Hebreos 8 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Jesúspaꞌ ña aꞌpoktatañterrtsa eꞌñe etserra yokop

¹ Ora allpon ñeñth oꞌ notwanmas ñeñthpaꞌ eꞌñe poꞌñoxh ateth notenes: ñeñth attho atarr sherben Korneshaꞌ Cristo theꞌña ñapaꞌ oꞌ alla anorrwerr Parets poꞌkowenroth all anen poꞌkonaño all poeꞌntaño. Allñapaꞌ oꞌ alla partsotwerr ñamha.

² Allñapaꞌ oꞌ atarr sherbhaꞌwerr eꞌñe allowanen Parets poꞌprawo all eꞌñe poꞌñoxh alloꞌtsen Yompor. Ñeñthpaꞌ ama attheyaye ñerraꞌm patsoꞌmar poerawaꞌ ñeñth thomaten acheñ. Allpaꞌ Yomporña thomateneꞌña poꞌprawaꞌ eꞌñe ña poeꞌntaño.

³ Yeñoteñ allowen ñeñth korneshatets Partsokop, ñetpaꞌ añekopña anarethtenet atthoch ñetchaꞌ es apoenet Yompor ñamha ñetpaꞌ oꞌch moetsenet payaraxhno Yomporekop atthoch peretnatenet poꞌchñaret. Ñeñthoꞌmarña Korneshaꞌ Jesús, ñokoppaꞌxhoꞌña eꞌñe pokteꞌ oꞌch es apan Pompor. (Ñeñthpaꞌ aña apoerran Pompor eꞌñe ñañeña poꞌchets atthoch rroma yokop.)

⁴ Ñewa, ñerraꞌm ñapaꞌ alloꞌtsenaraña añe patsropaꞌ amaꞌt mamesha amatheꞌ pokteyeꞌ enteññeña ñeñth kornaneshatyets añe patsro, tharroꞌmar ñetpaꞌ añach eꞌñe kowen entenet oꞌch es apoeñet Yompor ñeñth eꞌñe ateth naneteꞌth Moisés poꞌñoñ.

⁵ Ñeñthoꞌmarña yeñoteñ ñeñth ateth sherbenet ñet ñeñthpaꞌ attha tomaꞌnteñet ñeñth attho poꞌñoxh Cristo eꞌñe kowen sherben Parets poꞌprawo ñeñth poeꞌntañoꞌtsen. Añach sherbenet ñeñth atthemaꞌthtetsa ñeñth eꞌñe poꞌñoxh ateth moenen Yompor. Yeñoteñ ñeñthekma sherbeteꞌth tharroꞌmar awath allempo Moiséspaꞌ awoꞌch thomataneñ ñeñthchaꞌ poꞌprawaꞌ phaꞌ Parets arr patsro, all aspentho Yomporña gateꞌ ñeñth tomaꞌntenaya eꞌñe ña poꞌprawaꞌ ñeñth poeꞌntañoꞌtsen. Allempoñapaꞌ ateth otan Moisés: “Poꞌñoxhpaꞌ eꞌñech ateth peyexhkaton ñeñthchaꞌ neprawaꞌ nephaꞌ añ patsro allchaꞌ yexhena Nekamkëñ.” Arrpaꞌ allowa ateth otan Yompor Moisés.

⁶ Tharraña Korneshaꞌ Cristo theꞌ attho sherberr all poeꞌntaño, ñeñthpaꞌ eꞌñe poꞌñoxh poktakma kowen. Ello metanaꞌtwenan ñeñth ateth sherbhaꞌyeseꞌth awathotheñ kornaneshaxhno arr patsro. Tharroꞌmar theꞌ ñeñth ateth oꞌ aꞌpoktaterrnay Pomporeshopaꞌ ñeñthña eꞌñe poktakma kowen yokop, tharroꞌmar añ aꞌpoktateñetspaꞌ paꞌnamen oteney ñeñthchaꞌ ateth perrnay koshateñtso.

