El Apocalipsis 7 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Attho Israel poꞌmhreneñ ñeñthchaꞌ ayatoꞌmaꞌtarethetyestsa

¹ Allempoña napaꞌ nent mellañotheñneshaꞌ paꞌtatssheña. Eꞌñe allowanen pats, ñeñth paꞌtats poꞌtophñaroꞌmar allñapaꞌ all thomyen poesheñaꞌtets mellañotheñ ñeñth paꞌtatssheña. Ñeñth paꞌtatssheña ñetñapaꞌ ñet epatareꞌtenet mhorr paꞌtatsshemhtoꞌmaroth alloth wapyena mhorr. Allochñapaꞌ atthoch amach atarr mhorrarsampeno añ patser, amaꞌt ñamha oñexhno, ñamha amaꞌt pathrra tsachpaꞌ amach mhorrarsampeno.

² Allempoña napaꞌ oꞌ alla nenterrerr poꞌpsheñeñ mellañotheñ, arr orrtena alloth wena atsneꞌ. Ñapaꞌ añ orren yapets ñeñth alloch yanatan allowen ñeñth poeyochreshaꞌ pen Yompor ñeñth ama arromñatheshayaye amaꞌt awatha. Ñañapaꞌ rrana womenkpaꞌ otan mellañotheñneshaꞌ ñeñth paꞌtatssheñoꞌmar ñeñth añekop awamenkathtenet atthoch ñetchaꞌ pomnaren pet pats ñamha oñexhno.

³ Ñeñthpaꞌ ateth otanet: —Amach erroth sephatsto añ pats amaꞌt oñ amaꞌt tsach atoꞌtña yeyatoꞌmaꞌtweyaꞌ allowen ñeñth thorraꞌyetsa Yomporekop.

⁴ Allempoña neꞌmoerrerr ñeñth ateth oteñet ñeñthchaꞌ allpon ayatoꞌmaꞌtarethtatsa. Ciento cuarenta cuatro mil ñeñthpaꞌ allpon otenet. Ñeñth ciento cuarenta cuatro mil acheñeneshaꞌ ñetpaꞌ eꞌñe poꞌpoñeꞌttsokmoet mereñtsoret. Eꞌñe ñeñtha mereñtsorekmoet ñeñth xharrasheña poechena epa ñeñth paꞌtañ peneꞌ Israel ñeñth korratseꞌth awath.

⁵ Ñewa, patheꞌtets mereñtsorpaꞌ allponsheña ñeñthchaꞌ ayatoꞌmaꞌtarethtatsa: Judánaꞌtarpaꞌ alloꞌtsenchaꞌ xharraꞌ poechena epa mil acheñeneshaꞌ; Rubénnaꞌtarpaꞌxhoꞌña alloꞌtsenchaꞌ xharraꞌ poechena epa mil acheñeneshaꞌ; Gadnaꞌtarpaꞌxhoꞌña alloꞌtsenchaꞌ xharraꞌ poechena epa mil acheñeneshaꞌ;

⁶ Asernaꞌtarpaꞌxhoꞌña alloꞌtsenchaꞌ xharraꞌ poechena epa mil acheñeneshaꞌ; Neftalínaꞌtarpaꞌxhoꞌña xharraꞌ poechena epa mil acheñeneshaꞌ; Manasésnaꞌtarpaꞌxhoꞌña xharraꞌ poechena epa mil;

⁷ Simeónnaꞌtarpaꞌxhoꞌña xharraꞌ poechena epa mil; Levínaꞌtarpaꞌxhoꞌña xharraꞌ poechena epa mil; Isacarnaꞌtarpaꞌxhoꞌña xharraꞌ poechena epa mil;

⁸ Zabulónnaꞌtarpaꞌxhoꞌña xharraꞌ poechena epa mil; Josénaꞌtarpaꞌxhoꞌña xharraꞌ poechena epa mil; Benjamínnaꞌtarpaꞌxhoꞌña xharraꞌ poechena epa mil acheñeneshaꞌ.

Attho shonteꞌ paꞌnamen acheñeneshaꞌ ñetpaꞌ eꞌñe wallamaꞌtharerochet paꞌshtam

⁹ Allempoña napaꞌ oꞌ alla nenterrerr shonteꞌ acheñeneshaꞌ, nanak cheꞌmoechenet ama eꞌñotwenteno ñeñth allpon alloꞌtsen. Shonteꞌ paꞌnamen acheñeneshaꞌ. Ñeñthpaꞌ paꞌnamen anetsoth waxhaꞌtyenet, shonteꞌ paꞌnamen mereñtsoret ñeñth waxhetsa all, shonteꞌ paꞌnamen ñoñets eꞌñe poꞌpoñeꞌttsokma eñosyenet. Ñetñapaꞌ all thomxhenet eꞌñe ñewapoth alloꞌtsen Yompor poꞌkonañ alloꞌtsen ñamha Cristo ñeñth tomaꞌntenaya Carnero. Ñetpaꞌ eꞌñe wallamaꞌtharerochet paꞌshtam. Potothetñapaꞌ añ orraꞌyenet ateth ñerraꞌm shekëpan.

