El Apocalipsis 22 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

¹ Allempoña mellañotheñpaꞌ oꞌ alla gaterrnerr poꞌñes. Ñeñthpaꞌ arroth wena konañoth alloꞌtsen Yompor epoet ñamha Poechemer Cristo ñeñth atmaꞌntatareth Carnero. Ñeñth oñpaꞌ atarr kowen, atarr llankasaseno poptasoꞌtena. Oñ ñeñth atarr kowen añ tomaꞌntena attho apoeney Yompor atthochña yapaꞌ korretsayach eꞌñe yoksheñeshokmañen errponowañen.

² Ñeñth Parets paꞌnetsro eꞌñe rroxho allekma chopeñeꞌchenet, allñapaꞌ all oñen oñ. Ñeñth oñ emotoꞌmar popameꞌtar-ro all chopyen tsach. Ñeñthña tsachpaꞌ atarr nanak meꞌten, poemhaꞌtets arrorrpaꞌ xhokma meꞌten. Patherr charpaꞌ xharroch meꞌten poechena epa. Ñeñth poeꞌmer ñeñthchaꞌ apoerrey Yompor añ tomaꞌntena alloch yokrrerra errponañowen ñeñth ama awañaño amaꞌt awatha. Ñamha pasopanerpaꞌ añekop sherben ñeñthchaꞌ aꞌkrraterreꞌ allowen paꞌnamen acheñeneshaꞌ eꞌñe poekamkëñowenet.

³ Parets paꞌnetsropaꞌ amach eñalleterro amaꞌt pathrra ñeñthchaꞌ aꞌkmarethterrtsa. Tharroꞌmar Yompor epoet ñamha Poechemer Cristo ñeñth atmaꞌntatareth Carnero, ñetña partsotetset all poꞌkonañeto. Ñamha alloweney ñeñthey thorretsa Yomporekop eꞌñech kowen yesherberr yamha all.

⁴ Yenterchaꞌ Parets yekwaklleꞌchannerrach parro epay Yompor. Yetoꞌmoña yapaꞌ kellkërranchaꞌ eꞌñe ña paꞌsoꞌcheñ.

⁵ Allñapaꞌ amach eñalleterro chekmeteꞌ. Ñeñtheychaꞌ yexherrtsa allpaꞌ amach yemnerro ñeñthchaꞌ yexhoyoꞌtamphseꞌ. Attho theꞌpaꞌ xhokma yemnen lampareñ alloch yexhoyoꞌtampena. Allempopaꞌ amach yemnerro ñamha oꞌch xhoyoꞌtampeney atsneꞌ, tharroꞌmar Yompor ñeñth Yepartseshar yepen, ñapaꞌ ñaña paꞌtsnomoeña ñeñthchaꞌ yexhoyoꞌtamperreꞌ all. Ñamha yapaꞌ yaꞌmhchaꞌtarethtapreterach allempotheñ errponowañen.

Arrpaꞌ all eñotateney Jesucristopaꞌ awenchaꞌ werra poꞌpocheño arr patsro

⁶ Allempoña mellañotheñpaꞌ oꞌ alla oterrnerr, ñeñthpaꞌ ateth oterrnerr: —Ora allowen añ ñoñetspaꞌ eꞌñech seyemcha tharroꞌmar ñeñthpaꞌ eꞌñech poꞌñoxh ateth perra. Ñamha Yompor ñeñth Yepartseshar yepen ñañapaꞌ xhokma eñotatenan ñeñthchaꞌ aꞌmhteneꞌ poꞌñoñ. Ñeñthara Yompor amaꞌt theꞌpaꞌ oꞌ llesensan poꞌmhllañotheñer ñeñthchaꞌ gatyeneꞌ ñeñth thorretsa ñokop ñeñthchaꞌ awen ateth perra amaꞌt esempo.

⁷ Ñamha Cristo ñapaꞌ ateth oten: —Señochepaꞌch napaꞌ awenchaꞌ nowerra. Atarr kosheñtsoꞌtsen allowen ñeñth yemtenaya ora allpon añ ñoñets ñeñth akellkareth all Yompor poꞌlibro ñeñthchaꞌ ateth perra esempo. Arrpaꞌ allowa wañ ñeñth ateth eñotaten mellañotheñ.

