El Apocalipsis 16 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Allempo Juanpaꞌ enterranerr kanxherrsheña mellañotheñ ñeñth echeneꞌ poꞌpajotholleshaꞌ all naꞌyenet ñeñthchaꞌ amoeroxhtatañterrtsa paꞌnamenoth

¹ Allempoña napaꞌ alla neꞌmoerrerr ñoñets ñeñth eꞌmorrtetsa womenk Yompor paꞌpakllo. Ñeñthña ñoñetspaꞌ ateth otenan mellañotheñneshaꞌ ñeñth kanxherrsheña, ateth otenanet: —Theꞌpaꞌ oꞌch sawanma allchaꞌ seyoꞌpanat errapharen patso ñeñth senaꞌyen sepajothollesho ñeñth kanxhrroꞌmar atthoch sorrtatoñ Yompor poꞌyoroxhenña.

² Allempoña poesheñarr ñanom mellañotheñpaꞌ oꞌxhoꞌ awoꞌ. Allñapaꞌ yoꞌposan ñeñth poꞌpajotholloꞌtsen patso. Allempo xhap patsopaꞌ ñeñthñapaꞌ orrtatan poetsarñats ñeñth ama amapoxhatatañe ñeñthpaꞌ ama eñalle paꞌpar alloch partet atthoch metwerranet. Ñeñthpaꞌ aña aꞌptsarsat ñeñth ayatoꞌmaꞌtarethetyetsa maꞌyarrmaꞌth poeyotsaparo ñamha ñeñth maꞌyochenaya ayexhkatareth ñeñth tomaꞌntatenet maꞌyarrmaꞌth.

³ Allempoña poꞌpsheñeñ ñeñth poepañ mellañotheñpaꞌ oꞌxhoꞌ awerrerr oꞌch yoꞌpoenanaꞌ oño ñeñth poꞌpajotholloꞌtsen. Allempo yoꞌpos oño all atarr saꞌpo, oññapaꞌ xha errassastach, eꞌñe ateth orrta ñerraꞌmrratheꞌ arromñath poꞌrras. Ñeñthñapaꞌ eꞌñe aꞌkllatwosan allowen ñeñth allpon yexhetsa all oñoꞌmar.

⁴ Allempoña ñeñth poemaꞌpañ mellañotheñpaꞌ oꞌ awerrerr ñamha oꞌch yoꞌpoenanaꞌ ontapo ñeñth poꞌpajotholloꞌtsen ñamha alloth potayen oñ. Ñeñthña allempo ayoꞌparethta oño xha aꞌpnasatosan oñ errasats.

⁵ Allempoña napaꞌ neꞌmoen ñeñth ateth otenan mellañotheñ Yompor. Ñewa, ñeñthña mellañotheñpaꞌ atarr awamenkath atthoch pomnaren penan ora allowen oñexhno. Ñeñthña mellañotheñpaꞌ ateth otenan Yompor: —Eꞌñe pokteꞌ, Nompore, ñeñth ateth pekoñchatyenanet, pha ñeñtheph xhokma eñalleph amaꞌt awathotheñpaꞌ ñeñtheph atarr nanak Partsoph.

⁶ Tharroꞌmar acheñeneshaꞌ ñeñth peꞌmoñeꞌteneꞌpaꞌ xhokma moetsanatennapet ñeñth peyochreshaꞌ pepen ñamha ñeñth aꞌmhtaꞌyeneꞌ peñoñ, xhokma shatyeññañet poꞌrras. Theꞌña phapaꞌ oꞌ phonerranet errasats. Ñeñthpaꞌ eꞌñe pokteꞌ tharroꞌmar ñetpaꞌ añ oꞌ phowet ñeñth ama pokteyeꞌ penteno pha.

⁷ Allempoña eꞌmorrterrerr ñoñets arr eꞌmorrta altaroth, ñeñthñapaꞌ ateth oten: —Attheshaꞌ, Yompore, pha ñeñtheph atarr nanak Partsoph ñeñtheph Yepartseshar yepen. Ñeñth attho pentyenanet ñeñthpaꞌ eꞌñe poꞌñoxh ateth, eꞌñe pokteꞌ ñeñth ateth oꞌ pekoñchaterranet.

