Hebreos 7 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Jesúspaꞌ atarr kowen korneshatos Partsokop ateth korneshateꞌth ñamha Melquisedec Partsokop awath

¹ Ñewa, theꞌpaꞌ oꞌch alla neyerpaterrsa ñeñth ateth peꞌth ñeñth korneshatatseꞌth awath ñeñthpaꞌ añ paꞌsoꞌcheñ Melquisedec. Ñapaꞌ ñeñth korneshatatseꞌth Partsokop ñeñth atarr partsotets. Ñamha ñapaꞌ ñeñth amhchaꞌtarethtatseꞌth all anetso ñeñth paꞌsoꞌcheñ Salem. Allempopaꞌ korrena ñamha yatañ Abraham. Parrochña Abrahampaꞌ awoꞌ allchaꞌ kellarenanaꞌ poꞌpotantañexhno ñeñth amhchaꞌtarethetyetsa alloꞌmar. Eꞌñe aꞌmchechwawenanetaꞌpaꞌ werra. Allempo err, thoñopaꞌ all poktapoeñ korneshaꞌ Melquisedec. Allña pokteñpaꞌ allentha bensareꞌtamphsapoenan Abraham.

² Ora ñeñth allpon yoramphsan ñeñth oꞌ kellaraꞌwenaꞌpaꞌ allempoña Abrahampaꞌ apwenan korneshaꞌ Melquisedec allpon ñeñth Partsokop. Allpon apweñpaꞌ ñeñthpaꞌ ñeñth allpon otenet la décima parte. Ñeñthpaꞌ ateth ñerraꞌm es eñall ñeñth yechen xharrapaꞌttsokma, patheꞌtetsñapaꞌ oꞌch yeneñ eꞌñe Partsokop. Ñewa, ñeñth soꞌchñetser Melquisedecpaꞌ añ otenet “ñeñth pompor pen allowen amhchaꞌtarethexhno ñeñth eꞌñe pokteꞌ enten Parets.” Allothpaꞌ ñamha ñapaꞌ arr amhchaꞌtarethtena anetso añ paꞌsoꞌcheñ Salem. Ñeñth anetser paꞌsoꞌcheñ añ otenet “moechethteñtsompaño” tharroꞌmar all amhchaꞌtarethtena ñapaꞌ ña orrtateneꞌ eꞌñe kowen morrentannaꞌteñets atthoña yexhenet eꞌñe kowen moecheth.

³ Ñeñth Melquisedecpaꞌ ama eñotpawoyayeña ñeñth pompor peꞌth ñamha ñeñth pachor peꞌth tharroꞌmar ama akellkaretheyaye ñeñth paꞌsoꞌcheñ. Ñamha ñeñth paꞌtañneshañ peꞌth ñeñthpaꞌxhoꞌña ama eñotpawoyaye. Amaꞌt ñamha allempotheñ eñalleta Melquisedec amaꞌt ñamha allempo rroma ñeñthpaꞌxhoꞌña ama eñotpawoyaye. Ñapaꞌ tharroꞌmar ateth peꞌth añ tomaꞌntena ñeñth Poechemer pen Parets. Ñeñthoꞌmarña attho korneshaten ñeñthpaꞌ amach wañerro amaꞌt errponaña.

⁴ Señochepaꞌch korneshaꞌ Melquisedec ñapaꞌ atarr sherben. Amaꞌt yatañ Abrahampaꞌ xhokma es apaneꞌth Melquisedec ateth ñerraꞌmrratheꞌ ñeñth es yenen ñeñth Partsokop. Añ apweñ ñeñth allpon yoramphsan ñeñth oꞌ kellaraꞌwenaꞌ. Allpon apweñ ñeñth ateth ñerraꞌm xho es yenen Partsokop ñeñthpaꞌ ateth ñerraꞌmrratheꞌ ñeñth allpon es yechyen eꞌñe xharrapaꞌttsokma, patheꞌtetsñapaꞌ oꞌch yeneñ eꞌñe Partsokop.

