Efesios 3 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Attho Pablopaꞌ allsensarethterra oꞌch serrpareꞌtatan ñeñth ama judioneshayaye

¹ Ñeñthoꞌmarña napaꞌ xhokma nemaꞌyochena sokop. Neserrpareꞌtateñothes sa Cristo Jesús ñeñthes ama judioneshayayso ñeñthoꞌmarña na theꞌpaꞌ yottampennet.

² Ñewa, sapaꞌ oꞌtheꞌ seꞌmareꞌtwan attho Yomporpaꞌ oꞌ llesenserren eꞌñe poemoereñothen, nach aꞌpotheneꞌ poꞌñoñ sokop sa ñeñthes ama judioneshayayso.

³ Señoteñtheꞌ ñamha attho gaterren Yompor attho theꞌpaꞌ oꞌ neñoterrñañ ñeñth awathotheñpaꞌ ama eñotpawoyaye. Ñewa, ñeñthpaꞌ oꞌ notwanmas mameꞌ necartoth.

⁴ Ñerraꞌm esempoch selleyon ñeñth nekellkënnas allempochña señoch napaꞌ poꞌñoxh oꞌ xhapona neyoxhro eꞌñe ora ñeñth ateth sherbeney Cristo, ñeñth amaꞌt awathotheñ ama eñotpawoyaye.

⁵ Tharroꞌmar awathpaꞌ ama xhenaꞌ allempo pokteꞌ enteñ Parets oꞌch eñotatey ya ñeñthey arromñatheneshay amaꞌt ñeñth korretsa allempo. Ñeñthoꞌmarña allempopaꞌ ama eꞌñeyeꞌ eñotatwaneteꞌthe ateth ñerraꞌm theꞌpaꞌ eꞌñe Poekamkëñoth eꞌñe eñotatwenan allowen ñeñth poeyochreshaꞌ pen ña ateth ñerraꞌm ñeñth poellsensarneshaꞌ pen ñamha ñeñth aꞌmhteneꞌ poꞌñoñ.

⁶ Ñeñth eñotateney theꞌpaꞌ ñeñthpaꞌ attho amaꞌt ñeñth ama judioneshayaye, ñetpaꞌxhoꞌña oꞌpatapreteretchaꞌ Yompor ñeñthchaꞌ apoerranet atthekma oꞌpatatenya yamha ñeñthey judioneshay. Theꞌpaꞌ eꞌñe separrokmateñoth Cristo, theꞌña sapaꞌ eꞌñe poꞌchets penes ateth ñerraꞌm ya ñeñthey judioneshay. Atthoña oꞌ eꞌñe yeparrokmatwawerr alloweney. Ñamha ateth oteꞌth Yompor awath ñeñthchaꞌ ateth kowen perrnay esempo eꞌñe Cristeshoth atthoch aꞌkeshphaterreypaꞌ ñeñthpaꞌ añekpaꞌnaña ñeñth ama judioneshayaye. Ñewa, ñet añoth aꞌkeshphatarethterret attho eꞌñe pameꞌñeñothet añ kowen ñoñets ñeñth alloch yekeshperra alloweney.

⁷ Ñeñthoꞌmarña napaꞌ oꞌ naparethterra llesens atthoch nach thorrerraya serrpareꞌterreꞌ añ kowen ñoñets ñeñth alloch yekeshperra. Napaꞌ attho naparethterra amaña añotheyeꞌ oꞌ naparethterro attho eꞌñe kowen es nephaꞌyen ñeñth eꞌñe nokpa. Ñapaꞌ eꞌñe poemoereñothen oꞌ awamenkath perren,

⁸ amaꞌt napaꞌ ama esoyayno amaꞌt mamesha, atarr koñeꞌthoth nesherben. Ora allowen allpon ñeñth poeyochreshaꞌ pen Parets ñeñth sherbeneꞌ ña, naña ellonethpaꞌ eꞌñe ateth nentena ñerraꞌmrratheꞌ atarr koñeꞌthoth nesherbeñ Parets. Tharraña amaꞌt ama esoyaynopaꞌ Yomporña poemoereñoth oꞌ moenaterren nach serrpareꞌtatyeseꞌ ñeñth ama judioneshayaye. Atthochña nach eñotatyenawet attho Cristopaꞌ shonteꞌ esokmañen echyen paꞌnamen ñeñthña yoꞌpatapreteña ñeñthey yemtenaya ña. Amaꞌt ya arromñathaya amatheꞌ errothenoth eꞌñe xhapwonayo yeyoxhro ñeñth ora allpon oꞌpatatarethey eꞌñe yeyemteñoth Cristo.

⁹ Ñamha nach eñotatyeneꞌ amaꞌt allowen acheñeneshaꞌ ñeñth ateth kothapeꞌchennay Yompor. Tharroꞌmar ñeñthpaꞌ awathotheñ ama eñotpawoyaye tharroꞌmar ama xhenaꞌ allempoch aꞌpotherrnay Yompor, ñeñthara Yompor ñeñth eꞌñe yexhkatwaweꞌ ora allpon ñeñth yentyen.

¹⁰ Allochñapaꞌ allowen ñeñthchaꞌ allpon ameꞌñerrtsapaꞌ ñetñapaꞌ orrtateññañetchaꞌ Yompor attho ñapaꞌ atarr esokmañen es eñoten. Atthochña amaꞌt allowen ñeñth amhchaꞌtarethetyetsa ñamha allowen ñeñth allsensarethetyetsa all ento, ñetpaꞌxhoꞌña eñotweñet attho Yomporpaꞌ atarr esokmañen es eñoten ñeñth nanak sherbets yokop.

