌm ama es moetseneto atthoch shatatoñet poꞌrraspaꞌ amach eseshayeꞌ aphretnarethtetso poꞌchñaret.

Attho amtsarethta Cristo yoꞌchñarekoppaꞌ atthoña eꞌshowerrnay yoꞌchñar

²³ Ñeñthoꞌmarña yeñoteñ añe patsro poerawaꞌpaꞌ eyarra poꞌrrasoña aꞌkowentatyenetña allowen ñeñth Partsokop. Ñeñth poerawaꞌ añ patsoꞌmarpaꞌ añ tomaꞌntena Parets poꞌprawaꞌ ñeñth poeꞌntañoꞌtsen, ñeñthpaꞌxhoꞌña atthekma errasatso aꞌkowentatarethtena allowen ñeñth allpon alloꞌtsaꞌyen. Tharraña ñeñth rromats Parets poꞌprawakop ñeñth poeꞌntañoꞌtsen ñeñthpaꞌ añ moenen errasats ñeñth ello atarr kowen sherbets.

²⁴ Ñeñthoꞌmarña Cristopaꞌ ñeñthekopña rroma. Tharroꞌmar Cristopaꞌ ama arreyeꞌ beꞌthoswerro ñeñth patsoꞌmar poerawaꞌ ñeñth yexhkaten acheñ ñeñth attha tomaꞌntenaya Yompor poꞌprawaꞌ ñeñth poeꞌntañoꞌtsen. Allña beꞌthoswerrña Cristo Parets poꞌprawo ñeñth poeꞌntañoꞌtsen ñeñthoꞌmarña theꞌ ñapaꞌ alloꞌtsen eꞌñe allowanen Yomporesho allña thorraꞌwerra kowen yokop.

²⁵ Ñamha Cristopaꞌ ama attheyeꞌ phoso ateth pena kornaneshaxhno awath. Ñetpaꞌ xhokma beꞌthoseteꞌth allowanen Parets poꞌponro eꞌñe patheꞌtets char. Ñamha errasats ñeñthchaꞌ anenet oꞌpono ñeñthpaꞌ ama ñetoyaye poꞌrraset.

²⁶ Tharraña Cristopaꞌ eꞌñe parrochekpa anareth oꞌch pomoerra ñañeña oꞌch rroma atthoch ashatarethta poꞌrras. Tharroꞌmar ñerraꞌm ama attheyeꞌ anaretheñepaꞌ xhokmatheꞌ rromameꞌtañ amaꞌt tharrempotheñ allempotheñ eꞌñe errteꞌ ayexhkatarethtetsa pats. Tharraña ñeñthpaꞌ ama attheyeꞌ pho. Ñapaꞌ añekopña wapa atthoch eꞌñech parrocha amtsarethta alloweney yoꞌchñarekop atthoch ñachña yawanmamperreꞌ yoꞌchñar. Ñeñthoꞌmarña wapa allempowach xherr yeth allempoch mellapoterrmocha.

²⁷ Yeñoteñ amaꞌt alloweney acheñey xhokmach yerromoen. Tharraña eꞌñech parrocha yerroma allempoñapaꞌ oꞌch werrnaya atthoch Yomporpaꞌ eñotatyeswerrey eꞌñe errothenchaꞌ entyeswerrey —ñatoꞌ eꞌñech kowen entyeswerrey amapaꞌ ñatoꞌ amach kowenayeꞌ entyeswerrye.

²⁸ Atthekma pha ñamha Cristo eꞌñe parrocha rroma allempo amtsarethta allowen ochñartsokop. Atthoña ñapaꞌ eꞌñe awanmamperrey shontey alloweney yoꞌchñar. Amaꞌt amtsarethtañ ochñartsokop, tharraña Cristopaꞌ allach orrterra poꞌpocheño. Allempoch werra poꞌpocheñopaꞌ poꞌkowenño amach añekpayeꞌ werro oꞌch alla rromoerrerr ello ochñartsokop. Añekopchaꞌña werra poꞌpocheño oꞌch eꞌñe aꞌkeshphatwerran allowen ñeñth xhokma koweneꞌ ña.