Hebreos 12 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Xhokmoepaꞌchña eꞌñe yeyemoetneña Yepartseshar Jesús

¹ Ñeñthoꞌmarña yeñoteñ shonteꞌ acheñ ñeñth orrtatyesayeꞌth awathotheñ; eꞌñe poeyemteñothet Yompor eꞌñe etsotayeseteꞌth Yomporekop ñeñth atarr echarr. Ñamha ñet theꞌpaꞌ oꞌch netmaꞌntatanet ñerraꞌmrratheꞌ allowenetpaꞌ oꞌ kowapreterryet yamha oꞌch entyesyet errothenchaꞌ yetsota yamha ñeñth ateth moenateney Yompor. Ñeñthoꞌmarña yokoppaꞌ añ poktetsa oꞌch eꞌñe yeswanom amaꞌt erraꞌtsena ñeñth yepatareꞌteneꞌ amaꞌt ñamha yoꞌchñar ñeñth atarr yetpatyeneꞌ. Ñamha eꞌñepaꞌch yaꞌwantaꞌwanom allowen ñeñth echarr yentyen. Allochñapaꞌ atthoch eꞌñe kowen yetsoteññañ ñeñth ateth moenateney Yompor. Ñeñthpaꞌ eꞌñe ateth ñerraꞌmrratheꞌ ñeñth matetsa ñetpaꞌ xhokmach xhapoet allowa onañcharethtenet ñokpoet.

² Añchaꞌña xhokmoepaꞌchña eꞌñe yeyemoetneña Jesús ñeñth orrtaterreꞌ atthoch yeyemtera ñamha ñeñthchaꞌ yetsotaterreꞌ ñeñth attho atarr yeyemoetneña. Tharroꞌmar ñapaꞌ eꞌñe pokteꞌ eñcheꞌth oꞌch awantaꞌwan allowen ñeñth echarr enteꞌth amaꞌt attho rroma korsocho. Amaꞌt ñeñth atarr apenkoxhen entyenet, ñapaꞌ eꞌñe poktakma awantaꞌwanemh. Tharroꞌmar eꞌñe poeyemteñotha Pompor ñapaꞌ eñoteñ ñach apapoerreꞌ ñeñthchaꞌña atarr koshatwerreꞌ. Ñeñthoꞌmarña theꞌpaꞌ oꞌ alla anorrwerr Pompor poꞌkowenroth all anen poꞌkonaño allña partsotwerr ñamha.

³ Ñewa, theꞌ sapaꞌ oꞌch alla seyerpoera Jesús attho ñapaꞌ atarr moeroxhtater ñeñth atarr ochñatheneshaꞌ ñeñth atarr eꞌmoñeꞌtayeꞌth. Tharraña ñapaꞌ allowen moeroxhteñetspaꞌ eꞌñe awantaꞌwanemh. Allochñapaꞌ sapaꞌxhoꞌña amach xha semoenmeꞌchatsche ñeñthchaꞌ atarr echarr sewapoya, atthochña amach xha llekatenso.

⁴ Tharraña saña amaꞌt atarr sathpareꞌtyeñeñ attho atarr topataseꞌth soꞌchñar amaña xhoyeꞌ moetsenseto ñeñth ateth apharethta Jesús, ashatarethta poꞌrras ochñartsokop.

⁵ Ñamha sapaꞌ oꞌtheꞌ xha sepoeswa ñeñth ateth kothapeꞌchateney Yompor poꞌñoño alloweney ñeñthey poechemer pen. Ñeñthpaꞌ ateth oteney poꞌñoñ: Nechemere, ñerraꞌm esempo kothapeꞌchaterres kowen Yompor amachña attha sentatsche ñerraꞌm ama esoyeꞌ sherbeno. Ñamha ñerraꞌm esempo koñchatas mameꞌ atthoch oꞌch alla sokthapeꞌcherr kowen amachña ñeñthotha xha moeneꞌ sekexhpatstere.

⁶ Tharroꞌmar alloweney ñeñthey morrentena Yompor ñeñtheychaꞌña kothapeꞌchaterr kowen. Ñamha alloweney ñeñthey poechemereshaꞌ pen ñeñtheychaꞌña koñchatyes mameshaꞌtets atthoch oꞌch alla yokthapeꞌcherr kowen ñokop.

⁷ Eꞌñepaꞌchña yaꞌwantaꞌwanom attho koñchateney mameꞌ tharroꞌmar ñapaꞌ añ moenen oꞌch eꞌñe poechemer perrey poktakma. Ñewa, yeñoteñ eꞌñe pokteꞌ attho ñeñth achemereshath errothenopaꞌ oꞌch koñchachet poechemer mameꞌ allochñapaꞌ atthoch eꞌñe kowen ameꞌñenanet poechemer.