⁵ Ñewa, yeñoteñ levínaꞌtarneshaꞌpaꞌ ñeñthenaꞌtarña anarethtatseꞌth judioneshakop ñeñthchaꞌ korneshatets Partsokop. Ñokpoetña nanña Moisés poꞌñoñ, ñeñthña ñoñetspaꞌ ateth oten ñokpoet: Eꞌñe pokteꞌ secobreñ acheñeneshaꞌ. Apaꞌyenetepaꞌña allponapaꞌtets ñeñth Partsokop, ateth ñerraꞌmrratheꞌ ñeñth allpon yechyen eꞌñe xharrapaꞌttsokma, patheꞌtetsñapaꞌ oꞌch yeneñ eꞌñe Partsokop (ñeñthara otenet diezmo). Ñeñthoꞌmarña xhokma cobreñetña pamoꞌtseshaꞌ amaꞌt eꞌñe ñeñthenaꞌtarekmoet, tharroꞌmar Abrahampaꞌ ñeñthara paꞌtoꞌ phoweñet allowenet.

⁶ Tharraña Melquisedec amaꞌt ñapaꞌ ama levínaꞌtarneshayaye ñañapaꞌ ello metanaꞌtwenanet ñet tharroꞌmar ñapaꞌ amaꞌt yatañ Abrahampaꞌ agapoñeꞌth allpon ñeñthchaꞌ aph Partsokop. Elloña bensareꞌtampenan Abraham amaꞌt Abrahampaꞌ oꞌ otwe Yompor ñach bensareꞌtamphseꞌ. (Abrahampaꞌ eꞌñe pokteꞌ enteñ tharroꞌmar atarr awamenkatheshaꞌ entenan Melquisedec.)

⁷ Ñewa, yeñoteñ poꞌñoxh ñeñth atarr nanak amhchaꞌtarethtetsa ñapaꞌ ñachña bensareꞌtampeneꞌ poꞌpotantañexhno ñeñth ama tama amhchaꞌtarethtetso ateth ñerraꞌm ña. Ñeñthoꞌmarña yeñoteñ Melquisedecpaꞌ atarr sherben tharroꞌmar amaꞌt amhchaꞌtareth Abrahampaꞌ ñapaꞌ ello bensareꞌtampeñ.

⁸ Ñeñth yenten arr patsro ñeñth korneshatets Partsokop, ñetpaꞌ arromñathotha ateth penet. Tharraña amaꞌt arromñathotha ateth penet xhokma agëññañet acheñeneshaꞌ ñeñth apaꞌyenet Partsokop. Melquisedecpaꞌxhoꞌ ñaña agapayeꞌth ñeñth apaꞌyeseteꞌth Partsokop. Tharraña Melquisedec ñeñth ateth anareth Yompor poꞌñoño ñokop ñeñthpaꞌ ateth oten ñerraꞌmrratheꞌ ñapaꞌ ama arromñatheshayaye.

^9-10 Ñewa, ñatoꞌ oꞌch yot Leví amaꞌt allowen poeꞌñareshowen, ñetaꞌnaña agapamphsanet Melquisedec ñeñth allpon apoeñet Partsokop eꞌñe allempokma agapan ñeñth aph Abraham Partsokop. Amaꞌt ama eñalletenaꞌ Leví allempopaꞌ theꞌpaꞌ oꞌch yot ñapaꞌ eꞌñe paꞌtoꞌ Abraham poꞌchtsoꞌtsen allempo, allempo pokten Melquisedec. Ñeñthoꞌmar theꞌpaꞌ oꞌch yot levínaꞌtarneshaꞌ ñeñth poꞌtarwas peneꞌ oꞌch cobran acheñeneshaꞌ atthoch allpon apaꞌyenet Partsokop, ñetaꞌnetepaꞌtña cobraꞌña allempo Melquisedec. Ñeñthoꞌmarña yeñoteñ Melquisedecpaꞌ atarr sherben, ello metanaꞌtwenan levínaꞌtarneshaꞌ ñeñth korneshatyets Partsokop.

¹¹ Ñewa, yeñoteñ awath allempo aparethta israelneshaꞌ ñoñets ñeñth ateth anareth, ñeñthpaꞌ añ orrtateꞌ levíneshaꞌ ñeñth korneshatyestseꞌth awath Partsokop. Tharraña añ ñoñets ñeñth orrtat kornaneshaxhno ñeñthara levíneshaꞌpaꞌ ñeñthpaꞌ amach errothenoth aꞌkowentaterranetoña Yomporekop. Ñerraꞌm poꞌñoxhchaꞌ aꞌkowentatenyeñ amatheꞌ esoꞌmar wapoña Cristo ñeñthchaꞌ korneshatosets ello ñeñth ateth korneshateꞌth Melquisedec, ñeñthpaꞌ ama attheyeꞌ korneshatoso ñeñth ateth korneshaten Aarón ñeñthara levínaꞌtarneshaꞌ.

