El Apocalipsis 19 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

¹ Allempoña oꞌ alla neꞌmoerrerr ñeñth eꞌmorrtetsa womenk ento, shonteꞌ acheñeneshaꞌ eꞌñe parrokma rrannartenet, ñeñthñapaꞌ ateth otenet: ¡Aleluya! Ayeꞌchoxhtatpoꞌch Yompor tharroꞌmar ñapaꞌ ña ñapoeth aꞌkeshphatañtetsa, akowentatpoꞌch Yompor ñeñth ñapoeth atarr awamenkatheshaꞌ.

² Ñamha ñeñth pokteꞌ enten Yompor ñeñthpaꞌ eꞌñe pokteꞌ atthekma, ñamha allpon ñeñth ateth oten ña, ñeñthpaꞌ eꞌñe poꞌñoxh atthekma. Tharroꞌmar ñapaꞌ oꞌ koñchaterran koyaneshaꞌ ñeñth atarr ekañoreshathtetsa tharroꞌmar eꞌñe ña poꞌchñarothpaꞌ atarr aꞌsosyatenan acheñeneshaꞌ ora allowen ñeñth yexhaꞌyetsa añe patsro. Theꞌña Yomporpaꞌ oꞌ eꞌñe tsaꞌtatwera ñeñth allpon moetsanatatoñeꞌth ñeñth thorraꞌyestseꞌth ñokop.

³ Poꞌpocheñoñapaꞌ alla oterreterr: —¡Aleluya! Ayeꞌchoxhtatpoꞌch Yompor tharroꞌmar theꞌpaꞌ Yompor oꞌ amosoñeꞌchaterran ñeñth athpareꞌtayeꞌth. Atthoña oꞌ chepoterr pamosoñ enoneth; ñeñthpaꞌ amaꞌt awathapaꞌ amach wañerro.

⁴ Allempoña añ epoch xharraꞌ ñeñth poechetsa paꞌtatssheña ñeñth sherbeneꞌ Yompor poꞌkonaño, ñetñapaꞌ konkorpaꞌrrtenet epoet ñamha paꞌtats ñeñth berrmaꞌthtetsa. Allowenet konkorpaꞌrrtenet all Yomporesho. Allowenetpaꞌ maꞌyocheñet Yompor all anen poꞌkonaño. Ñetñapaꞌ ateth oteñet: —Ayeꞌchoxhtatpawpepaꞌch Yompore, atthetepaꞌch phokop errponowañen.

⁵ Allempoña all Yompor poꞌkonañothpaꞌ allothña eꞌmorrterrerr poꞌpoñ ñoñets, ñeñthpaꞌ ateth oten: Saꞌyeꞌchoxhtatoñepaꞌch Yompor, allowenes ñeñthes thorraꞌyetsa ñokop, amaꞌt sa ñeñthes atarr sherbets amaꞌt samha ñeñthes ama tama sherbetso. Amaꞌt allowenes erraꞌtsenestheꞌ ñeñthes atarr amhchaꞌnaꞌtpoꞌ enteneꞌ Yomporpaꞌ theꞌñapaꞌ saꞌyeꞌchoxhtatoñepaꞌchña.

Attho Cristopaꞌ eꞌñe kowen agërran allowen ñeñth ameꞌñenaya ña ñeñth atmaꞌntatareth ateth ñerraꞌmrratheꞌ ña poethapor penawet

⁶ Allempoña napaꞌ oꞌ alla neꞌmoerrerr shonteꞌ acheñeneshaꞌ rrannartenet, atarr womenk eꞌmorrtena ateth ñerraꞌmrratheꞌ all etsaseꞌtena shonteꞌ oñ atarrchaꞌ womenk maꞌmoreten. Poꞌmaꞌmoreteññapaꞌ xha ottena ñerraꞌmrratheꞌ xho thekor-rraren. Acheñeneshaꞌña ñeñth rrannartetsapaꞌ ñetñapaꞌ ateth otenet: Ayeꞌchoxhtatpoꞌch Yompor tharroꞌmar theꞌpaꞌ oꞌ xhap allempoch amhchaꞌtarethterra ña eꞌñe ñapoeth ñeñthara Yepartseshar ñeñth atarr awamenkatheshaꞌ.

⁷ Theꞌñapaꞌ yoksherrepaꞌch, yokshameꞌtamperepaꞌch, yekowentaterrñañepaꞌch tharroꞌmar theꞌpaꞌ oꞌ xhap allempoch yokshameꞌtampesya Cristo ñeñth atmaꞌntatareth Carnero. Theꞌñapaꞌ oꞌ xhap allempoch senaꞌta. Ñamha ñeñth koyaneshaꞌ ñeñthchaꞌ poethapor phaꞌ, ñañapaꞌ oꞌ eꞌñe aññoꞌtarethta.

