Hebreos 11 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Eꞌñe yeyemteñoth Yomporpaꞌ eꞌñech kowen es yetsotayen ñokop

¹ Ñewa, allempo poꞌñoxh yeyemteña Yompor eꞌñe yeñoteñ xhokmach apoerrey amaꞌt esempo ñeñth atarr yekwen theꞌ eꞌñe yenamoeñoth. Amaꞌt ama yenteñaꞌ eꞌñe yeyoxhroña yeñoteñ ñeñth yekwen theꞌ poꞌñoxhpaꞌ apoerreychaꞌ amaꞌt esempo.

² Yatañneshañ awathpaꞌ atarr yemoetyeseteꞌth Yompor. Ñeñth attho yemoetyesyeteꞌth Yomporñapaꞌ eꞌñe pokteꞌ entyesaneteꞌth.

³ Ñamha ya eꞌñe yeyemteñoth Yompor theꞌñapaꞌ oꞌ yeñoter allpon ñeñth yentyen arr patsro ñeñthpaꞌ eꞌñe poꞌñoñotha yexhkaꞌwa. Allempopaꞌ amaꞌt koñeꞌtha ama es orrtetso ñeñthchaꞌ paꞌnamen yexhkatyes ñeñth ateth yentyen theꞌ.

⁴ Ñamha Abel awath attho yemtaneꞌth Yompor, ñapaꞌ apan Yompor ñeñth atarr koshateꞌ. Paꞌmoꞌnasheñña Caín amaꞌt apaneñ ñamha Yompor, ñeñthñapaꞌ ama koshatano Yompor. Ñeñthoꞌmar Yomporpaꞌ eꞌñe kowen agapan ñeñth aph Abel; atthoña Yomporpaꞌ eñotatanet eꞌñe pokteꞌ entapretan Abel. Tharraña Abel amaꞌt rromañpaꞌ attho atarr yemtaneꞌth Yompor, ñeñthpaꞌ eꞌñe themeꞌttsen eñotateney ñeñth kowen enten Yompor. Ñeñthpaꞌ atthemaꞌth ñerraꞌmrratheꞌ Abelpaꞌ themeꞌttsen serrpareꞌtateney kowen.

⁵ Ñamha awath Enoc ñeñth atarr kowen yemtayeꞌth Yompor, ñapaꞌ eꞌñe ora aner Yompor poeꞌntaño eꞌñe bethnathoth. Ñapaꞌ ama xhoyeꞌ rromo arr patsro. Eꞌñe attha aꞌchenkach pamoꞌtseshaꞌ ama eseshaꞌ enterraye tharroꞌmar Yompor errayaꞌ. Ñewa, allempo ama aꞌtapateraꞌ Yompor poeꞌntaño ñapaꞌ atarr kowen koshataneꞌth Yompor allempo añe patsroꞌtsen, tharroꞌmar ñeñthpaꞌ ateth oten Yompor poꞌñoñ ñeñth akellkareth.

⁶ Ñerraꞌm ama yeyemteñe Yompor amach errothenoth yokshateñe amaꞌt eꞌñe mamesha. Tharraña ñerraꞌm eseshaꞌ moeneneꞌ oꞌch yemteret ñamet Yompor añ poktetsa oꞌch otet poꞌñoxhpaꞌ Yomporpaꞌ eñall, ñamha eñoteretepaꞌchña Yomporpaꞌ xhokmach koshaterran allowen ñeñth eꞌneneꞌ ña.