⁸ Allempoña poꞌpsheñeñ mellañotheñ ñeñth poepaꞌtatseñ oꞌ yoꞌpoerranerr ñeñth poꞌpajotholloꞌtsen. Eꞌñe arr yoꞌpoeꞌ alloꞌtsen ñeñth yexhoyoꞌtampeneꞌ. Ñeñthchaꞌ awamenkath peꞌ atsneꞌ atthoch chemoerran acheñeneshaꞌ ateth ñerraꞌm tsoꞌ.

⁹ Acheñeneshaꞌ amaꞌt atarr ethomoenanetañña atsneꞌpaꞌ tharraña ama es kexhpoenayeña ñeñth ateth korrenet sosyaꞌtsañexhno. Ama eseshayeꞌ kothapeꞌcherraye kowen Yomporekop atthoch kowentateññañet Yompor. Elloña ñetñapaꞌ atarr nanak achmhareꞌteññañet Yompor paꞌsoꞌcheñ amaꞌt ñeñth atarr awamenkathtetsa attho xhapatanet ñeñthchaꞌ moeroxhtaterrawet.

¹⁰ Allempoña poꞌpsheñeñ mellañotheñ ñeñth paꞌmnareñ, ñapaꞌxhoꞌña oꞌ yoꞌpoerranerr ñeñth poꞌpajotholloꞌtsen. Eꞌñe arr yoꞌpoeꞌ maꞌyarrmaꞌth poꞌkonaño all amhchaꞌtarethtena. Ñeñthña all amhchaꞌtarethtenapaꞌ xha aꞌchekmetwe. Acheñeneshaꞌña allpaꞌ epayeꞌ moeroxhtatanet paꞌnamen atserrpeñets. Ñeñth atserrpeñetspaꞌ xha moellatstameꞌtatyesanet, axhañeñeꞌchatyesanet atserr.

¹¹ Tharraña ñetpaꞌ amaꞌt ateth oꞌ apharethtetañpaꞌ ama kexhpoenetoña ñeñth ateth phatseꞌtyenet sosyaꞌtsañexhno. Elloña ñetpaꞌ alloꞌna achmhareꞌtneñet Yompor ñeñth entoꞌtsen ñeñth attho atserrpenanet poetsarñats.

¹² Allempoña ñeñth poꞌpechapoeñ mellañotheñ, ñapaꞌxhoꞌña oꞌ yoꞌpoerranerr ñeñth poꞌpajotholloꞌtsen. Arr yoꞌpoeꞌ poꞌñeso ñeñth añekmoen atarres ñeñth poꞌñes añ paꞌsoꞌcheñ Eufrates. Yoꞌposeꞌpaꞌ xha emasaꞌwosanña poꞌñes amaꞌt atarr añekmoen. Ñeñthña alloth masowapaꞌ ñeñtha thoñeterrets ñeñtha paꞌtheph perret allchaꞌ oñem amhchaꞌtarethexhno ñeñthchaꞌ waxhaꞌttsa alloth wena atsneꞌ.

¹³ Allempoña napaꞌ nenterrerr añyañ epoet maꞌyarrmaꞌth epoet ñamha ñeñth aꞌmhteneꞌ maꞌyarrmaꞌth poꞌñoñ añe patsro tharraña ñeñthpaꞌ ashkaña. Ñetña eꞌñe poenamothetpaꞌ xhaꞌnmatyeset poesheñaꞌtets oneñeth ñeñth ama mapoxho. Ñeñth oneñethpaꞌ maꞌpsheña. Ñetñapaꞌ eꞌñe ateth orretyenet ñerraꞌmrratheꞌ rrewankrro.

