Hebreos 10 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

¹ Ñeñthoꞌmarña yeñoteñ Moisés poꞌñoñ ñeñth ateth anareth awath judioneshakop, ñeñthpaꞌ ama eꞌñeyeꞌ kowenteno ñeñth ateth kowentena theꞌ ñeñth orrtatosnay Cristo. Añ ñoñets ñeñth ateth anareth awath ñeñthpaꞌ aña tomaꞌntena ñeñthchaꞌ eꞌñe poꞌñoxh kowenetwerrtsa ñeñthchaꞌ orrterrtsa tsapathoneth. Ñeñthoꞌmarña añ ñoñets ñeñth ateth anareth awath ñeñthpaꞌ amach errothenoth aꞌkowentatanoña acheñeneshaꞌ amaꞌt poesheñarra ñeñth moenenayeñ oꞌch yemtenanañ Yompor. Amaꞌt xhokma moetsaꞌyesetañeꞌth eyarraxhno poꞌchñarekop eꞌñe ateth oteneñ añ ñoñets ñeñth ateth anareth, ñeñthpaꞌ amach errothenoth eꞌñe aꞌkowentatanoña acheñeneshaꞌ. Amaꞌt patheꞌtets char xhokma moetsaꞌyesetañeꞌth ñeñth Yomporekop, ñeñthpaꞌ ama eꞌñeyeꞌ aꞌkowentataneꞌtheña acheñeneshaꞌ Yomporekop amaꞌt poesheñarra ñeñth moenenayeñ oꞌch yemtenanañ Yompor.

² Ñerraꞌm eꞌñe poꞌñoxh aꞌkowentatenaneñña acheñeneshaꞌ esoꞌmartheꞌña oꞌch alla moetsereterrña poꞌpoñexhno shonteꞌ eyarra. Ñerraꞌm poꞌñoxh aꞌkowentatenaneñ acheñeneshaꞌ ñeñth ateth kothapeꞌchyeneꞌ sosyaꞌtsañ poeyoxhreto, esoꞌmartheꞌña alla yerpapaꞌtaterraneteꞌthña poꞌchñaret ñeñth poeyoxhroꞌtsaꞌyenet.

³ Tharraña poꞌñoxh epayeꞌ yerpapaꞌtaterraneteꞌthña poꞌchñaret. Eꞌñe patheꞌtets char allempopaꞌ oꞌch alla moetserreterr eyarraxhno añekop ñeñth attho yerpapaꞌtaterraneterr poꞌchñaret.

⁴ Ñeñthoꞌmarña yeñoteñ eyarra poꞌrraspaꞌ amatheꞌ errothenoth awanmamperryeña yoꞌchñar amaꞌt toro poꞌrras amapaꞌ cabra poꞌrras.

⁵ Ñeñthoꞌmarña Cristopaꞌ ateth otosan pompor allempo acheñetos arr patsro ñeñthpaꞌ ateth ot: Pha theꞌpaꞌ ama añeyeꞌ pemneno eyarra ñeñth amtsarethtetsa phokop ñeñthchaꞌ atarr phokshateneꞌ. Amaꞌt ñamha ñeñth es apaꞌyenet phokop. Ñeñthoꞌmarña nokop theꞌpaꞌ oꞌ peyexhkatwerrnan nechets añ patsrekop ñeñth eꞌñe ateth pemnen pha, eꞌñech nechtsoth nesherbhoseph atthoch eꞌñe kowen nokshateneph.

⁶ Poꞌñoxh theꞌpaꞌ ama añeyeꞌ atarr phokshatenaye attho chamoenet eyarra phokop amapaꞌ allempo moetsanatenet eyarra ñeñth poꞌchñarekpoet.

⁷ Ñeñthoꞌmarña Nompore theꞌ napaꞌ oꞌch notaph: “Napaꞌ añekopña nowapa arr patsro atthoch netsotosnaph ñeñth ateth pemnen pha, ñeñth eꞌñe ateth anareth peñoño nokop.” Arrpaꞌ allowa ateth otan Cristo pompor.