⁷ Ñamha awath Yomporpaꞌ eñotatan Noé ñeñthchaꞌ ateth eꞌchophan oñ tsapathoneth. Allempo ateth otan Noé amaꞌt mameshapaꞌ ama wateꞌthe. Tharraña Noéñapaꞌ eꞌñe yemtenana ateth och Yompor allempo. Ñañapaꞌ yexhkatwan poꞌkompoer allochñapaꞌ atthoch aꞌkeshphatan pamoꞌtseshaꞌ. Attho yexhkatan poꞌkompoer eꞌñe ñapoeth eꞌñe poeyemteñoth Yomporpaꞌ eñotataneñña allowen poꞌpotantañexhno pamoꞌtseshaꞌ ñetpaꞌ koñchatwerranetchaꞌ Yompor. Ñeñthoꞌmarña eꞌñe poeyemteñoth, Yomporñapaꞌ eꞌñe pokteꞌ entenan Noé.

⁸ Ñamha awath Abrahampaꞌ allempo xhoreꞌch Yompor oꞌch moeñe allaphar allchaꞌ apoer pats, ñañapaꞌ eꞌñe poeyemteñoth Yompor eꞌñe kowen ameꞌñya. Allempoñapaꞌ saꞌnman paꞌnetser oꞌ awoꞌ amaꞌt ñapaꞌ ama eñoteñe allchaꞌ ta tharroꞌmar ama poentare all sen.

⁹ Allempo xhap anetso all oteñ Yompor ñeñthchaꞌ apoer esempowañen, allñapaꞌ all yexhosa eꞌñe poeyemteñoth Yompor. Tharraña ña allpaꞌ attha yexhosa ateth ñerraꞌm awapña. Amaꞌt ñeñth patspaꞌ ñeñth oꞌpatateña Yompor ñeñthchaꞌ apoer, tharraña allempopaꞌ ama apoeñaꞌ Yompor ñeñth ateth oteñ. Ñeñthoꞌmar ñapaꞌ attha shetamtsopoꞌtos all manatoset. Ñamha amaꞌt ñeñthchaꞌ poꞌmhreneñ perr Isaac ñamha Jacob ñetpaꞌxhoꞌña atthera yexherret shetamtsopawo. Ñetpaꞌxhoꞌña attha koweñet esempowañenchaꞌ apoerranet Yompor ñeñth patser eꞌñe ateth otenanet ñamet.

¹⁰ Abraham poꞌñoxhpaꞌ aña kowen ñeñth Yompor paꞌnetser ñeñth eꞌñe echarr aphareth tharroꞌmar Yompor yexhkateneꞌ eꞌñe echarr peñ.

¹¹ Poethapor Sarapaꞌxhoꞌña eꞌñe poeyemteñoth Yomporpaꞌ cheyoreꞌterr amaꞌt ñapaꞌ oꞌ atarr poꞌnmeꞌten. Amaꞌt oꞌ meten allempo attho cheyoreꞌten koyaneshaꞌ eꞌñe poeyemteñotha Yomporpaꞌ ña awamenkath peꞌ atthoch cheyoreꞌt. Tharroꞌmar ñapaꞌ atarr ayemoetpoꞌ entenan Yompor ateth oteñ.

¹² Atthoña eꞌñe Abrahamotha atarr mererra shonteꞌ acheñeneshaꞌ nanak amaꞌt ñapaꞌ oꞌ atarr nanak poꞌnmeꞌten allempo. Allpon acheñeneshaꞌ ña eꞌñe poꞌmhreneñ phowenawet ñeñth allpon shonteꞌ nanak ateth ñerraꞌmrratheꞌ ora allowen rantoxhno ñeñth entoꞌtsaꞌyen ñamha ateth yenteññañ saꞌp poꞌmñer ñeñth ama eꞌñotwapawoyaye.

¹³ Ñeñthet allponet atarr yemoetnomoet Yompor amaꞌt allempo Yomporpaꞌ ama apoenanetaꞌ ñeñth patser ñeñth oꞌpatataneteꞌth. Tharraña amaꞌt ama aparethterretaꞌ ñeñth patser ñeñth oꞌpatataneteꞌth Yompor, ñetñapaꞌ poeyemoetneñothet Yompor eñoteñet ñetpaꞌ aparethterretchaꞌ ñeñthchaꞌ poꞌñoxh paꞌnetser perret. Ñeñthchaꞌ atarr koshaterrawet. Tharroꞌmarña ñetpaꞌ eñoteñet añ patser poꞌñoxh ama paꞌnetsreyeꞌ peñeto. Ñetpaꞌ awapñanesheta entenet arr patsro.

