El Apocalipsis 8 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Allempo Cristopaꞌ torwan poꞌkanxhrroñ ñeñth allo ayomrrarethtena Yompor poꞌlibro allempoñapaꞌ orrta ñamha poesheñarr mellañotheñ ñeñth orreneꞌ poꞌpajoꞌ orotaten

¹ Allempoña Cristo ñeñth tomaꞌntenaya Carnero, ñapaꞌ allempo eꞌñe torwan poꞌkanxhrroñ ñeñth allo ayomrrareth Yompor poꞌlibro, eꞌñe moetsoñeñtwa poktakma poeꞌntaño thematwanen.

² Allempoña napaꞌ alla nenterrerr mellañotheñneshaꞌ ñeñth kanxherrsheña ñeñth thomxhets eꞌñe all Yomporesho. Ñetña poesheñaꞌttset allpaꞌ aparethtet poktor.

³ Allempoña oꞌ wapa poꞌpsheñeñ mellañotheñ. Wapapaꞌ oꞌ thomos all altaro. Añ altarpaꞌ allekma aꞌkrratenet tsach poeseꞌ ñeñthña atarr amostetsa all. Pamosoññapaꞌ ñeñth atarr eñmosathtetsa Yomporekop. Ñeñth mellañotheñpaꞌ añ orren pajoꞌ orotaten allchaꞌ nenan ñeñthchaꞌ eñmosathtetsa. Ñeñth mellañotheñpaꞌ allña apet shonteꞌ eñmosath ñeñthchaꞌ eñmosathtateꞌ ñeñth attho maꞌyochena Parets poeyochreshaꞌ. Ñeñthña eñmosathtetsapaꞌ ñeñthchaꞌ net altaro ñeñth ayexhkatareth oro ñeñth eꞌñe ñewapotheꞌtsen Yompor poꞌkonaño.

⁴ Ñeñth orrampen mellañotheñ eñmosathpaꞌ xha amosoñeꞌchnen enoneth alloꞌtsen Yompor, ñeñthña eñmosathtateneꞌ ñeñth attho maꞌyochena Parets poeyochreshaꞌ.

⁵ Allempoña mellañotheñpaꞌ cheterran pajoꞌpaꞌ oꞌ eshaꞌtan tsoꞌ poekallamhshor ñeñth chetaꞌ altaroth eꞌñe eꞌchorran tsoꞌ pajo. Allempoñapaꞌ waporeꞌch patso. Xhap patsopaꞌ meratstosa, tatstosa, eꞌmorrtosa womenk, pellatan pats.

Attho Juanpaꞌ entan kanxherrsheña mellañotheñ ñeñth poktorets

⁶ Allempoña mellañotheñ ñeñth kanxherrsheña ñeñth epoktoretharer poesheñaꞌttsetpaꞌ oꞌ echantyeset poꞌpoktor oꞌch aꞌthoret.

⁷ Allempoña ñeñth ñanom mellañotheñpaꞌ oꞌ poktoraꞌ, poktoraꞌwatsapaꞌ orrta ñeñth maꞌpoꞌmar ñeñthchaꞌ awaporeꞌtarethtatsa patso. Ñeñthpaꞌ añ weꞌ allothpaꞌ ñamha tsoꞌ ñeñth tsetetsa errasatso. Attho awaporeꞌtarethta patso allempo xhap patsopaꞌ eꞌñe aꞌwortatwosan ñeñth alloꞌtsen all xhap patso. Tsoꞌñapaꞌ errapharen eꞌñe aꞌpoywosan ñeñth allpon tsachexhno ñamha allpon taꞌtexhno ñeñth alloꞌtsaꞌyen amaꞌt allowanen pats allpon ñeñth otenet la tercera parte.

⁸ Allempoña poꞌpsheñeñ mellañotheñ ñeñth poepañpaꞌ oꞌ poktorerrerr. Poktoraꞌwerrtserrpaꞌ orrterrerr ateth ñerraꞌm ñeñth nanak atarr aspeneth. Ñeñthñapaꞌ xha worten. Ñeñth aspenethpaꞌ awaporeꞌtarethta saꞌpo. Oꞌña xhap oñopaꞌ errapharenña oñpaꞌ poenasa errasats allowanen oñ ñeñth allpon otenet la tercera parte.

⁹ Ñamha ñeñth allpon yexhetsa all oño errapharen, eꞌñe kollaꞌwa, allpon kollaꞌwatsa ñeñth otenet la tercera parte. Ñamha ñeñth allowen botexhno ñeñth chopeꞌchyets all oño errapharen eꞌñe chenkaꞌwet, allpon chenkaꞌwatsa ñeñth otenet la tercera parte.

^10-11 Allempoña poꞌpsheñeñ mellañotheñ ñeñth poemaꞌpañpaꞌ oꞌ poktorerrerr. Poktoraꞌwerrtserrpaꞌ orrterrerr ranto ento ñeñth añekmoen atarremh. Shoraꞌnerrerr xha werarereꞌtnena. Xhap alloꞌtsaꞌyen poꞌñesoxhno ñamha alloth potayen oñexhno errapharen arr patsro. Ñeñthpaꞌ arrowa xhap ñeñth allpon otenet la tercera parte. Ñeñth rantopaꞌ añ paꞌsoꞌcheñ Peshrremh. Xhap alloꞌtsaꞌyen oñexhno ñeñthpaꞌ xha aꞌpesherretwosan oñexhno errapharen arr patsro. Ñeñthpaꞌ allponowa aꞌpesherrtatan oñexhno ñeñth allpon otenet la tercera parte. Oñ poꞌpeshrroña ñeñthña aꞌkllatweꞌña shonteꞌ acheñeneshaꞌ all.

¹² Allempoña poꞌpsheñeñ mellañotheñ ñeñth poepaꞌtatseñ oꞌ poktorerrerr. Poktoraꞌwerrtserrpaꞌ allempokma xhotheꞌ errothetyesa atsneꞌ ñamha arrorr ñamha rantoxhno, oꞌ atthamha chekmetyeset. Ñetpaꞌ allpon chekmetyesets ñeñth allpon otenet la tercera parte. Ñeñth attho xhoyoꞌtenet yetho ñamha tsapopaꞌ oꞌwañ atsnomyeset. Ñeñth allpon oꞌwañ xhoyoꞌtyeset yetho ñamha tsapo ñeñthpaꞌ allpon otenet la tercera parte.

¹³ Allempoña napaꞌ oꞌ alla nekwererrpaꞌ allñapaꞌ nenterrerr poꞌpsheñeñ mellañotheñ ñapoeth all anomaꞌmtena ento allpononeth. Allñapaꞌ neꞌmoerrerr ñeñth ateth eñosnom womenk. Panomaꞌmteñothpaꞌ ateth oten: —Llekëñtsa-bee ñeñth allowenakop ñeñth yexhaꞌyetsa añe patsro. Oꞌ mameshamha oꞌch poktoraꞌwerrerr poꞌpoñ maꞌpsheñoꞌmar mellañotheñ.