⁷ Yeñoteñ ñerraꞌm eꞌñe kowen aꞌpoktatyeñeꞌth ñeñth ñenmath allempopaꞌ amach palltenañe oꞌch alla aꞌpoktaterryeterr eꞌñe ello etserra.

⁸ Yeñoteñ ñeñth awath aꞌpoktateñetspaꞌ ama eꞌñeyeꞌ kowen yenpaꞌyeꞌthe tharroꞌmar allempo Yomporpaꞌ ama pokteyeꞌ entaneꞌthe israelneshaꞌ. Tharroꞌmar poꞌñoñpaꞌ ateth oten ñeñth akellkareth ñeñthpaꞌ ateth ot Yompor: Xhapchaꞌ allempoch nenerrerr poꞌpoñ neñoñ israelenaꞌtarneshakop ñamha judánaꞌtarneshakop, ñeñthpaꞌ allochña naꞌpoktaterranet eꞌñe kowen etserra.

⁹ Ñeñthpaꞌ amach attheyaye ñerraꞌm ñeñth ateth naꞌpoktatanet ñenmath paꞌtañneshañ allempo nerranetaꞌ Egiptoth eꞌñe kowen na newamenkoth. Tharroꞌmar allempo ñetpaꞌ ama attheyeꞌ phoneto ñeñth ateth nenanet ñeñthchaꞌ aꞌpoktatawetañ. Ñeñthoꞌmar napaꞌxhoꞌña attha naꞌypoꞌñanet. Ñeñthpaꞌ ateth ot Yompor allempo.

¹⁰ Allempoñapaꞌ oꞌ alla oterrerr Yompor ñeñthara: Esempowañenpaꞌ oꞌch alla naꞌpoktatererr poꞌpoñ ñeñth israelenaꞌtarneshakop. Ñeñthpaꞌ atethchaꞌ neperranet allempo eshekchaꞌña nexhapaterranet neñoñ eꞌñe ñet poeyoxhreto, ñeñthpaꞌ ñatoꞌ oꞌch netmaꞌntacha attho neñoñpaꞌ oꞌ akellkarethterret eꞌñe ñet poeyoxhreto ñeñthchaꞌ kothapeꞌchaterrawetña eꞌñe kowen. Allempoña poꞌñoxhpaꞌ eꞌñech Poꞌyomporer perrnet, napaꞌxhoꞌña eꞌñech neyochreneshaꞌ neperranet ñamet.

¹¹ Ñamha allempo allowenetpaꞌ eꞌñech eñotwerrnanet ñeñthchaꞌ ateth nokthapeꞌchaterranet kowen poeyoxhreto. Allowenetpaꞌ eꞌñech atthekma eñoterrnet pomporneshowenet amaꞌt ñamha añetholleshowen amaꞌt ñeñth atarr sherbets amaꞌt ñamha ñeñth ama esoyeꞌ enteñeto. Ñeñthoꞌmarña allempo ñeñth amhchaꞌnaꞌtpoꞌ entetsapaꞌ ama pallteno oꞌch yexhatan poꞌpotantañ pamoꞌts amaꞌt ñamha paꞌmoꞌnasheñ. Amach eseshaꞌ oterraweteꞌthe theꞌpaꞌ añ poktetsa oꞌch señoter Yompor, tharroꞌmar allempopaꞌ oꞌch eꞌñe eñotwerrnet.

¹² Ñamha napaꞌ eꞌñe nemoereñothanetpaꞌ nephretnerranetchaꞌ poꞌchñaret, amach alla neyerpoerraneteꞌthe poꞌchñaret. Arrpaꞌ allowa ateth ot Yompor awath.

¹³ Ñeñthoꞌmarña yeñoteñ ñeñth attho Yomporpaꞌ all oten eꞌñe etserra oꞌch aꞌpoktaterrey, ñeñthpaꞌ tharroꞌmar ñapaꞌ oꞌ aꞌypoꞌñerran ñeñth atthoch ñanom aꞌpoktatyeñ. Ñamha ñeñth awathotheñ aꞌpoꞌtateñets theꞌpaꞌ oꞌ aꞌypoeñarethterra, ñeñthpaꞌ wañerrchaꞌ.