Gálatas 5 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Attho theꞌpaꞌ atarr kowenoꞌtseney, theꞌñapaꞌ amach yekexhpatstere

¹ Cristopaꞌ oꞌ aꞌpoktaterrnay atthoch eꞌñe yameꞌñeñothpaꞌ kowenoꞌtseneychaꞌ. Atthoch yokoppaꞌ amach amhchaꞌnoxhteno ñoñets ñeñth ateth anareth judioneshakop. Ñeñthoꞌmar theꞌpaꞌ amach alloꞌna sameꞌñatsterrerro judioneshaꞌ pokthaphña ñeñth nanak amoeroxhtatañ. Eꞌñepaꞌchña womenk sephaꞌ seyoxher Cristokop.

² Ñewa, theꞌpaꞌ oꞌch seꞌmhñoten na ñeñthen allsensarethen ñeñthchaꞌ ateth notas: Ñeñth ateth seyemtenañ atthoꞌch sekeshperra eꞌñe setsorrannaꞌteñothapaꞌ tharraña ñeñthoth Cristopaꞌ amach errothenoth yenpaso.

³ Tharraña theꞌpaꞌ oꞌch alla noterrserr, ñeñth moenets oꞌch atsorrarethtapaꞌ ñewa, poꞌñoxh añ palltetsa ñamha oꞌch eꞌñe etsotwan amaꞌt ñamha allowen ñoñets ñeñth ateth anareth judioneshakop.

⁴ Ñeñthes moenets oꞌch pokteꞌ entas Yompor eꞌñe setsoteñoth ñoñets ñeñth ateth anarethpaꞌ sañapaꞌ oꞌ alla sekexhpoerña Cristo. Ñeñthoꞌmarña theꞌpaꞌ amach errothenoth moererrso Yompor.

⁵ Tharraña yapaꞌ eꞌñe yeyemteñoth Cristopaꞌ eꞌñe yoksheñeshaꞌ yekwen esempowañenchaꞌ yexhaxherr Yomporesho tharroꞌmar yeñoteñ oꞌ pokteꞌ entwerrey Yompor. Ñamha eꞌñe ña Poekamkëñoth theꞌpaꞌ oꞌ yaꞌpoktatarethterra.

⁶ Ñerraꞌm oꞌ yeparrokmaterr epay Cristo Jesúspaꞌ ama sherbeno attho yetsorrannaꞌtena, ñamha amaꞌt ama atsorraretheyepaꞌ ñeñthpaꞌxhoꞌña ama sherbeno Yomporekop. Aña ñapoeth sherbets eꞌñe yameꞌñeñoth Cristopaꞌ oꞌch yemorrentannaꞌta.

⁷ Sa awañmoꞌchapaꞌ eꞌñe kowen sameꞌñyeꞌth Cristo. Theꞌñapaꞌ poꞌñoxhkaꞌye oꞌxha aꞌpsaterrsetña añ ñoñets ñeñth eꞌñe poꞌñoxh Yompor poꞌñoñ.

⁸ Ñeñthpaꞌ ama Yomporeyeꞌ saꞌpsatenaye, tharroꞌmar ñapaꞌ oꞌ waꞌñerres oꞌch sameꞌñerrñaña Poechemer Cristo.

⁹ Amaꞌt señoteñe amaꞌt poesheñarra yexhatats poꞌpoñ ñeñth ama poꞌñoxhoyayepaꞌ mameshapaꞌ oꞌch epaꞌwa errakmañen ñeñth ateth yexhaten. Ñatoꞌ oꞌch netmaꞌntacha ateth pena chaseꞌ. Amaꞌtchaꞌ koñeꞌtha chasetholl yenaꞌpaꞌ mameshapaꞌ oꞌch aꞌchasaꞌwan emasa.

¹⁰ Tharraña ñeñth semoññeꞌtateneꞌpaꞌ tsaꞌtaterach Yompor, amaꞌt erraꞌtsena ateth petsa. Tharraña na eꞌñe neyemteñoth Yepartsesharpaꞌ neñotenes theꞌpaꞌ oꞌch alla sekexhpoerr ñeñth ateth yexhatenes poꞌpsheñeñ, oꞌch alla sameꞌñerra ñeñth neyxhatenes.

