Hebreos 13 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Atethchaꞌ yepha atthoch eꞌñe kowen yokshach Yompor

¹ Attherepaꞌch xhokma semorrentannena allowenes ateth ñerraꞌm eꞌñe semoꞌnasheñ sephannaꞌtwena.

² Ñamha amach sepsatsto atthoch eꞌñe kowen sagaph allowen amaꞌt esesha ñeñth wapyetsa sepakllo. Tharroꞌmar ama señotannaꞌtweno; ñatoꞌrraña añ sagën ñeñth moeñen Yompor ateth pena poꞌpotantañ ñetpaꞌ añepaꞌt agapoet mellañotheñ.

³ Ñamha xhokmoepaꞌchña seyerepya ñeñth ayottamphsarethetyetsa. Eꞌñech kowen sellkapretenanet ateth ñerraꞌmrratheꞌ sapaꞌxhoꞌña ayottamphsarethes eꞌñe parro. Ñamha ñeñth amoeroxhtatarethetyetsa eꞌñepaꞌch kowen sellkapretenanet ñamet tharroꞌmar sapaꞌxhoꞌña señoteñ atthekma errothenopaꞌ xhokmach semoeroxhtena samha eꞌñe sechtso.

⁴ Ñamha oꞌch notas poꞌpoñ: Allowenes ñerraꞌm esempo sesnaꞌtena oꞌ eꞌñe seyorannaꞌta epas sethapor eꞌñepaꞌch kowen sentña ñeñth attho seyorannena. Amaꞌt parrochapaꞌ amoepaꞌchña seꞌnamphsannaꞌtatsto. Yakmapaꞌ amach chetatstano koyaneshaꞌ ñeñth ama poethaporeyaye amaꞌt eꞌñe parrocha. Koyaneshaꞌpaꞌxhoꞌña amach agapatstanoña ñamha ñeñth ama poerrollareyaye amaꞌt eꞌñe parrocha. Tharroꞌmar Yomporpaꞌ xhokmach tsaꞌtaterrana ñeñth cheteneꞌ ñeñth ama poethaporeyaye amaꞌt ñamha ñeñth agëneꞌ ñeñth ama poerrollareyaye.

⁵ Ñamha theꞌpaꞌ oꞌch noterrserr poꞌpoñ: Amoepaꞌchña aña atarr seyeꞌchapretatsetyesatsto kelle. Eꞌñepaꞌchña aña sokshena ñeñth eꞌñe allpona sechyen. Tharroꞌmar Yomporpaꞌ ateth oteney: “Napaꞌ amaꞌt awathapaꞌ amach nekexhpoerrso, amach naꞌypoꞌñerrso amaꞌt awatha.”

⁶ Ñeñthoꞌmarña yeyemteñoth Yompor eꞌñech yoksheñeshoth xhokmoepaꞌch ateth yoten: Yomporpaꞌ ñeñthña yeyenpoeneꞌ ñeñthoꞌmarña amach es yemhchaꞌtatsto. Amaꞌt errothwanen moeneꞌ peney poꞌpotantañ Yomporpaꞌ ñach yekwampeneꞌ.

⁷ Ñamha seyerpoeñoth xhokmoepaꞌch kowen senteñ ñeñth aꞌpotheneꞌ Yompor poꞌñoñ sokop, ñeñthchaꞌ señotatnomoeꞌ kowen. Ñamha oꞌch sokthapeꞌch ñeñth atarr kowenareꞌ orrtatyesnomoet sesho, attho ñetpaꞌ eꞌñe kowen yemteñet Yompor, sapaꞌxhoꞌña atethchaꞌ sepha samha yemtenaya Yompor eꞌñe kowen.

⁸ Jesucristo ñapaꞌ attherach yeyemteña amaꞌt awathotheñ, amaꞌt themeꞌttsen, amaꞌt ñamha errponañowen ñeñthach atthera ayemoetpotena.

