2 Tesalonicenses 2 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Allempoch orrterra poesheñarr acheñ ñeñth atarr athparñathtetsa

¹ Theꞌpaꞌ oꞌch, masheñneshachaꞌ ñamha noxhaneshachaꞌ, neñotatas poꞌpoñ ñeñthpaꞌ añ allempoch werra Yepartseshar Jesucristo atthoch ñapaꞌ oꞌch apxhatwerrey alloweney eꞌñe ñesho.

² Theꞌpaꞌ ñeñthoꞌmarña notenes: Amaꞌt poesheñarrothesapaꞌ ñatoꞌt xha yoreꞌtensaꞌña poꞌpoñ kothaphñats. Sapaꞌ amach xha seyorenatsto amaꞌtchaꞌ seꞌmareꞌter oꞌ xherr allempoch werra Yepartseshar. Amaꞌtchaꞌ otasetañ ñetpaꞌ eꞌñoꞌ Parets Poekamkëñ eñoratenawet, sañapaꞌ ñatoꞌtña xha seyorenaꞌ. Amaꞌtchaꞌ poeserrparñothet ateth otaset, sañapaꞌ amach seyorenatsto. Amaꞌtchaꞌ ateth otasetañ theꞌpaꞌ oꞌ xhap carta ñeñth moeñen Pablo ñeñthpaꞌ ateth oten carta, theꞌpaꞌ oꞌ xherr allempoch werra Yepartseshar, saña eꞌñe seyorñothpaꞌ ñatoꞌtña ñeñthaña sameꞌñenaꞌ.

³ Amaꞌt poesheñarrothesa sapaꞌ amach seꞌmhñotatstaneto amaꞌt eꞌñe errothenchaꞌ otyesaset, tharroꞌmar ñetpaꞌ atethchaꞌ shekareꞌtasetañ. Ñeñthoꞌmarña napaꞌ oꞌch notas, allempopaꞌ amakaꞌye xherraꞌ ñeñtheñpo ñeñthe yethñatsroch werra Yepartseshar, atoꞌtña atarr atonterraꞌ ñeñthchaꞌ kexhpoerreꞌ Yompor. Ñamha allempopaꞌ orrterrach poesheñarr acheñ ñeñth atarr athparñathtetsa, ñeñthpaꞌ chenkëñtsa oꞌpatenaya. Ñañapaꞌ Yomporach atarr eꞌmoñeꞌterr ñamha allowen acheñeneshaꞌ ñeñth moechatseꞌtyeneꞌ paꞌnamen ñeñth poꞌyomporer phaꞌyenet ñachña eꞌñe tanterrawet.

⁴ Ñamha ñeñthña athparñathpaꞌ eꞌñe pommoꞌcheñothpaꞌ atethchaꞌ oterran acheñeneshaꞌ ñapaꞌ ñoꞌña eꞌñe Yomporetets. Atthochña amaꞌt Parets paꞌpakllopaꞌ oꞌch anorrwerr, oꞌch eꞌñe ateth perra ñerraꞌmrratheꞌ ña poꞌñoxh Yomporetets.

⁵ Sapaꞌ amaꞌt seyerpoenoña allempo alloꞌtsenmeñen sesho na amaꞌt ñeñthpaꞌ eꞌñe notwaseꞌth.

⁶ Sapaꞌ señoteñtheꞌ ñeñth onareꞌtateneꞌña ña atthoth amoꞌ werro tharraña xhokmach orrterra allempoch xherr eꞌñe ateth onañchareth ñokop.

⁷ Amaꞌt eꞌñe thayotheñ attho athpareꞌtenet ñoñets ñeñth ateth anarethpaꞌ ñetña eꞌñe aꞌnawapaꞌ xhokma ateth penet. Tharraña theꞌpaꞌ eñall ñeñth onareꞌtateneꞌ ñeñth acheñer ñeñthchaꞌ atarr athparñathterrtsa, ñeñthñapaꞌ xhokmach ateth pena tharrempowach esempoch aprratamphsarethterra ñeñth onareꞌtateneꞌ theꞌ.

⁸ Oꞌch aprratamphsarethterrapaꞌ ñeñthña acheñer ñeñthchaꞌ athparñathterrtsa allempochña orrtatarethterra. Tharraña allempoch werra Yepartseshar Jesús ñachña eꞌñe poenamoth poꞌrrerrñothpaꞌ ñeñthchaꞌ moetserreꞌña ñeñth atarr athparñathtetsa. Atthoch orrterra Jesús eꞌñe ña poꞌpartsoteñoth ñeñthchaꞌña eꞌñe aꞌmchechaterreꞌña ñeñth athparñathtetsa.

