2 Timoteo 4 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Añ pokteꞌ xhokmach yeserrpareꞌtoñ Yompor poꞌñoñ amaꞌt errothenoꞌtsenya

^1-2 Theꞌpaꞌ oꞌch alla noterrperr ñeñthchaꞌ ateth pepha: Xhokmach peserrpareꞌtoñ Yompor poꞌñoñ amaꞌt esempo errothenoꞌtsenpha. Tharroꞌmar Yomporpaꞌ enteney epoet Poechemer Jesucristo, ñeñthara ñeñth Yepartseshar yepen, ñamha ñeñtharach werrtsa amaꞌt esempowañen, ñamha ñeñtharach amhchaꞌtarethetwerrtsa esempowañen, ñeñthchaꞌ akrerreꞌ allowen acheñeneshaꞌ ñeñth eꞌñe kowenareꞌ, ñamha amaꞌt ñeñth ama kowenayaye. Atethchaꞌ phan allowen ñeñth korretsmeñ allempo, ñamha amaꞌt ñeñth oꞌ kollaꞌwena. Ñamha theꞌ phapaꞌ oꞌch peñotatyes acheñeneshaꞌ ñerraꞌm esempo ñetpaꞌ ama pokteyeꞌ es peneto. Phañapaꞌ phach otyesawet amach ateth yephatsto, allothpaꞌ oꞌch phokthapeꞌchatyerranet eꞌñe peñmañeshaꞌ. Ñamha xhokmach peyxhatyesanet ñeñth poktetsa Yomporekop.

³ Tharroꞌmar esempowañenpaꞌ xhapchaꞌ allempo acheñeneshaꞌpaꞌ oꞌwañchaꞌ moenet oꞌch ameꞌñet ñeñth eꞌñe paxharr kothaphñats, ñeñth ateth yexhateney Yompor poꞌñoñ. Allempopaꞌ añach eꞌnyerret erraꞌtsentheꞌ serrpareꞌteneꞌ kothaphñatser ñeñth eꞌñe kowen entenet ñet atthothchaꞌña atonterraña ñeñthchaꞌ yexhaterrawet ñeñth eꞌñe ñet pokthaphñet.

⁴ Allempopaꞌ amach eseshaꞌ moenerraye oꞌch eꞌmhñotet kothaphñats ñeñth eꞌñe poꞌñoxh. Attheñapaꞌ oꞌch aña eꞌñe kothapeꞌcherret ñeñth eꞌñe ñet poeserrparñet.

⁵ Tharraña phapaꞌ añach patherr phokthapeꞌch ñeñth kowentetsa Yomporekop, ñamha xhokmach phaꞌwantaꞌ ñerraꞌm waponapha moeroxhteñets, ñamha añach patherr pemaꞌyoxhra serrpareꞌtatyesets kowen ñoñets alloch yekeshperra. Ñamha xhokmach pethorra ñeñth ateth petarwas apaph Yompor.

Allempo oꞌ moetsamochet Pablo

⁶ Napaꞌ amach erroth nepereꞌthe tharroꞌmar oꞌ xhapmoch allempoch naꞌmtsarethta Yomporekop. Theꞌpaꞌ neñotena napaꞌ oꞌ moetsamochnet.

⁷ Tharraña napaꞌ oꞌ epayeꞌ nethorraꞌnma Yomporekop ateth ñerraꞌmrratheꞌ xho nekhllarena Yomporekop. Ñamha napaꞌ oꞌ netsotwa ora ñeñth ateth oterren Yompor. Ñatoꞌ oꞌch netmaꞌntacha ñeñth ateth nepena: Ñerraꞌm xho erra yesechapaꞌ xhokmach yexhap all yesechena. Ñamha napaꞌ amaꞌt mameshapaꞌ ama nekexhpoeꞌthe attho nameꞌñeña Yompor.

⁸ Theꞌña napaꞌ aña nekwen esempoch nagap ñeñth oꞌpatatenna Yompor ñeñthchaꞌ nanak nokshaterreꞌ, tharroꞌmar napaꞌ añ nephaꞌyeseꞌth ñeñth ateth moeneꞌth Yompor. Ñeñthoꞌmarña theꞌ esempoch werra Yepartseshar Cristopaꞌ allempo napaꞌ apwerrenchaꞌ ñeñth oꞌpatatenna. Tharraña amach naptha apwerrno ñeñth oꞌpatatenya. Añeꞌnachña apwerr ñamha allowen ñeñth xhokma kowameꞌteneꞌ theꞌ Cristo oꞌch werra. Ñeñthara Yepartseshar Cristo ñeñthchaꞌ yeñotaterreꞌ ñeñth poꞌñoxh ateth yephaꞌyena theꞌ.

Arrpaꞌ all otyesan Timoteo ñeñth ateth apharethtena

⁹ Theꞌpaꞌ oꞌch notaph ñamha ñerraꞌm errothenothpaꞌ oꞌtheꞌ phon arr thayekma.

