Efesios 4 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Atthoch eꞌñe yeparrokmatwen alloweney ñeñthey ameꞌñenaya Cristo

¹ Ñeñthoꞌmarña theꞌpaꞌ añ notenes amaꞌt na ñeñthen ayottamphsarethen eꞌñe nethorreñoth serrpareꞌteꞌ Yepartseshar Cristo. Theꞌpaꞌ oꞌch notas: Eꞌñech kowen es sorrtatyen ñeñth ateth poktetsa añekop ñeñth oꞌ waꞌñerr Yompor ñeñthchaꞌ poeyochreshaꞌ perr ateth ñerraꞌm sa.

² Amaꞌt mameshapaꞌ amach sañeña entatstatso ñeñthesoꞌ atarr nanak sherbets. Eꞌñe semorrentannaꞌteñoth eꞌñech akopha es sephannaꞌtyena. Xhokmoepaꞌch saꞌwantannena ñerraꞌm erroth penes poꞌpsheñeñ, amachña seꞌmoñeꞌtatsche samha. Añchaꞌña eꞌñech kowen semorrentannaꞌtwena allowenes.

³ Añepaꞌchña seꞌnen atthoch sepatherrtat sokthaphña allowenes ñeñth eꞌñe ateth patherr kothapeꞌchatenes Parets Poekamkëñ. Allochñapaꞌ eꞌñe separrokmateñoth, eꞌñech kowen sentannena, amachña xha poꞌpoñ sentannaꞌtweno.

⁴ Tharroꞌmar poꞌñoxhpaꞌ eꞌñe yeparrokmatwen alloweney ñeñthey ameꞌñenaya Cristo ñamha ñeñthara patherr Parets Poekamkëñ ñeñth yechorraꞌyenaya alloweney. Ñamha amaꞌt paꞌnameney shontey ñeñthey oꞌ xhoreꞌterrey Yompor tharraña eꞌñe ñeñthara yeyemteñoth yekwen alloweney ñeñth oꞌpatatenya Yompor ñeñthchaꞌ apaꞌyeswerrey.

⁵ Poꞌñoxhpaꞌ eꞌñe pathrra Yepartseshar Cristo ñamha ñeñthara pathrra pokthaphña ñeñth yameꞌñaꞌwena alloweney, ñamha eꞌñe alloweney atthekma yapatarethta eꞌñe yameꞌñeñoth Cristo.

⁶ Ñamha eꞌñe pathrra Parets ñeñth Yeyomporer yephowen alloweney, ñeñthara ñeñth yaꞌmhchaꞌtarether yephowen alloweney. Ñamha ñeñthara Yompor ñeñth yethorratyenaya paꞌnamen alloweney ñamha ñeñthara Yompor ñeñth yechorraꞌyenaya yeyoxhro alloweney.

Attho Cristopaꞌ apaꞌyeney alloweney atthoch yethorraꞌyesa eꞌñe poꞌpoñeꞌttsokma

⁷ Ñamha Cristopaꞌ apaꞌyeney alloweney eꞌñe poꞌpoñeꞌttsokma atthoch yethorraꞌyesa Yomporekop eꞌñe paꞌnamenoth. Poesheñaꞌttsoypaꞌ oꞌch apaꞌyesey errpontheꞌ pokteꞌ enten ña.

⁸ Ñewa, ñeñthpaꞌ ateth oteney Yompor poꞌñoñ ñeñth akellkaꞌwareth awathotheñ, ñeñthpaꞌ ateth oten Cristokop: Allempo aꞌterr poeꞌntañopaꞌ awanerran allowen ñeñth eꞌmoñeꞌteneꞌ atthothña aꞌmchechwawerranet. Allempoñapaꞌ eꞌñe poksheñeshoth shonteꞌ es apaꞌyesnerran acheñeneshaꞌ.

