El Apocalipsis 13 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Attho Juanpaꞌ entan berrmaꞌth ñeñth atarr amhchaꞌnoxhen ñeñth xhaꞌnets oñoth

¹ Allempoña napaꞌ nathomos saꞌpatophño, allñapaꞌ nenterrerr berrmaꞌth atarr amhchaꞌnoxhen ñeñth xhaꞌnmats oñoth. Poñpaꞌ kanxherrmhaga, poꞌwkorpaꞌ xharraꞌ. Patheꞌtets poꞌwkorpaꞌ eꞌñe echoyoꞌmethocheꞌ. Poemhagaꞌttso all akellkareth sochatseꞌteñets ñeñth paꞌnamen sosyaꞌtsañ allo achmhareꞌteñet Yompor.

² Ñeñthña berrmaꞌth poeꞌmokër eꞌñe ateth ñerraꞌmrratheꞌ maꞌyarr tharraña paꞌtakñapaꞌ eꞌñe ateth ñerraꞌmrratheꞌ orranatek. Poenampaꞌ eꞌñe ateth ñerraꞌm maꞌñorenam. Añyaññapaꞌ ñeñth apoeꞌ poꞌwamenk, aph ñamha llesens atthoch amhchaꞌnoxhtaprecha all poꞌkonaño.

³ Poemhagarr poñpaꞌ all orrtena xha atserrpena nanak womenk xha mettagën ñeñthchaꞌ moetsayeñ tharraña ama rromo alla korrerra. Ñeñthoꞌmarña allowen acheñeneshaꞌ arr patsro ñetpaꞌ attha kowanrrorteñet xha otapoetañ ñatoꞌ xhach rroma, tharraña ama rromo. Ñeñth attho ama rromopaꞌ acheñeneshaꞌña arr patsro ñeñthña ameꞌñatenawet. Ñetpaꞌ otenapoetañ ñatoꞌ ñeñththeꞌña Parets.

⁴ Ñeñthoꞌmarña acheñeneshaꞌ maꞌyocheñet maꞌyarrmaꞌth. Ñetpaꞌ ateth otannaꞌtyeset: —Ama eñalle poꞌpoñ ñeñth nanak awamenkath ateth ñerraꞌm añ maꞌyarrmaꞌth ñeñth yenten. Amaꞌt eꞌñe eseshapaꞌ amatheꞌ errothenoth aꞌmchechachetoña añ ñeñth atarr awamenkath. Amaꞌt añyañpaꞌxhoꞌña ñeñth maꞌyochena acheñeneshaꞌ tharroꞌmar añyañpaꞌ ña awamenkath peꞌ maꞌyarrmaꞌth.

⁵ Añyañpaꞌ moenatenan maꞌyarrmaꞌth oꞌch ommoꞌchatseꞌtyesa. Pommoꞌchatseꞌteñothpaꞌ oꞌch achmhareꞌtenan Yompor. Ñamha moenatan maꞌyarrmaꞌth oꞌch amhchaꞌtarethta paꞌtatsoch xharramha ñamha poechena epmha arrorr.

⁶ Ateth pha maꞌyarrmaꞌth achmhareꞌtenan Yompor, sochatseꞌteññañ paꞌsoꞌcheñ. Ñamha Yompor paꞌpakëll ñamha allowen ñeñth allpon alloꞌtsaꞌyen poeꞌntaño eꞌñe achmhareꞌtweñ.

⁷ Ñamha moenateñ oꞌch kellaran ñeñth poeyochreshaꞌ pen Parets. Ñamha moenateñ oꞌch ganana Yompor poeyochreshaꞌ. Ñamha moenateñ oꞌch amhchaꞌtarethta allowenakop ñeñth paꞌnamen acheñeneshaꞌ, allpon ñeñth paꞌnamen mereñtsor ñeñth eꞌñe eñosyets poꞌpoñeꞌttsokma ñoñtso ñeñth ora allpon allemeñ anetsoꞌmar.

⁸ Ora allowen acheñeneshaꞌ ñeñth añe patsroꞌtsaꞌyen añach maꞌyochenet maꞌyarrmaꞌth tharroꞌmar ñeñth acheñeneshaꞌpaꞌ ama akellkaretheyayeto paꞌsoꞌcheñ Cristo poꞌlibro all akellkarethtena allowen ñeñth korretsetach ñeñth ameꞌñenaya Cristo ñeñth amtsarethtatsa ochñartsokop ateth ñerraꞌm carnero. Awath allempo errteꞌ ayexhkatarethta pats, Cristoña poꞌlibropaꞌ all akellkareth soꞌchñetsoxhno atthochña ñetpaꞌ korretsetach.

⁹ Ñerraꞌm eseshaꞌ eꞌmhñoteneꞌ añ ñoñets, xhapoñepaꞌch poeyoxhro ñeñth ateth yexhateney añ ñoñets. Ñeñth ñoñetspaꞌ ateth oten:

¹⁰ Ñerraꞌm eseshaꞌ rromanateneꞌ poꞌpotantañ atthoch yottamphsatanet, ñetpaꞌxhoꞌña ayottamphsarethterretchaꞌ. Ñamha ñerraꞌm eseshaꞌ moetsanateneꞌ poꞌpotantañ espado, ñetpaꞌxhoꞌña amtsarethterretchaꞌ espado. Ñeñthoꞌmar añ ñeñth poktetsa yokop eꞌñe yeyemteñoth Yompor oꞌch yaꞌwanten akophotheñ ñerraꞌm es yewapoya, alloweney ñeñthey oꞌ poeyochreshaꞌ perrey Parets.