⁸ Ñewa, ñeñth ateth ot Cristo arr ñeñthpaꞌ attho Yomporpaꞌ ama añeyeꞌ moeneno eyarra ñeñth amtsarethtetsa ochñartsokop atthoch koshateñet ña. Amaꞌt ñamha ñeñth es apaꞌyenet ñokop ñeñthpaꞌxhoꞌña ama ñeñtheyeꞌ eꞌneno ñeñthchaꞌ koshateneꞌ amaꞌt ñeñth achamareth ñokop amaꞌt ñamha ñeñth amtsarethtetsa ochñartsokop. Ñeñth ora añexhno ñeñth ateth naneꞌth Moisés poꞌñoñ atethchaꞌ es apoeñet Yompor, theꞌña ñeñthpaꞌ ama koshatenano Yompor; ateth oten Cristo.

⁹ Elloña ñapaꞌ ateth oten, “Napaꞌ añekopña newapa, Nompore, oꞌch netsotosnaph ñeñth ateth pemnen pha.” Ñeñthpaꞌ añ eñotatosey, ña aꞌwañatoseꞌ ñeñth awathotheñ attho moetseteꞌth eyarra poꞌchñarekop. Atthoña ñapaꞌ nosan poꞌñoñ ñach rromosets yoꞌchñarekop.

¹⁰ Ñeñthoꞌmarña Jesucristopaꞌ pomosa ñañeña yoꞌchñarekop. Amaꞌt parrocha rromapaꞌ ñeñthpaꞌ allowenakpay. Attho ñapaꞌ etsotenan ñeñth ateth moenen Pompor yañapaꞌ eꞌñe aꞌkowentaterrey Partsokop.

¹¹ Ñamha ñeñth kornaneshatyets judioneshakop ñet patheꞌtets yethpaꞌ xhokma thenet all altaro allothekma sherbeñet Yompor allekma moetsanaterretañeꞌth eyarraxhno ñeñth ochñartsokop. Tharraña amaꞌt amtsarethtenañpaꞌ amach errothenoth awanmanoña ochñarets.

¹² Tharraña Jesucristopaꞌ eꞌñe parrocha pomoerra eꞌñe ñañeña ñach amtsarethterrtsa ochñartsokop. Amaꞌt parrocha rroma ñeñthpaꞌ allowenakop eꞌñech errponowañenakop. Allempoñapaꞌ oꞌ alla anorrwerr Pompor poꞌkowenroth allña partsotwerr.

¹³ Allothña kowenan allowen ñeñth eꞌmoñeꞌteneꞌ esempowañenpaꞌ aꞌmchechatwerranetchaꞌ.

¹⁴ Jesucristo allempo pomoerra ñañeña, ñapaꞌ eꞌñe etsotatwerrnay atthoch eꞌñe aꞌkowentaterrey Partsokop. Amaꞌt parrocha rroma ñeñthpaꞌ eꞌñe allowenakop amaꞌt awathotheñ errponowañenakop añekop ñeñth poeyochreshaꞌ pen Parets.

^15-16 Amaꞌt Yompor Poekamkëñ ñeñthpaꞌxhoꞌña eñotoxhtatennay tharroꞌmar ñapaꞌ añ eñotatyeꞌth ñeñth ateth otyeꞌth Yompor, ñeñthpaꞌ ateth ot: Esempowañenpaꞌ napaꞌ oꞌch naꞌpoktaterranet poꞌpocheño. Ñeñthpaꞌ atethchaꞌ neperranet. Allempo eshekchaꞌña nexhapaterranet neñoñ eꞌñe poeyoxhreto. Ñeñthpaꞌ ñatoꞌ oꞌch netmaꞌntacha attho neñoñpaꞌ oꞌ akellkarethterret eꞌñe ñet poeyoxhreto ñeñthchaꞌkaꞌyeña kothapeꞌchaterrawetña eꞌñe kowen.