⁸ Na ñeñthen Juananpaꞌ naña eꞌmoeneꞌ ñeñth ora allowen añ ñoñets ñamha naña enteneꞌ ñeñth allpon gatyennet. Allempoña napaꞌ nekonkorposa eꞌñe mellañotheñ paꞌrrpho ñeñth negatyeneꞌ ora allpon paꞌnamen esokmañen oꞌch nemaꞌyochyañ.

⁹ Ñañapaꞌ oten: —Amach pemaꞌyochatsetno na, tharroꞌmar napaꞌxhoꞌña eꞌñe parropaꞌ attha nethorrapretenpha Yomporekop ñamha allowen ñeñth pemoꞌnasheñeshaxhno pepen ñeñth aꞌmhtaꞌyeneꞌ Yompor poꞌñoñ, epoet ñamha allowen ñeñth atarr yemtenaya añ ñoñets ñeñth ateth akellkareth añ libro. Phapaꞌ Yomporña pemaꞌyocha.

¹⁰ Allempoña ñeñth mellañotheñpaꞌ alla oterrnerr: —Ñatoꞌt xha phaꞌnasotenaꞌ añ ñeñth allpon Yompor poꞌñoñ ñeñth oꞌ pekellkaꞌwa. Tharroꞌmar allpon ñeñth oꞌ pekellkaꞌwa ñeñthchaꞌ ateth perra esempo, theꞌñapaꞌ oꞌ xhapmoch allempoch atthoch eꞌñe etsotwerra esempowañen.

¹¹ Tharraña eꞌñe allempotheñ allowen ñeñth ama kowenayeꞌ es petso ñeñthpaꞌ alloꞌnepaꞌch senet phatseꞌtyeset ñeñth ama kowenayeꞌ enteno Yompor. Allowenet ñeñth añach yexhenet sosyaꞌtsañexhno, ñetpaꞌ alloꞌnepaꞌch senet yexhkatyesnomoet ñeñth atarr sosyaꞌtsañexhno. Tharraña allowen ñeñth eꞌñech kowen es phaꞌyenetpaꞌ ñetñapaꞌ alloꞌnepaꞌch senet eꞌñe kowen es phaꞌyestset. Ñamha allowen ñeñth maꞌyoxhrenaya ñeñth attho sherbeñet Parets, ñetpaꞌxhoꞌña alloꞌnepaꞌch senet maꞌyoxhrenet ñeñth atarr kowen enten Parets.

¹² Ñamha Cristo ñapaꞌ ateth oten: —Theꞌpaꞌ señochepaꞌch napaꞌ awenchaꞌ nowerra. Newapaterrnaschaꞌ ñeñth noꞌpatatensa alloch netsaꞌtwerrsa eꞌñe poesheñaꞌttsos sa errothentheꞌ sethorraꞌyeseꞌth. Tharraña oꞌkaꞌye newapaterr ñamha alloch netsaꞌtatwera ñeñth ama pokteyeꞌ es petso.

¹³ Napaꞌ eꞌñe paꞌmothrotheñ eñallen, atthen ñerraꞌmrratheꞌ kellek A ñeñth paꞌmother pen alfabeto. Allempotheñña napaꞌ xhokma eñallen esempowañenchaꞌ wañerr ñeñth allpon eñall, napaꞌ atthen ñerraꞌmrratheꞌ kellek Z ñeñth all poen alfabeto.

¹⁴ Atarr kosheñtsoꞌtsen allowen ñeñth eꞌñe pokteꞌ enten Yompor oꞌch tsomwerrñañet Yompor poenaren alloch eꞌñe korrerret poktakma. Allempopaꞌ amach alla rromoerreteꞌthe. Ñeñthpaꞌ ñeñthchaꞌña eꞌñe yomhaꞌwerret ñesho. Ñewa, ñeñth eꞌñe pokteꞌ enten Yompor ñeñthpaꞌ allowen ñeñth eꞌñe eꞌshowarethterra poꞌchñar eꞌñe pameꞌñeñothet Cristo. Ñatoꞌ oꞌch netmaꞌntacha ateth: Ñetpaꞌ oꞌ eꞌñe tsamaꞌtwerret paꞌshtamoet atthoch eꞌñe pokteꞌ entanet Yompor oꞌch beꞌthoset yetarro eshekchaꞌ xhapoet Yompor paꞌnetsro.