⁹ Ñewa, all oten “aꞌterr poeꞌntaño.” Ñeñthoꞌmarña yeñoteñ allempo ama aꞌterraꞌpaꞌ ñapaꞌ entoth aswaña, xhap amaꞌt allowanen patso oꞌpono.

¹⁰ Ñeñthara ñeñth sowatsa entoth ñeñthpaꞌ ñeñthara ñeñth aꞌterrets amaꞌt eꞌñe allowanen ento. Atthothña eꞌñe errakmañen epaꞌwena Cristo.

¹¹ Ñamha ñeñth ateth oten ñoñets ñeñth anareth awathotheñ attho shonteꞌ es apaꞌyenan acheñeneshaꞌ ñeñthpaꞌ añ oten ñeñth attho ñapaꞌ eꞌñe poꞌwamenkoth es apaꞌyeney atthoch yethorraꞌyesa poꞌpoñeꞌttsokma ñokop. Patantarr acheñpaꞌ ateth aparethtet oꞌch thorrenet ateth ñerraꞌm ñeñth allsensarethtetsa Yomporekop; poꞌpotantaññapaꞌ añchaꞌ thorrenet oꞌch aꞌmhteññañet Yompor poꞌñoñ; poꞌpotantaññapaꞌ añchaꞌ thorrenet oꞌch serrpareꞌtatoñet poꞌñoñ acheñenesheshoꞌmar; poꞌpotantaññapaꞌ añchaꞌ thorrenet oꞌch kowampenan allowen ñeñth ameꞌñetsa ñeñthara ñeñthchaꞌ yexhatenawet Yompor poꞌñoñ.

¹² Atthoña awamenkath phaꞌyeney allochñapaꞌ ñach poꞌwamenkaro yethorraꞌyesa poꞌpoñeꞌttsokma eꞌñe poesheñaꞌttsokmay ñeñthey poeyochreshaꞌ oꞌ perrey Parets. Atthochña eꞌñe kowen yeyenpanneñothpaꞌ oꞌch womenk yephannaꞌta yeyoxher Yomporekop alloweney ñeñthey ameꞌñenaya Cristo.

¹³ Atthochña eꞌñe yeparrokmatwen eꞌñe yameꞌñeñoth Yompor Poechemer ñeñth Cristo tharroꞌmar alloweneypaꞌ oꞌch yeñotwerr ñeñth eꞌñe kowenareꞌ ñeñth ateth yexhateney Yompor Poechemer. Atthochña oꞌch eꞌñe ateth yephowen yamha ora allpon ñeñth kowentetsa ñeñth ateth pena Cristo ñeñth yechorraꞌyenaya. Ñatoꞌ oꞌch netmaꞌntacha oꞌch not, yapaꞌ oꞌ eꞌñe yepoꞌn Cristokop.

¹⁴ Ya theꞌpaꞌ ama attheye ñerraꞌm cheshaneshaꞌ ñeñth ama es eñotetso ñeñth epwoyeꞌ kothapeꞌcheneꞌ kowen. Ñewa, ateth ñerraꞌm cheshaneshaꞌ theꞌpaꞌ ñatoꞌ poꞌpoñchaꞌ kothapeꞌchyenet, ñatoꞌ tsapathñapaꞌ oꞌchxhoꞌ kothapeꞌchyeneterr poꞌpoñ. Yapaꞌxhoꞌña ateth yepena yamha allempo ama yepoꞌnenaꞌ Cristokop. Yaña ñeñthey ama epwoyeꞌ yoktheñe Cristopaꞌ amach errothenoth yeꞌmhñocheña ya ashkañ atthoch ameꞌñatya ña pokthaphña, aththoch oꞌch pantatey.