¹⁴ Ñewa, yeñoteñ acheñ ñeñth ateth entetsa ñerraꞌm awapñanesheta ñetpaꞌ añña eꞌnenet ñeñthchaꞌ eꞌñe paꞌnetser perret poꞌñoxh.

¹⁵ Ñamha ama añeyeꞌ paꞌnetser peneto alloth onet tharroꞌmar ñerraꞌm ñeñtha eꞌnenetañpaꞌ poꞌñoxhpaꞌ oꞌch alla poerrerretañ alloth onet tharraña ñetpaꞌ ama ñeñtheyeꞌña eꞌnameꞌteneto.

¹⁶ Ñetpaꞌ añña eꞌneteꞌth ñeñthchaꞌ eꞌñe paꞌnetser perret poꞌñoxh ñeñth atarr nanak kowen, ñeñthpaꞌ añepaꞌt Yompor paꞌnetser ñeñth poeꞌntañoꞌtsen. Ñeñthoꞌmarña Yomporpaꞌ eꞌñe pokteꞌ entenanet ama penkënaneto attho Poꞌyomporer peñet. Ñañapaꞌ oꞌpatatenanet ñeñthchaꞌ eꞌñe poꞌñoxh paꞌnetser perret all poeꞌntaño.

¹⁷ Ñamha allempo Yomporpaꞌ atarr topatan Abraham; ñeñthpaꞌ ateth otan Abraham: “Theꞌpaꞌ oꞌch pemtser pechemer Isaac eꞌñe ateth ñerraꞌm ñeñth moetsenet nokop.” Eꞌñe poeyemteñoth Yompor Abrahamñapaꞌ eꞌñe pokteꞌ eñch oꞌch poman poechemer Isaac oꞌch moetse Yomporekop. Ñewa, Yomporpaꞌ ateth oꞌ otwan Abraham awathotheñ:

¹⁸ “Eꞌñe pechemereshoth Isaacpaꞌ mererrach shonteꞌ acheñeneshaꞌ ñeñthchaꞌ eꞌñe pemhreneñ peperr.” Tharraña amaꞌt ateth oteñeñ Yompor, ñañapaꞌ eꞌñe poeyemteñoth Yomporpaꞌ eꞌñe pokteꞌ eñch awoꞌch moetsan poꞌpathrror allempo ateth otererr Yompor.

¹⁹ Tharroꞌmar ñapaꞌ ateth oten, Yomporpaꞌ atarr awamenkatheshaꞌ ñach tantatwerreꞌ amaꞌt ñeñthchaꞌ rromats. Ñeñthpaꞌ ateth ñerraꞌmrratheꞌ Yomporpaꞌ oꞌ alla tantaterrñañ poechemer rromoth, oꞌ alla agapoer pompor poꞌpocheño.

²⁰ Isaacpaꞌxhoꞌña allempo poꞌn eꞌñe poeyemteñoth Yomporpaꞌ enaman poechemereshakop Yompor paꞌnateña añekop Jacob ñamha Esaú; ñeñthchaꞌ ateth bensareꞌtamperranet tsapathoneth.

²¹ Jacobpaꞌxhoꞌña allempo rromamoch eꞌñe poeyemteñoth Yomporpaꞌ enamatnoman Yompor paꞌnateña poeꞌñaretholleshakop ñeñth poechemer José poechemeretholleshaꞌ poepoꞌnmeñothpaꞌ poꞌkarra kellpoena allña maꞌyochenanaña Yompor.