¹⁷ Ellonethpaꞌ ateth oteꞌth allempo: Napaꞌ amach alla neyerpoerraneteꞌthe poꞌchñaret. Amaꞌt ora attho athpareꞌtneteꞌthpaꞌ amachña ñeñtha alla neyerpoerraneteꞌthe.

¹⁸ Ñeñthoꞌmarña yeñoteñ attho Yomporpaꞌ oꞌ peretnaꞌwerrnay yoꞌchñar amach alla yerpoerrnayeꞌthe ñeñthoꞌmarña amach alla es yemtserreꞌthe ñeñth yoꞌchñarekop.

Theꞌpaꞌ ama es palltetso yokop atthoch eꞌñe kowen yeꞌñoranaꞌtera Yompor Parets

¹⁹ Ñeñthoꞌmarña masheñneshachaꞌ ñamha noxhaneshachaꞌ theꞌpaꞌ yeñoteñ eꞌñe pokteꞌ yokop eꞌñe ya yexhoreꞌteñoth Yomporpaꞌ eꞌñech yeyemteña eꞌñe ateth ñerraꞌm yamoꞌts yeyemtena eꞌñe allameꞌtets. Ñeñthpaꞌ añ tomaꞌntena ñerraꞌmrratheꞌ oꞌ yebeꞌtherr eꞌñe allowanen Parets poꞌponro all poꞌprawo ateth peꞌth awath kornaneshaꞌ ñeñth beꞌthostseꞌth ñapoeth ñeñth anmayeꞌth eyarra poꞌrras all, tharroꞌmar theꞌña attho oꞌ rroma Jesucristo yokop, poꞌrrasña ñeñthña eꞌñe yaꞌpoktaterreꞌña ya atthoch yeꞌñoranaꞌtera amaꞌt ñeñth atarr Parets.

²⁰ Poꞌñoxh Jesucristo eꞌñe ña poꞌchtsoth orrtaterrnay poꞌpoñ etserra atthoch yapaꞌxhoꞌña oꞌch yexhapampera Yompor atthoch yeꞌñoranaꞌtera. Ñeñthpaꞌ eꞌñe kowen atthoch yeyemteña eꞌñe poꞌñoxh. Ñeñthpaꞌ añ tomaꞌntena ñerraꞌmrratheꞌ Cristopaꞌ oꞌ xhapaterrey allowa yottampeññañet besmo Parets poꞌponro all poꞌprawo.

²¹ Jesús theꞌpaꞌ yeñoteñ ñeñthña atarr Yekorneshar yepen ñeñth xhets Yompor paꞌpakllo, ñapaꞌ allña amhchaꞌtarethetwerra Yomporepawo añekop allowen ñeñth poeyochreshaxhno pen Parets.

²² Ñeñthoꞌmarña eꞌñe yeyemteñothpaꞌ amach yemhchaꞌnañothayaya yexhoreꞌteñe. Eꞌñepaꞌchña yeñmañeshaꞌ yeyoxhrokmañen yexhoreꞌteñ, tharroꞌmar Cristo poꞌrrasoña oꞌ aꞌkowentaterrnay yeyoxher attho theꞌpaꞌ oꞌ eꞌñe kowen yokthapeꞌchyerr, amachña alloꞌna yerpapaꞌtatnenye yoꞌchñar. Ñeñthpaꞌ añ tomaꞌntena attho yapaꞌ eꞌñe kowen apatarethey oño ñeñth poktetsa Partsokop.

²³ Xhokmoepaꞌchña yekweñña ñeñth yeyemtena allochñapaꞌ aꞌkeshphaterreychaꞌ, amoepaꞌchña xha yeꞌcharrtatatstenoña yeyoxher tharroꞌmar Yompor ñapaꞌ xhokmach aꞌpoktaterrnay poꞌñoñ ñeñth ateth oteney.