⁸ Tharroꞌmar ñerraꞌm eseshaꞌ ama koñchatenaye mameꞌ poechemer atthoch eꞌñe kowen ameꞌñachet ñeñthpaꞌ poꞌñoxh ama poechemereyeꞌ peñe; ñeñthpaꞌ xha ottena ñerraꞌm ellapnaneshaꞌ. Ñeñthoꞌmar sapaꞌxhoꞌña ñerraꞌm ama koñchatenso Yompor mameꞌ atthoch sameꞌñya eꞌñe kowen poꞌñoxh amakaꞌye poechemereyeꞌ penso.

⁹ Elloña yeñoteñ allempo cheshenyaꞌ ñeñth yompor yepen arr patsro attho eꞌñe kowen kothapeꞌchatyesyeꞌth, ñeñthpaꞌ eꞌñe pokteꞌ yeñcheꞌth tharroꞌmar yeñoteñ ñeñthpaꞌ eꞌñe kowen yokop. Ñeñthoꞌmarña theꞌpaꞌxhoꞌña eꞌñepaꞌchña kowen yenteñ attho Yomporpaꞌ oꞌ kothapeꞌchaterrey kowen ñeñthara Yompor ñeñth poeꞌntañoꞌtsen ñeñth pamoꞌmteꞌ pen yekamkëñ atthoña yapaꞌ korretsayach.

¹⁰ Ñewa, ñeñth yamoꞌmteꞌ yepen arr patsro ñetpaꞌ eꞌñe allponmata kothapeꞌchatyesyeteꞌth allempo yapaꞌ cheshenyaꞌ. Ñetpaꞌ xhokma koñchatyesyeteꞌth allpon pokteꞌ entyeseteꞌth ñet. Ñamha Yompor attho allpon koñchatyeney mameshaꞌtets ñeñthpaꞌxhoꞌña eꞌñe kowenakma yokop allochñapaꞌ yapaꞌxhoꞌña eꞌñech kowenareꞌ es yorrtatyen eꞌñe ateth ñerraꞌm ñapaꞌ eꞌñe kowenareꞌ es orrtatyen.

¹¹ Ñamha yapaꞌ yeñoteñ ñerraꞌm eseshaꞌ yekoñchateneꞌ ñeñthpaꞌ ama kowenayeꞌ yenteñe eꞌñe allempo koñchatenyet, tharroꞌmar ñeñthpaꞌ xhokmach llekatenyet. Tharraña poekoñchateñothetaypaꞌ oꞌch yeñoterr ñeñth atarr kowen enten Yompor. Allochñapaꞌ atthochña eꞌñech yoksheñeshaꞌ yeyxhena kowen moecheth.

Ñatoꞌtña attha es sepxhampenaꞌña ñeñth ateth anareth Partseshoth sokop theꞌtña ama sexherro ñesho

¹² Ñeñthoꞌmarña theꞌpaꞌ oꞌch notas, oꞌch alla setanterra oꞌch alla saꞌwamenkathterra Yomporekop. Atethchaꞌ netmaꞌntatasa ateth ñerraꞌmrratheꞌ oꞌ alla awamenkath seperr sot ñeñth xha yonkotaꞌten ñamha attho seyonllokmeꞌchenpaꞌ oꞌch alla awamenkath seperr sellokëmh.

¹³ Eꞌñepaꞌch kowen es sorrtatyen allochñapaꞌ ñerraꞌm eseshaꞌ ama eꞌñeyeꞌ womenkayeꞌ penaye poeyoxher Yomporekop, sañapaꞌ amach aña sorrtateno ñeñthchaꞌ aꞌpoerrataterrawet. Añchaꞌña sorrtateññañ ñeñthchaꞌ eꞌñe kowen yenpoeneꞌ. Ñeñthpaꞌ atethchaꞌ netmaꞌntatasa ñerraꞌmrratheꞌ sapaꞌ añ seꞌnen thoñ ñeñth atarr kowen paxharr sets moepñarero allchaꞌ eꞌñe kowen sechopeꞌchen. Allochñapaꞌ ñerraꞌm eseshas chekaꞌrepoets amach xha sepothoꞌtatseꞌtnomo amach xha saꞌtserrphaꞌnmo atthochña eꞌñe kowen sechopeꞌchnom eꞌñe womenk.