²² Josépaꞌxhoꞌña eꞌñe poeyemteñoth Yompor allempoch rroma allaphar all anetso Egipto, ñapaꞌ ateth otnoman pamoꞌtseshaꞌ: “Poꞌñoxhpaꞌ xhokmach xhap allempoch allowenes israelenaꞌtarneshas sexhaꞌnerrchaꞌ arroth Egiptoth, oꞌch sawanerra alloꞌtsen pats ñeñth oꞌpatatyeꞌth awathotheñ Yompor ñeñthchaꞌ apoerrey. Ñamha ñerraꞌm esempoch awerres arrothpaꞌ sanerrnanchaꞌ nenpaꞌts.”

²³ Ñamha allempo eñalleta Moisés, pamoꞌmteꞌñapaꞌ eꞌñe kowenatholl entan ematholl. Ñetpaꞌ eꞌñe poeyemteñothet Yomporpaꞌ oꞌ eꞌpochet. Ama mechaꞌteññañeto amhchaꞌtareth poꞌñoñ ñeñth ateth nen atthoch xhokma moetsanachet allowen asheñorrotholleshaꞌ ñeñth eñalletyetsa. Eꞌñe maꞌpmha arrorr alla eꞌpoteñet.

²⁴ Tharraña Moisés allempo oꞌ poꞌn ñapaꞌxhoꞌña eꞌñe poeyemteñotha Yomporpaꞌ ama moeno oꞌch oteñet ñoꞌ poeꞌñar penña amhchaꞌtareth, tharroꞌmar ñapaꞌ attha ñañreteña amhchaꞌtareth poꞌseñ ñeñth egiptoꞌmarneshaꞌ.

²⁵ Ñapaꞌ añña eꞌñe pokteꞌ ent oꞌch moeroxhtapretana israelneshaꞌ ñeñth eꞌñe pamoꞌtseshaꞌ pen ñeñthara ñeñth poeyochreshaxhno pen Yompor. Ama pokteyeꞌ entano oꞌch koshapretana egiptoꞌmarneshaꞌ ñeñth ateth yexhenet ñeñth ama pokteyeꞌ enteno Yompor tharroꞌmar ñapaꞌ eñoteñ ñeñthpaꞌ eꞌñe mamekpa ateth koshenet.

²⁶ Ñapaꞌ attha awantenan attho atarr sasareꞌteñet israelneshaꞌ. Tharroꞌmar ñapaꞌ añ pokteꞌ enten oꞌch moeroxhta Cristokop. Ñapaꞌ ñeñthña atarr kowen enten, ello metanaꞌtwenan ñeñth ateth sherben allowen ñeñth esokmañen ñeñth atarr morrentena egiptoꞌmarneshaꞌ. Tharroꞌmar ñapaꞌ aña kowen ñeñthchaꞌ apoer Yompor ñeñthchaꞌña atarr koshaterreꞌ.

^27-28 Ñeñthoꞌmarña Moisés eꞌñe poeyemteñoth Yomporpaꞌ ateth otan allowen israelenaꞌtar ñeñth Egiptoꞌtsaꞌyen: “Theꞌpaꞌ oꞌch semtsa carnerotholl tharroꞌmar Yompor otets. Ñeñthña poꞌrraspaꞌ oꞌch seshellkataꞌtyes alloth sebeꞌthen soꞌponro, allochñapaꞌ ñerraꞌm esempoch wapa mellañotheñ ñeñth amñareth ñeñthchaꞌ moetsanatwenayaꞌ allowen egiptoꞌmarneshaꞌ poꞌmotherneshaꞌ atthochña sa ñeñthes israelenaꞌtarneshaspaꞌ amaꞌt poesheñarrothesapaꞌ amach moetsenso.” Ñamha Moisés eꞌñe poeyemteñoth Yomporpaꞌ saꞌnerran anets Egipto, ama mechaꞌtnomano ñeñth amhchaꞌtarethtetsa all Egipto ñeñth atarr atsrreꞌmñath. Moiséspaꞌ attha awantaꞌwanman allowen ñeñth atarr echarr entyen tharroꞌmar ñapaꞌ añ eꞌñe yemtena Yompor ñeñth amaꞌt ama entpawoyaye.

