Colosenses 4 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

¹ Ñamha sapaꞌ oꞌch notas samha ñeñthes pamoꞌmteꞌ pen ñeñth setarwasaten. Sapaꞌ atethchaꞌ sepeꞌña saꞌtarwasañer ñeñth eꞌñe pokteꞌ entenet ñet. Ñamha sapaꞌ señochepaꞌch sapaꞌxhoꞌña sechenkaꞌyeña Samoꞌmteꞌ ñeñth poeꞌntañoꞌtsen.

² Ñamha theꞌ allowenespaꞌ oꞌch notas samha: Xhokmoepaꞌchña semaꞌyoxhrenaña maꞌyochatsa, amach sekhllañotha semaꞌyocheñoña Yompor. Eꞌñechña separasyosoꞌteñeshaꞌ semaꞌyocheña.

³ Ñamha oꞌch semaꞌyocheña Yompor yokop, oꞌch senamonay atthoch eñalleta allchaꞌ yeserrpareꞌtoñ poꞌñoñ, allchaꞌ eꞌñe yaꞌpotwa ñeñth awathotheñ ñeñth amaꞌt poesheñarrapaꞌ ama eseshayeꞌ eñotenaye ñeñth ateth penaña Cristo. Ñeñthoꞌmarña na theꞌpaꞌ ayottamphsarethen cárcelo.

⁴ Ñamha añchaꞌ senamon Yompor allochña napaꞌ oꞌch eꞌñe neñotaterranet eꞌñe eñotoxhen ñeñth ateth poktetsa nokop oꞌch eꞌñe naꞌpotwer allowen.

⁵ Ñamha añekop ñeñth ama ameꞌñetso sapaꞌ señotepaꞌchña ñeñth kowentetsa ñeñthchaꞌ ateth sephanet. Amaꞌt thaya sapaꞌ arosña attha es poexhatstatsa.

⁶ Eꞌñe semoereñothpaꞌ xhokmoepaꞌchña eꞌñe kowen seꞌñoranaꞌtyenanet, allochña ñetpaꞌ eꞌñech kowen entonaset ñeñth ateth señen. Allochña sapaꞌ señochchaꞌ eñoranaꞌtyesawet atthoch eꞌñe kowen sanapyesanet eꞌñe poesheñaꞌttsokmoet.

Arrpaꞌ all soꞌterranet poꞌcartoth

⁷ Ñamha theꞌpaꞌ oꞌch notas, masheñ Tíquico ñach señotatenayaꞌ allowen ñeñth ateth nepena na arr. Ñapaꞌ atarr yemoerannena, ñapaꞌ xhokma eꞌñe kowen yenpoenen attho yethorrena Yepartsesharekop.

⁸ Ñeñthoꞌmarña napaꞌ ñeñthekopña nemñeñña sesho ñach señotatenayaꞌ ñeñth ateth yepena ya arr. Ñamha ñach sokshatoseꞌ eꞌñe seyoxhrowen.

⁹ Oꞌch nemñe epoet masheñ Onésimo. Ñapaꞌxhoꞌña xhokma atarr kowen yenpoenen, nanak yemoerannena. Ñapaꞌ eꞌñe parroꞌmarneshas. Ñetchaꞌña señotatoseꞌña allowen ñeñth ateth yepena ya arr.

¹⁰ Ñamha masheñ Aristarcopaꞌxhoꞌña moeneñ oꞌch womhchaꞌtas añ necartoth. Ñapaꞌxhoꞌña eꞌñe parrokma ayottamphsarethey. Allothpaꞌ oꞌch womhchaꞌtas ñamha masheñ Marcos ñeñthara añ patherr necartoth. Ñapaꞌ Bernabé poepaꞌñer. Napaꞌ oꞌ notwas atethchaꞌ sepeꞌ masheñ Marcos. Ñerraꞌm esempoch xhap seshopaꞌ eꞌñech kowen sagaph.

¹¹ Ñamha masheñ Jesús ñeñthara sochetsa Justo, ñapaꞌxhoꞌña moeneñ oꞌch womhchaꞌtas añ necartoth. Ñetpaꞌ ñeñthet ñapoeth judioneshet ñeñth ameꞌñetsa, ñetña nethorrapretenet Yomporekop atthoch atarr ayochreshathtena ña. Ñetña atarr nokshateneꞌ.

¹² Ñamha masheñ Epafras ñeñth parroꞌmarneshas, ñapaꞌxhoꞌña moeneñ oꞌch womhchaꞌtas ñamha. Ñapaꞌxhoꞌña nanak thorrena Cristokop. Eꞌñe poemaꞌyocheñoth womenkpaꞌ atarr thorrena sokop. Poemaꞌyocheñothpaꞌ xhokma enamatennas Yomporeshoth atthoch eꞌñe womenk sephaꞌnom seyoxher Yomporekop. Ñamha añ enamoennas atthoch eꞌñech poktakma xhaponasa seyoxhro ora allowen ñeñth ateth moenen Yompor.

¹³ Ñokoppaꞌ oꞌ eꞌñe neñotatwas ñeñth ateth nanak thorrena sokop ñamha añekop ñeñth Laodiceoꞌtsaꞌyen, ñamha ñeñth Hierápolisoꞌtsaꞌyen.

¹⁴ Ñamha masheñ Lucas ñeñth apartañtetsa, nanak yemoerannena, ñapaꞌxhoꞌña moeneñ oꞌch womhchaꞌtas añ necartoth. Masheñ Demaspaꞌxhoꞌña moeneñ oꞌch womhchaꞌtas ñamha.

¹⁵ Theꞌña sapaꞌ oꞌch sewomhchaꞌch samha nokop masheñneshaxhno ñamha noxhaneshaxhno ñeñth Laodiceoꞌtsaꞌyen. Oꞌch sewomhchaꞌch ñamha Ninfas, sewomhchaꞌch ñamha allowen ñeñth xhokma apxhetsa ña paꞌpakllo eꞌñe pameꞌñeñothet Cristo.

¹⁶ Esempoch lleyaꞌwet añ carta sesho allothpaꞌ oꞌch selleyach ñamha laodiceoꞌmarneshaꞌ ñeñth pameꞌñeñothet Cristopaꞌ xhokma apxhenet ñamet. Ñamha poꞌpoñ necarta ñeñth nemñen Laodiceo sapaꞌxhoꞌña selleyeꞌch ñerraꞌm esempoch wapateret Laodiceoth oꞌch xherr sesho.

¹⁷ Ñamha oꞌch soch masheñ Arquipo ñeñth ateth noten na, poꞌñoxhpaꞌ etsotanepaꞌña ñeñth ateth yecheña Yepartseshar ñeñthchaꞌ poꞌtarwas phaꞌ ñokop.

¹⁸ Na ñeñthen Pablon arrpaꞌ nekellkëñoth eꞌñe na notothpaꞌ oꞌch newomhchaꞌtnerres. Theꞌpaꞌ oꞌch seyerpaꞌna napaꞌ ayottamphsarethen. Theꞌpaꞌ ñeñthach notas, Yomporepaꞌchña saꞌnataya. Ñeñthpaꞌ atthetepaꞌch Nompore. Allowa. Pablo