Hebreos 3 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Jesús ñeñth Yompor Poechemer ña metaneneꞌ amaꞌt Moisés attho atarr sherben ña

^1-2 Ñewa, masheñneshachaꞌ ñamha noxhaneshachaꞌ, sapaꞌ ñeñthes oꞌ saꞌkowentatarethterra Partsokop ñeñthes oꞌ xhoreꞌterres Yompor oꞌch xhapaterres all poeꞌntaño. Theꞌpaꞌ oꞌch notas, oꞌch sokthapeꞌch eꞌñe kowen ñeñth ateth perrnay Cristo Jesús ñeñth yameꞌñerra. Ñapaꞌ attho allsensarethtapaꞌ eꞌñe kowen etsotwan ñeñth ateth llesenseꞌ Pompor. Ñamha ñapaꞌ ña Yekorneshar yepen ñeñth atarr sherbets Partsokop allowenakpay ñeñthey ameꞌñenaya Yompor. Ñapaꞌ eꞌñe atthekma kowen etsotwan ora allpon ñeñth ateth moenach Pompor acheñeneshakop ateth peꞌth ñamha Moisés ñapaꞌxhoꞌña eꞌñe etsotan ñeñth ateth och Yompor allowen poeyochreneshakop. Ñewa, allowen ñeñth poeyochreneshaꞌ pen Yomporpaꞌ ñetpaꞌ paꞌpakëll penanet Yompor.

³ Ñewa, yeñoteñ ñerraꞌm eñall poepawarr pokoll ñeñth thomatenet eꞌñe kowen añchaꞌña atarr kowen yenten ñeñth thomateneꞌ. Amachña aña kowen yenteno pokoll tharroꞌmar pokollpaꞌ ama ñothayeꞌ kowenteno; eñallkaꞌyeña pamoꞌmteꞌ ñeñth aꞌkowentateneꞌ. Atthekmach yeñch ñamha Jesús atarr kowen tharroꞌmar ñapaꞌ attho ameꞌñatana shonteꞌ ñeñthchaꞌ poeyochreneshaꞌ phaꞌ Pompor atthoña thomatosan ñamha pokoll ñeñth atarr kowen ñeñthchaꞌ paꞌpakëll pen Pompor. Moiséspaꞌ amachña ñañeña atarr kowen yenteno tharroꞌmar ñapaꞌ ama ñayeꞌ thomataye ñeñthchaꞌ paꞌpakëll perr Yompor.

⁴ Ñewa, yeñoteñ allowen pokollpaꞌ ama ñothayeꞌ yexhkëno; xhokmakaꞌyeña eñall ñeñth yexhkateneꞌ. Ñeñth yexhkateꞌ esokmañen ñeñth eñalletyetsa ñeñthpaꞌ Yomporña yexhkatwaweꞌ.

⁵ Añña Moiséspaꞌ eꞌñe kowen etsotan ñeñth ateth yechya Yompor; ñeñthpaꞌ oꞌch es eñotatyesan acheñeneshaꞌ tharraña ñeñthpaꞌ tomaꞌnteñtsa. Tsapathonethña Yomporpaꞌ oꞌch eñotaterranet ñeñth eꞌñe eñotoxhen. Amaꞌt eꞌñe kowen etsotenaneñ Moisés allowenakop ñeñth paꞌpakëll pen Yompor allempo, tharraña ñeñth attho sherbenan Yompor paꞌpakllopaꞌ ñapaꞌ attha poeñañra peñ Yompor. Amaña Poechemereyeꞌña peñe.

⁶ Ñapaꞌ añkaꞌyeña Poechemer pen Cristo ñeñthchaꞌ sherberrets tsapathoneth allowenakop ñeñthchaꞌ eꞌñe paꞌpakëll perr Pompor. Ñapaꞌ eꞌñe kowen etsoterran ñeñth eꞌñe Pomporekop. Alloweneypaꞌ eꞌñe paꞌpakëll phoweney Yompor allchaꞌ yexhena ña ñerraꞌm alloꞌnach womenk yeyemoetneña atthochña eꞌñe yoksheñeshokma yekwaꞌwanom ñeñth oꞌpatatenya.

Yomporpaꞌ eꞌñech kowen amesaterran poeyochreshaxhno ñeñthchaꞌ eꞌñe kowen ameꞌñerraya atthoch eꞌñe kowen kosherret

⁷ Ñeñthoꞌmarña Parets Poekamkëñothpaꞌ ateth oten all akellkareth Yompor poꞌñoño ñeñthpaꞌ ateth oten: Ñerraꞌm seꞌmoeñ Yompor attho xhoreꞌtenes theꞌ,

⁸ sañapaꞌ xhochña seꞌmhñoch, amachña xha seꞌcharrtatatsto seyoxher. Amach xha sathpareꞌtatsche ateth peꞌth israelneshaꞌ awath allempo chopeñeꞌchyeseteꞌth amayo. Allñapaꞌ epayeꞌ atsrreꞌmoxhtanaꞌtyesneteꞌth.

