El Apocalipsis 2 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Attho Juanpaꞌ kellkan carta añekop ñeñth ameꞌñetsa anetso Efeso

¹ Ñeñth neserrpareꞌtateneꞌ ñapaꞌ alla oterrnerr, ñapaꞌ ateth oten: —An poktetsa oꞌch pekellkaꞌ carta añekop ñeñth kowampeneꞌ allowen ñeñth ameꞌñetsa all anetso Efeso, oꞌch photanet ateth: “Napaꞌ oꞌch nekellkonas carta atthoch neñotatas ñeñth ateth otenes Jesucristo ñeñth orreneꞌ kanxherr ranto eꞌñe all poto poꞌkowenroth, ñeñthara Cristo ñeñth chopeꞌchets rroxho eꞌñe alloꞌtsen ñeñth ayexhkatareth oroch all orratenet werare.

² Ñañapaꞌ ateth otenes: ‘Napaꞌ neñotwennas ñeñth ora allpon ateth sephaꞌyena all. Napaꞌ eꞌñe nentwennas ñeñth allpon nanak sethorraꞌyena ñamha allpon ñeñth eꞌñe kowen akopha es saꞌwantaꞌwanen. Ñamha napaꞌ eꞌñe nentwenes sapaꞌ ama sagëñe ñeñth ama kowenayeꞌ es phaꞌyetso. Sapaꞌ attho setpatyeñ ñeñth otetseñ ñetpaꞌ allsensarethetoꞌ tharraña ñetpaꞌ attha shekareꞌtenet. Atthoña setpateñoth oꞌ señotanet ñetpaꞌ attha shekareꞌtenset.

³ Ñamha napaꞌ neñotwenes ñeñth allpon semoeroxhtena nokop ñamha attho eꞌñe kowen saꞌwantaꞌwen moeroxhteñets, ama semoenmeꞌcheñe allo sethorrena.

⁴ Tharraña amaꞌt attheñpaꞌ nentwennas patherr ñeñth ama kowenayeꞌ nentapretenso. Ñeñthpaꞌ añ attho sapaꞌ oꞌwañ eꞌñe semorrentna ñeñth ateth sepha awath allempo eꞌñe errteꞌ sameꞌñerrna.

⁵ Theꞌpaꞌ oꞌch notas, oꞌch seyerpoerra attho awañmoꞌcha nanak kowen semorrentenna. Theꞌpaꞌ ama attheyeꞌ sepeno. Añ pokteꞌ oꞌch alla sokthapeꞌcherr eꞌñe kowen atthoch oꞌch alla seperra kowen ñeñth ateth sepha allempo eꞌñe ñenmath sameꞌñenna. Ñerraꞌm amach ello sokthapeꞌcherro kowen napaꞌ thayekma oꞌch awen oꞌch neprratamperres ñeñth atmaꞌntatareth sokop ñeñthara ñeñth all orratenet werare.

⁶ Tharraña amaꞌt attheñpaꞌ napaꞌ añña eꞌñe kowen nentwennas attho sapaꞌ ama pokteyeꞌ senteno ñeñth ateth phatseꞌtyen acheñeneshaꞌ ñeñth kotheneꞌ Nicolás pokthaphña. Napaꞌxhoꞌña ama pokteyeꞌ nenteno ñeñth ateth phatseꞌtyenet sosyaꞌtsañ.

⁷ Ñeñth eꞌmhñoteneꞌ añ ñoñetspaꞌ xhapanetepaꞌch poeyoxhreto ñeñth ateth neñotatenanet na Nekamkëñoth, ora allowen ñeñth pameꞌñeñothet xhokma apxhaꞌyenet allemeñ anetsoꞌmar. Ñeñth metanaꞌtweꞌ allowen paꞌnamen topateñtsoxhno, ñeñth ama nepoerramperrayo, ñetñapaꞌ napwerranetchaꞌ ñeñth noꞌpatatenanet ñeñthchaꞌ atarr yomhaꞌwerret eꞌñe poktakma Nomporesho, allpaꞌ eꞌñech kosheñtsoꞌtsenet. Ñeñthña napaꞌ oꞌch not, napaꞌ oꞌch nemnaterranet atthoch oꞌch tsomwerret añ tsach poeꞌmer alloch korraꞌwerret eꞌñe poktakma amach alla rromoerreteꞌthe amaꞌt awatha.’ ” Arrpaꞌ allowa wañ ateth ot efesoꞌmarneshakop.