²⁹ Ñamha allempo onaxherr allowen israelenaꞌtarneshaꞌ Egiptoth allempo xhaxhaꞌtet atarr saꞌpo ñeñth otenet Saꞌp Tsasasen, israelenaꞌtarneshaꞌ eꞌñe poeyemteñothet Yomporpaꞌ eꞌñe attha awanmoset all chopeꞌchnomoet ateth ñerraꞌmrratheꞌ eꞌñe porrareꞌ patso chopeꞌchenet. Egiptoꞌmarneshaꞌña ñeñth kothawetañpaꞌ ñetpaꞌxhoꞌña awanmosetañ ñamet all saꞌpo, tharraña ñetñapaꞌ eꞌñe allowenet ñoꞌshrraꞌtwosetña all oño.

³⁰ Ñamha allempo xhaxhaꞌtet all anetso Jericó ñeñthña alloꞌmarneshaꞌpaꞌ ama moeneñeto oꞌch abeꞌthosamphsarethtet. Tharraña israelenaꞌtarneshaꞌ eꞌñe poeyemteñothet Yomporpaꞌ kanxherrmatoset; oꞌ kanxhrroch poetesamphsameꞌtoset ñeñth anetser Jericó ñeñth ateth otanet Yompor. Allempoña eꞌñe poeyemteñothet Yomporpaꞌ ñeñthña konxhet allo akonxhaꞌtamphsareth ñeñth anetser all poetesmeꞌtet kanxhrroch eꞌñepaꞌtchaꞌ ñotha mataꞌnom.

³¹ Ñamha Rahab amaꞌt ñeñth atarr ekañoreshathtatseꞌth awathpaꞌ attho atarr yemterrana ñamha Yompor, ñeñth koyanesharpaꞌ ama rromo allempo aꞌkllatarethta allowen pamoꞌtseshaꞌ ñeñthara jericoꞌmarneshaꞌ ñeñth atarr athpareꞌtyesayeꞌth Yompor all anetso. Tharroꞌmar ñapaꞌ eꞌñe kowen agapan paꞌpakllo allponsheña israelenaꞌtar ñeñth ñanom amñarethtatsa all anetso ñeñthchaꞌ eñotenayaꞌ errothentheꞌña ñeñth anetser ñamha ñeñth yexhetsa all, ñatoꞌ awamenkatharerettheꞌ ñatoꞌpaꞌ amatheꞌ.

³² Poꞌpotantañexhnopaꞌ shontemeñ ñeñthchaꞌ alla neyerpaterrsañerr ñeñth atarr yemtayeꞌth Yompor awath. Tharraña ama eñalle allponmat yeth atthoch alla neyerpatwerrsa allowen ñeñth atarr yemtayeꞌth Yompor, ateth ñerraꞌm Gedeón, ñamha Barac, ñamha Sansón, ñamha Jefté, ñamha David, ñamha Samuel ñamha allowen ñeñth aꞌmhtaꞌyesayeꞌth Yompor poꞌñoñ awath.

³³ Tharraña allowenet eꞌñe poeyemteñothet Yomporpaꞌ paꞌnamen etsotayenet ñeñth ateth moenatenanet Yompor. Poesheñaꞌttsetpaꞌ eꞌñe aꞌmchechweñet poꞌpotantañ amhchaꞌtarethneshaxhno ñeñth eꞌmoñeꞌtenawet. Poꞌpotantaññapaꞌ eꞌñe poeyemteñothet Yompor eꞌñe kowen amhchaꞌtarethtenet. Eꞌñe poeyemteñothet Yompor ñapaꞌ alla yenpoerranet ñeñth ateth otaneteꞌth. Amaꞌt poꞌpsheñeñpaꞌ eꞌñe poeyemteñoth Yompor ama moenatano maꞌyarr oꞌch erroth peꞌ.