¹⁵ Yapaꞌ añachña eꞌñech pathrra yokthapeꞌchen ñeñth eꞌñe poꞌñoxh alloch yekeshperra ñeñth ateth oteney Yompor poꞌñoñ. Eꞌñech yemorrentannaꞌteñoth es yephaꞌyen. Atthochña eꞌñe yephowen allowen ñeñth ateth kothapeꞌchateney Cristo. Atthochña yapaꞌ eꞌñech ora yokthapeꞌchen eꞌñe ateth kothapeꞌchen Cristo. Ñeñthoꞌmarña eshekchaꞌña yeparrokmat epay Cristo, ñeñthña Cristopaꞌ yeyoxher yepeñ ñeñth xhokma yokthapeꞌchateneꞌ kowen Yomporekop.

¹⁶ Ñatoꞌ oꞌch netmaꞌntacha ñeñth ateth pena yechets. Ñewa, yechetspaꞌ amach errothenoth ellopaꞌtetsteno. Amaꞌt allemeñ meynaꞌten yechets xhokma parrokmaten attho rremannenet eꞌñe kowen atthoña yenpannenet. Ñamha yapaꞌ yameꞌñeñoth Cristo eꞌñe poꞌchets phoweney alloweney amaꞌt paꞌnamen acheñrey. Atthoña Cristopaꞌ eꞌñe parrokmatateney ñeñthoꞌmarña eꞌñe yemorrentannaꞌteñoth oꞌch yeyenpannena eꞌñe kowen. Atthochña alloꞌnach yesen atontatnomoeꞌ ñeñth ateth eñotateney Yompor oꞌch yemorrentannerra alloweney.

Attho Yomporpaꞌ oꞌ etserrataterrnay yokthaphña ñeñth ateth moenen ña

¹⁷ Ñeñthoꞌmarña theꞌpaꞌ oꞌch notas ñeñth poꞌñoxh sherbets Yepartsesharekop. Sapaꞌ amach alloꞌna ateth sephaꞌyesneno ñeñth ateth phatseꞌtyena ñeñth ama ameꞌñenayo Yompor. Tharroꞌmar ñeñth ateth kothapeꞌchatseꞌtyenet ñetpaꞌ ñeñthpaꞌ eꞌñe orrena amaꞌt mameshapaꞌ ama es sherbeno.

¹⁸ Ñetpaꞌ ama xhenaneto poeyoxhreto ñeñth Cristo pokthaphña. Ñetpaꞌ xha ottenet ñerraꞌmrratheꞌ atarr chekmetoꞌtsenet. Tharroꞌmar ñetpaꞌ atarr echarrtenet poeyoxhret atthoch kotheret Yompor. Ñeñthoꞌmarña amach enterreto korreñets ñeñth wetsa Yomporeshoth tharroꞌmar ama eñoteñeto Yompor.

¹⁹ Ñet poꞌchñaret amaꞌt mamesha oꞌwañchaꞌ apenkoxhen eñchet. Ñetñapaꞌ eꞌñech poksheñeshaꞌ pomoenet poꞌchets atthochña eꞌñe ñeñtha yomhaꞌyenet ñeñth paꞌnamen sosyaꞌtsañexhno ñeñth ama aphapawoyaye amaꞌt mamesha.

²⁰ Tharraña sapaꞌ amaña attheyeꞌ seyxheno. Sapaꞌ añña seyxhen ñeñth ateth yexhateney Cristo.

²¹ Tharroꞌmar napaꞌ neñotenes sapaꞌ oꞌ seꞌmhñoterrñañ Cristo poꞌñoñ allempo yeyxhatas ñeñth eꞌñe poꞌñoxh atthoch yeyemtera Jesús.

²² Sa awathpaꞌ attha sokthapeꞌchatseꞌtyeseꞌth theꞌña ñeñthpaꞌ oꞌch saꞌypoꞌñamper. Sapaꞌ ñeñthaña atarr seshkareꞌtayeꞌth atthoña añach eꞌñe semnatseꞌtyeseꞌth ñeñth ama kowenayaye amaꞌt mamesha.

²³ Theꞌña sapaꞌ añepaꞌchña setserrataterreꞌ Yompor eꞌñe ora ñeñth ateth sokthapeꞌchyen seyoxhro.