⁸ Ñañapaꞌ oꞌ apet ñamha ñeñthchaꞌ chorra ñeñth atarr kowen wallamaꞌth atarr koxhneshaꞌ shetamoets ñeñth otenet lino ñeñth ama asosyatño amaꞌt eꞌñe mamesha, attherach poptameꞌtena. Ñewa, añ shetamoets ñeñth otenet lino ñeñth ama aꞌsosyatpawoyaye amaꞌt eꞌñe mamesha, ñeñthpaꞌ añ tomaꞌntena ñeñth attho eꞌñe kowenareꞌ es phaꞌyen ñeñth poeyochreshaꞌ pen Parets. Ñetñapaꞌ añ tomaꞌntenet Cristo poethapor penawet.

⁹ Allempoña mellañotheñpaꞌ alla oterrnerr: —Theꞌpaꞌ oꞌch pekellkërrerr añ ñoñets ñeñth noteneph, ñeñthpaꞌ ateth ot: “Atarr kosheñtsoꞌtsen allowen ñeñth awaꞌñarethtetsa oꞌch rrallmeꞌchaprechet allchaꞌ koshameꞌtampeñet Cristo ñeñth atmaꞌntatareth Carnero ñeñth senaꞌtatsa.” Mellañotheññapaꞌ alla oterrnerr: —Ora allpon ñeñth ateth oteney Yompor arrpaꞌ ñeñthpaꞌ eꞌñe poꞌñoxh ateth.

¹⁰ Nañapaꞌ nekonkorposa mellañotheñ paꞌrrpho ñeñth neserrpareꞌtateneꞌ oꞌch nemaꞌyochyañ, tharraña ñapaꞌ ateth oten: —Napaꞌ amach pemaꞌyochatsetno, napaꞌ añana ñeñthen pethorrapretenaya Yomporekop ñamha allowen pemoꞌnasheñneshaxhno ñeñth serrpareꞌteneꞌ attho ameꞌñeñet Jesús. Phapaꞌ añchaꞌña pemaꞌyocha Yompor ñapoeth. Tharroꞌmar allowen ñeñth aꞌmhteneꞌ Yompor poꞌñoñ, eꞌñe ña Poekamkëñothpaꞌ añ serrpareꞌtenet ñeñth attho yameꞌñeña Jesús.

Cristo ñeñth montenaya kawall ñeñth atarr wallaphnanen

¹¹ Allempoña poꞌpocheñopaꞌ alla nenterrerr atorareth enet. Allñapaꞌ alloꞌtsen kawall ñeñth atarr wallaphnanen. Ñeñth montenaya kawallpaꞌ añ socheñet, Ñeñth atarr Ayemoetpotetsa ñamha ñeñth eꞌñe Poꞌñoxh Yompor Poꞌñoñ. Tharroꞌmar ñapaꞌ erraꞌtsen pokteꞌ ent oꞌch koñchach, ñeñthña ñokoppaꞌ eꞌñe pokteꞌ. Ñamha ñerraꞌm ña kellaratawet ñeñthpaꞌxhoꞌña eꞌñe pokteꞌ ñokop.

¹² Paꞌklloyothñapaꞌ atarr nanak aꞌrrechatañ ateth ñerraꞌmrratheꞌ tsoꞌ poꞌworter. Poñoñapaꞌ shonteꞌ poꞌchoyoꞌmh ñeñth choyoꞌmhtena. Allñapaꞌ anareth ñamha paꞌsoꞌcheñ ñeñthpaꞌ eꞌñe ñaptha eñoteñ.

¹³ Paꞌshtampaꞌ año eꞌxhomareth errasatso. Ñamha añ socheñet Yompor Poꞌñoñ.

¹⁴ Ñamha ñeñth allpon paꞌkhllarañneshar pen all poeꞌntaño, ñetñapaꞌ kotheñet chentaꞌ montaꞌyesnenet ñamet poekawalloro ñeñth atarr wallaphnarren. Ñetpaꞌxhoꞌña ñeñth paꞌshtam penet atarr wallamaꞌtharer. Ñeñth shetamoetspaꞌ atarr kowen ñeñth otenet lino ñeñth ama sosyatetso amaꞌt mamesha.

¹⁵ Ñeñth anenawet, eꞌñe poenamoth all orrtena kochell ñeñth atarr etsotañtatareth. Ñeñth kochellpaꞌ añekop sherben alloch ameꞌñatwerrana ora allpon paꞌnamen acheñeneshaꞌ arr patsro. Allochñapaꞌ poꞌyoroxhenñothpaꞌ oꞌch amhchaꞌtarethterranet ateth ñerraꞌmrratheꞌ ñapaꞌ aꞌsrepereth oꞌch amhchaꞌnoxhtanaꞌterranet. Ñamha ñach koñchaterrawet. Oꞌch netmaꞌntacha ateth ñerraꞌmrratheꞌ ñach athmamaꞌteꞌ uva eshekchaꞌ xhaꞌnom poꞌñer. Ñeñth ateth athmamaꞌteñet uvapaꞌ añ tomaꞌntena attho Yompor ñeñth atarr awamenkath eꞌñe ña poꞌyoroxhenñothpaꞌ atarrchaꞌ koñchaterran acheñeneshaꞌ ñeñth athpareꞌtetsa.