³⁴ Ñamha amaꞌt tsoꞌña amaꞌt atarr womenk worten ama moenache oꞌch atserrpeꞌ. Poꞌpsheñeñpaꞌ eꞌñe poeyemteñoth Yompor ñapaꞌ aꞌkeshphach atthoch ama moetseto espado. Poꞌpotantañpaꞌ amaꞌt ama eñalleto poꞌwamenk, eꞌñe poeyemteñothet Yompor atarr awamenkath phanet. Ñeñthña womenkñatserpaꞌ alloña kellarenet. Attho eꞌñe aꞌmchechwet ñeñth eꞌmoñeꞌtenawet.

³⁵ Amaꞌt poꞌpotantañ koyaneshaxhno ñetpaꞌxhoꞌña eꞌñe poeyemteñothet Yompor, oꞌ alla atantatarethterret pamoꞌts ñeñth rromoets. Poꞌpotantañ amaꞌt atarr atserrphatseꞌtarethtenet, ñetpaꞌxhoꞌña eꞌñe poeyemteñothet Yompor ama moeneñeto oꞌch kexhpoet Yompor atthoch aꞌrroyarethetyerret. Eꞌñe pokteꞌ enteñet oꞌch rromoet poeyemteñothet Yompor tharroꞌmar ñetpaꞌ eñoteñet allach tanterret ello ñeñth atarr nanak kowentetsa.

³⁶ Poꞌpotantañexhno ñetpaꞌxhoꞌña eꞌñe poeyemteñothet Yompor awantaꞌyenet paꞌnamen attho atarr atserrphatseꞌtarethetyeseteꞌth —atthoña atarr acheꞌtatsetarethteteꞌth, all ashtarethteteꞌth, ewankanatarethteteꞌth, ayottamphsarethetyeseteꞌth.

³⁷ Poꞌpotantañ amtsanatarethteteꞌth attho arrollapecharethteteꞌth. Poꞌpotantañpaꞌ ashesharethetyeseteꞌth eꞌñe poerroxhreto attho amtsanatarethetyeseteꞌth, atarr womenk wapaneteꞌth topateñets. Poꞌpotantañ espado amtsanatarethetyeseteꞌth. Poꞌpotantañ attha chopeñeꞌchyeseteꞌth, aña chorraꞌyeseteꞌth carnerorrom, ñamha cabrarrom. Atarr wokchañetyeseteꞌth atthaña atarr amoeroxhtatarethteteꞌth attho atserrphaꞌyesarethteteꞌth.

³⁸ Attha chopeñeꞌchyeseteꞌth amayoꞌmar, aspenthoꞌmar. Eshoꞌtyeseteꞌth arrorothoꞌmar, mapoetponoꞌmar añe patsro. Allowenet ñet ñeñth attho atarr amoeroxhtatarethteteꞌth, Yomporñapaꞌ atarr kowen entaneteꞌth. Ello metanaꞌtweñet ora allowen acheñeneshaꞌ arr patsro.

³⁹ Allowenet ñeñthet atarr yemteteꞌth Yompor awath, Yomporñapaꞌ eꞌñe kowen entaneteꞌth, tharraña ñetpaꞌ amaña enterretoña ora allpon ñeñth ateth otaneteꞌth Yompor awath ñeñthchaꞌ ateth apoerranet.

⁴⁰ Tharroꞌmar Yomporpaꞌ amaꞌt awathotheñ añ kothapeꞌchen ñeñth ello nanak kowen enten ña. Ñeñthpaꞌ yokpaꞌna allowenakpay. Ñapaꞌ añ moenen alloweney parro oꞌch etsotaterrnay ñeñth oꞌpatatenya ñeñthchaꞌ eꞌñe kowen yaꞌkowentaterreꞌ alloweney.