⁹ Ñeñthoꞌmarña amach seyemtatstoña ñeñth poꞌpoñexhno yexhateñets ñeñth ama attheyeꞌ ayxhataretheso awañmoꞌchotheñ. Tharroꞌmar añña poktetsa oꞌch womenk yephaꞌ yeyoxher eꞌñe Yompor poemorrenteñothey attho atarr yenpoeney eꞌñe attha. Ama añotheyeꞌ womenk yepenoña yeyoxher attho es yerraꞌyen amapaꞌ attho es yethoreꞌtyena. Tharroꞌmar ñeñth kotheneꞌ añ yexhateñets rreñtsokpaꞌna, ñeñth yexhateñtsorpaꞌ ama yenpoenaneto atthoch womenk phaꞌnmoet poeyoxher Yomporekop.

^10-11 Ñewa, yeñoteñ ñeñth korneshatets judioneshakop ñerraꞌm esempo moetsenet eyarra all altaro ñeñth poꞌchñarekpoet, ñeñthña eyarra poꞌrraspaꞌ ñeñthpaꞌ oꞌch anemh korneshaꞌ eꞌñe allowanen Parets poꞌponro ñeñth ochñartsokpatets. Tharraña ñeñthña eyarra poꞌchetspaꞌ amach eseshaꞌ rrenaye. Ñeñthña poꞌchetspaꞌ oꞌch anmet aꞌyo all ama acheñempañoyaye, allchaꞌ chamoset. Tharraña theꞌña yokop ñeñth amtsarethterrtsa yoꞌchñarekop ñeñthpaꞌ Cristo. Yapaꞌ ñeñth poꞌñoñ pokrramh pen yekamkëñ alloweney ñeñthey yemtenaya ña. Tharraña ñeñth atthera korneshatets judioneshaꞌ pokthaphñakop all poꞌprawo peñet, ñetpaꞌ amach errothenoth pokrramh petoña Cristo.

¹² Ñamha attho anenan judioneshaꞌ eyarra poꞌchets aꞌyo all ama acheñempañoyaye, ñeñthpaꞌ añ tomaꞌntena attho Cristopaꞌxhoꞌña anmet aꞌyo all ama acheñempañoyaye allchaꞌ eꞌñe poemoeroxhtateñothetpaꞌ oꞌch rroma. Atthoña eꞌñe ña poꞌrraso aꞌkowentaterrey Partsokop.

¹³ Ñeñthoꞌmarña theꞌpaꞌ eꞌñepaꞌchña yeswanom ñeñth awath yokthaphña ñeñthara ñeñth yaꞌnetser yepenpaꞌ oꞌch awey aꞌyo alloꞌtsen Jesús. Allchaꞌña yemoeroxhtapretosya yamha all atarr otnareꞌtyeñet.

¹⁴ Tharroꞌmar añe patserpaꞌ ama añeyaye ñeñth poꞌñoxh yaꞌnetser yepen tharroꞌmar ñeñthpaꞌ wañerrchaꞌ. Yapaꞌ añña yeꞌnen ñeñthchaꞌ yaꞌnetser yeperr ñeñthchaꞌ yenterr Yompor poeꞌntaño ñeñth ama awañaño amaꞌt eꞌñe errponaña.

¹⁵ Eꞌñe yeyemteñoth Jesucristo xhokmoepaꞌchña yaꞌyeꞌchoxhtateññañ Yompor. Attho xhokma yaꞌyeꞌchoxhtateññañ ñeñthpaꞌ añ tomaꞌntena ñeñthchaꞌ yapoeñ Yompor ateth peteꞌth awath oꞌch moetset eyarra ñokop. Eꞌñepaꞌchña ya yenamoth yaꞌyeꞌchoxhtateññañ paꞌsoꞌcheñ atthochña eꞌñech yokshateñ.

¹⁶ Ñamha xhokmoepaꞌchña eꞌñe kowen seyenpannena ñamha eꞌñech kowen saꞌmoerañtena. Tharroꞌmar theꞌpaꞌ ñeñthña attho es yapoeñ Yompor ñeñthchaꞌ atarr koshateneꞌ ña.