¹² Ñewa, yeñoteñ ñerraꞌm esempo Yomporpaꞌ orrtaterran poꞌpsheñeñ ñeñthchaꞌ korneshaterrets poꞌpoñoneth, yeñoteñ añ ñoñets ñeñth ateth anareth ñeñth orrtat kornaneshaꞌ levínaꞌtarneshaꞌ ñeñth ñoñtsorpaꞌxhoꞌña oꞌch xha poꞌpoñetwerr.

^13-14 Yeñoteñ Yepartseshar Cristo ñeñthña otenña Yompor poꞌñoñ ñeñthchaꞌña ello korneshatosets. Yeñoteñ ñapaꞌ ama levínaꞌtareyaye, ñapaꞌ judámereñtsoroth eñalleta, ñeñth poꞌpoñ mereñtsor ñeñthara israelenaꞌtar. Ñetpaꞌ ama anaretheyayeto oꞌch korneshatet Partsokop ñeñth ateth anarethta levínaꞌtarneshakop. Moiséspaꞌ ama esoyeꞌ sochaneto ñokpoet amaꞌt poesheñarrotha atthoch korneshatet. Ñamha ñetpaꞌ amaꞌt poesheñarrotheta ama eseshayeꞌ thetso altaro allothekma sherbeñet Parets.

¹⁵ Elloña yeñoteñ oꞌ poꞌpoñet ñeñthchaꞌ eꞌñe kowen korneshaterrets tharroꞌmar allempo orrta Cristo, ñach korneshaterrets ateth anarethteꞌth Melquisedec. Ñapaꞌ ama attheyaye ñerraꞌmrratheꞌ ateth anarethteꞌth levínaꞌtarneshaꞌ.

¹⁶ Attho korneshatos Cristo ñeñthpaꞌ ama añekpayaye atthoch alloꞌna korneshatnen levínaꞌtar ñeñth ateth anarethtenet ñokpoet. Ñapaꞌ añekopña korneshaterr Partsokop tharroꞌmar ñapaꞌ ña atarr awamenkatheshaꞌ ñeñth ama arromñatheshayaye amaꞌt errponaña.

¹⁷ Eꞌñe Cristokop eñotateney añ ñoñets ñeñth ateth anareth Yompor poꞌñoño, ñeñthpaꞌ ateth oteñ Pompor: Phapaꞌ atthoch pekorneshaterrpaꞌ ñeñthpaꞌ amach wañerro amaꞌt eꞌñe errponaña. Eꞌñe ateth oꞌ phaꞌllsensarethterra ateth ñerraꞌm Melquisedec ñeñth korneshatatseꞌth awath.

^18-19 Ñeñth awathotheñ ñoñets ñeñth ateth nonayeꞌth Moisés ñeñthchaꞌ ateth yephoweneñ ñeñthña theꞌpaꞌ oꞌwañchaꞌ yeꞌkwaꞌper tharroꞌmar ñeñthpaꞌ ama eñalle poꞌwamenk atthoch ñeñthchaꞌ yaꞌkowentaterreꞌ Yomporekop, eꞌñe orrena atarr yethorraꞌyeseꞌth. Tharraña theꞌpaꞌ oꞌ orrterrnaya poꞌpoñ ñeñthñapaꞌ ello atarr sherben ñeñthchaꞌ yaꞌkowentaterreꞌ Yomporekop eshekchaꞌ yexherr Yomporesho ñeñthchaꞌña atarr yeyemterraña theꞌ.

²⁰ Yomporpaꞌ eꞌñe ña paꞌsoꞌchño nan poꞌñoñ allempo llesensan Cristo ñach korneshaterrets errponañowen.