¹¹ Ñatoꞌ napaꞌxhoꞌña xhatheꞌ otyennet añoꞌ neserrpareꞌtaten oꞌch yetsorrannaꞌta atthoch yekeshperra. Ñewa, masheñneshachaꞌ ñamha noxhaneshachaꞌ ñerraꞌm poꞌñoxh ñeñthara neserrpareꞌtateneñ atethpaꞌ amatheꞌ errothenoth eꞌmoñeꞌtennoñeña judioneshaꞌ ñeñth serrpareꞌteneꞌ oꞌch yetsorrannaꞌta. Tharraña poꞌñoxhpaꞌ ama attheyeꞌ neserrpareꞌtateno. Añña neserrpareꞌtaten attho Cristopaꞌ rroma korsocho yokop attho tsaꞌtwerrnaya yoꞌchñar, allochñapaꞌ eꞌñe yameꞌñeñotha ñapaꞌ oꞌch yekeshperra. Ñeñthña ateth neserrpareꞌteñoth añña ñeñth serrpareꞌteneꞌ oꞌch yetsorrannaꞌtapaꞌ ñetñapaꞌ ñeñthña nanak atsrreꞌmatenawet. Ñerraꞌm oꞌwañchaꞌ ateth neserrpareꞌtañpaꞌ oꞌwañtheꞌ eꞌmoñeꞌtnetañ.

¹² Napaꞌ atarr nemneñ ñeñth xhokma semoññeꞌtateneꞌpaꞌ oꞌtheꞌ alla kexhpaꞌnerres.

Eꞌñe yemorrenteñoth yamoꞌtspaꞌ oꞌch eꞌñe yetsotwa allowen ñoñets ñeñth ateth anareth Yomporeshoth

¹³ Tharroꞌmar sa masheñneshachaꞌ ñamha noxhaneshachaꞌ oꞌ waꞌñerres Yompor atthoch kowenoꞌtseneschaꞌ. Ñapaꞌ ama moeno oꞌch amhchaꞌnoxhtena sokop ñoñets ñeñth ateth anareth. Tharraña amaꞌt oꞌ waꞌñerrey Yompor atthoch kowenoꞌtseneypaꞌ ñeñthpaꞌ ama añekpayaye oꞌch yephaꞌyesa nanak sosey ñeñth ateth moenateney yechets. Ñapaꞌ moeneñ eꞌñe yemorrentannaꞌteñothpaꞌ oꞌch yeyenpannaꞌta, tharroꞌmar yapaꞌ kowenoꞌtseney.

¹⁴ Ñerraꞌm xho yemorreñcha yamoꞌtspaꞌ ñeñthpaꞌ atthoch amaꞌt eꞌñe parrothapaꞌ oꞌch yetsotwa ora allowen ñoñets ñeñth ateth anareth awathotheñ Yomporeshoth, tharroꞌmar Yompor poꞌñoñpaꞌ oteney: “Atarrepaꞌch semorreñcha samoꞌts eꞌñe ateth atarr semorrentena sañeña.”

¹⁵ Tharroꞌmar ñerraꞌm sapaꞌ xhokma seꞌmoñeꞌteñ samoꞌts, amapaꞌ xha amtsen senteñ samoꞌts, ñeñthpaꞌ ama pokteyaye ateth sepena, tharroꞌmar ñerraꞌm ateth sepenapaꞌ señochepaꞌch atthothchaꞌña xhach saꞌchenkatannerra eꞌñe sagattsa.

Ñeñth ateth kothapeꞌchateney Parets Poekamkëñ, ñamha ñeñth ateth moenateney yechets

¹⁶ Tharraña napaꞌ oꞌch notas ñeñth poktetsa ñeñthchaꞌ ateth sepha. Eꞌñepaꞌchña kowen sokrrena Partsokop ñeñth ateth kothapeꞌchatenes Parets Poekamkëñ. Allochñapaꞌ amach alloꞌna sephaꞌyesneno ñeñth ateth moenatyenes sechets.

¹⁷ Tharroꞌmar ñeñth ateth moenatseꞌtateney yechetspaꞌ ñeñthpaꞌ ama yemtenano ñeñth ateth kothapeꞌchatyeney Parets Poekamkëñ. Añpaꞌxhoꞌña Parets Poekamkëñpaꞌ ama yemtenano ñeñth ateth moenatseꞌtateney yechets. Ñeñthoꞌmarña amach errothenoth yokthapeꞌcho eꞌñe pathrra kothaphñats, tharroꞌmar ñetpaꞌ xha eꞌmoñeꞌtannenet.

¹⁸ Tharraña ñerraꞌm poꞌñoxh yepha ateth kothapeꞌchateney Parets Poekamkëñpaꞌ allempopaꞌ amach errothenoth amhchaꞌnoxhto yokop añ ñoñets ñeñth ateth anareth awathotheñ, tharroꞌmar ñapaꞌ añchaꞌ phateney ñeñth ateth moenen Yompor.