¹⁷ Ñamha ñeñth saꞌmhchaꞌtaretherneshaꞌ sephaꞌyenpaꞌ xhokmoepaꞌchña sameꞌñenanet, tharroꞌmar ñetpaꞌ añekop anarethtenet ñetchaꞌ kowampenet sekamkëñ Yomporekop. Ñamha Yomporpaꞌ eñotatwerranetchaꞌ ñeñth ateth phaꞌyenet, ñatoꞌ eꞌñetheꞌ kowen kowampenset ñatoꞌpaꞌ amatheꞌ kowenayeꞌ kowampenseto. Ñeñthoꞌmarña sokoppaꞌ añ poktetsa eꞌñechña kowen sameꞌñenanet atthochña ñetpaꞌ eꞌñech poksheñeshokmañen thorrenet sokop. Amoepaꞌch xha sellkatatstenaneto tharroꞌmar ñerraꞌm atethpaꞌ amach errothenoth koshaterrsetoña samha.

¹⁸ Ñamha theꞌpaꞌ oꞌch notas, xhokmach semaꞌyochampenya. Yapaꞌ yeñotena yeyoxhro ama eñalle atthoch poꞌpoñ yentannena. Yapaꞌ añña yemnen xhokmach yorrtatyen ñeñth atarr kowen enten Yompor.

¹⁹ Ellopaꞌ oꞌch alla noterrserr xhokmach semaꞌyochampesna allochñapaꞌ amach atarr atomatatstopaꞌ oꞌch alla nexherrerr sesho.

Arrpaꞌ all soꞌtnerranet poꞌcartoth

^20-21 Theꞌñapaꞌ Yomporepaꞌchña eꞌñe awamenkath sepeneꞌ amaꞌt allowen paꞌnamenakop ñeñth atarr sherbets ñokop. Eꞌñe yameꞌñeñoth Poechemer ñeñth Jesucristo ñachña yaꞌkowentateneꞌña ora yokthaphña ñeñth ateth yokthapeꞌchyen yeyoxhro allochñapaꞌ atthochña eꞌñe kowen yokthapeꞌcherr ora allowen ñeñth kowen enten ña. Atthochña eꞌñech kowenareꞌ sorrtatyen ñeñth eꞌñe ateth moenen ña. Ñeñthpaꞌ ñeñthara Yompor ñeñth eꞌñe yokshateneꞌ yeyoxhro ñamha ñeñthara ñeñth tantaterreꞌ Poechemer rromoth ñeñth Yepartseshar yepen, Jesucristo ñeñthña atarr kowen yekwampeneꞌ ateth ñerraꞌmrratheꞌ ñeñth atarr kowen kowampeneꞌ poꞌcarneror. Eꞌñe poꞌrrasoña alloña aꞌpoktatonay ñeñth eꞌñe etserra ñeñthña aꞌpoktateñetspaꞌ amaꞌt errponañapaꞌ amach wañerro. Theꞌña eꞌñe thayotheñpaꞌ yekowentatoñepaꞌch Cristo amaꞌt errponowañen. Ñeñthpaꞌ atthetepaꞌch Nompore yokop.

²² Eꞌñe allowanen masheñneshachaꞌ ñamha noxhaneshachaꞌ oꞌch alla noterrserr, eꞌñepaꞌch kowen seꞌmhñoton neñoñ ñeñth allpon oꞌ alla nokthapeꞌchaterres tharroꞌmar ama atonayeꞌ ñoñets nekellkënnaso.

²³ Ñamha oꞌch neñotatas masheñ Timoteopaꞌ oꞌ alla aꞌrroyeret. Ñerraꞌm awenchaꞌ xhap arrpaꞌ epsheñoꞌmareypaꞌ oꞌch awey oꞌch yemoꞌtensaꞌ.

²⁴ Ñamha napaꞌ nemnen oꞌch newomhchaꞌch necartoth allowen ñeñth saꞌmhchaꞌtaretherneshaꞌ sephaꞌyen, ñamha allowen masheñneshaxhno ñeñth poeyochreshaꞌ pen Parets all sesho. Ñamha italioꞌmarneshaꞌ ñeñth ameꞌñetsapaꞌ ñetpaꞌxhoꞌña moeneñet oꞌch womhchaꞌtaset ñamet añ necartoth.

²⁵ Theꞌñapaꞌ Yomporepaꞌch saꞌnataya allowenes. Ñeñthach notas, ñeñthpaꞌ atthetepaꞌch Nompore. Allowa.