¹⁴ Añepaꞌchña semaꞌyoxhrena atthoch eꞌñe kowen samoꞌtstannena, eꞌñech moecheth seyxhena epas allowen samoꞌtseshaxhno. Ñamha añchaꞌña sokthapeꞌchyen ñeñth eꞌñe kowenareꞌ enten Parets. Tharroꞌmar ñerraꞌm añ ama yokthapeꞌcheno ñeñth kowenareꞌ enten Paretspaꞌ amach errothenoth yentereña Yompor.

¹⁵ Ñamha señotannaꞌtnomoepaꞌch, ñatoꞌ eseshaspaꞌ ama añeyeꞌ eꞌneno Yompor ñeñthchaꞌ yenpoeꞌ. Ñamha señotannaꞌtepaꞌch ñatoꞌtña amaꞌt eꞌñe mameshapaꞌ sorrtatenaꞌña atthoch seꞌmoñeꞌtannaꞌta. Ñerraꞌm ateth sepenapaꞌ akophotheñpaꞌ oꞌch eꞌñe epaꞌwapaꞌ xhach orrtatan atsrreꞌmoxhen. Atthoña ñerraꞌm shonteꞌ acheñeneshaꞌpaꞌ xhach aꞌsosyatwanet; ñeñthpaꞌ ama pokteyeꞌ enteñe Parets. Ñeñthpaꞌ atethchaꞌ netmaꞌntacha ñerraꞌmrratheꞌ narmets ñeñth atarr pesherr yeꞌmoen.

¹⁶ Ñamha señotannaꞌtnomoepaꞌch ñatoꞌtña eseshaꞌ chetenayaꞌña ñeñth ama poethaporeyaye. Amapaꞌ ñatoꞌtña attha es sepxhampenaꞌña ñamha ñeñth atarr sherbets Partsokop, ñeñth ateth pha awath Esaú. Ñapaꞌ eꞌñe paꞌchporrñotha pomwan ñeñth anareth ñokop Partseshoth. Ñeñthpaꞌ ñeñth oꞌpatacha pompor ñeñth metanaꞌtweneꞌ ñeñthchaꞌ allpon apaꞌnman poꞌpoñ poechemereshaꞌ tharroꞌmar ñapaꞌ ñeñth eꞌñe poꞌmother pen pompor. Tharraña Esaúpaꞌ ama esoyeꞌ enteñe ñeñth anareth ñokop Partseshoth ñeñthoꞌmar eꞌñe pomwan ñeñth oꞌpatacha pompor amaꞌt eꞌñe parrocha rrachet.

¹⁷ Tharraña eꞌñe allponmatapaꞌ yeñoteñ oꞌ alla moenerran ñeñth anareth ñokop Partseshoth, tharraña allempopaꞌ amach errothenoth alla apoereterro. Amaꞌt poeyaꞌchpeñeshaꞌ enamoerreñ allempopaꞌ amatheꞌ errothenoth aꞌpoꞌpoñeterretoña ñeñth ateth oꞌ phowet ñenmath.

¹⁸ Ñewa, yeñoteñ awath allempo Yomporpaꞌ eñotatan israelenaꞌtarneshaꞌ atthoch aꞌpoktatanetañ Parets all aspentho Sinaíphno, ñeñthpaꞌ atarr yoroxhen. Allña aspentho ñerraꞌm eseshaꞌ xhapats amaꞌt paꞌrrphapaꞌ allorokmach errothtoset all. Ñeñthña aspentherpaꞌ all worten tsoꞌ ñamha ama machekmeto, amhchaꞌnoxhtena, womenkëshaten.

¹⁹ All eꞌmorrtena ñamha poktor atarr yoroxhen. Attho eñoranaꞌtanet Paretspaꞌ atarr amhchaꞌnoxhen enteñet. Ñeñthoꞌmarña acheñeneshaꞌ ñeñth eꞌmhñoteneꞌ attho eñorena Parets, ñetñapaꞌ ateth otyenet. “Ñeñthepaꞌtha amach alloꞌna eñoranaꞌtnenye Parets.”

²⁰ Ama eshkayeꞌ awantenayeꞌ enteñeto ñeñth ateth otarethtenet: “Ñerraꞌm eseshaꞌ xhapats ñeñth aspenthero amaꞌt paꞌrrphapaꞌ amtsarethtetepaꞌ —arrolleꞌtarethtetepaꞌch amapaꞌ enapecharethtetepaꞌ panmeto. Amaꞌt ñamha eyarra moetsetepaꞌ.”

²¹ Amaꞌt Moiséspaꞌxhoꞌña atarr yoroxhen enteñ, amaꞌt ñapaꞌ ateth otanet: “Amaꞌt napaꞌ nemhchaꞌnaꞌteñothpaꞌ xha neyonshemaꞌten.”