¹⁰ Tharroꞌmar arr masheñ Demaspaꞌ oꞌ aꞌypoꞌñaꞌnerren arr napoeth, ñapaꞌ oꞌ awerr Tesalónico, tharroꞌmar ñapaꞌ aña nanak morrentena ñeñth patsoꞌmarekpa. Añpaꞌxhoꞌña masheñ Crescentepaꞌ oꞌ awoꞌ ñamha Galacio. Ñamha masheñ Titopaꞌ oꞌ awoꞌ anetso Dalmacio.

¹¹ Theꞌ arrpaꞌ aña arroꞌtsen masheñ Lucas. Ñamha oꞌch phaꞌsech masheñ Marcos ñeñthchaꞌ epaph phon arr, tharroꞌmar ñatoꞌ ñapaꞌ oꞌch yenpaꞌn arr.

¹² Masheñ Tíquicopaꞌ oꞌ nemñe aꞌyo anetso Efeso.

¹³ Ñamha oꞌch notaph ñerraꞌm phonchaꞌ arrpaꞌ phanmonchaꞌ necapa ñeñth nenaꞌnom Troaso eꞌñe Carpo paꞌpakllo. Ñamha phanmonchaꞌ allowen nelibroxhno, ñamha nepaphllexhno. Ñeñthara añ nepaphllexhnopaꞌ ñeñth nanak nemnen.

¹⁴ Alejandro ñeñth poꞌtarwas peneꞌ asrexhnopaꞌ ñapaꞌ attha nanak aꞌmethareꞌtamphsen. Tharraña Yomporpaꞌ tsaꞌtaterach ñeñth ateth phaꞌn.

¹⁵ Ñeñthoꞌmar phapaꞌ eꞌñech peñota ñokop, tharroꞌmar ñapaꞌ nanak epatareꞌtenan Yompor poꞌñoñ ñeñth ateth yeserrpareꞌten.

¹⁶ Ñamha oꞌch notaph. Amaꞌt awañmoꞌcha allempo ñanom naꞌpoktat neñoñ amhchaꞌtaretheshopaꞌ amaꞌt poesheñarrapaꞌ ama eseshaꞌ neñosapretaye. Elloña ñeñthapaꞌ xha aꞌypoꞌñaꞌwanet. Tharraña amaꞌt ateth phaꞌnetañpaꞌ napaꞌ ama nemno Yomporpaꞌ oꞌch tsaꞌtaterranet.

¹⁷ Tharraña Yepartseshar Cristopaꞌ ama aꞌypoꞌñaꞌno, elloña nanak awamenkath phaꞌn. Ñeñthoꞌmarña oꞌ alla neserrpareꞌterrerr Yompor poꞌñoñ atthoch eꞌmareꞌch allowen acheñeneshaꞌ amaꞌt ñeñth ama judioneshayaye ñeñth alloch yekeshperra. Attho nekeshperra allempo all atarr amoeroxhtatarethen, napaꞌ ateth nenteñ ñerraꞌmrratheꞌ Yepartsesharpaꞌ oꞌ aꞌkeshphaterren eꞌñe maꞌyarr poenamoth.

¹⁸ Ñeñthoꞌmarña theꞌpaꞌ neñoteñ Yepartsesharpaꞌ xhokmach aꞌkeshphaterren arroth all ama kowenayaye, ñamha napaꞌ neñoteñ xhokmach kowampenen, atthochña xhapaterren all amhchaꞌtarethtena ña poeꞌntaño. Ñeñthoꞌmarña xhokmoepaꞌch yaꞌyeꞌchoxhtatoñ errponowañen. Ñeñthpaꞌ atthetepaꞌch.

Arrpaꞌ all womhchaꞌtyesnerranet poꞌcartoth

¹⁹ Ñamha añ necartothpaꞌ nemneñ oꞌch newomhchaꞌch noxh Prisca epoet poerrollar Aquila, ñamha oꞌch newomhchaꞌch Onesíforo pamoꞌtseshaꞌ.

²⁰ Ñamha masheñ Erastopaꞌ alla aꞌpa anetso Corinto, ñamha masheñ Trófimopaꞌ alla nesaꞌnemh patsnañoth Mileto.

²¹ Ñamha phapaꞌ ñerraꞌm errothenothpaꞌ xhokmatheꞌ pewapa allempo ama wapoenaꞌ. Ñamha añ necartothpaꞌ moeneñ oꞌch womhchaꞌtaph masheñ Eubulo, ñamha Pudente, allothpaꞌ ñamha Lino, ñamha noxh Claudia ñamha allowen masheñneshaxhno ñeñthey ameꞌñetsa arr Romo.

²² Eꞌñe allowanenpaꞌ oꞌch notaph, Yepartseshar Jesucristopaꞌ xhokmoepaꞌchña eꞌñe parroꞌtseneph. Ñamha Yomporepaꞌch saꞌnatenaya allowenes. Ñeñthpaꞌ atthetepaꞌch Nompore. Allowa. Pablo