¹¹ Ñeñthpaꞌ ateth kothapeꞌcheꞌth Yompor awath poeyochreshakop ñeñthchaꞌ sherbhats allempotheñ eꞌñe errponañowen. Ñamha añ onañcheꞌth ñeñthchaꞌ etsoterreꞌ pokthaphña ñeñthpaꞌ añ Cristo Jesús ñeñthara Yepartseshar yepen.

¹² Ñeñthoꞌmarña yapaꞌ eꞌñe yameꞌñeñoth Cristo eꞌñech yeñmañeshaꞌ yexhoreꞌteñ Yompor. Amach yemhchaꞌnañotheyeꞌ yexhoreꞌteñe tharroꞌmar añ yeyemteññaña Poechemer Cristo ñeñth oꞌ aꞌpoktaterrey Pomporesho.

¹³ Ñeñthoꞌmarña napaꞌ oꞌch notas, attho señotenen napaꞌ atarr nemoeroxhtena sokop, sapaꞌ amach sellkëñotha seꞌcharrtatatsto seyoxher. Eꞌñepaꞌchña kowen sokshapretenna.

Attho Cristopaꞌ atarr morrentenya

¹⁴ Ñeñthoꞌmarña napaꞌ xhokma nekonkorpoena Yomporeshoneth alloth nemaꞌyochampensa.

¹⁵ Ñeñthara Yompor alloth wena ora allpon paꞌnamen acheñeneshaꞌ ñeñth eꞌñe pamoꞌtsnaꞌtarekma phannenet amaꞌt ñeñth poeꞌntañoꞌtsaꞌyen amaꞌt ñamha allpon ñeñth patsoꞌtsaꞌyen.

¹⁶ Attho Yomporpaꞌ shonteꞌ esokmañen echyen ñeñth atarr nanak kowenñatsotets Poekamkëñothpaꞌ ñepaꞌchña atarr awamenkath sepeneꞌ eꞌñe seyoxhro. Nemaꞌyocheñothpaꞌ ateth nenamoennas Yompor.

¹⁷ Ñamha xhokmoepaꞌch yexhena Cristo eꞌñe seyoxhro eꞌñe seyemteñoth ña. Allochñapaꞌ atthochña eꞌñe sagapoñ Yompor poemorrenteña atthoch eꞌñe womenk sephaꞌ seyoxher Yomporekop. Ateth ñerraꞌmrratheꞌ tsach ñeñth atarr erxhath eꞌñech womenk orrena patso, allochña poeꞌchorpaꞌ eꞌñech kowen then.

^18-19 Allochñapaꞌ atthochña atarrchaꞌ womenk xhaponasa seyoxhro attho Cristopaꞌ atarr nanak morrentenya. Ñeñth allpon attho atarr morrentenyapaꞌ ñeñthpaꞌ ama awañaño. Ñatoꞌ oꞌch netmaꞌntacha attho yechopeꞌchen patso. Oꞌch awey tenoneth, amaꞌtchaꞌ yexhap bhaxhayo amach yemhtanwoñeña ñeñth attho morrentenya Cristo. Atthekma ñamha toponeth amaꞌtchaꞌ yexhap bhaxhayo amach yemhtanwoñeña ñeñth attho morrentenya Cristo. Atthekma ñamha onnathoneth amaꞌtchaꞌ yexhap bhaxhayo amach yemhtanwoñeña ñeñth attho morrentenya Cristo. Atthekma ñamha enoneth ñamha oꞌpononeth, amaꞌtchaꞌ yexhap atarr allapharpaꞌ amach yemhtanwoñeña ñeñth attho morrentenya Cristo. Amaꞌt ñamha allowen ñeñth allpon ñeñth ameꞌñenayapaꞌ eñochetepaꞌch ñamet attho atarr morrentenya Cristo. Tharraña amaꞌt ama eꞌñeyeꞌ eñotpawoyaye ora allpon ñeñth ateth pena Cristo poemorrenteña yokop, tharraña sapaꞌ señochepaꞌch amaꞌt eꞌñe allpona. Ñeñthpaꞌ ateth nenamatennas Yompor. Allochñapaꞌ atthochña eꞌñe poktakma chorrerrsa Yompor.

Ayeꞌchoxhtatpawepaꞌch Yompor alloweney eꞌñe yameꞌñeñoth

^20-21 Theꞌñapaꞌ ayeꞌchoxhtatpawepaꞌch yenteñ Yompor tharroꞌmar ña awamenkath yepeneꞌ. Ña poꞌwamenkothpaꞌ atethchaꞌ phatonay ya ñeñth allpon yenamoeñ, elloña ñapaꞌ atethchaꞌ pennay elloch metanaꞌtwonay ñeñth allpon yenamoeñ. Ñamha elloña metanaꞌtwennay ñeñth allpon yokthapeꞌchyen. Elloña nanakokmañen eꞌñe kowen es pennay eꞌñe poꞌwamenkoth ña. Yaꞌyeꞌchoxhtatoñepaꞌch Yompor alloweney ñeñthey yameꞌñeñoth xhokma yapxhaꞌyena ñokop. Ayeꞌchoxhtatpawepaꞌch thayotheñ amaꞌt ñamha errponañowen tharroꞌmar ña yapoerreꞌ Poechemer ñeñth Cristo Jesús. Ñeñthpaꞌ atthetepaꞌch Yompore yokop.