²⁴ Añepaꞌchña chorraterrsa Yompor ñeñthchaꞌ sokthapeꞌchaterreꞌ kowen eꞌñe etserra. Ñeñthpaꞌ atthochña etserrataterrnas Yompor sokthaphña eꞌñe ateth kothapeꞌchen ña. Allochñapaꞌ atthoch eꞌñe pokteꞌ es sephaꞌyen arr patsro ñeñth eꞌñe poꞌñoxh kowen enten Parets.

Arrpaꞌ all kothapeꞌchatyenanet paꞌnamen ñeñth atarr sherbets

²⁵ Ñeñthoꞌmarña theꞌpaꞌ añ poktetsa sokop amach alloꞌna seshkareꞌtannaꞌtyesneno. Eꞌñe poesheñaꞌttsos errothen sotannena, eꞌñepaꞌch poꞌñoxh saꞌpoktaten señoñ samoꞌtseshakop. Tharroꞌmar eꞌñe yameꞌñeñoth Cristo eꞌñe yeparrokmatwen.

²⁶ Ñamha ñerraꞌm esempo saꞌtsrreꞌmapaꞌ amach alla señotatoñaꞌ oꞌch sorrtat ñeñth ama kowenayaye. Ñamha xhokmach semaxhaꞌnerr eꞌñe mamekma amachña ñeñthaña sellaphsateno.

²⁷ Allochñapaꞌ atthoch amach yemnatatsche oneñeth oꞌch atarr topateney, tharroꞌmar yokop ama pokteyaye oꞌch yemnach oneñeth oꞌch atarr awamenkath peney.

²⁸ Ñamha ñerraꞌm eseshas etetspaꞌ añ poktetsa theꞌñapaꞌ amach alloꞌna setyesatsetneno. Ñeñth acheñerpaꞌ tarwasepaꞌña eꞌñe ña pototh. Amaꞌt erraꞌtsena ñeñthchaꞌ poꞌtarwas phaꞌpaꞌ ñeñth tarwaspaꞌ eꞌñe kowen ama apenkoxhenayaye. Allochñapaꞌ atthothchaꞌ echenan shonteꞌ atthoch apaꞌyesan ñamha poꞌpotantañ ñeñth atarr es palltaꞌyetsa.

²⁹ Amach yeñosatseꞌtyesatsto ñeñth ama kowenayaye amaꞌt mamesha. Añchaꞌña yeñosyen ñeñth eꞌñe kowen entwen allowen acheñeneshaꞌ ñeñthchaꞌ yenpoeneꞌ ñeñth eꞌmhñotets. Atthochña ñetpaꞌ oꞌch womenk pet poeyoxher Yomporekop.

³⁰ Atthochña amach xha yellkateññañe Yompor Poekamkëñ ñeñth yexhetsa yeyoxhro ñeñthara ñeñth Poekamkëñ pen ñeñth atarr kowen Parets. Tharroꞌmar poechorreñothey ya, Parets Poekamkëñ ñeñthpaꞌ ñeñthña yeñotateneꞌ yapaꞌ poechemer peney Yompor thayotheñ ñamha esempowañenchaꞌ allempoch yaꞌkeshphatarethterra.

³¹ Amach atsrreꞌmoxhen sentannaꞌtatsto amaꞌt seyoxhra. Allochñapaꞌ atthoch amach xha saꞌtsrreꞌmareꞌtatanneno, atthochña amach secheꞌxhameꞌtanneno. Ñamha amach sesasareꞌtannaꞌtatsto. Amaꞌt mameshapaꞌ amach seꞌmoñeꞌtannaꞌtatsto.

³² Añchaꞌña eꞌñech kowen yentannena ñamha eꞌñech kowen yemoerannena. Ñamha añña poktetsa xhokmach yephretnannena attho Yomporpaꞌ oꞌ peretnerrey yamha. Ñeñthpaꞌ añoth peretnerrey attho rroma Poechemer Cristo yokop.