Attho Juanpaꞌ kellkan carta añekop ñeñth ameꞌñetsa anetso Esmirno

⁸ Allempoña ñeñth neserrpareꞌtateneꞌ ñapaꞌ alla oterrnerr: —Theꞌpaꞌ oꞌch pekellkërrerr carta añekop ñeñth kowampeneꞌ ñeñth ameꞌñetsa all anetso Esmirna, oꞌch photanet ateth: “Napaꞌ oꞌch nekellkonas carta atthoch neñotatas ñeñth ateth otenes Jesucristo ñeñth ñanom eñall, allempotheñña ñapaꞌ xhokma eñall amaꞌt esempowañenchaꞌ wañerr ora allpon ñeñth eñall. Jesucristo ñapaꞌ ñeñth rromwats tharraña theꞌpaꞌ oꞌ alla bethterra.

⁹ Ña theꞌpaꞌ ateth otenes: ‘Napaꞌ neñotwennas ora allpon ñeñth ateth sephaꞌyena. Neñotwennas ñamha attho atarr saꞌmoeroxhtatarethtena, ñamha attho atarr wokchañes. Ñewa, amaꞌt wokchañsoñpaꞌ Yomporeshoth shonteꞌ esokmañen ñeñth sechyen. Ñamha ñeñth seꞌmoñeꞌteneꞌ neñotwennas attho atarr sasareꞌtenset. Amaꞌt otenetañ ñetpaꞌ judioneshetoꞌ tharraña ñetpaꞌ ama Yomporeyeꞌ poeyochreshaꞌ penaweto; ñetpaꞌ aña poeyochreshaꞌ penawet oneñeth amaꞌt allowenet.

¹⁰ Amach yoreꞌtatstaso moeroxhteñets ñeñthchaꞌ awen sewapoya. Tharroꞌmar ñeñthchaꞌ seyottamphseꞌ patantaꞌttsos, ñeñthpaꞌ oneñetheshoth wena añekopña atthoch topatwas ñerraꞌm poꞌñoxhtheꞌ sameꞌñena. Poesheñaꞌttsos moeroxhtatasetchaꞌ eꞌñe xharramat. Amaꞌtchaꞌ moetsasetpaꞌ añ pokteꞌ oꞌch serromapes attho sameꞌñena. Allochña napaꞌ napwerreschaꞌ ñeñth noꞌpatatensa alloch sokrraꞌwerra eꞌñe soksheñeshokmañen. Ñeñthpaꞌ ñeñthara noten poꞌpoñ ñoñtso napwerreschaꞌ sepremio ñeñthchaꞌ sokshatwerreꞌ eꞌñe poktakma.

¹¹ Ñeñth eꞌmhñoteneꞌ añ ñoñetspaꞌ xhapanetepaꞌch poeyoxhreto ñeñth ateth neñotatenanet na Nekamkëñoth ora allowen ñeñth pameꞌñeñothet xhokma apxhaꞌyenet allemeñ anetsoꞌmar. Ñeñth metanaꞌtweꞌ allowen paꞌnamen topateñtsoxhno, ñeñth ama nepoerramperrayo, ñetpaꞌ amaꞌt poesheñarrothetapaꞌ amach amñarethterreto koñcheñtso amaꞌt awatha. Ñetpaꞌ amach alla rromoerreterro poꞌpocheño.’ ” Arrpaꞌ allowa wañ ateth ot esmirnoꞌmarneshakop.

Attho Juanpaꞌ kellkan carta añekop ñeñth ameꞌñetsa anetso Pérgamo

¹² Allempoña ñeñth neserrpareꞌtateneꞌ, ñapaꞌ alla oterrnerr: —Theꞌpaꞌ oꞌch pekellkërrerr carta añekop ñeñth kowampeneꞌ ñeñth ameꞌñetsa all anetso Pérgamo, oꞌch photanet ateth: “Napaꞌ oꞌch nekellkonas carta atthoch neñotatas ñeñth ateth otenes Jesucristo ñeñth orrtateneꞌ kochell poenamoth, poꞌkchellpaꞌ ñeñth emoshemhtoꞌmar etsotañtatareth.

¹³ Ñapaꞌ theꞌpaꞌ otenes: ‘Napaꞌ neñotwennas ora allpon ñeñth ateth sephaꞌyena. Napaꞌ neñotenes all seyxhena ñeñthpaꞌ all atarr amhchaꞌnoxhtena oneñeth. Tharraña amaꞌt attheñpaꞌ sapaꞌ ama sekexhpoeno attho sameꞌñenna, ñamha xhokma saꞌmethen attho sameꞌñenna, amaꞌt eꞌñe allempo moetsennanet ñeñth nameꞌñenaya ñeñthara Antipas ñeñth xhokma neserrpareꞌteneꞌ neñoñ sesho, allara ñeñth paꞌnetser peñ oneñeth.