¹⁰ Allowenetpaꞌ rranenet, otenet: Yompor ñeñth poꞌkonañoꞌtsen ñapaꞌ oꞌ aꞌkeshphaterrey epoet ñamha Poechemer ñeñth tomaꞌntenaya Carnero.

¹¹ Ñeñth berrmaꞌthtetsa paꞌtatsoꞌmar ñamha ñeñth sherbeneꞌ Yompor all, ñamha allowen mellañotheñneshaꞌ ñeñth thomxhets aꞌyowen errapharen, ñetña allowenetpaꞌ eꞌñe rroxhtampesweñet Yompor ñeñth poꞌkonañoꞌtsen. Ñeñth mellañotheñneshaꞌ all rremaꞌrrartenet Yompor poꞌkonaño ateth maꞌyocheñet Yompor.

¹² Ñeñthpaꞌ ateth ayeꞌchoxhtateññañet Yompor, ñeñthpaꞌ ateth otenet: Atthetepaꞌch yokop yaꞌyeꞌchoxhtatoñepaꞌch, yekowentatoñepaꞌch, amoepaꞌch awañaño attho eñotañtena Yompor, yeparasyosoꞌchepaꞌch, amhchaꞌnaꞌtpawepaꞌch yenteñ, amoepaꞌch awañañathto ñeñth attho awamenkathtena Yompor, amhchaꞌtarethtepaꞌch thayotheñ errponowañen. Ñeñthpaꞌ atthetepaꞌch.

¹³ Allempoña poesheñarr ñeñth sherbeneꞌ Yompor, ñañapaꞌ aꞌphthoꞌten, ateth oten: —Phapaꞌ ¿amaꞌt peñoteñeña eseshaxhnotheꞌña ñeñth chorrenaya wallamaꞌtharer, ñamha amaꞌt peñoteñe erroththeꞌña waxhenet?

¹⁴ Nañapaꞌ ateth noch: —Amakaꞌye, Nompore, neñoteñe. Phatheꞌkaꞌyeña eñoteneꞌ. Ñañapaꞌ oꞌ alla oterren: —Añeneshaꞌ ñeñth chorrenaya wallamaꞌtharer ñetña awanterret allempo orrterra paꞌnamen moeroxhteñtsoxhno. Ñamha ñetpaꞌ attho eꞌshowarethtet poꞌchñaret eꞌñe Cristo poꞌrraso, ñeñthña ottetsa ateth ñerraꞌmrratheꞌ ñetpaꞌ oꞌ atsamaꞌtarethtet paꞌshtam atthoch eꞌñe kowen aꞌwallamaꞌthtatarethtet paꞌshtamoet eꞌñe kowen.

¹⁵ Ñeñthoꞌmarña ñetpaꞌ alloꞌtsaꞌyenet Yompor poꞌkonaño. All xhokma sherbeñet Yompor —ellapeneteꞌth, arepeneteꞌth sherbhatset all Yompor paꞌpakllo. Yomporña ñeñth anets all poꞌkonaño, ñachña eꞌñe aꞌnatenawet eꞌñe ñesho.

¹⁶ Ñetpaꞌ amach moeroxhterreteꞌthe paꞌchporrñoth amaꞌt poꞌñpañoth. Ñamha ñetpaꞌ amach errothenoth chemoerraneteꞌthe atsneꞌ ñamha amach aꞌmñechaterraneteꞌthe ñamha werateꞌ.

¹⁷ Tharroꞌmar Cristo ñeñth atmaꞌntatareth Carnero ñeñth alloꞌtsen all Yompor poꞌkonaño, ñachña kowampenawet eꞌñe ateth ñerraꞌmrratheꞌ carnero eꞌñech kowampeñ pamoꞌmteꞌ. Ñapaꞌ xhapatanetchaꞌ all poten oñ ñeñthchaꞌ apawet atthoch korrenet errponañowen. Yomporña ñach aꞌwañamphsawet poellkëña amaꞌt awathapaꞌ amach yawerreteꞌthe.