2 Tesalonicenses 3 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Attho Pablopaꞌ otanet xhokmach maꞌyochampeñet

¹ Masheñneshachaꞌ ñamha noxhaneshachaꞌ, theꞌña eꞌñe allowapaꞌ oꞌch notas: Sapaꞌ xhokmach semaꞌyochampesya yamha. Oꞌch senamoeñ Yompor atthoch epaꞌwerra thekma Yepartseshar poꞌñoñ errapharen, kowenepaꞌch entyeññañet poꞌñoñ eꞌñe ateth atarr kowen señch samha allempo xhap sesho.

² Tharroꞌmar acheñeneshaꞌpaꞌ ama allowenakmayeꞌ ameꞌñeneto, shonteꞌ ñeñth athpareꞌteneꞌ Yompor ñamha shonteꞌ atsrreꞌmñathneshaꞌ ñeñth ama kowenayaye. Ñeñthoꞌmarña sapaꞌ añchaꞌ senamoeñ Yompor amoepaꞌchña xha epatareꞌtatsetyeto.

³ Tharraña Yepartsesharpaꞌ ñachña atarr yeyemtena, ñachña awamenkath sepeneꞌ, ñach sekwampeneꞌ, ñach saꞌnataya, amach moenatano oꞌch xhaponasa ñeñth ama kowenayaye.

⁴ Ñamha yapaꞌ eꞌñe yeyemteñoth Yepartseshar sapaꞌ eꞌñe yeñotenes ñeñth ateth yotenes sañapaꞌ eꞌñech ateth sepena theꞌ amaꞌt ñamha tsapathoneth xhokmachña ateth sepena.

⁵ Yepartsesharepaꞌchña Jesús eꞌñe kowen señotateneꞌña seyoxhro attho Yomporpaꞌ atarr morrentensa, atthochña eꞌñech kowen saꞌwantaꞌwanom allowen topateñets eꞌñe ateth peꞌth Cristo.

Yokoppaꞌ añ poktetsa xhokmach yetarwasen

⁶ Theꞌñapaꞌ, masheñneshachaꞌ, oꞌch notas eꞌñe Yaꞌmhchaꞌtarether Jesucristo paꞌsoꞌchño, sapaꞌ ñatoꞌt seyemteñaꞌña ñeñth atarr kellañets ñeñth amach moeno tarwasaꞌ. Ñeñth ateth petsapaꞌ ama moeno oꞌch ameꞌñanaña ñeñth ateth yeyxhatenes.

⁷ Sapaꞌ eꞌñe señoteñ añ poktetsa sokop oꞌch ateth sepena samha eꞌñe ateth senteney ya. Yapaꞌ allempo alloꞌtseney parro yapaꞌ xhokma yetarwasen.

⁸ Yapaꞌ amaꞌt errothena amaꞌt poesheñarrapaꞌ ama yerraprecheña poerrar eꞌñe attha. Ñamcheꞌña yapaꞌ xhokma yetarwasen yetho eꞌñe tsapomeꞌtets atthoth yentña ya yerrar allempo alloꞌtseney sesho. Yapaꞌ ama xhoyeꞌ yaꞌtsrreꞌmoxhtanaꞌtaso amaꞌt poesheñarrothesa.

⁹ Amaꞌt eꞌñe pokteñ oꞌch serratapyeñ eꞌñe attha, tharraña yapaꞌ ama yemno tharroꞌmar yapaꞌxhoꞌña yemneñ oꞌch yetarwasos yamha allochñapaꞌ atthoch yorrtatonas ñeñth eꞌñe kowentetsa sokop allochñapaꞌ atethchaꞌ sepha samha.

¹⁰ Allempo alloꞌtseney seshopaꞌ ateth yotas, ñerraꞌm eseshaꞌch atarr kelletspaꞌ arepaꞌña rratstats, rranepaꞌ poꞌkhllañ.

¹¹ Yapaꞌ yeꞌmareꞌtenes poesheñaꞌttsos sapaꞌ sekhllañothpaꞌ attha sellapeneꞌth, ama xhoyeꞌ setarwaseno amaꞌt mamesha, añaña eꞌñe sethorraꞌyena sa ñeñth ama es sherbeno.

¹² Allowenes ñeñthes atarr kellañtsarerespaꞌ theꞌpaꞌ oꞌch notas eꞌñe Yaꞌmhchaꞌtarether Jesucristo paꞌsoꞌchño, sapaꞌ xhoñakaꞌyeña setarwasaꞌña eꞌñe kowen señmañeshaꞌ atthothchaꞌ sechen allpon ñeñth sepalltaꞌyena arr patsro.

¹³ Ñamha sa, masheñneshachaꞌ ñamha noxhaneshachaꞌ, sapaꞌ ñatoꞌtña xha semoenmeꞌchenaꞌña orrtatyeseꞌ kowen ñeñth atthekma sephaꞌyena.

¹⁴ Ñerraꞌm eseshaꞌch ama eꞌmhñotaye ateth yotenes añ yecartoth, ñeñthña acheñerpaꞌ oꞌch seꞌñotorrtach ñapaꞌ xhokma ateth pena. Sañapaꞌ ñatoꞌtña seyemteñaꞌña ñeñth ateth petsa, allochñapaꞌ atthothchaꞌ penkërra.

¹⁵ Tharraña amach ateth sentatsche ñerraꞌmrratheꞌ xho seꞌmoñeꞌteñ. Sapaꞌ xhochña eꞌñe kowen sokthapeꞌchater ateth eꞌñe kowen yokthapeꞌchateñ yemoꞌnasheñ.

Arrpaꞌ all soꞌterranet poꞌcartoth

¹⁶ Yepartseshar ñeñth eꞌñe yokshateneꞌ yeyoxhro ñepaꞌchña sokshaterreꞌ sa seyoxhro amaꞌtchaꞌ errothenoꞌtsenes. Yepartsesharpaꞌ eꞌñepaꞌchña parro alloꞌtsenes allowenes.

¹⁷ Na ñeñthen Pablon arrpaꞌ nekellkëñoth eꞌñe na notothpaꞌ oꞌch newomhchaꞌtnerres. Sapaꞌ ñeñthchaꞌña señotateꞌ añmapaꞌ eꞌñe no necarta. Allowen ñeñth eꞌñe no necartapaꞌ atthekma nekellkëñ.

¹⁸ Yepartsesharepaꞌchña Jesucristo saꞌnatenaya eꞌñe allowenes. Ñeñthach notas, ñeñthpaꞌ atthetepaꞌch Nompore. Allowa. Pablo