¹⁴ Tharraña amaꞌt attheñpaꞌ napaꞌ nentwennas koñeꞌth ñeñth ama pokteyeꞌ nentapretenso ñeñth ateth sephatseꞌtena. Eꞌñe all Pérgamo patantaꞌttsos ama semno oꞌch sekëchpaꞌ ñeñth poeyxhateñ peꞌth ateth yexhateꞌth Balaam awath. Balaam awathpaꞌ ateth kothapeꞌchataneꞌth Balak atthoch shekareꞌtaneꞌth israelenaꞌtarneshaꞌ allochñapaꞌ atthoch ñetpaꞌ oꞌch phatseꞌtyenet ñeñth ama pokteyeꞌ enteno Yompor. Ñeñth ateth phatseꞌtyenet ñeñthpaꞌ ateth peteꞌth oꞌch rrallmeꞌchapretan poꞌpoñ acheñ ñeñth poꞌyomporer peneꞌ ñeñth ayexhkatareth, ñerraꞌm esempo rrenet poꞌchets ñeñth moetsenet allo sherbeñet poeyexhkatar. Elloña allempo ñetpaꞌ eꞌñe pokshapreteñothetpaꞌ oꞌch agapannaꞌtet amaꞌt ñeñth ama poethaporeyaye, allñapaꞌ oꞌch kañoreshaꞌtenet.

¹⁵ Eꞌñe atthekma seshopaꞌxhoꞌña patantaꞌttsos atarr ashkarethes ñeñthes poesheñaꞌttsos ñeñthes ama semno oꞌch sekexhpoñ Nicolás pokthaphña ñeñth ateth yexhatenes ñeñth ama pokteyeꞌ nenteno.

¹⁶ Tharraña napaꞌ oꞌch notas, sekëchpaꞌ ñeñth añ kothaphñatser, oꞌch alla sokthapeꞌcherr eꞌñe kowen. Ñerraꞌm amach ello sokthapeꞌcherro kowen, napaꞌ eꞌñe thayekma oꞌch awen oꞌch nekhllarenanetaꞌ nokchelloth ñeñth nenamoꞌtsen.

¹⁷ Ñeñth eꞌmhñoteneꞌ añ ñoñetspaꞌ xhapanetepaꞌch poeyoxhreto ñeñth ateth neñotatenanet na Nekamkëñoth ora allowen ñeñth pameꞌñeñothet xhokma apxhaꞌyenet allemeñ anetsoꞌmar. Ñeñth metanaꞌtweꞌ allowen paꞌnamen topateñtsoxhno, ñeñth ama nepoerramperrayo ñetñapaꞌ napanetchaꞌ maná ñeñthchaꞌ pokrramh perret ñeñth ama entpawesho. Ñamha oꞌch napanet mapyetholl ñeñth atarr wallamemen allo akellkarethtena soꞌchñets eꞌñe etserra. Ñeñthchaꞌ agapoeꞌ ñeñthpaꞌ ñaptha eñotenan añ soꞌchñets ñeñth akellkareth all.’ ” Arrpaꞌ allowa wañ ateth ot pérgamoꞌmarneshakop.

Attho Juanpaꞌ kellkan carta añekop ñeñth ameꞌñetsa anetso Tiatiro

¹⁸ Allempoña añ ñeñth neserrpareꞌtateneꞌ ñapaꞌ alla oterrnerr: —Theꞌpaꞌ oꞌch pekellkërrerr carta ñamha añekop ñeñth kowampeneꞌ ñeñth ameꞌñetsa all anetso Tiatira, oꞌch photanet ateth: “Napaꞌ oꞌch nekellkonas carta atthoch neñotatas ñeñth ateth otenes ñeñth Yompor Poechemer, ñeñthara ñeñth paꞌklleꞌpaꞌ atarr aꞌrrechatañ ateth ñerraꞌmrratheꞌ tsoꞌ poꞌworter, ñamha ñeñthara paꞌtakpaꞌ atarr poptena ateth ñerraꞌm aser ñeñth bronce ñeñth atarr kowen poptetsa.

¹⁹ Ñapaꞌ theꞌpaꞌ ateth otenes: ‘Napaꞌ neñotwennas ora allpon ñeñth ateth kowen sephaꞌyen, attho atarr semorrentannena ñamha attho atarr sameꞌñena, ñamha attho atarr seyenpannena, ñamha attho eꞌñe kowen saꞌwantaꞌwen ñeñth atarr echarr senten. Ñamha elloña alloꞌna sesen ateth phaꞌnmoeꞌ ñeñth atarr kowen enten Yompor.

