El Apocalipsis 6 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Attho Cristopaꞌ toran ñeñth kanxherr allo echarr apharethtena Yompor poꞌlibro

¹ Allempoñapaꞌ nent Cristo ñeñth tomaꞌntenaya Carnero atthoch ñach toreꞌ ñeñth kanxherr allo echarr apharethtena Yompor poꞌlibro. Allempoña ñapaꞌ oꞌ tore patherr ñeñth eꞌñe ñanom allo ayomrrareth ñeñth libro. Allempoña oꞌ tore, añña paꞌtatsoꞌmar ñeñth berrmaꞌthtetsa, poesheñarrñapaꞌ eños. Nañapaꞌ oꞌ neꞌmoerrerr ñeñth ateth eñen womenk, poꞌñoñpaꞌ eꞌñe ateth eꞌmorrtena ñerraꞌmrratheꞌ xho tatstena. Ñeñthpaꞌ ateth oten: —¡Aphon, pekweꞌ!

² Naña nekweꞌpaꞌ nent patherr kawall atarr wallaphnanen. Ñeñthña montenayapaꞌ echenan patherr poꞌkaꞌnoth ñeñth orraꞌnen pototh. Allñapaꞌ apet patherr choyoꞌmets ñeñthchaꞌ choyoꞌmetnoma. Ñañapaꞌ awoꞌ oꞌch kellaraꞌyenaꞌ oꞌch eꞌñe aꞌmchechwan ñeñth eꞌmoñeꞌtyen.

³ Allempo torerranerr ñeñth poepañ allo ayomrrareth Yompor poꞌlibro, nañapaꞌ alla neꞌmoererr ñeñth poepañ berrmaꞌthpaꞌ oꞌ alla eñorerrerr. Ñeñthpaꞌxhoꞌña ñeñthara ateth oterrerr: —¡Aphon, pekweꞌ!

⁴ Allempoñapaꞌ xhaꞌnerrerr poꞌpoñ kawall, ñeñthñapaꞌ atarr tsaphnanen. Ñeñthña montenaya allñapaꞌ apet patherr espada atarr allpochaꞌph. Ñañapaꞌ oꞌ moenateñet oꞌch kellaratannaꞌtatan acheñeneshaꞌ arr patsro atthochña moetsatannaꞌtatenanet. Atthoña ñetpaꞌ oꞌwañchaꞌ moecheth yexhenet arr patsro.

⁵ Allempo torerranerr ñeñth poemaꞌpañ allo ayomrrareth Yompor poꞌlibro nañapaꞌ alla neꞌmoererr ñeñth poemaꞌpañ berrmaꞌthpaꞌ oꞌ alla eñorerrerr. Ñeñthpaꞌxhoꞌña ñeñthara ateth oterrerr: —¡Aphon, pekweꞌ! Naña nekwererrpaꞌ nenterrerr poꞌpoñ kawall ñeñthñapaꞌ atarr kellwephnanen. Ñeñth montenayapaꞌ orraꞌnenan patherr pesamets.

⁶ Alloꞌtsaꞌyen ñeñth berrmaꞌthtetsapaꞌ eꞌñe all rroxhothpaꞌ neꞌmoererr ñeñth ateth eꞌmorrterrerr ñoñets, ñeñthpaꞌ ateth oten ñoñets: —Patherr kilo trigopaꞌ nankëpaꞌch tsaꞌteterr amaꞌt ñeñth patherr denario, ñamha maꞌpa kilo cebadapaꞌ nankëpaꞌch tsaꞌterra. Tsaꞌterrepaꞌch ñamha patherr denario. Tharraña olivoseꞌ ñamha vinospaꞌ xhokmoepaꞌch eñall, amach seprratamphsatsetye.

⁷ Allempo torerranerr ñeñth poepaꞌtatseñ allo ayomrrareth Yompor poꞌlibro, nañapaꞌ alla neꞌmoererr ñeñth poepaꞌtatseñ berrmaꞌthpaꞌ oꞌ alla eñorerrerr. Ñeñthpaꞌxhoꞌña ñeñthara ateth oterrerr: —¡Aphon, pekweꞌ!

⁸ Naña nekwererrpaꞌ nenterrerr ñeñth patherr kawall atarr shemashrephnaneno poerramaꞌphnen. Ñeñth montenayapaꞌ añ paꞌsoꞌcheñ Rromoeñets. Ñeñth kotheneꞌ chentaꞌpaꞌ añ tomaꞌntena ñeñthchaꞌ agëneꞌ allowen ñeñthchaꞌ rromoets. Ñeñthpaꞌ apareth llesens añekop atthoch aꞌkllatatan shonteꞌ acheñeneshaꞌ arr patso. Amaꞌt pashepharr pats, allpon otenet un cuarto, allponchaꞌ aꞌkllatatwerran acheñeneshaꞌ. Ñeñthpaꞌ atethchaꞌ aꞌkllatatanet, kellareñtsoterrchaꞌ, chaporrñatsoterrchaꞌ, atsnañtsoterrchaꞌ, orrterrach berr ñeñth atarr atsrreꞌmñath ñeñth atarr bellak arr patsro.