¹⁶ Ñamha paꞌshtamo eꞌñe paꞌthapakoptaro allñapaꞌ all akellkareth ñoñets ñeñthchaꞌ ateth enteñet Cristo, ñeñthpaꞌ ateth oten ñoñets: “Allowen ñeñth amhchaꞌtarethexhno añmapaꞌ ñeñthña eꞌñe Paꞌmhchaꞌtarether phoweñet allowenet. Ñamha allowen ñeñth ayochreshathexhno añmapaꞌ ñeñthña eꞌñe Paꞌyochreshather phowenet allowenet.”

¹⁷ Allempoña napaꞌ oꞌ alla nenterrerr mellañotheñ ñeñth thets all ñeñth yexhoyoꞌtampeneꞌ. Ñañapaꞌ atarr womenk eñen, xhoreꞌtenan allowen tseꞌmaxhno ñeñth anomxhaꞌtyetsa eno. Ñeñthñapaꞌ ateth otenanet: —Sewaxhaꞌta allowenes oꞌch sapxha arr oꞌch serren poꞌchets ñeñth atarr aton rratenes Yompor.

¹⁸ Atthoch serroñ poꞌchtsoxhno shonteꞌ acheñeneshaꞌ ñeñth amhchaꞌtarethetyetsa, ñamha shonteꞌ ñeñth capitanatyets, ñamha shonteꞌ ñeñth atarr awamenkath entyenet. Serroñ ñamha shonteꞌ kawallexhno poꞌchets ñamha añ poꞌchets ñeñth montenaya. Amaꞌt shonteꞌ paꞌnamen acheñeneshaꞌ oꞌch serroñ poꞌchets amaꞌt ñeñth acheñer ñeñth atarr sherbets ñamha amaꞌt ñeñth ama sherbetso, amaꞌt ñeñth eꞌñe kowenoꞌtsen acheñ, amaꞌt ñamha ñeñth atarwasatareth eꞌñe attha —oꞌch eꞌñe serrwanet poꞌchets allowenet.

¹⁹ Allempoña napaꞌ oꞌ alla nenterrerr maꞌyarrmaꞌth epoet ñamha allowen amhchaꞌtarethexhno ora errapharen ñeñth añe patsroꞌtsen epoet ñamha allowen ñeñth paꞌkhllarañneshar pen. Ñetpaꞌ añekop apxhenet allochñapaꞌ oꞌch kellareñet ñeñth montenaya poekawallor ñeñth atarr wallaphnanen ñamha epoet ora allpon ñeñth paꞌkhllarañneshar pen ña.

²⁰ Allempoña kellarannaꞌtet maꞌyarrmaꞌthñapaꞌ xha rremoet epoet ñamha ñeñth aꞌmhteneꞌ eꞌñe ña poꞌñoñ tharraña ñeñthpaꞌ ashkaña. Añ ñeñth ashkañerpaꞌ eꞌñe maꞌyarrmaꞌth poꞌwamenkoth gatenan acheñeneshaꞌ ñeñth ama poentareto. Ñeñthpaꞌ alloña shekënan acheñeneshaꞌ atthoch ameꞌñeñet. Ñeñthña acheñeneshaꞌpaꞌ oꞌ eꞌñe yatoꞌmatwanet maꞌyarrmaꞌth poeyotsaparo. Ñetñapaꞌ aña maꞌyochenet ayexhkatareth ñeñth tomaꞌntatenet maꞌyarrmaꞌth. Allempoña rremoet maꞌyarrmaꞌth epoet ñamha ñeñth aꞌmhteneꞌ poꞌñoñ allempoñapaꞌ awaporeꞌtarethtet epsheñoꞌmaret eꞌñe bethareret all parraren tsoꞌ errapharen. Ñeñth tsoꞌpaꞌ atarr shemasher worten.

²¹ Poꞌpotantañexhnoña ñeñth epoet kellarañ maꞌyarrmaꞌth ñetpaꞌxhoꞌña oꞌ eꞌñe amtsanatarethetwet. Año amtsanatarethtet kochllo ñeñth poenamoꞌtsen ñeñth montenaya poekawallor ñeñth atarr wallaphnanen. Allempoña ñeñth allowen tseꞌmaxhno epayeꞌ ochareꞌch poꞌchets allempo rret añ poꞌchets ñeñth oꞌ eꞌñe amtsanatarethetwa.