²⁰ Tharraña amaꞌt attheñpaꞌ eñall patherr ñeñth ama pokteyeꞌ nentapretenso. Ñeñthpaꞌ attho sapaꞌ semnateñ koyaneshaꞌ ñeñth sochetsa Jezabel attho ñapaꞌ aña yexhaten ñeñth ama kowenayeꞌ nenteno na. Amaꞌt ñapaꞌ oteneñ ñoꞌ aꞌmhteneꞌ Yompor poꞌñoñ tharraña ama attheyaye, ñapaꞌ attha shekareꞌtenes ñeñthes thorretsañ nokop. Ñamha ñapaꞌ aña yexhatenes ñeñth attho sekañoreshaꞌten, ñapaꞌ otenes ñeñthpaꞌ eꞌñe pokteꞌ enteñ Yompor. Ñamha aña yexhatenes ñeñth attho serrapreten poꞌchets ñeñth moetsenet ayexhkatarethekop, ñapaꞌ otenes ñeñthpaꞌxhoꞌña eꞌñe pokteꞌ enteñ Yompor. Tharraña Yomporñapaꞌ amaꞌt mameshapaꞌ ama pokteyeꞌ enteñe.

²¹ Napaꞌ attha nekweñ allponmat, noten ñatoꞌ oꞌch kothapeꞌcherran kowen tharraña themeꞌttsenpaꞌ ama moeno oꞌch kothapeꞌcherran kowen. Ñapaꞌ aña atarr kowen enten attho kañoreshaꞌten.

²² Ñeñthoꞌmar theꞌ napaꞌ oꞌch nemnach oꞌch atsnaꞌten atthoch amach xhaꞌnerro poꞌmayoth. Ñamha ñeñth epoet ateth penet ñerraꞌm ama kothapeꞌcherreto kowen atthoch kexhpoenet ñeñth ateth yexhatenanet ña, ñetpaꞌxhoꞌña oꞌch nekoñchatanet nanak.

²³ Amaꞌt ñamha poechoyoreshowen napaꞌ oꞌch neꞌnwerranet. Allochñapaꞌ atthoch allowen ñeñth pameꞌñeñothet apxhaꞌyetsa allemeñ anetso oꞌch eñochet ñeñth atethpaꞌ ama aphapawo. Napaꞌ eꞌñe nentwennas amaꞌt ñeñth ateth sokthapeꞌchen seyoxhro. Napaꞌ ñeñthenchaꞌ sapwerreꞌ allpon ñeñth poktetsa eꞌñe poesheñaꞌttsokpas, ñeñth allpon ateth sephaꞌyen.

²⁴ Tharraña poꞌpotantañes ñeñthes tiatiroꞌmarneshas sapaꞌ ama soktheññañe ñeñth ateth yexhaten koyaneshaꞌ. Amaꞌt ñamha ñeñth otenet oneñeth pokthaphña ñeñth ama eñotpawoyaye, poesheñaꞌttsa eꞌñe etsoteneꞌ —ñeñthpaꞌxhoꞌña sapaꞌ ama seyxheñe. Ñeñthoꞌmar theꞌpaꞌ oꞌch notas, napaꞌ amach nenonaso poꞌpoñ ñoñets ñeñth atarr echarr senten.

²⁵ Añña notenes, amach sekexhpatsche ñeñth attho sokthapeꞌchen kowen Yomporekop, amaꞌt thayotheñ ñamha esempowañen allempoch nowerra.

^26-27 Ñeñth metanaꞌtweꞌ allowen paꞌnamen topateñtsoxhno, ñeñth ama nepoerramperrayo, ñeñth alloꞌna sets phaꞌnmoeꞌ ñeñth pokteꞌ nenten na, ñetpaꞌ napwerranetchaꞌ atthoch amhchaꞌtareth entenanet allowen paꞌnamen acheñeneshaꞌ ñeñth yexhaꞌyetsa añe patsro. Ñeñthpaꞌ ateth Nompor apoenen namha. Neyoroxhenñoch amhchaꞌnoxhtapreterrnetchaꞌ. Eꞌñe poꞌwamenkothet ñerraꞌm ñet moenats atarrchaꞌ moeroxhtateret allowen paꞌnamen acheñeneshaꞌ arr patsro. Ñeñthpaꞌ oꞌch netmaꞌntacha ñerraꞌmrratheꞌ ñeñth echeneꞌ poꞌkarr asreph, ñerraꞌm allo asoꞌtet patsrroꞌpaꞌ xhach aꞌmlloꞌtstach eꞌñe poktakma.

²⁸ Ñeñth metanaꞌtweꞌ allowen paꞌnamen topateñtsoxhno elloña ñetpaꞌ napanetchaꞌ ranto ñeñth atarr ateshamerr.

²⁹ Ñeñth eꞌmhñoteneꞌ añ ñoñetspaꞌ xhapanetepaꞌch poeyoxhreto ñeñth ateth neñotatenanet na Nekamkëñoth, ora allowen ñeñth pameꞌñeñothet xhokma apxhaꞌyenet allemeñ anetsoꞌmar.’ ” Arrpaꞌ allowa ñeñth ateth ot tiatiroꞌmarneshakop.