⁹ Ñewa, ñeñth acheñerpaꞌ oneñeth atarr awamenkath peneꞌ atthoch orrterra. Ñeñthoꞌmarña paꞌnamenchaꞌ orrtaterr ñeñth poꞌpartsoña pen ña ñeñth amaꞌt awatha acheñeneshaꞌ arr patsropaꞌ amaꞌt poesheñarrothetapaꞌ ama poentareto. Tharraña ñeñth poꞌpartsoteña pen ñapaꞌ ñeñthpaꞌ ama Yomporeyeꞌ apoenaye, ñeñthpaꞌ oneñetha apoeneꞌ attho shekareꞌtyenan acheñeneshaꞌ.

¹⁰ Atthach eꞌñe paꞌnamenoth atarr shekareꞌtyerran acheñeneshaꞌ ñeñth amaꞌt mameshapaꞌ ama pokteyaye. Añchaꞌ ashkarethterrtsa allowen ñeñth ama ameꞌñetso ñeñth oꞌpatena chenkëñets. Tharroꞌmar ñetpaꞌ awathotheñ ama ameꞌñaꞌpoyeꞌ enteññañetoña Yompor poꞌñoñ ñeñth eꞌñe poꞌñoxh alloch aꞌkeshphatarethterretañ.

¹¹ Ñeñthoꞌmarña Yomporpaꞌ moenaterranetchaꞌ oꞌch atarr ashkarethterret, atthochña ñetpaꞌ eꞌñech aña ameꞌñerret shekëñets ñeñth ama poꞌñoxhayaye amaꞌt mamesha.

¹² Atthochña allowen ñeñth ama ameꞌñaꞌpoyeꞌ entayeꞌthe Yompor poꞌñoñ ñeñth eꞌñe poꞌñoxh keshpeñets, ñetpaꞌ aña kosheteꞌth ñeñth ama pokteyeꞌ enteno Yompor, ñeñthoꞌmarña ñetpaꞌ aꞌkoñchatarethterretchaꞌ allempo.

Yapaꞌ eꞌñe awathotheñ akrerrey Yompor atthoch aꞌkeshphaterrey

¹³ Tharraña saña, masheñnesha ñamha noxhaneshachaꞌ, yapaꞌ xhokma yeparasyosoꞌteñ Yompor sokop ñeñthes atarr moerena Yepartseshar. Tharroꞌmar Yomporpaꞌ awathotheñ akrerres sa atthoch aꞌkeshphaterres eꞌñe kowen. Ñeñthpaꞌ añchaꞌ saꞌkeshphaterreꞌ attho Parets Poekamkëñpaꞌ eꞌñe aꞌkowentatenes ñokop attho sapaꞌ eꞌñe kowen sameꞌñerrñaña poꞌñoñ ñeñth eꞌñe poꞌñoxh alloch yekeshperra.

¹⁴ Sapaꞌ ñeñthekopña xhoreꞌterresña Yompor allempo yeserrpareꞌtataseꞌth kowen ñoñets alloch aꞌkeshphaterrey Yompor. Atthochña sapaꞌxhoꞌña sekowentapreterach Yepartseshar Jesucristo esempowañen.

¹⁵ Ñeñthoꞌmarña oꞌch, masheñneshachaꞌ ñamha noxhaneshachaꞌ, noterrserr: Sapaꞌ eꞌñepaꞌchña womenk sephaꞌnom seyoxher Yomporekop. Ñamha ora allpon ñeñth yeyxhatyesaseꞌth eꞌñe ya yenamoth yeserrpareꞌtataseꞌth amaꞌt ñamha yecartoth ñeñthñapaꞌ eꞌñepaꞌch womenk seyoxhreꞌcha.

^16-17 Theꞌñapaꞌ oꞌch notas: Yepartseshar Jesucristo ñamha Yompor Parets ñetepaꞌchña eꞌñe kowen sokshaterreꞌña sa seyoxhro, ñetepaꞌchña awamenkath sephaꞌyeseꞌ allochñapaꞌ atthochña sapaꞌ xhokmach señosyen ñeñth eꞌñe kowen ñoñets ñamha eꞌñechña kowenareꞌ es sorrtatyen. Tharroꞌmar Yomporpaꞌ ñeñthña atarr yemorrentenaya, ñapaꞌ ña ñeñth xhokma yokshateneꞌ yeyoxhro. Ñeñthña kosheñetspaꞌ amach awañañathterro amaꞌt errponaña. Ña eꞌñe poemoereñothpaꞌ xhokma eñotateney eꞌñe kowen ñeñth atarr yeyemtena.