⁹ Allempoñapaꞌ oꞌ torerranerr ñeñth paꞌmnareñ allo ayomrrareth Yompor poꞌlibro, naña nekwererrpaꞌ allñapaꞌ nenterrerr altar ñeñth allekma aꞌkrrateteꞌth ñeñth eñmosathtetsa Yomporekop. Eꞌñe all patsoth altaro all nent shonteꞌ kamoekñetsoxhno ñeñth amtsanatarethtatseꞌth all eꞌñe poeserrpareꞌteñothet Yompor poꞌñoñ attho aꞌmetheteꞌth ñamha attho ameꞌñeñet Cristo.

¹⁰ Añña ñeñth kamoekñetsoxhnopaꞌ ñetñapaꞌ rrannartenetpaꞌ oteñet Yompor: —Yompore, pha atarr Partsoph, atarr ayemoetpoꞌ ateth photeney. Esempowachkaꞌ pekoñchatwerña acheñeneshaꞌ all patsro, esempowachkaꞌ petsaꞌtateraña ñeñth acheñer yemtsanatayeꞌth ñeñth patsoꞌtsen. Añpaꞌ allowa ateth ot kamoekñetsneshaꞌ.

¹¹ Ñetña poesheñaꞌttsetpaꞌ aparethtenet paꞌshtam atarr wallamaꞌtharer. Ñamha ñetñapaꞌ otarethtet atoꞌt eꞌñe amesetaꞌ. “Oꞌ mameshamha oꞌch etsotwa allpon poꞌpotantañekop semoꞌnasheñ ñeñthchaꞌ amtsanatarethterrtserr ñeñthes eꞌñe atthekma sesherbeñ Cristo.”

¹² Allempo torerranerr ñeñth poꞌpechapoeñ allo ayomrrareth Yompor poꞌlibro naña oꞌ alla nekwererrpaꞌ nent ñamha xha poetalleꞌchena pats womenk. Atsneꞌñapaꞌ oꞌ chekmet ateth ñerraꞌmrratheꞌ shetamoets ñeñth atarr kellwe ñeñth chorrena ñeñth atarr llekëtsa. Arrorrñapaꞌ oꞌ xha tsamaꞌthta ateth ñerraꞌmrratheꞌ errasats.

¹³ Rantoxhno ñamha ñeñth entoꞌtsaꞌyen allowenpaꞌ oꞌxha shorxhaꞌtwa oꞌ xhaxhaꞌt patso. Oꞌch netmaꞌntacha ateth ñerraꞌmrratheꞌ parte ñeñth eꞌmereth oꞌch womenkëshatpaꞌ poeꞌmerñapaꞌ oꞌch aꞌshoreꞌtampeswe womenkëshaꞌ, amaꞌt atarr ememh poeꞌmer.

¹⁴ Enetpaꞌxhoꞌña oꞌ eꞌñe chenkaꞌwa ateth ñerraꞌm papell epharethpaꞌ oꞌwañchaꞌ orrta. Amaꞌt ora allpon aspentharerpaꞌxhoꞌña oꞌ eꞌñe rrotheꞌtyeswawa ñopaꞌtets. Ñamha ora allowen oñexhno ñeñth rroxhpeꞌchañexhno ñeñthpaꞌxhoꞌña oꞌ eꞌñe rrotheꞌtyeswawa.

¹⁵ Allempoñapaꞌ allowen acheñeneshaꞌ ñeñth yexhaꞌyetsa añe patsropaꞌ oꞌ eꞌñe eꞌpotrraꞌtwet arrorothoꞌmar ñamha mapoetponoꞌmar ñeñth aspenthareroꞌtsaꞌyen. Amaꞌt allowen amhchaꞌtarethneshaxhno oꞌ eꞌñe eꞌpotrraꞌtwet, ñamha allowen ñeñth atarr sherbhaꞌyets, ñamha ñeñth ekhllayorethexhno, ñamha ñeñth paꞌmhchaꞌtarether pen solltar, ñamha ñeñth atarr awamenkath entyetsa, ñamha amaꞌt allowen acheñ ñeñth ama esoyeꞌ enteneto ñeñth atarwasatareth eꞌñe attha, amaꞌt ñamha allowen ñeñth ama atarwasaretheyaye ñeñth eꞌñe kowenoꞌtsen, allowenet eꞌñe eꞌpotrraꞌtwenet.

¹⁶ Allowenetpaꞌ xhoreꞌteñet aspeneth ñamha mapoetaxhno ateth otenet: —Theꞌñapaꞌ yeñgatamperrepaꞌ atthothchaꞌ eꞌpoterrey atthoch amach enterrye Parets ñeñth anets all poꞌkonaño allochñapaꞌ amach errothenoth koñchaterrye Cristo ñeñth tomaꞌntenaya Carnero.

¹⁷ Tharroꞌmar theꞌpaꞌ oꞌ xhap añ yethro allempoch yoroxhterra allempoch atsaꞌtatarethterra allowen acheñeneshaꞌ. Amaꞌt eseshapaꞌ amach errothenoth awantoñeto Yompor poꞌyoroxhenña.