²¹ Poꞌpotantañexhno ñeñth korneshatyets ñeñthara levínaꞌtarneshaꞌ allempo akorneshaꞌtarethetyeset ñetpaꞌ ama Yomporeyeꞌ naweto paꞌsoꞌchño atthoch korneshatyeset. Tharraña Cristo allempo allsensarethta atthoch korneshatos, ñeñth eñoraten Yompor Cristokoppaꞌ ñeñthñapaꞌ ateth oten: Yompor oꞌ nan poꞌñoñ eꞌñe ña paꞌsoꞌchño ñeñthoꞌmar amach errothenoth aꞌpoꞌpoñetwerrano poꞌñoñ; (ñeñthpaꞌ ateth ot Cristokop): “Phapaꞌ atthoch pekorneshaterrpaꞌ ñeñthpaꞌ amach wañerro amaꞌt eꞌñe errponaña. Eꞌñe ateth oꞌ phaꞌllsensarethterra ateth ñerraꞌm Melquisedec ñeñth korneshatatseꞌth awath.”

²² Ñeñthoꞌmarña Jesúspaꞌ eñotoxhtaterrnay poꞌñoxh attho Yomporpaꞌ aꞌpoktaterrnay etserra ñeñthña atarr sherbets, ello oꞌ metanaꞌtwerran ñeñth ateth aꞌpoktatonayeꞌth awath.

²³ Ñeñth awathotheñ kornaneshaxhno ñeñthara levínaꞌtarneshaꞌ, ñetpaꞌ epayeꞌ shontaꞌnmoet tharroꞌmar xhokmach rromayeseteꞌth atthoña oꞌwañchaꞌ alloꞌna korneshatyesnenet. Ellopaꞌ oꞌchxhoꞌ wapa poꞌpsheñeñ ñeñthara levínaꞌtar ñeñthchaꞌ alla korneshaterrets. Ñeñthoꞌmar epayeꞌ shontaꞌnma ñeñth korneshatyesnomtseꞌth awathotheñ.

²⁴ Tharraña Cristopaꞌ errponañowenchaꞌ korneshaterr tharroꞌmar ñapaꞌ ama arromñatheshayaye.

²⁵ Ñeñthoꞌmar Cristopaꞌ ña eñoteneꞌ atthoch xhokma aꞌkeshphatenan allowen ñeñth eꞌneneꞌ Yompor ñerraꞌm eꞌñe poeyemteñothet ña, tharroꞌmar ñapaꞌ xhokma alloꞌtsen Pomporesho allekma aꞌpoktatennay ñeñth eꞌñe kowen yokop.

²⁶ Ñeñthpaꞌ eꞌñekaꞌye pokteꞌña yokop oꞌch yechen Yekorneshar ñeñth Cristo tharroꞌmar ñapaꞌ eꞌñe kowen Parets, ama eñalle poꞌchñar amaꞌt mamesha ñeñthchaꞌ aꞌsosyateneꞌ. Ñapaꞌ oꞌ sowanerran allowen ñeñth kotheneꞌ sosyaꞌtsañ oꞌ alla xherr allowanen Yompor poeꞌntaño allña partsotapretenan Pompor.

²⁷ Ñapaꞌ ama attheyeꞌ phoso ñerraꞌm poꞌpotantañ kornaneshaxhno ñeñth awathotheñ. Ñet patheꞌtets yethpaꞌ epayeꞌ moetseteꞌth payaraxhno; ñeñth eyarra poꞌrraspaꞌ alloña peretnataneꞌthña kornaneshaxhno poꞌchñar. Ellonethpaꞌ oꞌch peretnateñet ñamha allowen acheñeneshaꞌ poꞌchñar ñeñthara eyarra poꞌrraso. Tharraña Cristo ñapaꞌ eꞌñe parrocha shatan eꞌñe ñañeña poꞌrras allowenakop ochñartsokop allempo rroma yokop eꞌñe ña poemnenñoth; ñeñthpaꞌ atthoña tsaꞌtwerrnaya yoꞌchñar Pomporesho.

²⁸ Moisés ñeñth ateth nan ñoñets awathpaꞌ ñeñthpaꞌ acheña naꞌyes ñeñthchaꞌ korneshatyesets attheta ñerraꞌmrratheꞌ ya ñeñthey ama kowenakmayeꞌ es petso. Tharraña allempo met allpon charpaꞌ allempoña Yomporpaꞌ oꞌ alla nerran poꞌñoñ eꞌñe ña paꞌsoꞌchño. Allempoñapaꞌ nerran Poechemer ñeñthchaꞌ korneshaterrets ñeñth eꞌñe kowenareꞌ es phaꞌyets Partsokop; ñeñthpaꞌ amach wañerro amaꞌt errponaña. (Ñeñthoꞌmarña Cristopaꞌ eꞌñe etsotwan ñeñth nanak sherbets.)