¹⁹ Ñewa, yapaꞌ oꞌ yeñotwer ñeñth ateth moenatseꞌtateney yechets. Ñeñth allpon yemnatseꞌtyenpaꞌ ñeñthpaꞌ ateth ñerraꞌmrratheꞌ erraꞌtsentheꞌ chetaꞌyeneꞌ koyaneshaꞌ ñeñth amach poethaporeyaye, ateth ñamha erraꞌtsentheꞌ koyaneshar ñeñth chetaꞌyeneꞌ yakma ñeñth ama poerrollareyaye, ñamha ateth ñerraꞌmrratheꞌ ñeñth nanak kothapeꞌchyeneꞌ sosyaꞌtsañ, ñamha ñeñth nanak yomenaya ottatsñats.

²⁰ Ñamha ñeñth poꞌyomporer phaꞌyeneꞌ poꞌpoñexhno ñeñth ama poꞌñoxh Yomporeyaye, ñamha ateth pena achyoꞌtañexhno, amapaꞌ ñeñth ateth pena paꞌllerrnaneshaꞌ ñamha ñeñth ateth pena amaseꞌñeth. Ñamha poꞌpoñ ñeñth ateth moenatseꞌtyen yechetspaꞌ ñeñthpaꞌ ateth ñerraꞌmrratheꞌ eꞌmoñeꞌtannaꞌteñets, ñamha orroteñets, ñamha yeꞌchapretannaꞌteñets, ñamha atsrreꞌmareꞌteñets, ñamha moparrñats, ñamha elloptanneñets attho amach eꞌñe amoꞌtstanneneto, ñamha ateth pena ñeñth kothapeꞌchyeneꞌ poꞌpoñ kothaphñats ñeñth ama poꞌñoxhoyaye.

²¹ Ñamha poꞌpoñexhno ñeñth ateth moenatseꞌtyen yechetspaꞌ ateth ñerraꞌm yeꞌchapreteñets, ñamha moetsannaꞌteñets, ñamha posaꞌtarñats, ñamha arepsarñats porrareꞌteñoth, ñamha eñallmeñ poꞌpoñexhno shonteꞌ atthemaꞌth ñeñth ateth oꞌ notwa. Theꞌpaꞌ oꞌ alla nokthapeꞌchaterrserr ñeñthara ateth notwanmas amaꞌt awaña, ñeñth ateth petsapaꞌ amach es oꞌpatatereto all amhchaꞌtarethtena Yompor.

²² Tharraña ñeñth peneꞌ kowen ñeñth ateth yexhateñ Parets Poekamkëñpaꞌ ñeñthpaꞌ atethchaꞌ pena, oꞌch morrentenana pamoꞌts, ñamha eꞌñech koshaꞌwena poeyoxhro Yomporekop, ñamha amach es llekatenaye amaꞌt eꞌñe mamesha, eꞌñech awantaꞌwenan allowen ñeñth echarr entyen. Ñamha ñeñth peneꞌ kowen ñeñth ateth yexhateñ Parets Poekamkëñpaꞌ oꞌch amoerañtena, ñamha oꞌch yenpaꞌyenan pamoꞌtseshaꞌ, ñamha erroth otpaꞌ atethchaꞌxhoꞌ pena.

²³ Ñamha amach atsrreꞌmaꞌpeno ñamha eꞌñech poetpara es phaꞌyen. Ñerraꞌm ñeñthña ateth oꞌ yephowapaꞌ oꞌch yetsotwa allowen ñoñets ñeñth ateth anareth Yomporeshoth.

²⁴ Ñamha ñeñth poꞌñoxh oꞌ poeyochreshaꞌ perr Cristo Jesúspaꞌ oꞌ wenerran ñeñth ateth moenatseꞌtyen yechets ñeñth attho es yeyeꞌchyena ya acheñey. Ñeñthpaꞌ eꞌñech ateth yentena ñerraꞌm akorsoꞌtamphsarethey.

²⁵ Attho Parets Poekamkëñpaꞌ oꞌ apoerrey atthoch yokrrerra eꞌñe kowen Yomporekop, theꞌpaꞌ añ pokteꞌ oꞌch yephaꞌyena eꞌñe kowen ñeñth ateth kothapeꞌchateney Parets Poekamkëñ.

²⁶ Amachña xha yommoꞌchweno, ñamha amach xha es yotnareꞌtannaꞌtyeno, ñamha amach xha yeyeꞌchapretanneno.