²⁴ Ñamha añepaꞌchña eꞌñe kowen yeꞌnen atthoch yeyenpannena alloweney allochñapaꞌ atthoch eꞌñe kowen yeyxhen morrentannaꞌteñets ñamha eꞌñech kowen es yeyenpannena.

²⁵ Ñamha xhokmoepaꞌch yesen all xhokma yapxhena eꞌñe yameꞌñeñoth Cristo. Amachña attha yephatsto ñeñth ateth pena poꞌpotantañ ñeñth ama wetso allekma yapxhena. Añchaꞌña ateth yepena allempo yapxhena eꞌñech kowen yokthapeꞌchatannena Yomporekop. Elloña theꞌpaꞌ xhokmach yapxhena ñeñth nanak kowentetsa yokop tharroꞌmar yeñoteñ theꞌpaꞌ oꞌ xherrmoch allempoch werra Yepartseshar Cristo.

²⁶ Tharroꞌmar ñerraꞌm oꞌ yeñoter poꞌñoxh Cristo rromats yokop atthoch aꞌkeshphaterrey ñamha ñerraꞌm ñeñthoꞌ yameꞌñerra tharraña ñerraꞌm alloꞌna yesen ochñaꞌtareꞌtnomoets eꞌñe ya yemneññothpaꞌ allempopaꞌ amach eñalleña ñeñthchaꞌ rromoerrtserr poꞌpocheño ñeñthchaꞌ yetsaꞌterroyerr ello yoꞌchñar.

²⁷ Ñeñth alloꞌna sets ochñaꞌtareꞌtnomoets añach oꞌpaterrawet koñcheñets ñeñth atarr amhchaꞌnoxhtetsa ñeñthara Yompor poꞌyoroxhenña ñeñth tsoꞌpaꞌ eꞌñech eꞌnwerran allowen ñeñth eꞌmoñeꞌteneꞌ Yompor.

²⁸ Ñewa, awath ñerraꞌm eñall amaꞌt poesheñarra ñeñth athpareꞌtayeꞌth Moisés poꞌñoñ, ñerraꞌm eñall epsheña amapaꞌ maꞌpsheña ñeñthchaꞌ aꞌmethampeneꞌ ñeñthña athparñathpaꞌ awoꞌch moetse allowen acheñeneshaꞌ. Amaꞌt poesheñarrapaꞌ amach eñalleña ñeñthchaꞌ morrentaya.

²⁹ Elloña ñeñth ama esoyeꞌ entenaye Yompor Poechemerpaꞌ atarrchaꞌ nanak aꞌkoñchatarethterret. Elloña poꞌrras ñeñthchaꞌ aꞌkowentaterrawetañ Partsokop ñeñthpaꞌxhoꞌña ama esoyeꞌ enteñeto amaꞌt ñeñth errasatser ñeñth etserra aꞌpoktatañtetsa. Elloña amaꞌt Yompor Poekamkëñ ñeñthpaꞌxhoꞌña xhach sasareꞌteññañet ñeñthara Poekamkëñ ñeñthchaꞌ morrenterrawetañ atthoch chorrerranetañ. Amaꞌt señoteñeña elloña atarrchaꞌ nanak akoñchatarethterra ñeñth ateth atarr tsenaꞌteneꞌ Yompor Poechemer.

³⁰ Tharroꞌmar yapaꞌ yeñoteñ Yomporña ateth otets: “Napaꞌ ñeñthenchaꞌ koñchaterrawet, napaꞌ ñeñthenchaꞌ tsaꞌtaterrawet.” Elloñapaꞌ ateth oten Yompor: “Napaꞌ ñeñthenchaꞌ otteñeꞌcherrawet atthochña nekoñchaterranet amaꞌt ñeñth neyochreshaxhno nepeneñ.”

³¹ Ñeñthoꞌmarña yeñoteñ atarr yoroxhenoꞌtsen amaꞌt allowen ñeñth aña oꞌpatenaya ñeñth poꞌyoroxhenña pen Yompor ñeñth ama arromñatheshayaye.