^14-16 Tharraña ñeñthpaꞌ oneñethkaꞌye ñeñthchaꞌ orrtaterreꞌ ñeñth ama poentare allowen acheñeneshaꞌ ñeñthchaꞌ kowanrrortaterrawet. Ñetpaꞌ oꞌch chopeñeꞌchyerret errakmañen atthoch apxheret allowen ñeñth amhchaꞌtarethetyetsa añe patsro. Allochñapaꞌ atthoch kellareret Yompor ñeñth atarr awamenkath, atthoch kellaret allempoch xherr ponañcho ñeñthe yethroch yoroxhtater Yompor. Allowen amhchaꞌtarethneshaꞌ ñeñthchaꞌ kellarerreꞌ Yompor, arrchaꞌ apxhatarethterret anets ñeñth paꞌsoꞌcheñ Armagedón, allothchaꞌ kellareret Yompor. Añ Armagedónpaꞌ ñeñthpaꞌ hebreoneshaꞌ socheneꞌ añ ñeñth anetser. Ñewa, oꞌch neyerpatasa ñeñth ateth oteꞌth Yepartseshar Jesús, ñapaꞌ ateth oteꞌth: “Señochepaꞌch napaꞌ eꞌñech machayotha nowerra ateth ñerraꞌmrratheꞌ eñeth amach eseshaꞌ eñotenaye esempoch wapa. Tharraña atarr kosheñtsoꞌtsaꞌyen ñeñth xhokma neñoseꞌrtenaya ñeñthoꞌmarña ñetpaꞌ eꞌñe kowen aññoꞌtenet paꞌshtam ñeñthchaꞌ chorraꞌnmoet allochñapaꞌ amach moelleꞌmkotha xhaꞌnmoeto amach xha apenkoxhterreto.”

¹⁷ Allempoña poꞌpsheñeñ mellañotheñ ñeñth pokanxhrroñ, ñapaꞌxhoꞌña oꞌ yoꞌpoerranerr ñeñth poꞌpajotholloꞌtsen. Eꞌñe arr yoꞌpoeꞌ mhorresho. Allempokma eꞌmorrta ñoñets ñeñth wetsa Yompor poꞌkonañoth ñeñth paꞌpaklloꞌtsen all poeꞌntaño. Ñeñthña ñoñetspaꞌ atarr womenk eꞌmorrtena, ñeñthpaꞌ ateth oten: —Theꞌña poꞌñoxhpaꞌ oꞌ etsotwerra, wañerrchaꞌ ñeñth awathotheñ.

¹⁸ Allempoñapaꞌ meramerta oꞌ tatsllares, eꞌmorrta ñamha ñeñth maꞌmoretets, atarr womenk eꞌmorrtena. Poetalleꞌcha ñamha pats nanak womenk ñeñth amaꞌt awathapaꞌ ama ateth poepharo allempotheñ eꞌñe paꞌmothrotheñ eñalleta acheñeneshaꞌ arr patsro.

¹⁹ Añ ñeñth atarr anets ñeñth atmaꞌntatareth anets Babiloniapaꞌ ñeñthña anetserpaꞌ oꞌ rraraꞌpes maꞌpshemhta. Amaꞌt ora allpon paꞌnamen anetsoxhno añe patsro all shontaꞌyena paꞌnamen acheñeneshaꞌ, ñetpaꞌxhoꞌña eꞌñe ñegatampeswawet. Yomporpaꞌ añchaꞌ yerpaterranet ñeñth allowen allpon phatseꞌtyenet ñeñth atarr sosyaꞌtsañ all atarr anetso ñeñth atmaꞌntatareth Babilonia. Ñeñth allpon allowen alloꞌtsaꞌyenet eꞌñe koñchatwerranet Yompor, oꞌ eꞌñe tsaꞌtatwerranet poꞌyoroxhenño.

²⁰ Allempoña amaꞌt ñeñth rroxhpeꞌchañexhno ñamha aspenthexhno oꞌ eꞌñe chenkaꞌwerra.

²¹ Shoraꞌnom ñamha entoth weꞌ ñeñth atarr añekmoesheñ ateshamerr. Patheꞌtetspaꞌ eñerrtena cuarenta kilo. Ñeñthña eꞌñe aꞌtpetseꞌtwoseꞌ allowen acheñeneshaꞌ. Allempoña ñetpaꞌ atarr achmhareꞌteñet Yompor tharroꞌmar oꞌ koñchaterranet atarr womenk.