Attho Juanpaꞌ entan poꞌpoñ berrmaꞌth ñeñth xhaꞌnets oꞌponoth patsoth

¹¹ Allempoña na allpaꞌ nenterrerr poꞌpoñ ñeñth berrmaꞌthtetsa. Ñeñthpaꞌ arroth xhaꞌnom oꞌponoth patsoth. Ñeñthñapaꞌ eꞌñe epa poꞌwkor ateth ñerraꞌm carnero poꞌwkor, tharraña ñeñthpaꞌ atarr amhchaꞌnoxhen eñen eꞌñe ateth eñen ñerraꞌmrratheꞌ añyañ eñoretsa.

^12-13 Ñapaꞌxhoꞌña atarr amhchaꞌtarethta eꞌñe ateth amhchaꞌtarethtena maꞌyarrmaꞌth ñeñth ñanom nent ñeñth xhaꞌnmats oñoth. Allñapaꞌ amhchaꞌtarethtapretenana ñeñth maꞌyarrmaꞌthtetsa all. Ñeñth xhaꞌnmats oꞌponoth patsoth ñeñthñapaꞌ moenatenan allowen acheñeneshaꞌ ñeñth añe patsroꞌtsaꞌyen oꞌch maꞌyochyet ñeñth maꞌyarrmaꞌth. Ñeñthara maꞌyarrmaꞌth ñeñth korrerrtsa eꞌñe mamekma allempo mettagën. Ñeñth attho mettagën ñeñthchaꞌ moetsayeñ tharraña ñapaꞌ ama rromo. Añ berrmaꞌth ñeñth xhaꞌnmats oꞌponoth patsothpaꞌ ñerraꞌm esempo alloꞌtsen parro epoet maꞌyarrmaꞌth ñañapaꞌ eñall atthoch orrtatenan acheñeneshakop paꞌnamen ñeñth ama poentareto amaꞌt awatha. Atthoña aꞌshoran entoth worteꞌ tsoꞌ ñeñthña tsoꞌ worteꞌpaꞌ oꞌ eꞌñe xhap patso allñapaꞌ kowanrrortatan shonteꞌ acheñeneshaꞌ.

¹⁴ Ñeñthñapaꞌ allo shekënan shonteꞌ acheñeneshaꞌ ñeñth añe patsroꞌtsen. Ñeñthoꞌmarña ñerraꞌm allempo otenan acheñeneshaꞌ, oꞌch seyexhkat maꞌyarrmaꞌth, ñetñapaꞌ eꞌñech pokteꞌ enteñet. Añ ñeñthara maꞌyarrmaꞌth ñeñth mettoꞌten espada tharraña ñapaꞌ eꞌñe mamekma oꞌ alla korrerra.

¹⁵ Añña berrmaꞌth ñeñth xhaꞌnmats oꞌponoth patsoth ñeñthñapaꞌ moenateñet oꞌch oꞌrrerratan ayexhkatareth ñeñth tomaꞌntatenet maꞌyarrmaꞌth. Allochñapaꞌ atthoch eñoranaꞌtanet poeyexhkatar. Ñamha maꞌyarrmaꞌthpaꞌ ateth nanet poꞌñoñ, ñeñthpaꞌ ateth oten: Ñerraꞌm eseshaꞌ ama maꞌyochenaye ayexhkatareth moetsanachetepaꞌch.

^16-17 Elloñapaꞌ oterranerr acheñeneshaꞌ: —Theꞌpaꞌ oꞌch seyakoꞌmhtaꞌtyesa sototh sekowenroth amapaꞌ arr setoꞌmoꞌmar. Allchaꞌ senaꞌyeson nesoꞌcheñ amapaꞌ senaꞌyeson ñeñth nenúmero nepen. Ateth phatan allowen acheñeneshaꞌ amaꞌt ñeñth ama esosheꞌmayaye acheñ, amaꞌt ñamha ñeñth atarr sherbets, amaꞌt ñamha acheñ ñeñth atarr ekhllayoreth, amaꞌt ñamha ñeñth atarr wokchañetets, amaꞌt ñamha acheñ ñeñth eꞌñe kowenoꞌtsen, amaꞌt añ acheñer ñeñth atarwasatareth eꞌñe attha. Allowen acheñeneshaꞌ ñeñth ama ayakoꞌmhtaꞌtarethe all neññañet maꞌyarrmaꞌth paꞌsoꞌcheñ amapaꞌ ñeñth poꞌnúmero pen maꞌyarrmaꞌth, ñetñapaꞌ amach errothenoth es pomoeneto ñamha amach errothenoth es rañtheneto ñeñth moenenet ñet.

¹⁸ Ñewa, ñeñth allpon poꞌnúmero pen maꞌyarrmaꞌthpaꞌ ñeñthpaꞌ alloꞌtsen seiscientos sesenta seis. Ñeñth número añ tomaꞌntena poesheñarr acheñ paꞌsoꞌcheñ ñeñthchaꞌ ñanom orrterrtsa tsapathoneth. Ñerraꞌm eseshaꞌch atarr es eñoterrets eñoterrñañetepaꞌch paꞌsoꞌcheñ ñeñth atmaꞌntatareth añ número.