²² Tharraña sapaꞌ ama sentare aspeneth all amhchaꞌnoxhtena Parets. Sapaꞌ aña senterr ñeñth Siónapen ñeñth tomaꞌntenaya all yexhena Yompor ñeñth ama arromñatheshayaye. Ñamha aña senterr Jerusaléñ ñeñth tomaꞌntenaya Yompor paꞌnetser ñeñth poeꞌntañoꞌtsen. Allñapaꞌ shonteꞌ koshameꞌtampeña mellañotheñneshaꞌ shonteꞌ nanak. Ñeñth allpon alloꞌtsaꞌyenpaꞌ ama eꞌñotwapawoyaye.

²³ Ñamha sapaꞌ aña senterr allowen ñeñth poechemereshaꞌ oꞌ perr Parets ñeñth apxhetsa pameꞌñeñothet ña. Ñetña allowenetpaꞌ ñeñthet akellkarethet paꞌsoꞌchñexhno Yompor poeꞌntaño. Ñamha sa theꞌpaꞌ oꞌ senter Yompor ñeñthchaꞌ yeñotaterreꞌ alloweney erraꞌtsenchaꞌ kowen entyeswerr ñamha erraꞌtsenchaꞌ ama kowenayeꞌ entyeswerro. Ñamha alloꞌtsaꞌyen allowen acheñeneshaꞌ poekamkëñexhno ñeñth eꞌñe pokteꞌ enten Yompor; ñeñthñapaꞌ oꞌ eꞌñe etsotatwanet all poeꞌntaño.

²⁴ Ñamha theꞌ oꞌ senter ñamha Jesús ñeñth eñosets yokop Yomporesho atthoch eꞌñe kowen aꞌpoktatonay etserra. Ñamha oꞌ señoterrñañ poꞌrras ñeñth ashatarethtatsa alloña oꞌ aphretnarethterraña yoꞌchñar. Ñeñthpaꞌ elloña eꞌñe kowen yenpoerrey. Ñeñthpaꞌ ama attheyaye ñerraꞌm Abel poꞌrras ñeñth ashatarethtatsa awath.

²⁵ Ñeñthoꞌmarña theꞌpaꞌ oꞌch notas, seꞌmhñoterepaꞌch Yompor ñeñth seꞌñoranaꞌtenaya theꞌ. Tharroꞌmar awath israelenaꞌtarneshaꞌ ñeñth ama eꞌmhñotayeꞌthe Yompor allempo eñoranaꞌtaneteꞌth arr patsro, ñetñapaꞌ ama eseshayeꞌ keshphatso. Ñeñthoꞌmarña yeñoteñ ñerraꞌm yapaꞌ amach yeꞌmhñotere yamha Yompor ñeñth yeꞌñoranaꞌtenaya theꞌ poeꞌntañoth, elloña yapaꞌxhoꞌña amaꞌt poesheñarrotheyapaꞌ amach eseshay keshperrtso.

²⁶ Awath allempo eñoranaꞌtanet aspenthoth, poꞌñoññapaꞌ xha pelleꞌllchatenan pats. Ñamha theꞌpaꞌ elloña oꞌ alla ateth oterrerr Yompor ñeñthchaꞌ ateth perrerr, ñeñthpaꞌ ateth oten: “Elloña esempowañen poꞌpocheñopaꞌ oꞌch alla nepelleꞌllchaterrerr pats, tharraña amach ñapthayaya pats nepelleꞌllchaterro, entaꞌnachña nepelleꞌllchaterr.”

²⁷ Ñeñthña poꞌñoñer all oten “poꞌpocheño” ñeñthña yeñotateneꞌ esempowañenpaꞌ awaporeꞌtarethterrach allowen ñeñth ayexhkatareth ñeñth apelleꞌllchatpoꞌ. Allempopaꞌ añach aꞌpoerrtsa ñeñth ama apelleꞌllchatpawoyaye.

²⁸ Ñamha attho amhchaꞌtarethtena Yompor, ñeñthpaꞌ ama apelleꞌllchatpawoyaye. Ñeñthoꞌmarña yeparasyosoꞌchepaꞌch Yompor tharroꞌmar ñeñth oꞌpatatenyapaꞌ ama awaporeꞌtpawoyaye. Eꞌñe yemhchaꞌnaꞌteñothpaꞌ eꞌñepaꞌchña kowen yesherbeñ Yompor ñeñthchaꞌ eꞌñe koshateneꞌ ña.

²⁹ Tharroꞌmar yeñoteñ ñeñth Yeyomporer yepen ñapaꞌ atarr Parets eꞌñe ateth ñerraꞌm tsoꞌ ñeñth eꞌnweneꞌ amaꞌt erraꞌtsena ñeñth ama erroth apen yenteno.