³² Tharraña theꞌpaꞌ oꞌch notas, oꞌch alla seyerpoerra ateth sepha awañmoꞌcha allempo eꞌñe errtes eñoterreꞌ poꞌñoxh Cristepaꞌtña aꞌkeshphatañ. Ñeñthpaꞌ allempo ñanom aꞌpoetarsamphsarethta seyoxhro sokthaphña. Allempopaꞌ amaꞌt atarr amoeroxhtataretheseñ sañapaꞌ eꞌñe saꞌwantaꞌwanom paꞌnamen topateñtsoxhno ñeñth setantyesoya; ñeñthpaꞌ eꞌñe ateth ñerraꞌmrratheꞌ sapaꞌ xho atarr sekhllarena.

³³ Patantaꞌttsospaꞌ atarrkaꞌye cheꞌtatsetaseteꞌth eꞌñe alloꞌtsaꞌyen allowen acheñeneshaꞌ. All atarr saꞌmoeroxhtatarethta. Elloña ñerraꞌm esempo moeroxhtateñet poꞌpotantañ samoꞌtseshaꞌ sapaꞌxhoꞌña xhokmach semoeroxhtapretaneteꞌth.

³⁴ Poꞌñoxh ñeñth arrmanatarethtatseꞌth oꞌch ayottamphsarethtet, sañapaꞌ eꞌñe sellkapreteñothanetpaꞌ xhokmach eꞌñe kowen seyenpoenanet. Amaꞌt allempo poerratamphsatsreꞌtaseꞌth ñeñth seꞌmoñeꞌtyesayeꞌth, sañapaꞌ eꞌñech soksheñeshaꞌ saꞌwantenanet. Tharroꞌmar sapaꞌ señoteñ oꞌ secherr ento ñeñth atarr sherbets ñeñth ello metanaꞌtweneꞌ attho sherbenes sechatser, tharroꞌmar ñeñthpaꞌ ama aptsaño.

³⁵ Ñeñthoꞌmarña masheñneshachaꞌ oꞌch alla noterrserr, amach alla sekexhpatsterrñañe ñeñth attho atarr seyemteña Cristo tharroꞌmar Yomporpaꞌ ñachña atarr kowen setsaꞌterraya.

³⁶ Theꞌ sapaꞌ aña sepalltena atthoch eꞌñe akopha saꞌwantaꞌwanom ñeñth atarr echarr sentyen, atthochña alloꞌnach sesen phaꞌyesnomoeꞌ ñeñth ateth moenen Yompor, atthochña Yomporpaꞌ apoerreschaꞌ ñeñth eꞌñe ateth otenes.

³⁷ Tharroꞌmar yeñoteñ Yompor poꞌñoñ ñeñth akellkareth awathotheñ ñeñthpaꞌ Cristokop ateth oten: Oꞌ mameshamerra oꞌch orretwerra ñeñthchaꞌ werrtsa, theꞌpaꞌ amach alla atomato poeꞌntaño.

³⁸ Tharraña Yomporpaꞌ ateth oten: Ñeñth eꞌñe pokteꞌ nenten na amaꞌt erraꞌtsena acheñer tharroꞌmar eꞌñe poeyemteñothen na, ñeñthñapaꞌ korretsach. Tharraña ñerraꞌm eseshaꞌ nepoerramperraya ñapaꞌ oꞌwañchaꞌ alloꞌna koshatenen.

³⁹ Tharraña yapaꞌ ama attheyayye ñerraꞌmrratheꞌ ñeñthchaꞌ poerramperraya Yompor ñeñthchaꞌ chenkërrtsa. Yapaꞌ añeykaꞌyeña ñeñtheychaꞌ xhokma yemterraya Yompor ñeñtheychaꞌ aꞌkeshphatarethterrtsa eꞌñe yekamkëñowen.