¹⁵ Tharraña allowen ñeñth ama ameꞌñenayo Cristo ñetñapaꞌ aꞌyotheꞌtsaꞌyenetach Yompor paꞌnetsroth. Ateth ñerraꞌm amaseꞌñethexhno, ñamha ñeñth ekañoreshathexhno, ñamha ñeñth amtsañexhno ñamha allowen ñeñth poꞌyomporer peneꞌ ayexhkatareth ñamha allowen ñeñth kowen enteneꞌ allowen shekëñtsoxhno. Ñetpaꞌ eꞌñe ñeñtha eñotenet oꞌch shekareꞌchet acheñeneshaꞌ.

¹⁶ Allempoña Jesúspaꞌ alla oterrerr, ñeñthpaꞌ ateth ot: —Napaꞌ naña ñeñthen llesenseneꞌ nemhllañotheñer ñeñth oꞌ eñotaterres ora añexhno, allowenes ñeñthes eꞌñe sameꞌñeñothen na sapaꞌ xhokma sapxhaꞌyena allemeñ anetsoꞌmar. Napaꞌ ñeñthen alloth wapa amhchaꞌtareth David, elloñapaꞌ oꞌ alla poꞌmhreneñ perrnerr namha. Ñamha napaꞌ atthen ñerraꞌmrratheꞌ ranto ñeñth atarr atarremh ñeñth atarr womenk atsnets oꞌch poetarenmoch. Atthoña naꞌpoetarsampeñ allowen acheñeneshaꞌ.

¹⁷ Allowen ñeñth poeyochreshaꞌ pen Parets ñetpaꞌ atmaꞌntatarethtenet ateth ñerraꞌmrratheꞌ Cristo poethapor penawet. Atthoña ñet Parets Poekamkëñoth oteñet Cristo: —Aphon. Ñamha allowenes ñeñthes eꞌmhñoteneꞌ oꞌch soch samha Cristo: —Aphon. Ñamha allowenet ñeñth oñpaꞌtets ñeñth ama eñmatetso poeyoxhreto ñeñth xhokma es eꞌnyenet, ñetpaꞌxhoꞌña wapoetepaꞌ. Yoretepaꞌ añ oñ, allochñapaꞌ ñetpaꞌxhoꞌña korretsetach. Ñeñth oñpaꞌ eꞌñech attha aparethtet, amach es tsaꞌtayo amaꞌt eꞌñe koñeꞌtha.

¹⁸ Na theꞌpaꞌ oꞌch nokthapeꞌchach allowen ñeñth eꞌmhñoteneꞌ añ ñoñets all oteney ñeñthchaꞌ ateth perra esempo. Oꞌch notanet: Ñerraꞌm eseshaꞌ atontateneꞌ ñet pokthaphñet ñeñth ama attheyeꞌ otenye añ ñoñets, Yomporñapaꞌ oꞌch atontatanet ñokpoet ñeñthchaꞌ moeroxhtaterrawet ñeñth ateth oꞌ akellkaꞌwarethta añ libro.

¹⁹ Ñamha ñerraꞌm eseshaꞌ xha aꞌchenkatenan amaꞌt pathrra ñoñets ñeñth allpon akellkaꞌwarethta añ libro, Yomporñapaꞌ amach moenataneto oꞌch es oꞌpatapreteret all akellkarethtena libro allpon ñeñthñapaꞌ korretsetach. Ñamha ñetpaꞌ amach beꞌthosapoꞌtampereto Parets paꞌnetsro ñeñth ateth oꞌ akellkaꞌwarethta añ libro.

²⁰ Ñeñthara Jesús ñeñth yeñotatyeneꞌ ora añexhno, ñañapaꞌ alla oterrerr: —Napaꞌ poꞌñoxhchaꞌ awen nowerrerr poꞌpocheño. Yañapaꞌ alloweney yoteñ: —Aphon Yepartseshare Jesucristo. Ñeñthpaꞌ atthetepaꞌch yokop.

²¹ Yepartsesharepaꞌchña Jesucristo saꞌnatenaya eꞌñe allowenes. Ñeñthpaꞌ atthetepaꞌch Nompore allowenakpay. Arrpaꞌ eꞌñe allowa poen Yompor poꞌñoñ.