⁹ All amayo satañneshaññapaꞌ atarr topatneteꞌth atthoꞌch eñotnet poꞌñoxhoꞌtheꞌ atsaꞌtatañen. Ñetpaꞌ ateth phaꞌyesneteꞌth amaꞌt xhokma entyesoneteꞌth ñeñth norrtatyesaneteꞌth. Paꞌtatsoch xharraꞌ charowa entyesoneteꞌth ñeñth xhokma negatyesaneteꞌth.

¹⁰ Ñeñthoꞌmarña napaꞌ atsrreꞌmoxhen nentyesanet, napaꞌ ateth not: “Ñeñth ateth kothapeꞌchenet poeyoxhro ñeñth ama kowenayaye ñetpaꞌ atarr panteñet nokop. Ama añeyeꞌ moeneneto oꞌch kothapeꞌchet ñeñth kowen nenten na.”

¹¹ Atarr atsrreꞌmoxhen nentaneteꞌth. Ñeñthoꞌmarña ateth not ñokpoet: “Ñetña poꞌñoxh amaꞌt awathapaꞌ amach nexhapaterraneto allchaꞌ poksheñeshothpaꞌ oꞌtheꞌ amesapreterrnetañ.” Ñeñthoꞌmarña ñokpoetpaꞌ ateth nenaꞌ neñoñ eꞌñe na nesoꞌchño.

¹² Ñeñthoꞌmarña, masheñneshachaꞌ ñamha noxhaneshachaꞌ, theꞌpaꞌ oꞌch notas samha, eꞌñech señota seyoxhro ateth sokthapeꞌchyen eꞌñe poesheñaꞌttsos, ñatoꞌpaꞌ amatheꞌ kowenayeꞌ sokthapeꞌcheno, ñatoꞌpaꞌ amatheꞌ poꞌñoxhayeꞌ sameꞌñeñoña Yompor. Ñerraꞌm poꞌñoxh ateth sepenapaꞌ ñeñthpaꞌ ñeñthach sekexhpaterreꞌ Yompor amaꞌt ñeñth Yomporer ñeñth ama arromñatheshayaye.

¹³ Sapaꞌ eꞌñepaꞌchña kowen sokthapeꞌchatannaꞌtnoma patheꞌtets yeth thayepaꞌtñapaꞌ orameñ yeth allempotheñ oꞌ xhoreꞌterrey Yompor. Atthochña soꞌchñarpaꞌ amach errothenoth alla shekërrserro. Atthoch amach xha seꞌcharrteno seyoxhro allochñapaꞌ amach alla sathpareꞌtere Yompor, amaꞌt eꞌñe poesheñarrothesa.

¹⁴ Alloꞌnepaꞌchña eꞌñe womenk yephaꞌnom yeyoxher. Eꞌñepaꞌchña yeyoxhrokmañen yeyemteña Cristo ateth yepha allempo eꞌñe errtey ameꞌñenaya. Ñerraꞌm atethchaꞌ yeyemoetnomha allempopaꞌ yagapapreterchaꞌ Cristo ñeñth oꞌpatateña Pompor.

¹⁵ Ñeñthoꞌmarña oꞌch alla neyerpaterrserr ñeñth ateth oten Yompor poꞌñoñ ñeñth akellkareth awathotheñ, ñeñthpaꞌ ateth oteney: Ñerraꞌm seꞌmoeñ Yompor attho xhoreꞌtenes theꞌ sañapaꞌ xhochña seꞌmhñoch, amachña xha seꞌcharrtatatsto seyoxher. Amach xha sathpareꞌtatsche ñeñth ateth peꞌth israelneshaꞌ awath allempo chopeñeꞌchyeseteꞌth amayo.

¹⁶ Ñamha theꞌpaꞌ oꞌch neyerpaterrserr ñeñth athpareꞌtyesayeꞌth Yompor allempo poexhoreꞌteñothpaꞌ eñoranaꞌtaneteꞌth, ñetpaꞌ ñeñthareta ñeñthet xhaꞌnmaxhaꞌtaterr Moisés Egiptoth.

¹⁷ Ñamha oꞌch neyerpaterrserr, ñeñth atarr atsrreꞌmoxhen entyeseꞌth Yompor awath amaꞌt paꞌtatsoch xharraꞌ charowa, ñetpaꞌ ñeñthareta ñeñthet atarr ochñaꞌtareꞌtatseteꞌth. Ñeñthoꞌmarña ñet allempopaꞌ eꞌñe alla kollaꞌwet amayo.

¹⁸ Ñamha oꞌch neyerpaterrserr, ñeñth otarethtatsa allempo ñetpaꞌ amaꞌt awathapaꞌ amach amnatarethterreto atthoch poksheñeshothetpaꞌ oꞌtheꞌ amesapreteretañ Yompor, ñeñthpaꞌ ñeñthara ñeñthet atarr athparñathtatseteꞌth. Ñeñth ateth otarethteteꞌth allempo, Yomporña nawet poꞌñoñ eꞌñe ña paꞌsoꞌchño, tharroꞌmar ñapaꞌ ama poenesho poꞌñoñ.

¹⁹ Atthoña yeñotenanet ñetpaꞌ amaꞌt poesheñarrothetapaꞌ amach eshkayeꞌ xhapoeto allchaꞌ yexhaꞌwerretañ eꞌñe kowen poeñmañeshaꞌ tharroꞌmar ñetpaꞌ ama eseshayeꞌ kowen ameꞌñayo Yompor.